Bangelo—‘Myuuya Iibeleka Mulimo Wabuleya’

“Sena baangelo boonse tiili myuuya iimubelekela, mbatuma kuya bumubelekela kulibaabo abayoojana kufutuka?”—HEB. 1:14.

1. Ino mmajwi nzi aawumbulizya ngotubala kuli Matayo 18:10 alimwi aku Ba-Hebrayo 1:14?

JESU KRISTO wakacenjezya muntu uuli woonse uukonzya kufwumpuzya basikumutobela kuti: “Amucenjele. Mutasampauli umwi akati kabaniini aba, nkaambo ndamwaambila kuti kujulu baangelo babo baleebela lyoonse busyu bwa-Taata uuli kujulu.” (Mt. 18:10) Kaamba kujatikizya bangelo basyomeka, mwaapostolo Paulo wakalemba kuti: “Sena baangelo boonse tiili myuuya iimubelekela, mbatuma kuya bumubelekela kulibaabo abayoojana kufutuka?” (Heb. 1:14) Majwi aaya ncisyomezyo icuumbulizya calo icitondezya kuti Leza ubelesya zilenge zyamuuya eezyi zyakujulu mukugwasya bantu. Ino Bbaibbele litwaambila nzi kujatikizya bangelo? Ino mbuti mbobatugwasya? Ino ncinzi ncotukonzya kwiiya kulimbabo?

2, 3. Ino mmilimo nzi njobacita bangelo?

² Kuli tuulunzuma tunji twabangelo kujulu. Boonse aaba ‘mbaasintaze basinguzu ibacita nzyaamba’ Leza. (Int. 103:20; amubale Ciyubunuzyo 5:11.) Bana ba Leza bamuuya aaba baliindene-indene muzyintu nzyobayanda alimwi ambobabona zyintu, bajisi bube mbuli mbwajisi Leza alimwi balaangulukide kulisalila zyakucita. Balibikkidwe kabotu-kabotu muzibeela zyaandeene-andene alimwi balijisi zyuuno zyaatala mububambe bwa Leza. Mikayeli (izyina lya Jesu lyakujulu) ngo angelo simutwe. (Dan. 10:13; Jud. 9) Ooyu “mutaanzi kuzyalwa kuzilenge zyoonse” ndi “Jwi,” naa Mwaambilizi wa Leza alimwi wakabelesyegwa a Jehova mukupanga zyintu zyoonse.—Kol. 1:15-17; Joh. 1:1-3.

³ Kuzwa kuli angelo simutwe kuboola baserafimu, ibaambilizya kusalala kwa Jehova akugwasya bantu bakwe kuti kabasalala kumuuya. Alimwi kuli bakerubimu, ibasumpula bulelo bwakwe. (Matl. 3:24; Is. 6:1-3, 6, 7) Bangelo bambi, naa batumwa, bacita milimo yaandeene-andeene mumulimo wa Leza.—Heb. 12:22, 23.

4. Ino bangelo bakacita buti nyika noyakalengwa, alimwi ino kubelesya kabotu lwaanguluko lwakulisalila zyakucita ndobakajisi bantu nokwakabagwasya buti?

⁴ Bangelo boonse bakasekelela ‘inyika noyakalengwa’ alimwi bakakkomana mukucita milimo yabo njobakapegwa ciindi nyika noyakazooba munzi wabantu. (Job. 38:4, 7) Jehova ‘wakamucesya muntu kwiinda bangelo’ pele awalo, wakalengwa “mucinkozya” ca Leza, kutegwa katondezya bube bwa Leza busumpukide. (Heb. 2:7; Matl. 1:26) Ikuti Adamu a Eva nobakabelesya kabotu lwaanguluko ndobakajisi lwakulisalila zyakucita, balo alimwi abana babo nobakazumanana kuba abuumi muparadaiso kabali cibeela camukwasyi wa Jehova wazilenge zyamaanu zyoonse zili kujulu alimwi aanyika.

5, 6. Ino mbuzangi nzi bwakacitika kujulu, alimwi ino Leza wakacita buti?

⁵ Masimpe bangelo ibasyomeka beelede kuti bakagambwa kubona matalikilo aabuzangi mumukwasyi wa Leza wakujulu. Omwe akati kabo tanaakacili kuyanda kutembaula Jehova, pele wakayanda kuti kakombwa nguwe. Wakalipanga kuba Saatani (icaamba “Sikukazya”) kwiinda mukukazya kweelela kwabulelo bwa Jehova alimwi akuyandisya kutalisya bulelo bwakuzangila Leza. Kwiinda mukubabeja, Saatani cabucenjezu wakeena bantu bobile bakusaanguna kuti bamusangane mukuzangila Mulengi wabo siluyando.—Matl. 3:4, 5; Joh. 8:44.

⁶ Cakufwambaana, Jehova wakabeteka Saatani kwiinda mukwaamba businsimi butaanzi bwamu Bbaibbele ibwakuti: “Njoobusya inkondo akati kanduwe amwanakazi, akati kalunyungu lwako alunyungu lwakwe. Walo uyookuuma amutwe, ayebo uyoomuluma kukasinde.” (Matl. 3:15) Inkondo yakali kuyoozumanana akati ka Saatani “amwanakazi” wa Leza. Masimpe, Jehova wakabona mbunga yakujulu yabangelo basyomeka kuba mukaintu wakwe ngwayandisya kapati. Businsimi oobu bwakapa bulangizi nokuba kuti twaambo tunji twakali “makani aasisidwe” alo aakali kuyubununwa bucebuce. Leza wakakanza kuti omwe kuzwa mumbunga yakwe yakujulu uyoonyonyoona bazangi boonse alimwi akuti kwiinda mulinguwe, “zintu zyamujulu niziba zintu zyaansi, [z]ibikwe antoomwe.”—Ef. 1:8-10.

7. Ino ncinzi ncobakacita bangelo bamwi kumazuba aa Nowa, alimwi ino ncinzi cakabacitikila?

⁷ Mumazuba aa Nowa, bangelo bamwi “bakabusia busena bwabo” akulipangila mibili yanyama kutegwa bacite zisusi zyabo anyika. (Jud. 6; Matl. 6:1-4) Jehova wakatandila bazangi aaba kumudima, eelyo bakamusangana Saatani kabali “myuuya yabubi” alimwi basinkondo babyaabi bababelesi ba Leza.—Ef. 6:11-13; 2 Pet. 2:4.

Ino Bangelo Batugwasya Buti?

8, 9. Ino mbuti Jehova mbwabelesya bangelo kugwasya bantu?

⁸ Abrahamu, Jakobo, Musa, Joshua, Isaya, Daniele, Jesu, Petro, Johane, alimwi a Paulo bali akati kabaabo ibakagwasyigwa abangelo. Bangelo baluleme bakazuzikizya lubeta lwa Jehova alimwi bakali kutola milumbe yabusinsimi alimwi amalailile, ikubikkilizya a Mulawo wa Musa. (2 Bam. 19:35; Dan. 10:5, 11, 14; Inc. 7:53; Ciy. 1:1) Akaambo kakuti lino tujisi Jwi lya Leza likkwene, bangelo inga kabataciyandiki kuleta milumbe iizwa kuli Leza. (2 Tim. 3:16, 17) Nokuba boobo, kabali myuuya, bangelo bajisi bubi kucita kuyanda kwa Leza akugwasyilizya babelesi bakwe.

⁹ Ibbaibbele litusyomezya kuti: “Baangelo ba-Jehova balibazyungulukide bamuyoowa, kuti babavune.” (Int. 34:7; 91:11) Akaambo kakuti Saatani wakadooneka kuti bantu balakonzya kuzumanana kusyomeka nokuba kuti basukusyigwa, Jehova ulamuzumizya kutuletela masukusyo aayindene-indene. (Lk. 21:16-19) Nokuba boobo, Leza ulizyi ciindi ncoyeelede kutola sunko kutegwa tutondezye kuti tulasyomeka kulinguwe. (Amubale 1 Ba-Korinto 10:13.) Bangelo balipakamene lyoonse kutegwa batugwasye kweelana amakanze aa Leza. Bakakwabilila Sadrake, Mesaki, Abedinego, Daniele alimwi a Petro, pele kunyina nobakakwabilila Stefano a Jakobo kuti batajaigwi abasinkondonyina. (Dan. 3:17, 18, 28; 6:22; Inc. 7:59, 60; 12:1-3, 7, 11) Bukkale alimwi atwaambo twakajatikizyidwe zyakaliimpene. Mbubwenya buyo, bakwesu bamwi bakajaigwa muzilabba zyaba Nazi, kakuli Jehova wakagwasya bamwi kuti bafwutuke.

10. Kunze lyakugwasyigwa abangelo, ino ndugwasyo luli buti ndotukonzya kutambula?

¹⁰ Magwalo kunyina naayiisya kuti muntu aumwi anyika ulijisi mungelo uumugatela. Notupaila tusyoma kuti “na twakumbila kufumbwa cintu cili buti cili mbuli makanze aakwe, [Leza] ulatumvwa.” (1 Joh. 5:14) Masimpe ngakuti Jehova ulakonzya kutuma mungelo kuti atugwasye, pele lugwasyo lulakonzya kuboola munzila iimbi. Banakristoma balakonzya kukulwaizyigwa kuti batugwasye alimwi akutuumbulizya. Leza inga watupa busongo alimwi anguzu kutegwa tucikonzye kuliyumya “cisongozyo cakuyasa mubili” calo citupenzya mbuli kuti “mutumwa wa-Saatani” ulatudinkaula.—2 Kor. 12:7-10; 1 Tes. 5:14.

Amwiiye Jesu

11. Ino mbuti bangelo mbobakabelesyegwa mukugwasya Jesu, alimwi ino ncinzi ncaakazuzikizya kwiinda mukuzumanana kusyomeka kuli Leza?

¹¹ Amulange Jehova mbwaakabelesya bangelo mukaambo ikajatikizya Jesu. Bakaambilizya kuzyalwa akubusyigwa kwakwe alimwi bakamugwasya ciindi naakali anyika. Bangelo nobakamukwabilila kuti ataangwi akujaigwa. Pele muciindi caboobo, mungelo wakatumwa kuti akamuyumye-yumye. (Mt. 28:5, 6; Lk. 2:8-11; 22:43) Kweelana amakanze aa Jehova, Jesu wakafwa lufwu lwacipaizyo akutondezya kuti muntu uulondokede ulakonzya kuzumanana kusyomeka kuli Leza nokuba kuti wasunkwa kapati. Aboobo Jehova wakamubusya Jesu kubuumi butakonzyi kufwa bwakujulu, wa kamupa “nguzu zyoonse” akumubikka kuba mupati kubangelo. (Mt. 28:18, NW; Inc. 2:32; 1 Pet. 3:22) Mpoonya Jesu wakaba cibeela cakusaanguna “[ca]lunyungu” lwa “mwanakazi” wa Leza.—Matl. 3:15; Gal. 3:16.

12. Ino mbuti mbotukonzya kwiiya cikozyanyo ca Jesu?

¹² Jesu wakalizyi kuti taciluzi kusunka Jehova kwiinda mukulinjizya caali muntenda kumwi kalangila kuti bangelo balamukwabilila. (Amubale Matayo 4:5-7.) Aboobo atwiiye cikozyanyo ca Jesu kwiinda “[mukuk]kala cakulibatamika,” kutegwa tutanikulinjizyi muntenda acaali, nokuba boobo, tweelede kuliyumya calusyomo ciindi notupenzyegwa.—Tit. 2:12.

Ncotukonzya Kwiiya Kuzwa Kubangelo Basyomeka

13. Ino ncinzi ncotwiiya kuzwa kucikozyanyo cabangelo baluleme ibaambwa kuli 2 Petro 2:9-11?

¹³ Naakali kusinsa bantu bamwi ibakali “kusampaula” babelesi ba Jehova ibananike, mwaapostolo Petro wakaamba cikozyanyo cibotu cabangelo baluleme. Nokuba kuti balijisi nguzu zinji, bangelo tababeteki bantu akaambo kakuti balamulemeka Jehova. (Amubale 2 Petro 2:9-11.) Andiswe tutanoobeteki bantu kakunyina kaambo, atubalemeke aabo ibajisi mukuli wabulangizi mumbungano, akusiya twaambo mumaanza aa Jehova, Mubetesi Mupati.—Rom. 12:18, 19; Heb. 13: 17.

14. Ino ncinzi ncotukonzya kwiiya kuzwa kubangelo kujatikizya kulibombya?

¹⁴ Bangelo ba Jehova bapa cikozyanyo cibotu icakulibombya nobacita milimo yabo. Bangelo bamwi bakakaka kwaambila bantu mazyina aabo. (Matl. 32:29; Bab. 13:17, 18) Nokuba kuti kuli tuulunzuma tunji twabangelo kujulu, Bbaibbele lyaamba buyo mazyina aa Mikayeli a Gabriyeli. Eeci cilakonzya kutugwasya kuti tutanoopi bangelo bulemu ibutabeelede. (Lk. 1:26; Ciy. 12:7) Ciindi Johane naakaliwaala ansi kuti akombe mungelo, wakaambilwa kuti: “Pe, utaciti obo, nkaambo ndi muzikenyoko buyo, ndi umwi wabanabakwanu.” (Ciy. 22:8, 9) Tweelede kukomba alimwi akupaila buyo kuli Leza.—Amubale Matayo 4:8-10.

15. Ino mbuti bangelo mbobatupa cikozyanyo cakukkazika moyo?

¹⁵ Alimwi bangelo bapa cikozyanyo cibotu cakukkazika moyo. Nokuba kuti balayandisisya kuzyiba makani aasisidwe aa Leza, taali oonse ngobazyi. Bbaibbele lyaamba kuti: “Aya makani ngengao ngobayandisya abaangelo kwaazibisya.” (1 Pet. 1:12) Aboobo, ino ncinzi ncobacita? Balalindila mane cikasike ciindi ncabikkide Leza cakuti “busongo [bwakwe] bwamisyobo misyobo” ‘buzyibisyigwe kwiinda mumbungano.’—Ef. 3:10, 11.

16. Ino mbuti kulilemeka kwesu mbokukonzya kubajatikizya bangelo?

¹⁶ Banakristo ibapenzyegwa ‘nceebelo kumeso aabangelo.’ (1 Kor. 4:9) Kabakkomene kapati, bangelo balangilila milimo njotucita cakusyomeka alimwi balabotelwa ikuti sizibi weempwa. (Lk. 15:10) Kulilemeka kwabunaleza nkobacita banakazi Banakristo kulabonwa abangelo. Ibbaibbele litondezya kuti “mwanakazi uleelede kuba acitondezyo cakulibombya kumutwe wakwe nkaambo kabaangelo.” (1 Kor. 11:3, 10) Masimpe, bangelo balakkomana kubona banakazi Banakristo alimwi ababelesi boonse ba Leza baanyika kabatobela bubambe bweendelezyegwa a Leza alimwi abubambe bwabusilutwe. Kumvwida kuli boobu nciyeezyo cibotu kubana ba Leza aaba bakujulu.

Bangelo Balaugwasyilizya Mulimo Wakukambauka

17, 18. Ino nkaambo nzi ncotukonzya kwaamba kuti bangelo balatugwasyilizya mumulimo wakukambauka?

¹⁷ Bangelo balatola lubazu muzyintu zimwi iziyandika kapati zyalo izicitwa “kubuzuba bwa-Mwami.” Zyintu eezyi zibikkilizya kuzyalwa kwa Bwami mu 1914 alimwi akutandwa kwa Saatani amadaimona aakwe kuzwa kujulu nkwaakacita “Mikayeli abaangelo bakwe.” (Ciy. 1:10; 11:15; 12:5-9) Mwaapostolo Johane wakabona “angelo . . . uuluka mujulu, wakalijisi Makani Mabotu aateeli aakukambaukila kulibaabo ibakala ansi.” Mungelo wakaambilizya kuti: “Amuyoowe Leza akumupa bulemu, nkaambo casika ciindi calubeteko lwakwe. Amukombe oyo iwakalenga ijulu anyika alwizi atusensa twamaanzi.” (Ciy. 14:6, 7) Aboobo babelesi ba Jehova basyomezyegwa kuti bayoogwasyigwa abangelo ciindi nobakambauka makani mabotu aa Bwami bwalo ibwakatalisyigwa nokuba kuti Saatani ulabakazya kapati.—Ciy. 12:13, 17.

¹⁸ Mazuba aano, bangelo kunyina nobatusolole kubantu babombe myoyo kwiinda mukubandika andiswe mbuli mungelo mbwaakabandika a Filipo akumusololela kumuzibe waku Etiopiya. (Inc. 8:26-29) Nokuba boobo, izyakuluula zyamazuba aano zitondezya kuti, nokuba kuti tatukonzyi kubabona bangelo, balatugwasyilizya mumulimo wesu wakukambauka Bwami alimwi balatusololela kuli “baabo abasalidwe buumi butamani.” * (Inc. 13:48) Elo kaka cilayandika kapati kuti katukambauka lyoonse kutegwa katutola lubazu mumulimo wakujana bantu ibayandisya “[ku]komba Taata mumuuya amubwini!”—Joh. 4:23, 24.

19, 20. Ino mulimo nzi ngobajisi bangelo muzyintu zili mukucitika zyalo izitondezya kuti tuli “kumamanino aaciindi”?

¹⁹ Kujatikizya mazuba ngotupona, Jesu wakaamba kuti “kumamanino aaciindi” bangelo “bazoosala babi kuzwa kubaluleme.” (Mt. 13:37-43, 49) Bangelo balatola lubazu mukubunganya alimwi akugwala bananike. (Amubale Matayo 24:31; Ciy. 7:1-3) Kunze lyaboobo, Jesu ulaantoomwe abangelo ciindi “[n]aandaanya imbelele ampongo.”—Mt. 25:31-33, 46.

²⁰ “Kuciindi cakuyubunuka kwa-Mwami Jesu kuzwa kujulu . . . antoomwe abaangelo bakwe basinguzu,” boonse “batamuzi Leza akutaswiilila Makani Mabotu aa-Mwami wesu Jesu” bayoonyonyoonwa. (2 Tes. 1:6-10) Ciindi Johane naakacibona eeci kacicitika mucilengaano, wakapandulula kuti Jesu amakamu aabangelo bakatantide mbizi zituba kutegwa bakalwane inkondo iiluleme.—Ciy. 19:11-14.

21. Ino mungelo ‘uujisi cijuzyo camulindi uutagoli mujanza lyakwe anketani impati’ uyoomucita buti Saatani amadaimona aakwe?

²¹ Alimwi Johane “[w]akabona angelo uuza buseluka kujulu, ulijisi cijuzyo camulindi uutagoli. Mujanza lyakwe mwakali inketani impati.” Cakutadooneka, mungelo ooyu ngu angelo simutwe Mikayeli, walo uuyooanga Diabolosi amadaimona aakwe akubasowela mumulindi uutagoli. Bayooangununwa kwaciindi cisyoonto buyo kumamanino aa Bulelo bwa Myaka iili Cuulu ya Kristo ciindi bantu balondokede nobayoosunkwa kwamamanino. Mpoonya, Saatani abazangi bambi boonse bayoonyonyoonwa. (Ciy. 20:1-3, 7-10; 1 Joh. 3:8) Boonse ibamuzangila Leza bayoogwisyigwa.

22. Ino mbuti bangelo mbobajatikizyigwa muzyintu iziyoocitika lino-lino, alimwi ino mbuti mbotweelede kulimvwa kujatikizya mulimo wabo?

²² Lufwutuko kuzwa kubweende bwazyintu bubyaabi oobu bwa Saatani luli afwaafwi. Bangelo bayooba amulimo uuyandika kapati ciindi zyintu eezyi noziyoocitika zyalo iziyoosinizya bweendelezi bwa Jehova alimwi akuzuzikizya makanze aakwe oonse kujatikizya nyika abantu. Masimpe, bangelo baluleme ‘mmyuuya iibeleka mulimo wabuleya, ibatumwa kuya bubeleka kulibaabo ibayoofwutuka.’ Aboobo, atumulumbe Jehova Leza akaambo kanzila njabelesya bangelo mukutugwasya kucita kuyanda kwakwe kutegwa tukabe abuumi butamani.

Bupanduluzi buyungizidwe

Ino Inga Mwaingula Buti?

• Ino bangelo bali muzibeela-beela zili buti?

• Ino bangelo bamwi bakacita nzi kumazuba aa Nowa?

• Ino mbuti Leza mbwaabelesya bangelo ikutugwasya?

• Ino bangelo babeleka mulimo nzi mazuba aano?

[Mibuzyo yaciiyo]

[Cifwanikiso icili apeeji 21]

Angels rejoice in carrying out God’s will

Bangelo balakkomana kubelekela Leza

 [Cifwanikiso icili apeeji 23]

Mbubwenya mbuli mbocakabede kuli Daniele, bangelo balipakamene lyoonse kutegwa batugwasye kweelana amakanze aa Leza

 [Zifwanikiso izili apeeji 24]

Amube basicamba, nkaambo bangelo balaugwasyilizya mulimo wakukambauka Bwami

[Kulumba]

Nyika: cifwoto caba NASA