Mibuzyo Yabasikubala

Jesu wakakambauka munyika yoonse ya Israyeli. Aboobo ciindi ba Juda alimwi abeendelezi nobakaamba kuti Jesu ajaigwe, ino nkaambo nzi mwaapostolo Petro ncaakaambila kuti “[b]akacita obo mukutaziba”?—Inc. 3:17.

Naakali kwaambila kakamu kaba Juda kujatikizya lubazu ndobakajisi mukujaya Mesiya, mwaapostolo Petro wakaamba kuti: “Ndilizi kuti mwakacita obo mukutaziba, abalo bami banu mbubonya.” (Inc. 3:14-17) Ba Juda bamwi beelede kuti tiibakazyiba kuti Jesu wakali Mesiya. Kujatikizya bamwi, icakapa kuti batamuzyibi Mesiya cibikkilizya kutayanda kukkomanisya Leza, kusulaika, munyono alimwi alunya.

Amubone kutayanda kumukkomanisya Jehova mbokwakapa kuti bantu banji batazibikkili maano zyintu nzyaakali kuyiisya Jesu. Kanji-kanji Jesu naakali kuyiisya, wakali kubelesya zikozyanyo zyalo nzyaakapandulula kuli boonse ibakali kuyanda kwiiya. Pele bamwi, bakali kuzwa, kabatayandi kumvwisya caambwa. Aciindi cimwi, nobaba basikwiiya bamwi bakatyompwa akaambo kacikozyanyo cimwi ncaakaamba Jesu. (Joh. 6:52-66) Bantu ibali boobu bakakakilwa kuzyiba kuti zikozyanyo nzyaakali kubelesya Jesu zyakali kusunka mbobakalibambilide kucinca kuyeeya alimwi amicito yabo. (Is. 6:9, 10; 44:18; Mt. 13:10-15) Alimwi tiibakabikkila maano kubusinsimi ibwaamba kujatikizya Mesiya mbwaakali kuyoobelesya zikozyanyo mukuyiisya kwakwe.—Int. 78:2.

Akaambo kakusulaika bantu, bamwi bakazikaka njiisyo zya Jesu. Naakali kuyiisya mucikombelo cili mumunzi wakwabo iwa Nazareta, bantu “bakagamba.” Muciindi cakumuzumina Jesu kuti ngu Mesiya, bakatalika kubuzya mibuzyo kujatikizya mukwasyi wakwe kabati: “Ino oyu muntu wakajana kuli zintu ezi? . . . Sa oyu engwe mubezi, mwana wa-Mariya, amwanaakwabo Jakobo a-Jose a-Juda a-Simoni? Abalo bacizi bakwe sa tabako okuno akati kesu?” (Mk. 6:1-3) Akaambo kakuti Jesu wakakomenena mumukwasyi wakanyina mpuwo, bantu baku Nazareta tiibakabikkila maano kumakani ngaakali kuyiisya.

Ino mbuti kujatikizya basololi bacikombelo? Ibanji tiibakamubikkila maano kapati Jesu akaambo katwaambo ntomunya ootu. (Joh. 7:47-52) Alimwi bakakaka njiisyo zyakwe akaambo kamunyono, nkaambo Jesu wakali kuyandwa abantu banji. (Mk. 15:10) Bantu banji ibakajisi mpuwo bakanyema kapati naakabasinsa akaambo kakuupaupa ameso kwabo alimwi alweeno. (Mt. 23:13-36) Cakweelela Jesu wakabasinganya akaambo kakutayanda acaali kuzyiba kasimpe naakati: “Maawe kulindinywe, nobasimilao, nkaambo mwacitola cijuzyo caluzibo, tamukwe nomwanjila [mu Bwami] nobeni, abalo abali kunjila mwabakasya.”—Lk. 11:37-52.

Kwamyaka yotatwe acisela, Jesu wakakambauka makani mabotu munyika. Alimwi wakayiisya bantu banji kubeleka mulimo ooyu. (Lk. 9:1, 2; 10:1, 16, 17) Jesu abasikwiiya bakwe bakalicibwene kapati kuyiisya cakuti ba Falisi bakatongooka kuti: “Kamulanga, ede inyika yoonse yamucilila.” (Joh. 12:19) Aboobo, taali masimpe kuti ba Juda kunyina ncobakazyi cilicoonse. Pele, ‘ncobatakazyi’ ncakuti Jesu wakali Mesiya. Bakeelede kuba aluzyibo lunji alimwi aluyando kujatikizya Mesiya, pele tiibakacita boobo. Bamwi bakatola lubazu mulufwu lwa Jesu. Aboobo, mwaapostolo Petro wakabakulwaizya kuti: “Amweempe, musanduke, kuti zibi zyanu zijatilwe, kusike ziindi zyakulyookezya izizwa kubusyu bwa-Jehova, atume Kristo ngomwakaimikizizigwa, nguwe Jesu.” (Inc. 3:19, 20) Cilakkomanisya kuzyiba kuti ba Juda banji bakakazumina kasimpe kubikkilizya “abapaizi banjibanji.” Tiibakazumanana kucita zyintu cakutazyiba. Muciindi caboobo, bakeempwa alimwi bakamukkomanisya Jehova.—Inc. 2:41; 4:4; 5:14; 6:7.