Amwiiye Jesu Kwiinda Mukukambauka Cabusicamba
Amwiiye Jesu Kwiinda Mukukambauka Cabusicamba
“Twakaba akaanzambwene . . . kumwaambila Makani Mabotu.”—1 TES. 2:2.
1. Ino nkaambo nzi makani mabotu aa Bwami ncaakkomanisya?
ELO kaka cilakkomanisya kumvwa makani mabotu! Alimwi makani mabotu kwiinda oonse, makani aa Bwami bwa Leza. Makani mabotu aaya atusyomezya kuti kupenga, kuciswa, buumba, alimwi alufwu ziyakumana. Apa bulangizi bwabuumi ibutamani, ayubununa makanze aa Leza alimwi atondezya mbotukonzya kuba acilongwe anguwe. Mulakonzya kuyeeya kuti boonse bayookkomana kumvwa mulumbe ooyu Jesu ngwaakaambila bantu. Pele tacili boobu pe.
2. Amupandulule majwi aa Jesu aakuti: “Nd[akaboola] kukazyanisya.”
2 Jesu wakaambila basikwiiya bakwe kuti: “Mutayeeyi kuti ndeza kuleta luumuno ansi, nsizide kuleta luumuno pe, ndaleta iceba. Nkaambo ndeza kukazyanisya mwana awisi, alakwe mwana musimbi abanyina, alakwe mukamwana abanyinazyala. Nkabela basiŋanda bamuntu mwini mbibazooba basinkondonyina.” (Mt. 10:34-36) Muciindi cakuti baatambule makani mabotu, bantu banji balaakaka. Bamwi baba basinkondonyina abaabo ibaakambauka, nobaba banamukwasyi.
3. Kutegwa tuucite kabotu mulimo wesu wakukambauka, ino tuyandika nzi?
3 Tulakambauka kasimpe nkoona nkaakali kukambauka Jesu, alimwi bantu bakamvwa bacita mbuli mbobakacita mumazuba aakwe. Eeci, tulacilangila. Jesu wakaambila basikwiiya bakwe kuti: “Muzike tali mupati kwiinda simalelaakwe. Kuti bakandipenzya mebo, bayoomupenzya anywebo.” (Joh. 15:20) Mumasi manji, tatupenzyegwi caantangalala, pele tujana bantu ibatatuyandi alimwi ibataabikkili maano makani mabotu. Aboobo tweelede kuba alusyomo alimwi abusicamba kutegwa tukakatile mumulimo wesu wakukambauka makani mabotu.—Amubale. 2 Petro. 1:5-8.
4. Ino nkaambo nzi Paulo ncaakali kuyandika kuba sicamba kutegwa akambauke?
4 Ambweni mulakatazyigwa kutola lubazu mumulimo wakukambauka, naa kuli cibeela cimwi camulimo wakukambauka cimukatazya. Ikuti kacili boobo, mweelede kuzyiba kuti tamuli nolikke nomulimvwa boobu. Mwaapostolo Paulo wakali mukambausi sicamba alimwi uutayoowi, walo iwakakazyi kabotu kasimpe, nokuba boobo awalo wakali kukatazyigwa kukambauka zimwi ziindi. Paulo wakalembela Banakristo baku Tesalonika kuti: “Nokuba kuti twakapenzegwa kale akucitilwa bubi ku-Filipi, mbomuziba, twakaba akaanzambwene muli-Leza wesu kumwaambila Makani Mabotu aa-Leza akati kankondo zinjizinji.” (1 Tes. 2:2) Beendelezi baku Filipi bakamuuma acimboko Paulo amweenzinyina Sila akubabikka muntolongo. (Inc. 16:16-24) Nokuba boobo, Paulo a Sila “[ba]kaba akaanzambwene” naa busicamba akuzumanana kukambauka. Ino mbuti mbotukonzya kucita boobu andiswe? Kutegwa twiingule mubuzyo ooyu, atulange-lange icakapa babelesi ba Leza ibakali kupona kaindi kuti babe basicamba ciindi nobakali kukambauka makani mabotu aa Jehova, alimwi atubone mbotukonzya kwiiya cikozyanyo cabo.
Bakali Kuyandika Busicamba Nobakali Kukazigwa
5. Ino nkaambo nzi aabo ibayanda kusyomeka kuli Jehova ncobayandika kuba basicamba?
5 Jesu Kristo wakali cikozyanyo cibotu cabusicamba. Nokuba boobo, kuzwa bantu nobakalengwa, busicamba bwali kuyandika kuli baabo boonse ibasyomeka kuli Jehova. Ino nkaambo nzi? Kuzwa ciindi nibakazanga mu Edeni, Jehova wakasinsima kuti kwakali kuya kuba nkondo akati kabantu ba Leza aba Saatani. (Matl. 3:15) Eeyi nkondo yakafwambaana kulibonya ciindi muntu uululeme Abelo naakajaigwa amunyina. Nokwakainda ciindi, nkondo eeyi yakaya kumuntu uumbi uusyomeka Enoki, iwakali kupona kalitanasika zambangulwe. Wakasinsima kuti Leza uyakuboola ankamu yakwe yabangelo kuzoobeteka bantu ibatamukombi. (Jud. 14, 15) Bantu banji tiibakali kuuyanda mulumbe ooyu. Bantu tiibakali kumuyanda Enoki alimwi nobakamujaya ikuti Jehova naatakamutola. Eelyo kaka Enoki wakali sicamba!—Matl. 5:21-24.
6. Ino nkaambo nzi Musa ncaakali kuyandika kuba sicamba ciindi naakali kwaambaula a Farao?
6 Alimwi amuyeeye buyo mbwaakali sicamba Musa naakali kwaambaula a Farao, muleli iwatakali kwiiminina buyo baleza, pele iwakali kubonwa kuti nguleza, imwana waleza wazuba Ra. Kuboneka kuti wakali kukomba cinkozya cakwe mbubonya bwakali kucita bama Farao bambi. Farao kufwumbwa ncaamba ngowakali kuba mulawo. Akaambo kakuti Farao ngowakali kweendelezya, wakali kulisumpula alimwi wakalaankazi, aboobo tanaakali kuyanda kwaambilwa cakucita abantu bambi. Ngonguwe muntu ooyu Musa imweembezi buyo nkwaakali kuunka cakwiinduluka-induluka nokuba kuti tanaakali kutambulwa kabotu. Ino ncinzi Musa ncaakaamba kuti ciyakucitikila bana Egepita? Wakaamba kuti baya kusikilwa zipenzyo. Alimwi ino ncinzi ncaakaambila Farao kuti acite? Wakamwaambila kuti azumizye bazike bakwe boonse kuti bazwe mucisi ca Egepita. Sena Musa wakali kuyandika kuba sicamba? Inzya.—My. 12:3; Heb. 11:27.
7, 8. (a) Ino masunko aali buti aakabacitikila babelesi ba Leza basyomeka bakaindi? (b) Ino ncinzi cakabagwasya bantu ibakali kupona kuciindi Bunakristo kabutanatalika kuti babe basicamba mukusumpula bukombi bwakasimpe?
7 Mumyaanda yamyaka yakatobela, basinsimi alimwi ababelesi ba Leza ibasyomeka bakazumanana kuba basicamba kutegwa basumpule bukombi busalala. Bantu ba Saatani tiibakali kubayanda. Paulo wakati: “Bakali kufuswa mabwe, bakali kukosolwa akati, bakali kusunkwa, bakali kujazigwa mapanga. Bakali kuya butuntulika akudabila masalu aambelele ampongo, bakali kweenda kaumbaumba akufwabizigwa akugutaikwa.” (Heb. 11:37) Ino ncinzi cakabagwasya babelesi ba Leza aaba ibasyomeka kuti bazumanane? Mukapango 13, mwaapostolo wakaamba icakapa kuti Abelo, Abrahamu, Sara, alimwi abambi baliyumye. Wakaamba kuti: “Tabakalina kutambula zeezyo izyakasyomezegwa, nekubaboobo [akaambo kalusyomo] bakalizibwene kule, bakali kuzitangalila.” (Heb. 11:13) Cakutadooneka, basinsimi ibali mbuli Eliya, Jeremiya, alimwi abantu bambi ibasyomeka ibakali kupona kuciindi Bunakristo kabutanatalika, ibakasumpula bukombi bwakasimpe cabusicamba, abalo bakaliyumya akaambo kakusyoma kuti zyoonse nzyaakasyomezya Jehova ziyoozuzikizigwa.—Tit. 1:2.
8 Bantu aaba ibasyomeka bakali kupona kuciindi Bunakristo kabutanatalika bakajisi bulangizi bubotu kumbele. Baakubusyigwa, baya kuba bantu balondokede ‘akulubulwa kubuzike bwabubozi’ kwiinda mumilimo yabupaizi ya Kristo Jesu antoomwe abapaizi bakwe ibali 144,000. (Rom. 8:21) Kunze lyaboobo, Jeremiya ababelesi bambi ba Leza bakaindi bakaba basicamba akaambo kacisyomezyo ca Jehova ncaakasyomezya Jeremiya cakuti: “Bayookulwisya, pele tabakooyookuzunda pe, nkaambo ndi ayebo, nzookuvuna, mbwaamba Jehova.” (Jer. 1:19) Andiswe mazuba aano tulayumizyigwa notuzinzibala kuyeeya zisyomezyo zya Leza, kuti ulatukwabilila kumuuya akuti kumbele uyootupa buumi butamani.—Tus. 2:7; amubale 2 Ba-Korinto 4:17, 18.
Luyando Lwakapa Kuti Jesu Akambauke Cabusicamba
9, 10. Ino muunzila nzi Jesu mwaakatondezya busicamba (a) kubasololi babukombi, (b) kuli basikalumamba, (c) kumupaizi mupati, (d) kuli Pilato?
9 Jesu, uuli ncikozyanyo ncotutobela, wakatondezya busicamba munzila zili mbozibede. Mucikozyanyo, nokuba kuti beendelezi abantu bakajisi mpuwo tiibakali kumuyanda Jesu, kunyina naakaubya-ubya mulumbe Leza ngwaakali kuyanda kuti bantu bamvwe. Cabusicamba, wakayubununa micito yabasololi babukombi yakulibona kululama alimwi anjiisyo zyabo zyakubeja. Jesu wakabasinsa baalumi aaba cakutainda mumbali. Aciindi cimwi wakaamba kuti: “Maawe inywe nubalembi aba-Farisi nubasikuupaupa ameso, nkaambo mulikozyene atubanda tulambidwe amulambo uutuba, ntubotu atala anukuti mukati tulizwide zifuwa zyabafu azisofweede zyoonse. Mbubonya obo anywebo mbumubonekela bantu mbuli balulami, nekubaboobo mukati mulizwide buupeupe ameso abubi.”—Mt. 23:27, 28.
10 Inkamu yabasikalumamba noyakamujana mumuunda wa Getesemane, cabusicamba Jesu wakabaambila kuti ndime uno. (Joh. 18:3-8) Mpoonya, wakatolwa ku Nkuta Mpati kwalo nkwaakabetekwa amupaizi mupati. Nokuba kuti wakalizyi kuti mupaizi mupati wakali kuyandaula kaambo kakumubejekezya kutegwa ajaigwe, Jesu cakutayoowa wakaamba kuti wakali Kristo alimwi a Mwana wa Leza. Wakayungizya akwaamba kuti bakali kuyoomubona “[kak]kede kululyo lwasinguzu akuboola amakumbi aakujulu.” (Mk. 14:53, 57-65) Nokwakainda kaindi kasyoonto kuzwa waawo, Jesu wakatolwa kuli Pilato iwakajisi nguzu zyakumwaangulula. Pele Jesu wakaumuna buyo ciindi bantu nobakali kumutamikizya twaambo. (Mk. 15:1-5) Zyoonse eezyi wakazicita cabusicamba.
11. Ino busicamba aluyando ziswaangene buti?
11 Kuli Pilato Jesu wakaamba kuti: “Ncendakazyalilwa, ncendakasikila ansi ano, kuti nkalungulule bwini.” (Joh. 18:37) Jehova wakatuma Jesu kuti akambauke makani mabotu, eelyo Jesu wakakkomana kucita oobo nkaambo wakali kubayanda Bausyi bakujulu. (Lk. 4:18, 19) Jesu alimwi wakali kubayanda bantu. Wakalizyi kuti bakalipengede. Andiswe tulakambauka cabusicamba alimwi cakutayoowa akaambo kakuti tulamuyanda Leza abantu.—Mt. 22:36-40.
Muuya Uusalala Utupa Kuti Tukambauke Cabusicamba
12. Ino ncinzi cakapa kuti basikwiiya ba Jesu bakkomane?
12 Nsondo zyakatobela kuzwa ciindi Jesu naakafwa, basikwiiya bakwe bakakkomana kubona kuti Jehova wakali kuleta basikwiiya bapya kuti babasangane. Mubuzuba bomwe buyo, bama Juda abaabo ibakasandulwa buya kuba ba Juda, ibatandila ku 3,000 ibakaboolede ku Jerusalemu kuzwa kumasi aaindene-indene kuzoosekelela Pentekoste bakabbapatizyigwa! Eelyo kaka cilibonya kuti bantu boonse mu Jerusalemu bakali kwaamba buyo cintu icakali kucitika ooku! Bbaibbele lyaamba kuti: “Bantu boonse bakasikilwa kuyoowa. Malele azitondezyo zinjizinji zyakacitwa baapostolo.”—Inc. 2:41, 43.
13. Ino nkaambo nzi bakwesu ncobakapailila kuti babe basicamba, alimwi ino ncinzi cakacitika?
13 Kabanyemede, basololi babukombi bakajata Petro a Johane, bakababikka muntolongo masiku woonse akubalailila kuti bataambi alimwi kujatikizya Jesu. Nobakaangululwa, baapostolo bobilo aaba bakaambila bakwesu zyintu zyakacitika, mpoonya boonse bakapaila kujatikizya kukazyigwa ooku, kabalomba kuti: “Jehova, . . . ugwasye bazike bako, baambe makani aako akaanzambwene kanji.” Ino ncinzi cakacitika? “Boonse bakazuzigwa Muuya Uusalala, nkabela bakatalika kwaamba makani aa-Leza akaanzambwene.”—Inc. 4:24-31.
14. Ino mbuti muuya uusalala mboutugwasya mumulimo wesu wakukambauka?
14 Amubone kuti wakali muuya uusalala wa Jehova iwakagwasya basikwiiya kuti baambe Ijwi lya Leza cabusicamba. Kwaambila bantu kasimpe cabusicamba, nokuba kuli baabo ibakazya mulumbe ngotujisi, takuyeeme aali ndiswe tobeni pe, pele kuyeeme anguzu zizwa kuli Jehova. Jehova ulakonzya alimwi ulapa muuya wakwe uusalala ikuti twamulomba kuti atupe. Kwiinda mukugwasyigwa a Jehova, andiswe tulakonzya kuba basicamba kutegwa tuliyumye ciindi notuli mukukazyigwa.—Amubale Intembauzyo 138:3.
Banakristo Bamazuba Aano Balakambauka Cabusicamba
15. Ino mbuti kasimpe mbokaandaanya bantu mazuba aano?
15 Mazuba aano, mbubwenya mbocakabede kaindi, kasimpe kazumanana kwaandaanya bantu. Bamwi balaswiilila, kakuli bamwi tabamvwisyi naa tababulemeki bukombi bwesu. Mbubwenya mbwaakaamba Jesu, bamwi balatukazya, balatusampaula nokuba kutusula buya. (Mt. 10:22) Zimwi ziindi, balasoleka kutusampaula kwiinda mukumwaya twaambo twakubeja muli sikapepele. (Int. 109:1-3) Nokuba boobo, bantu ba Leza munyika yoonse cabusicamba balakambauka makani mabotu.
16. Ino ncakuluula cili buti icitondezya kuti busicamba bulakonzya kucinca kuyeeya kwabantu mbotukambaukila?
16 Busicamba bwesu bulakonzya kupa bantu kucinca mbobayeeya kujatikizya mulumbe wa Bwami. Mucizyi umwi kucisi ca Kyrgyzstan waamba kuti: “Nondakali kukambauka, mukamwiniŋanda umwi wakandaambila kuti: ‘Mebo ndisyoma muli Leza pele kutali Leza wa Bunakristo. Ikuti alimwi ukaboole kuŋanda yangu, ndiyookulumya mubwa!’ Mulubuwa kwakali mubwa mupati iwakaangidwe. Pele notwakali kumwaya tupepa twa Makani aa Bwami Na. 37, itwakuti ‘Mamanino Aabukombi Bwakubeja Ali Afwaafwi!,’ ndakayeeya kwiinda kuŋanda njoonya eeyi kuti ambweni ndilajana muntu uumbi wamumukwasyi ooyu. Pele, mwaalumi ngoonya ulya nguwakajalula mulyango. Ndakapaila kuli Jehova, mpoonya ndakaamba kuti: ‘Ndilauyeeya mubandi wesu ngotwakajisi mazuba otatwe aainda, alimwi ndilamuyeeya mubwa wanu. Ndayeeya kuti ndimuletele katulakiti aaka nkaambo andime ndilasyoma muli Leza mwini-mwini uuli alikke, mbubwenya mbuli ndinywe. Ino-ino Leza uyoobunyonyoona bukombi boonse butamulemeki. Mulakonzya kuzyiba zinji kwiinda mukubala kapepa aaka.’ Ndakagambwa kapati kuti wakakatambula kapepa ka Makani aa Bwami. Mpoonya ndakaunka kuŋanda itobela. Nokwakainda kaindi kasyoonto, mwaalumi ooyu wakabalika kuboola nkondakabede kajisi kapepa ka Makani aa Bwami mujanza. Mpoonya wakaamba kuti: ‘Ndakabala, ino ncinzi ncondeelede kucita kutegwa nditakanyonyoonwi?’” Ciiyo ca Bbaibbele cakatalisyigwa amwaalumi ooyu, alimwi wakatalika kujanika kumiswaangano ya Bunakristo.
17. Ino mbuti busicamba mbwaakatondezya mucizyi mbobwakayumya sikwiiya Bbaibbele iwakali muyoofwu?
17 Alimwi busicamba bwesu bulakonzya kukulwaizya bantu bambi kuba basicamba abalo. Kucisi ca Russia, mucizyi umwi wakali kuyanda kupa magazini kumukaintu umwi ngubakali limwi mubbaasi. Mpoonya mwaalumi umwi wakanyamuka, wamunyanga mucizyi magazini eeyi, wiivwunga-vwunga, akwiisowela ansi. Katukila ajwi lyaatala, mwaalumi ooyu wakabuzya nkwaakali kukkala mucizyi akumwaambila kuti acileke kukambauka mumunzi ooyu. Mucizyi wakapaila kuli Jehova kuti amugwasye alimwi wakayeeya majwi aa Jesu aakuti: “Mutabayoowi bajaya mubili.” (Mt. 10:28) Cakukkazyika moyo, wakanyamuka akwaambila mwaalumi ooyu kuti: “Tandikookwaambila nkondikkala alimwi ndilazumanana kukambauka mumunzi ooyu.” Mpoonya mucizyi wakasika nkwaakali kuya akuseluka. Mucizyi ooyu taakwe naakazyi kuti mukaintu umwi ngwaakali kuyiisya Bbaibbele awalo wakalimo mubbaasi eeli. Mukaintu ooyu wakali kuyoowa kuunka kumiswaangano ya Bunakristo akaambo kakuyoowa muntu. Pele naakabona busicamba mbwaakatondezya mucizyi, sikwiiya Bbaibbele ooyu wakayeeya kuti atalike kuunka kumiswaangano.
18. Ino ncinzi cikonzya kumugwasya kuti mukambauke cabusicamba mbuli mbwaakacita Jesu?
18 Munyika eeyi iizandukide kuli Leza, kuyandika busicamba kuti tukambauke mbuli mbwaakacita Jesu. Ino ncinzi cikonzya kumugwasya kucita boobo? Kamulangila zyakumbele. Amuyumye luyando ndomujisi kuli Leza akubantu. Kamupaila kuli Jehova kulomba busicamba. Lyoonse kamuyeeya kuti tamuli nolikke, nkaambo Jesu ulaandinywe. (Mt. 28:20) Muuya uusalala ulamuyumya. Mpoonya Jehova ulamulongezya akumugwasya. Aboobo, atube basicamba akwaamba kuti: “Jehova ngomuvuni wangu, takukwe encenjoowa. Nobaba bantu ino bandicite buti?”—Heb. 13:6.
Ino Inga Mwaingula Buti?
• Ino nkaambo nzi busicamba ncobuyandika kubabelesi ba Leza?
• Kujatikizya busicamba, ino ncinzi ncotwiiya kuzwa . . .
kubabelesi ba Leza basyomeka ibakapona Kristo katanaboola?
kuli Jesu Kristo?
ku Banakristo bakusaanguna?
ku Banakristoma bamazuba aano?
[Mibuzyo yaciiyo]
[Cifwanikiso icili apeeji 21]
Cakutayoowa Jesu wakayubununa basololi babukombi bwakubeja
[Cifwanikiso icili apeeji 23]
Jehova ulatupa busicamba kuti tukambauke