Kubelekela Antoomwe Mumukwasyi Kulakonzya Kumugwasya Kucita Kabotu Kumuuya

IKUBELEKELA antoomwe kulayandika kuli baabo boonse bayanda kuti mukwasyi wabo kaubikkila maano zyintu zyakumuuya. Naakalenga banabukwetene bakusaanguna, Jehova wakaamba mbokuyandika kubelekela antoomwe. Eva wakeelede kubeleka a Adamu kali “sikumugwasya uumweelede.” (Matl. 2:18) Banabukwetene beelede kuti kabagwasyanya. (Muk. 4:9-12) Ikutegwa bazyali alimwi abana baizuzikizye kabotu mikuli njobajisi mumukwasyi, beelede kubelekela antoomwe.

Kukombela Antoomwe Mumukwasyi

Ba Barry aba Heidi bajisi bana bosanwe. Bajana kuti kubelekela antoomwe kutegwa babe aciiyo ca Bbaibbele kwabagwasya kucita kabotu kumuuya. Ba Barry baamba kuti: “Ciindi aciindi bana ndilabapa zyakucita kutegwa balibambile nzyotuya kubandika muciiyo camukwasyi. Mucikozyanyo, zimwi ziindi ndilabaambila kuti baambe ncibajana mumamagazini aa Sinsimuka! Alimwi tulibambilila limwi zyakwaamba mumuunda kutegwa bana boonse kabalibambide notuunka mukukambauka.” Ba Heidi abalo baamba kuti: “Aumwi mumukwasyi ulijisi mulongo wambaakani nzyotuyanda kuzuzikizya, mpoonya ciindi aciindi aciiyo camukwasyi inga tulazilanga-langa kutegwa tubone naa tucita kabotu.” Banabukwetene aaba alimwi bakajana kuti ikubikka mazuba amwi ansondo nobateebeleli cipekupeku kwapa kuti boonse mumukwasyi kabajana ciindi cakubala.

Miswaangano Yambungano

Ba Mike aba Denise balaabana bone. Ino mukwasyi wabo wakagwasyigwa buti akaambo kakubelekela antoomwe? Ba Mike baamba kuti: “Zimwi ziindi twakali kumuka kumiswaangano, nokuba kuti twalibambila muciindi. Pele ikubelekela antoomwe kwakatugwasya kuti katutamuki kumiswaangano.” Ba Denise baamba kuti: “Nibakali kukomena, aumwi mwana wakalijisi cakucita. Kim, imwana wesu musimbi, ngowakali kujika akubikka zyakulya atebulu.” Michael, imwana wabo musankwa waamba kuti: “Lyoonse muli Bwabili twakali kuba amuswaangano wambungano muŋanda yesu. Twakali kusalazya muŋanda akuzibikka kabotu zyuuno. Awalo Mathew, imwana wabo uumwi musankwa, wakati: “Mazuba ngotwakali kuswaangana, bataata bakali kufwambaana kuboola kuzwa kumilimo kutegwa batugwasye.” Ino eeci cakabagwasya buti?

Mbokugwasya Kubelekela Antoomwe

Ba Mike baamba kuti: “Mu 1987, Denise andime twakatalika mulimo wabupainiya. Ciindi eeco, ibana besu basankwa botatwe bakacili kukkala andiswe. Bana bobilo, imusankwa amusimbi abalo bakaba bapainiya, mpoonya bobilo bambi ibasankwa bakatola lubazu mumulimo wakuyaka maanda aa Bbeteli. Alimwi citukkomanisya kapati mumukwasyi wesu ncakuti twakagwasya bantu bali 40 kulyaaba kuli Jehova akubbapatizigwa. Alimwi twakaba acoolwe cakubeleka mumulimo wakuyaka maanda aakuswaanganina mucisi cesu amumasi aambi.”

Masimpe, ikubelekela antoomwe mumukwasyi kulagwasya. Sena inga mwasola nzila zimbi mbomukonzya kubelekela antoomwe mumukwasyi wanu? Mubwini, kubelekela antoomwe kuyoopa kuti boonse mumukwasyi wanu kabacita kabotu kumuuya.

[Cifwanikiso icili apeeji 28]

Kulibambilila limwi zyakwaamba kulakonzya kumugwasya kucita kabotu mumulimo wamumuunda