Kamuyeeya Mbuli Mbwaakali Kuyeeya Kristo
Kamuyeeya Mbuli Mbwaakali Kuyeeya Kristo
‘Amube amiyeeyo njiyonya njaakajisi Kilisito Jesu.’—ROM. 15:5, NW.
1. Ino nkaambo nzi ncotweelede kuyeeya mbuli mbwaakali kuyeeya Kristo?
JESU Kristo wakaamba kuti: “Amuboole kulindime . . . mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu.” (Mt. 11:28, 29) Ooku kutamba kutondezya mbwatuyanda Jesu. Kunyina muntu ulaacikozyanyo cibotu kwiinda nguwe. Nokuba kuti wakali Mwana wa Leza alimwi wakali Singuzu, Jesu wakabafwida lubomba bantu ikapati aabo bakapengede.
2. Ino nimbazu nzi zitondezya mbwaakali kuyeeya Jesu nzyotutilange-lange?
2 Mucibalo eeci alimwi azibalo zyobilo zitobela, tulalanga-langa mbotukonzya kuba “[a]miyeeyo ya Kristo” mubuumi bwesu. (1 Kor. 2:16) Tulalanga-langa buyo mbazu zyosanwe zitondezya mbwaakali kuyeeya Jesu: kulibombya, lubomba, kumvwida Leza, busicamba aluyando.
Amube Babombe Moyo Mbuli Kristo
3. (a) Ino nciiyo nzi cakulibombya Jesu ncaakayiisya basikwiiya bakwe? (b) Ino Jesu wakacita buti ciindi basikwiiya bakwe nobakalezya?
3 Jesu Mwana wa Leza uulondokede, wakalyaaba kuboola anyika kuzookkala akubeleka abantu batalondokede alimwi basizibi. Bamwi akati kabantu aaba mbebakali kuzoomujaya. Nokuba boobo, Jesu wakazumanana kukkomana akulijata. (1 Pet. 2:21-23) Kutobela cikozyanyo ca Jesu kulakonzya kutugwasya kuti aswebo tuzumanane kukkomana akulijata notubona tumpenda twabamwi. (Heb. 12:2) Jesu wakatamba basikwiiya bakwe kuti babweze joko lyakwe antoomwe anguwe akwiiya kuli nguwe. (Mt. 11:29.) Ino ncinzi ncobakali kukonzya kwiiya? Cintu cimwi ncobakali kukonzya kwiiya ncakuti Jesu wakali mubombe moyo, alimwi wakali kubakkazikila moyo basikwiiya bakwe nokuba kuti bakali atumpenda. Ibuzuba bwamamanino masiku katanafwa, Jesu wakasanzya matende aabo ikubayiisya kulibombya, alimwi eeci tabakacilubi. (Amubale Johane 13:14-17.) Kumbele, Petro, Jakobo a Johane nobakaalilwa “kulangila,” Jesu kunyina naakabanyemena nkaambo wakalikuzyi kulezya kwabo. Wakabuzya Petro kuti: “Simoni, sa uloona na? . . . Amulangile akukomba, kuti mutanjili mumatepauzyo. Moyo walo ulisungweede, anukuti mubili waboyoka.”—Mk. 14:32-38.
4, 5. Ino mbuti cikozyanyo ca Jesu mbocikonzya kutugwasya notubona kulezya kwabamwi?
4 Ino mbuti mbotucita ikuti naa musyomima kayanda kuzundana, kafwambaana kunyema naa katatobeli lulayo kuzwa kubaalu naa “muzike musyomesi uucenjede”? (Mt. 24:45-47) Nokuba kuti tulizyi kuti bantu munyika ya Saatani eeyi balijisi tumpenda alimwi tulabalekelela naa balubizya, pele ikuti kabali bakwesu balubizya cilakonzya kukatazya kubalekelela. Ikuti katufwambaana kunyema akaambo katumpenda twabamwi, tweelede kulibuzya kuti, ‘Ino mbuti mbondikonzya kutondezya kuti ndili “[a]miyeeyo ya Kristo”?’ Tutalubi kuti Jesu kunyina naakabanyemena basikwiiya bakwe, nociba ciindi nobakali kulubizya.
5 Amuyeeye cikozyanyo ca Petro. Jesu naakamwiita kuti azwe mubwato akweenda atala amaanzi kuya kuli nguwe, wakacita oobo akweenda asyoonto. Mpoonya naakabona guwo wakayoowa akutalika kubbila mumaanzi. Sena Jesu wakanyema akumwaambila kuti: “Nciindi cako! Usubuke”? Peepe. “Mpawo Jesu wakatambika ijanza lyakwe, wamujata, wamwaambila wati, Webo nusilusyomoluniini, ino nkaambonzi wadoneeka?” (Mt. 14:28-31) Mbubonya mbuli Jesu mbwaakatandabika janza lyakwe kugwasya Petro, sena andiswe inga twamugwasya muntu iwalezya kulusyomo? Eeci nceciiyo ncotukonzya kwiiya kuzwa kuli Jesu, mbwaakacitila Petro amoyo mubombe.
6. Ino ncinzi Jesu ncaakabayiisya basikwiiya bakwe kujatikizya kuyanda kuba mupati?
6 Alimwi Petro wakali akati kabaapostolo ibakali kukazyanya kujatikizya iwakali mupati akati kabo. Jakobo a Johane bakali kuyanda kukkala umwi kujanza lyalulyo lya Jesu aumwi kujanza lyalumwensi mu Bwami. Petro alimwi abaapostolo bambi nobakakamvwa kaambo aaka, bakanyema. Jesu wakalizyi kuti bakaba amizeezo eeyi akaambo kabantu bamunyika mbobakali kukkala limwi. Wakabaita akubaambila kuti: “Mulizi kuti baami babamasi babacitila kami-kami, abalo bapati babo babeendelezya. Pele kulindinywe takuli boobo pe. Umwi aumwi uuyanda kuba mupati akati kanu uzooba mulanda wanu, alimwi umwi aumwi uuyanda kuba mutaanzi akati kanu uzooba muzike wanu.” Mpoonya Jesu wakabaambila cikozyanyo cakwe kuti: “Nkaambo mbubonya obo Mwana a-Muntu tazide kuti abelekelwe, wakeza kuti abeleke, alimwi akwaaba buumi bwakwe, bube cinunuzyo cabanji.”—Mt. 20:20-28.
7. Ino mbuti aumwi mbwakonzya kupa kuti kube lukamantano mumbungano?
7 Kuyeeya mbwaakali kulibombya Jesu kulakonzya kutugwasya kuti katulibombya notuli abakwesu. (Lk. 9:46-48) Kucita oobu kupa kuti kube lukamantano. Jehova, mbuli usyi uujisi mukwasyi mupati, uyanda kubona kuti bana bakwe “bakala kabotu antoomwe.” (Int. 133:1) Jesu wakapaila kuli Bausyi kujatikizya Banakristo boonse bakasimpe kuti: “Mebo ndibe mulimbabo, ayebo mulindime, kuti bazuzigwe kuba bamwi, kuti nyika ikazibe kuti nduwe owakandituma, nduwe owakabayanda mbubonya mbookali kundiyanda amebo.” (Joh. 17:23) Aboobo, kukamantana kwesu kulagwasya bantu kutuzyiba kuti tuli basikutobela Kristo. Kutegwa tukamantane boobu, tweelede kubona kulezya kwabamwi mbubwenya mbwaakali kukubona Jesu. Jesu wakali kulekelela bantu, alimwi wakayiisya kuti tulakonzya kulekelelwa buyo ikuti andiswe katulekelela bambi.—Amubale Matayo 6:14, 15.
8. Ino ncinzi ncotukonzya kwiiya kucikozyanyo cababelesi ba Leza babeleka kwaciindi cilamfwu?
8 Alimwi tulakonzya kwiiya zinji kwiinda mukwiiya lusyomo lwabantu ibatobela cikozyanyo ca Kristo kwamyaka minji. Mbubwenya mbuli mbwaakacita Jesu, babelesi ba Leza aaba balazyiba kulezya kwabamwi. Balizyi kuti kuba alubomba mbuli Kristo kulagwasya “kuyumuna matenda aabaabo batali bayumu” alimwi akupa kuti kube lukamantano. Kunze lyaboobo, kupa kuti bantu boonse mumbungano babe amiyeeyo ya Kristo. Bayanda kuti Banakristonyina kabayeeya mbuli Kristo akuba azilongezyo mbubwenya mbuli Paulo mbwaakali kuyanda ku Banakristo baku Roma naakalemba kuti: “Leza wabukakatilo abukombelezyo amupe bujatano bwacinkaminwe mbuli Kristo Jesu, kuti camoyo omwe acamulomo omwe mulemeke Leza wisi Mwami wesu Jesu Kristo.” (Rom. 15:1, 5, 6) Masimpe, notukamantana mukukomba, Jehova ulatembaulwa.
9. Ino nkaambo nzi ncotuyandika kuba amuuya uusalala kutegwa twiiye cikozyanyo ca Jesu?
9 Jesu wakakozyanisya ‘kubomba’ moyo kukulibombya, icibeela camicelo yamuuya uusalala wa Leza. Aboobo, notwiiya cikozyanyo ca Jesu, tuyandika kuba amuuya uusalala kutegwa tumwiiye kabotu. Tweelede kupaila ikulomba muuya uusalala alimwi akusoleka kuba amicelo yanguwo—“luyandano, lukondo, luumuno, busicamba, buuya, bubotu, lusyomo, lubombo, kulyeendelela.” (Gal. 5:22, 23) Lilikke notulibombya akubomba moyo mbuli mbwaakacita Jesu notukonzya kumukomanisya Taateesu wakujulu, Jehova.
Jesu Wakali Kubafwida Lubomba Bantu
10. Ino mbuti Jesu mbwaakatondezya lubomba kubantu?
10 Lubomba alwalo ncibeela camicelo yamuuya uusalala. Lyoonse Jesu wakali kubafwida lubomba bantu. Bantu boonse ibakali kulombozya kubona Jesu ‘wakabatambula kabotu.’ (Amubale Luka 9:11.) Ino ncinzi ncotukonzya kwiiya kulubomba lwa Jesu? Muntu silubomba ulabayanda bantu. Oobu mbwaakabede Jesu. Wakabafwida lubomba bantu “nkaambo kakuti bakalikatede akumwaika mbuli imbelele zitakwe mweembezi.”—Mt. 9:35, 36.
11, 12. (a) Amupandulule cakacitika ciindi Jesu naakatondezya luzyalo. (b) Ino ncinzi ncomukonzya kwiiya kuli ceeci?
11 Jesu tanaakabafwida buyo luzyalo bantu, pele wakali kubagwasya. Amubone cikozyanyo comwe. Kwamyaka iili 12, mukaintu umwi wakali kuciswa bulwazi bwakuzwa bulowa. Wakalizyi kuti mu Mulawo wa Musa, bulwazi bwakwe bwakapa kuti walo alimwi amuntu uuli woonse uumujata asofwaale. (Lev. 15:25-27) Nokuba boobo, akaambo kakuti Jesu wakali ampuwo mbotu alimwi wakali kubeendelezya kabotu bantu, mukaintu ooyu wakali alusyomo lwakuti ulamuponya. Wakali kulyaambauzya kati: “Kufumbwa ndaakwaampa zyakusama zyakwe buyo, njoopona.” Cabusicamba, wakaampa zyakusama zya Jesu, mpoonya mpoonya wakapona.
12 Jesu wakazyiba kuti kuli wamwaampa, aboobo wakacebuka kuti abone naa nguni. Kayoowede kuti ambweni ulakalalilwa akaambo kakutyola mulawo, mukaintu ooyu wakavwundama kubusyu bwa Jesu akumwaambila zyoonse. Sena Jesu wakamunyemena mukaintu ooyu iwakapengede? Peepe. Wakamwaambila caluyando kuti: “Mwanaangu, lusyomo lwako lwakufutula, koya, ube aluumuno.” (Mk. 5:25-34) Eelyo kaka wakayumizyigwa naakaambilwa majwi aayo calubomba!
13. (a) Ino Jesu wakaindene buti a Bafalisi? (b) Ino Jesu wakali kubalanganya buti bana?
13 Mukwiimpana a Bafalisi ibayumu moyo, Jesu kunyina naakabelesya nguzu zyakwe zyabweendelezi kudyaaminina bamwi. (Mt. 23:4) Wakali kubayiisya nzila zya Jehova calubomba akukkazika moyo. Kuli basikwiiya bakwe, Jesu wakali mulongwe silubomba alimwi wakali kubayanda lyoonse. (Tus. 17:17; Joh. 15:11-15) Nobaba bana bakali kumusikila cakwaanguluka, alimwi awalo wakali kuyanda kuba ambabo. Nokuba kuti wakajisi bubi, wakali kujana ciindi cakwiizya ambabo. Aciindi cimwi, basikwiiya bakwe bakali kuyeeya mbuli basololi babukombi ibakali kulibona kusumpuka kwiinda bamwi, bakasola kukasya bantu bakali kuleta bana kuli Jesu kuti abaampe. Eeci tiicakamukkomanisya Jesu. Wakabaambila kuti: “Amuleke twana, tuze kulindime, mutatukasyi pe, nkaambo Bwami bwa-Leza mbubwabo bali boobo.” Mpoonya wakabelesya cikozyanyo cabana kubayiisya cintu ciyandika kapati, wakati: “Ncobeni ndamwaambila kuti, Umwi aumwi uutatambuli Bwami bwa-Leza mbuli kana, takooyoonjila mulimbubo pe.”—Mk. 10:13-15.
14. Ino mbubotu nzi bana mbobajana akaambo kakuyandwa?
14 Amuyeeye buyo mbobakali kuyoolimvwa bana aaba kumbele, kabali bapati, bayeeya kuti Jesu Kristo ‘wakababukata akubalongezya.’ (Mk. 10:16) Abalo bana bamazuba aano bayoobayeeya baalu abantu bamwi mumbungano ibabayanda amoyo woonse. Kwiinda zyoonse, ibana bayandwa munzila eeyi kuzwa kubwana, balazyiba kuti muuya wa Leza mpuuli akati kabantu bakwe.
Amube Alubomba Munyika Yalunya
15. Ino nkaambo nzi ncotuteelede kugambwa kuti bantu banji mazuba aano mbaasilunya?
15 Bantu banji mazuba aano balimvwa kuti bajisi bubi cakuti banyina ciindi cakutondezya lubomba kubantu. Aboobo, abuzuba bantu ba Jehova beendelezyegwa calunya kucikolo, kumilimo, munyendo amubukambausi. Nokuba kuti micito yalunya ilakonzya kututyompya, tatweelede kugambwa pe. Kwiinda mumuuya uusalala, Jehova wakamwaambila Paulo kutucenjezya kuti “[mu]mazuba aakumamanino” aaya, Banakristo bakasimpe bayooswaangana “[a]basikuliyanda, . . . [a]basikancimwa.”—2 Tim. 3:1-3.
16. Ino mbuti mbotukonzya kuba alubomba mbuli lwa Kristo mumbungano?
16 Kulubazu lumwi, ibukkale bwa Banakristo mumbungano yakasimpe buliindene kapati abwanyika eeyi yalunya. Kwiinda mukwiiya Jesu, umwi aumwi wesu ulakonzya kusumpula bukkale oobu bukatalusya. Ino mbuti mbotukonzya kucita boobo? Cakusaanguna, atubagwasye aabo bali mumbungano ibayandika lugwasyo akuyumizyigwa akaambo kakuciswa amapenzi amwi. “[M]umazuba aakumamanino” aaya, mapenzi aali boobu alakonzya kwiindila, pele taali meenzu pe. Banakristo bansiku abalo bakalaajisi mapenzi ngaonya aaya. Mbubwenya mbobakali kuyandika lugwasyo Banakristo aaba, aalo mazuba aano lulayandika. Mucikozyanyo, Paulo wakakulwaizya Banakristo kuti: “Mubaumbulizye batyompedwe mumyoyo, mubatabe bakompeme, amube acamba cilemu kubantu boonse.” (1 Tes. 5:14) Eeci caamba kuba alubomba mbuli Kristo.
17, 18. Ino muunzila nzi motukonzya kumwiiya Jesu ikucita calubomba?
17 Banakristo beelede kubatambula kabotu ibanyina, ikucita mbuli mbwaakali kukonzya kucita Jesu, ikubabikkila maano aabo mbotwakazyiba kaindi abaabo mbotwatakazyi. (3 Joh. 5-8) Mbubwenya mbuli Jesu mbwaakabafwida lubomba bantu, andiswe tuyandika kubakatalusya bamwi lyoonse.—Is. 32:2; Mt. 11:28-30.
18 Toonse tuyandika kubafwida lubomba bamwi kwiinda mukubabikkila maano. Amubone mbomukonzya kubagwasya. Paulo wakati: “Amuyandane aluyandisyo lwabunyina. Amusungwaale kukulemekana.” (Rom. 12:10) Eeci caamba kutobela cikozyanyo ca Kristo, ikubafwida lubomba bantu akubasamausya, ikutondezya “luyandisyo lwinilwini.” (2 Kor. 6:6) Iluyando luli boobu Paulo wakalupandulula kuti: “Luyandisyo lulakazika moyo akufwa luzyalo. Luyandisyo talukwe ibbivwe, talulikankaizyi, talulisumpuli.” (1 Kor. 13:4) Muciindi cakubabikkilila bakwesu abacizi, tweelede kutobela lulayo lwakuti: “Amuusilane buuya, mukabe batete moyo, akuba aluzyalo lwakulekelelana milandu, mbubonya mbuli Leza mbwaakalekelela ndinywe muli-Kristo.”—Ef. 4:32.
19. Ino mbubotu nzi mbotujana ikuti naa twatobela Kristo mukuba alubomba?
19 Ikuti naa katusoleka lyoonse ikucita calubomba mbuli Kristo, tuyoolongezyegwa. Muuya wa Jehova unootugwasya toonse mumbungano ikuba amicelo yamuuya. Kuyungizya waawo, ikuti twatobela cikozyanyo ncaakasiya Jesu akugwasya bamwi kucita boobo, tunookamantene mubukombi bwesu alimwi eeci ciyoomukkomanisya Leza. Aboobo, lyoonse atusolekesye kulibombya akubafwida lubomba bantu mbuli Jesu.
Sena Inga Mwapandulula?
• Ino mbuti Jesu mbwaakatondezya kuti wakali ‘mubombe moyo’?
• Ino mbuti Jesu mbwaakatondezya lubomba?
• Ino mbuti mbotukonzya kubomba moyo akucita calubomba mbuli Jesu munyika eeyi yalunya?
[Mibuzyo yaciiyo]
[Cifwanikiso icili apeeji 8]
Ikuti mukwesu walezya kulusyomo, mbuli bwakacita Petro, sena inga twamugwasya?
[Cifwanikiso icili apeeji 10]
Ino mbuti mbomukonzya kuba alubomba mbuli lwa Kristo mumbungano?