Ndakacijana Ncondeelede Kuponena

Akaluulwa aba Gaspar Martínez

Ndiyanda kumwaambila cakacitika nindakali mwana. Ndakali mucete kumunzi pele nindakalongela kudolopo ndakavwuba. Pele lubono ndondakajana taluli loolo ndondakali kuyeeyela.

NDAKAKOMENENA kumunzi muma 1930 ku Rioja, kucisi ca Spain nkocili kunyika. Kubusena ooku zisyango tiizyakali kukomena kabotu. Nindakali amyaka iili kkumi ndakacileka cikolo, pele aciindi eeci ndakalicizyi kale kubala akulemba. Mebo abana bakwesu basankwa abasimbi bali cisambomwe, ndakali kweembela buyo mbelele alimwi akulima mutuunda twesu.

Ibucete bwakatupa kuyeeya kuti ikuba amali azyintu zyakumubili kwakali kukonzya kutukkomanisya. Twakali kubanyomenena aabo bakajisi lubono lunji. Nokuba boobo, cimwi ciindi bbishopo waku Katolika wakaamba kuti imunzi wesu “nguwakali kucita kabotu kubukombi mucilawo coonse ncaakali kulanganya.” Bbishopo tanaakalizyi kuti ibanji bayooleka kukomba ku Katolika.

Kulangaula Zyintu Zibotu

Ndakakwata Mercedes, imusimbi wamumunzi mweena. Nokwakainda ciindi cisyoonto, twakaba amwana musankwa. Mu 1957, twakalongela kudolopo lya Logroño ilyakali munsi-munsi kumane abalo banamukwasyi bakanditobela. Akaambo kakutaiya, cakandikatazya kujana mulimo iwakali kukonzya kundipa mali aakugwasya mukwasyi. Tiindakalizyi wakali kokonzya kundigwasya. Ndakatalika kubala mabbuku mulaibbulali iyakali kubusena ooku, pele tiindakalizyi kabotu ncindakali kulangaula.

Nokwakainda ciindi, ndakamvwa kuti kwakali pulogilamu imwi muli sikapepele iyakali kuyiisya Bbaibbele kwiinda mukulembelana magwalo. Nindakamanizya kwiiya, bapati-pati bacikombelo ca Pulotesitanti bakandiswaya. Mumazuba buyo masyoonto ngondakaunka kucikombelo eeci, ndakabona kuti bapati-pati mucabo-cabo bakali kukazyanya akulwana. Kunyina nindakapilukila akaambo kazyintu zyakali kucitika alimwi ndakayeeya kuti zikombelo zyoonse mbozibede.

Lino Ndakazyiba Ncondeelede Kuponena

Mu 1964, Eugenio wakatuswaya kuŋanda. Wakali umwi wa Bakamboni ba Jehova, icikombelo ncindatakazyi. Nokuba boobo, ndakali kuyanda kapati kubandika makani aamu Bbaibbele. Ndakali kuyeeya kuti ndakalaazyi kabotu Magwalo. Ndakabandika anguwe kubelesya magwalo masyoonto ngondakaiya kwiinda mucikolo cakulembelana. Nokuba kuti ndakali kuziiminina njiisyo zyaci Pulotesitanti zimwi, tiindakali kuzisyoma.

Notwakabandika ziindi zyobilo, ndakabona  kuti Eugenio wakali kulipandulula kabotu Ijwi lya Leza. Ndakagambwa kubona mbwaakali kufwambaana kujalula magwalo akwaapandulula nokuba kuti ndakali kumwiinda lwiiyo lwakumubili. Wakanditondezya ncolyaamba Bbaibbele kuti tupona kumazuba aakumamanino akuti ino-ino Bwami bwa Leza buyoopa kuti nyika eeyi ibe paradaiso. Aaya makani akandikkomanisya kapati.—Int. 37:11, 29; Is. 9:6, 7; Mt. 6:9, 10.

Ndakazumina kwiiya Bbaibbele. Zyoonse nzindakaiya zyakali zipya alimwi zyakandikkomanisya kapati. Lino ndakazyiba ncondakali kuponena. Ndakaleka kulangaula zyintu nzyondakali kuyanda. Ndimane ndakabona kuti kulangaula zyintu zyakumubili nkwabuyo alimwi ndakaleka kulangaula mulimo uuvwolwa mali manji. Ndakazyiba kuti imalwazi alufwu ziyoomana.—Is. 33:24; 35:5, 6; Ciy. 21:4.

Mpoonya ndakatalika kwaambila basazima zyintu nzindakali kwiiya alimwi cakali kundikkomanisya kubaambila kuti Leza uyoopa kuti nyika ibe paradaiso oomo bantu basyomeka mobayookkala kukabe kutamani.

Ibamukwasyi Wangu Bakakatambula Kasimpe Kamu Bbaibbele

Nokwakainda ciindi cisyoonto, notuli 12 twakatalika kuswaangana lyoonse mu Nsondo kumazuba muŋanda yabaacisya, ikubandika makani aamu Bbaibbele. Ansondo twakali kubandika makani aamu Bbaibbele kwamawoola obilo naa otatwe. Eugenio naakabona kuti basazima aaba boonse bakali kuyanda kwiiya Bbaibbele, wakatalika kubayiisya mukwasyi omwe-omwe.

Ndakalijisi abasazima bamwi ibakali kukkala ku Durango ikwakanyina Bakamboni, ikulampa makkilomita aali 120 kuzwa ku Logroño. Aboobo nokwakainda myezi yotatwe, ndakalomba mazuba aakulyookezya kumulimo kutegwa ndikabaswaye akubaambila makani aabukombi mbondakajana. Mumazuba ngondakakkala ambabo, notuli kkumi twakali kuswaangana lyoonse kumazuba alimwi twakali kubandika makani aamu Bbaibbele mane kusikila kubucedo. Boonse bakali kwaakkomanina makani aaya. Naakamana mazuba aakulyookezya, ndakabasiila ma Bbaibbele amabbuku aamba zyamu Bbaibbele. Kuzwa ciindi eeco, twakali kulembelana magwalo.

Bakamboni ba Jehova nobakasika mudolopo lya Durango—ibusena nkobatakaninga kukambaukila—bakajana bantu bali 18 ibakali kulangila kuyiisyigwa Bbaibbele. Bakamboni bakakkomana kapati akutalika kuyiisya mukwasyi aumwi.

Kusikila aciindi eeci, mukaintu wangu Mercedes tanaakali kuyanda kwiiya Bbaibbele akaambo kakuyoowa bantu. Mulimo wa Bakamboni ba Jehova wakalesyegwa mucisi ca Spain, aboobo wakali kuyeeya kuti bana besu balatandwa kucikolo akuti toonse tulatalika kupenga. Pele naakabona kuti banamukwasyi boonse bakatambula kasimpe kamu Bbaibbele, awalo wakazumina kwiiya.

Mumyaka yobilo buyo, basazima bali 40 bakaba Bakamboni alimwi bakalyaaba kuli Leza akubbapatizyigwa. Inzya, toonse mumukwasyi twakaba abulangizi bomwe. Ndakalimvwa kuti lino ndakajana cintu ciyandika kapati mubuumi. Twakalongezyegwa, twakajana lubono lunji lwakumuuya.

Nindakali Kuyaabucembaala Ndakali Kuyaabuvwuba

Mumyaka iili 20 yakatobela, ndakabikkila buyo maano kukukomezya bana besu bobilo akugwasya mbungano yesu. Mebo amukaintu wangu Mercedes notwakalongela ku Logroño, kwakali buyo Bakamboni bali 20 mudolopo eeli imwakali bantu basika ku 100,000. Muciindi buyo cisyoonto, ndakaba amikuli minji mumbungano.

Mpoonya nindakali amyaka iili 56, kufakitoli nkondakali kubelekela bakajala cakutayeeyelwa aboobo ndakacileka kubeleka. Lyoonse ndakali kulombozya kuba mupainiya waciindi coonse, aboobo nindakaleka kubeleka cakaba coolwe cakuti nditalike mulimo ooyu. Mali ngondakapegwa nindakaleka mulimo akali masyoonto cakuti cakali kukatazya kugwasya mukwasyi. Mercedes wakagwasya kapati akaambo kakuti wakajana mulimo uubelekwa buyo cisela  cabuzuba. Twakacikonzya kugwasya mukwasyi alimwi twakali kukonzya kujana zyoonse zyakali kuyandika. Kusikila sunu ndicili mupainiya waciindi coonse alimwi mukaintu wangu ciindi aciindi ulacita bupainiya bwakugwasyilizya, ulayanda kapati kukambauka.

Myaka misyoonto yainda, Mercedes wakali kupa mamagazini kumukaintu umwi wazyina lya Merche, iwakali kwiiya Bbaibbele naakacili mwana. Merche wakali kwaayanda mamagazini eesu alimwi Mercedes wakabona kuti mukaintu ooyu wakacili kuyanda kwiiya kasimpe kamu Bbaibbele. Mpoonya Merche wakazumina kwiiya Bbaibbele alimwi wakali kucita kabotu. Pele mulumaakwe Vicente wakali mudakwi alimwi wakali kuleka-leka milimo. Eeci cakamupa kwaalilwa kujana mali aakugwasya mukaintu wakwe alimwi bakali kulangilwa akulekana.

Mukaintu wangu wakakulwaizya Merche kuti alombe Vicente kuti abandika andime, amane wakacita oobo. Nindakamuswaya ziindi zili mbozibede, wakazumina kwiiya Bbaibbele. Vicente wakatalika kucinca, wakali kunywa buyo muziindi. Kwakali kwiinda nsondo yomwe naa ziindaawo katanywi bukoko. Amane wakacilekela limwi kunywa bukoko. Bukkale bwakwe bwakacinca kapati cakuti bakatalika kukamantana mumukwasyi. Boonse mumukwasyi bacita kabotu alimwi balagwasyilizya mumbungano iili kunsumbu zyaku Canary nkobakkala ino.

Kubona Zyintu Mbozyakali Kuyaabubota Mubuumi

Nokuba kuti basazima bamwi ibakaiya Bbaibbele kaindi bakafwa, mukwasyi wesu wazumanana kukomena alimwi Leza watulongezya kapati. (Tus. 10:22) Cilakkomanisya kaka kubona kuti bunji bwabaabo ibakaiya kasimpe myaka iili 40 yainda—kubikilizya bana abazyukulu babo—bacizumanana kubelekela Jehova cakusyomeka!

Lino, basazima banji Mbaakamboni ba Jehova alimwi bunji bwabo mbaalu, bamwi mbakutausi alimwi bamwi mbapainiya. Mwanaangu wakutaanguna amukaintu wakwe babelekela kuofesi yamutabi ya Bakamboni ba Jehova mu Madrid, ku Spain. Nindakaba Kamboni, Bakamboni bakali 3,000 mu Spain. Lino tulainda ku 100,000. Ndilaukkomanina kapati mulimo waciindi coonse alimwi ndilamulumba kapati Leza akaambo kakundipa coolwe cakumubelekela. Nokuba kuti tandiyiide, ciindi aciindi ndilabeleka kugwasyilizya mulangizi wabbazu.

Myaka misyoonto yainda, ndakamvwa kuti kumunzi nkondakakomenena bantu bakali kuyaabumana. Ibucete bwakapa kuti bantu basiye myuunda amaanda aabo akulongela kumbi ikwakali kubotu. Cikkomanisya ncakuti, bunji bwabaabo ibakalonga kubikkilizya andime, twakajana lubono lwakumuuya. Twakaiya ncotweelede kuponena akuti ikubelekela Jehova kolikke nkokukonzya kukkomanisya muntu.

[Cifwanikiso icili apeeji 32]

Bunji bwabanamukwasyi wa Mukwesu Martínez’ ibali mukasimpe