Mibuzyo Yabasikubala

Ino Nciiyo nzi ncotwiiya ku Tusimpi 24:27?

Naakali kulaya mwana musankwa, sikulemba Tusimpi wakaamba kuti: “Bamba milimo yako anze; bamba zintu zyoonse mumyuunda; wamana obo, yaka iŋanda yako.” Ino nkaambo nzi kali kukasimpi aaka kakasololelwa amuuya? Musankwa weelede kulibambila kabotu katanakwata akuba amukwasyi wakwe, kutegwa akacikonzye kuuzuzikizya mukuli wabusilutwe.

Ikaindi, lugwalo oolu lwakali kupandululwa kuti lwaamba mulumi naa usyi kuti teelede buyo kulanganya mulimo wakwe wakumubili, pele alimwi weelede kuyaka mukwasyi wakwe, mucikozyanyo kuyiisya mukwasyi makani aamu Bbaibbele. Nokuba kuti kaambo aaka nkamasimpe alimwi nkamu Magwalo, takali nkakaambo kapati kaambwa mulugwalo oolu. Nkaambo nzi? Amubone twaambo tobilo.

Kakusaanguna nkakuti, ilugwalo oolu talwaambi kuyaka munzila yakuyumya-yumya mukwasyi uuliko kale. Muciindi caboobo, lwaamba kuyaka ŋanda ini. Ibbala lyakuti “yaka” alimwi lilakonzya kuba maambilambali ikwaamba kukwata akuba abana.

Ikabili nkakuti, lugwalo oolu lukankaizya mbokuyandika kucita zyintu munzila iili kabotu, mbuli kwaamba kuti: “Saanguna kucita ceeci, wamana ucite ceeci.” Aboobo, sena kasimpi aaka kaamba kuti tweelede kusaanguna kuzuzikizya mikuli yakumubili katutanacita zyintu zyakumuuya? Peepe!

Kaindi, ikuti musankwa kayanda “[ku]yaka iŋanda” yakwe naa kukwata akuba amukwasyi, wakeelede kulibuzya kuti: ‘Sena ndililibambilide kubamba mukaintu abana mbotuya kuba ambabo kumbele?’ Katanaba amukwasyi, wakeelede kubeleka canguzu mumyuunda. Aboobo, Ibbaibbele litegwa Today’s English Version lyaamba boobu kulugwalo oolu: “Utayaki ŋanda yako akuba amukwasyi kusikila waakutebula myuunda yako akuba azilyo zyeelede.” Sena njiisyo eeyi icibeleka amazuba aano?

Inzya. Imusankwa uuyanda kukwata weelede kulibambila kabotu kutegwa akakonzye kuzuzikizya mikuli yakwe. Kufwumbwa kuti katacisidwe, weelede kubeleka. Nokuba boobo, mulumi teelede kugwasya buyo mukwasyi wakwe kumubili. Ijwi lya Leza lyaamba kuti mulumi uutabapi bamumukwasyi wakwe zyintu nzobayandika kumubili, kumoyo akumuuya ulainda kubija aliyooyo uutali Munakristo. (1 Tim. 5:8) Aboobo, musankwa nalibambila kukwata akuba amukwasyi, weelede kulibuzya mibuzyo eeyi: ‘Sena ndililibambilide kupa bamumukwasyi wangu zyintu zyakumubili? Sena ndililibambilide kusololela mukwasyi wangu muzyintu zyakumuuya? Sena ndiya kuuzuzikizya mukuli wakwiiya Bbaibbele amukaintu wangu alimwi abana?’ Ijwi lya Leza lilakankaizya mboiyandika mikuli eeyi.—Dt. 6:6-8; Ef. 6:4.

Aboobo, imusankwa uuyanda mukaintu wakukwata weelede kuyeeya njiisyo iili ku Tusimpi 24:27. Mbubwenya buyo awalo musimbi weelede kulibuzya naa ulilibambilide kuzuzikizya mikuli yamukaintu. Banabukwetene ibakakwatana caino-ino abalo inga balibuzya mibuzyo iili boobo ikuti kabalombozya kuba abana. (Lk. 14:28) Ikutobela njiisyo zili boobu izyakasololelwa amuuya kulakonzya kubagwasya bantu ba Leza kutegwa batakanjili mumapenzi alimwi akubapa kuti kabakkomana mumukwasyi.

Majwi aakwelelezya sikubala aali apeeji 12]

Ino mibuzyo nzi iijatikizya lukwatano imusankwa uuyanda kukwata njayelede kulibuzya?