“Munooli Beenzuma”
“Munooli Beenzuma”
“Munooli beenzuma mwanoozicita nzemwaambila.”—JOH.15:14.
1, 2. (a) Ino balongwe ba Jesu bakali kucita milimo nzi iindene-indene kabatanaba basikwiiya bakwe? (b) Ino nkaambo nzi ncotuyandika kuba balongwe ba Jesu?
IBASANKWA ibakkede a Jesu muŋanda yamujulu bakali kucita milimo iindene-indene kabatanaba basikwiiya bakwe. Banabunyina, Petro a Andreya, bakali bazubi banswi. Matayo wakali simutelo—imulimo iwakali kubacima bama Juda. Bamwi mbuli Jakobo a Johane, beelede kuti bakalimuzyi Jesu kuzwa naakacili mwana. Ibamwi mbuli Natanayeli, beelede kuti bakamuzyiba buyo kwamyaka misyoonto Jesu. (Joh. 1:43-50) Nokuba boobo, boonse ibakajanika imasiku ku Pobwe lya Kwiindilila mu Jerusalemu bakali kusyoma kuti Jesu ngo Mesiya wakasyomezyegwa, Imwana wa Leza muumi. (Joh. 6:68, 69) Kweelede kuti bakalimvwa kuti balayandwa naakabaambila kuti: “Ndamwaamba kuti muli beenzuma, nkaambo zintu zyoonse nzendakamvwa kuli-Taata, ndamuzibya nzizyo.”—Joh. 15:15.
2 Aaya majwi Jesu ngaakaambila baapostolo bakwe basyomeka aamba Banakristo bananike bamazuba aano, pele alimwi alakonzya kwaamba ababelesinyina ‘ibambelele zimwi.’ (Joh. 10:16) Kufwumbwa naa twakazwa mubukkale buli buti, tulakonzya kuba balongwe ba Jesu. Kuba balongwe ba Jesu kulayandika kapati akaambo kakuti kutupa kumvwana a Jehova. Alimwi tacikonzyeki kumvwana a Jehova ikuti twatataanguna kumvwana a Kristo. (Amubale Johane 14:6, 21.) Aboobo, ino ncinzi ncotweelede kucita kutegwa tube balongwe ba Jesu akuti tuzumanane kumvwana anguwe? Katutana kabandika kaambo aaka ikayandika kapati, atulange-lange cikozyanyo ca Jesu cakuba mulongwe mubotu mbocakabagwasya basikwiiya bakwe, akubona ncotukonzya kwiiya.
Cikozyanyo ca Jesu Cakuba Mulongwe Mubotu
3. Ino Jesu wakazyibidwe buti?
3 Mwami musongo, Solomoni, wakalemba kuti: “Muvubi ulijisi bazwalani banji.” (Tus. 14:20) Aaya majwi aamba cilengwa ncobajisi bantu batalondokede icakuyanda kumvwana abantu mbobabona kuti balakonzya kubapa zyintu nzyobayanda ikutali baabo bayandika kupegwa. Jesu kunyina naakacita oobo pe. Tanaakali kuyungwa amali ngaakajisi muntu naa cuuno ncaakajisi. Masimpe, Jesu wakamuyanda mweendelezi muvwubi wakacili mwana akumutamba kuti kamutobela. Nokuba boobo, Jesu wakamwaambila kuti auzye zyintu zyoonse nzyaakajisi akupa bacete. (Mk. 10:17-22; Lk. 18:18, 23) Jesu wakazyibidwe kuti tanaakali kumvwana abavwubi bali ampuwo, pele wakali kumvwana abacete abaabo batakali kubikkilwa maano.—Mt. 11:19.
4. Ino nkaambo nzi ncotukonzya kwaamba kuti beenzinyina Jesu bakali kulubizya?
4 Masimpe, beenzinyina a Jesu bakali kulubizya. Zimwi ziindi Petro wakali kwaalilwa kubona zyintu mbuli mbwaakali kuzibona Leza. (Mt. 16:21-23) Jakobo a Johane bakatondezya kuti bakali kuliyanda nobakalomba Jesu kuti ababikke muzyuuno zyaatala mu Bwami. Eeci cakabanyemya baapostolonyina alimwi kaambo aaka kakuyanda kuba mupati akati kabeenzinyina kakaliko kale aciindi eeci. Pele Jesu muciindi cakubanyemena beenzinyina wakabagwasya amoyo kaukkede.—Mt. 20:20-28.
5, 6. (a) Ino nkaambo nzi Jesu ncaakazumanana kumvwana abaapostolo bakwe? (b) Ino nkaambo nzi Jesu ncaakaleka kumvwana a Judase?
5 Ikuzumanana kumvwana abantu aaba batalondokede tacaambi kuti Jesu tanaakalizyi kuti balalubizya naa kuti wakali kukukkomanina kulezya kwabo pe. Pele, wakali kubikkila buyo maano kuzyintu zibotu nzyobakali kucita. Mucikozyanyo, Petro, Jakobo alimwi a Johane bakoona ciindi nobakali kuyandika kumugwasya Jesu naakali mumapenzi. Cakutadooneka, Jesu wakatyompwa. Nokuba boobo, wakabona kuti bakali kuyanda kumugwasya nakaamba kuti: “Moyo wazumina pele nyama njiibula inguzu.”—Mt. 26:41.
6 Mukwiimpana, Jesu wakaleka kumvwana a Judase Iskariote. Nokuba kuti Judase wakali kulibonya mbuli kuti ucimuyanda mweenzinyina, Jesu wakazyiba kuti ooyu wakali mweenzinyina wakacinca maano. Akaambo kakuti Judase wakayandisya nyika, wakaba sinkondonyina a Leza. (Jak. 4:4) Aboobo, ciindi Jesu naakaambila baapostolo bakwe bali 11 kuti mbeenzinyina, wakali mutandide kale Judase.—Joh. 13:21-35.
7, 8. Ino mbuti Jesu mbwaakatondezya kuti ulabayanda beenzinyina?
7 Jesu tanaakali kubikkila buyo maano kukulezya kwabeenzinyina pele wakali kubacitila azyintu zibotu. Mucikozyanyo, wakapaila kuli Bausyi kuti babakwabilile mumasunko. (Amubale Johane 17:11.) Jesu wakali kuzibikkila maano zyintu zyakumubili nzyobakali kuyandika. (Mk. 6:30-32) Wakali kukkomana kubaambila nzyaakali kuyeeya akuswiilila nobakali kwaamba nzyobakali kuyeeya ambobakali kulimvwa.—Mt. 16:13-16; 17:24-26.
8 Jesu wakaaba buumi bwakwe kuti abelekele beenzinyina akubafwida. Masimpe, wakalizyi kuti wakeelede kwaaba buumi bwakwe kutegwa azuzikizye zyeelelo zya Bausyi zyabululami. (Mt. 26:27, 28; Heb. 9:22, 28) Pele Jesu wakacita oobo kutondezya kuti wakali kubayanda. Wakaamba kuti: “Taakwe uuli aluyando ulwiinda olu, kuti muntu atulile beenzinyina buumi bwakwe.”—Joh.15:13.
Ino Basikwiiya Bakacita Buti Naakali Kubayanda Jesu?
9, 10. Ino bantu bakali kulimvwa buti azyintu nzyaakali kubapa Jesu?
9 Jesu wakali mwaabi, wakapa ciindi cakwe, wakali kubayanda bantu alimwi wakabapa zyintu nzibakali kuyanda. Eeci cakapa kuti bantu kabamuyanda alimwi akwaanguluka kubandika anguwe akumupa zyintu. (Lk. 8:1-3) Akaambo kaceeci, Jesu wakaamba kuti: “Amupe, anywebo munooyoopegwa. Kuyoopedwa mucamba canu iceelelo cibotu cisindaidwe, cuumidwe-umidwe, cizywide mwa. Nkaambo ceelelo ncomweelela bamwi, anywebo muyooelelwa nciconya.”—Lk. 6:38.
10 Cakutadooneka, bamwi bakali kuyanda kumvwana a Jesu akaambo buyo kakuyanda kupegwa zyintu. Aaba beenzinyina bakubeja bakaleka kumuyanda Jesu nobakaalilwa kumvwa zyintu nzyaakaamba. Muciindi cakumusyoma, bakafwambaana kuyeeya kuti nzyaakaamba tiizyakaluzi. Mukwiimpana, ibaapostolo bakwe bakazumanana kusyomeka. Nokuba kuti bakali kupenzyegwa akaambo kakumvwana a Kristo, bakazumanana kuba anguwe naakali kukkomana anaakali kupenzyegwa. (Amubale Johane 6:26, 56, 60, 66-68.) Imasiku, buzuba bwamamanino anyika, Jesu wakaamba mbwaakali kubayanda beenzinyina naakati: “Nywebo ndinywe mwandiiminina mumapenzi aangu.”—Lk. 22:28.
11, 12. Ino Jesu wakatondezya buti kuti wakacili kubayanda basikwiiya bakwe, alimwi ino balo bakacita buti?
11 Nokwakainda buyo ciindi cisyoonto kuzwa Jesu naakabalumbaizya basikwiiya bakwe kuti balasyomeka, bakamutija. Kwaciindi cisyoonto, bakaleka kumuyanda Kristo akaambo kakuyoowa bantu. Jesu alimwi wakabalekelela. Naakafwa akubusyigwa, wakalibonya kulimbabo alimwi, akubasyomezya kuti wakacili kubayanda. Kuyungizya waawo, wakabapa mulimo uusetekene—imulimo wakugwasya “bantu bamisyobo yoonse” kuba basikwiiya alimwi akuba bakamboni bakwe “mane kusikila kumamanino aanyika.” (Mt. 28:19; Inc. 1:8) Ino basikwiiya bakwe bakacita buti?
12 Basikwiiya bakaubeleka kabotu mulimo wakumwaya mulumbe wa Bwami. Kwiinda mukugwasyigwa amuuya uusalala wa Jehova, bakakambauka mumunzi woonse wa Jerusalemu. (Inc. 5:27-29) Nokuba kuti bakali kukongwa kujaigwa akaambo kamulimo ooyu, kunyina nobakauleka pe. Nokwakainda buyo myaka iili mbwiibede kuzwa ciindi Jesu naakabapa mulimo wakukambauka, mwaapostolo Paulo wakalemba kuti imakani mabotu “akakambaukilwa bantu boonse baansi ano.” (Kol. 1:23) Cakutadooneka, basikwiiya aaba bakatondezya kuti bakali kukkomana akaambo kakumvwana a Jesu.
13. Ino muuzyintu zili basikwiiya ba Jesu mobakacinca akaambo kakutobela njiisyo zyakwe?
13 Abalo aabo bakaba basikwiiya bakazitobela njiisyo zya Jesu. Eeci cakapa kuti banji bacince bukkale bwabo. Bamwi bakali koonana abasankwanyina, basimamambi, bacakolwa naa babbi. (1 Kor. 6:9-11) Ibamwi tiibakali kubayanda bantu bamusyobo umbi. (Inc. 10:25-28) Nokuba boobo, bakatalika kumutobela Jesu. Bakazileka zyintu nzyobakali kucita kaindi akulisamika buntu bupya. (Ef. 4:20-24) Nobakaizyiba “miyeeyo ya-Kristo,” bakali kucita mbuli nguwe.—1 Kor. 2:16.
Mbotumvwana a Kristo Mazuba Aano
14. Ino ncinzi Jesu ncaakasyomezya kuti uyakucita “[ku]mamanino aaciindi”?
14 Banakristo banji bamumwaanda wamyaka wakusaanguna bakalimuzyi Jesu pele bamwi bakamubona naakabusyigwa. Pele swebo kunyina notwakamubona pe. Aboobo, ino mbuti mbotukonzya kuba balongwe ba Kristo? Inzila yomwe njakutobela malailile aazwa kukabunga kamuzike musyomesi uucenjede, ikabananike bacili anyika ibanyina Jesu. Jesu wakasyomezya kuti “[ku]mamanino aaciindi,” uyakubikka muzike ooyu “kuti abe mupati wazintu zyoonse nzyajisi.” (Mt. 24:3, 45-47) Mazuba aano, banji ibayanda kuba balongwe ba Kristo tabali bakabunga kamuzike ooyu. Ino malailile aazwa kuciinga camuzike musyomesi akujatikizya buti kumvwana kwabo a Kristo?
15. Ino ncinzi citondezya kuti naa muntu uli mbuli mbelele naa mpongo?
15 Amubale Matayo 25:31-40. Jesu wakaamba kuti aabo ibayakuba mukabunga kamuzike bayakuba ibanyina. Mucikozyanyo cakwaandaanya mbelele ampongo, Jesu wakaamba kuti nzyotucita kubanyina cili mbuli kuti tucitila nguwe. Wakaamba kuti cintu iciyakwaandaanya bantu ibali mbuli mbelele kubantu ibali mbuli mpongo ciyakuba kumuntu aumwi mbwacita kuli baabo bali mukabunga aaka naba ‘muniini akati kabanyina.’ Aboobo, aabo ibayanda kuba beenzinyina Kristo ibali aalusyomo lwakupona anyika kukabe kutamani, bayandika kubagwasya ibali mukabunga kamuzike musyomesi.
16, 17. Ino mbuti mbotubayanda ibanyina Kristo?
16 Ikuti kamuli alusyomo lwakupona anyika mubwendelezi bwa Bwami bwa Leza, ino mbuti mbomubayanda ibanyina Kristo? Atulange nzila zyotatwe buyo. Kusaanguna, nkwiinda mukutola lubazu camoyo woonse mumulimo wakukambauka. Kristo wakaambila ibanyina kuti bakambauke makani mabotu munyika yoonse. (Mt. 24:14) Nokuba boobo, ibanyina Kristo ibacili anyika mazuba aano tabakonzyi kuumanizya mulimo ooyu kakunyina kugwasyigwa abeenzinyina ibambelele zimwi. Masimpe, iciindi ibambelele zimwi nobatola lubazu mumulimo wakukambauka, bagwasya ibanyina Kristo kumanizya mulimo ooyu uusetekene. Kristo abamuzike musyomesi uucenjede balakkomana kapati amulimo ooyu ngobacita balongwe babo.
17 Nzila yabili njobabelesya ibambelele zimwi kugwasya ibanyina Kristo mumulimo wakukambauka njakusanga. Jesu wakakulwaizya basikumutobela kuti kababelesya “lubono lwamunyika” kutegwa balijanine beenzinyina. (Luka 16:9, BT) Eeci tacaambi kuti cilongwe ncotujisi a Jesu naa a Jehova ciyandika kuulwa buya. Muciindi caboobo, notubelesya lubono lwesu mumulimo wa Bwami, tutondezya kuti tulabayanda alimwi tatuciti buyo oobo kwiinda mukwaambaula, pele tulacita oobo kwiinda ‘mumilimo amulusinizyo.’ (1 Joh. 3:16-18) Tulapa lubono lwesu ciindi notubelesya zyintu zyesu notukambauka, notusanga mali kumulimo wakuyaka awakubambulula maanda aakuswaanganina alimwi amali ngotusanga aabelesyegwa mumulimo wakukambauka uucitwa nyika yoonse. Kufwumbwa naa mali ngotusanga masyoonto naa manji, Jehova a Jesu balakkomana kapati akaambo kakusanga nkotucita cakuliyandila.—2 Kor. 9:7.
18. Ino nkaambo nzi ncotweelede kwaatobela malailile aamu Bbaibbele ngobatupa baalu mumbungano?
18 Nzila yatatu toonse njotutondezya kuti tuli balongwe ba Kristo nkwiinda mukutobela malailile aapegwa abaalu mumbungano. Kwiinda muli Kristo, ibaalumi aaba bakasalwa amuuya uusalala. (Ef. 5:23) Mwaapostolo Paulo wakalemba kuti: “Kamubaswiililisya baalu banu, mulitesye kulimbabo.” (Heb. 13:17) Zimwi ziindi, cilatukatazya kutobela malailile aamu Bbaibbele ngobatupa baalu mumbungano yesu. Tulakonzya kuti katuzizyi zyintu nzyebalezya, alimwi eeci cilakonzya kutupa kuti katutalutobeli lulayo ndobatupa. Nokuba boobo, Kristo uuli ngo Mutwe wambungano, ulikkomene kubabelesya baalumi aaba ibatalondokede. Aboobo, mbotucita nobatweendelezya cilakonzya kutondezya mbotumuyanda Kristo. Notutabikkili maano kukulubizya kwabaalu anotutobela malailile ngobatupa, tutondezya kuti tulamuyanda Kristo.
Nkotukonzya Kujana Balongwe Babotu
19, 20. Ino ncinzi ncotukonzya kujana mumbungano, alimwi ino ncinzi ncotuyakubandika mucibalo citobela?
19 Jesu ulazumanana kutubikkila maano ikutali buyo akaambo kakuti ulatupa baalu ibatusololela caluyando, pele alimwi ulatupa bamaama, bakwesu alimwi abacizi bakumuuya mumbungano. (Amubale Marko 10:29, 30.) Nomwakatalika kuswaangana ambunga ya Jehova, ino mbuti mbobakacita basazinyoko? Ndiza bakamugwasya kuba balongwe ba Leza a Kristo. Pele Jesu wakacenjezya kuti zimwi ziindi “basiŋanda bamuntu mwini mbibazooba basinkondonyina.” (Mt. 10:36) Eelyo kaka cilakkomanisya ikuzyiba kuti mumbungano tulakonzya kujana bantu ibakonzya kutuyanda kwiinda bantu mbotwakazyalwa limwi!—Tus. 18:24.
20 Imajwi aa Paulo ngaakalemba kumamanino aalugwalo lwakwe kumbungano yaku Roma atondezya kuti wakaba abalongwe. (Rom. 16:8-16) Mwaapostolo Johane wakamanizya lugwalo lwakwe lwatatu amajwi aakuti: “Juzya beenzuma aumwi aumwi.” (3 Joh. 14) Cakutadooneka, awalo wakalijisi beenzinyina banji. Ino mbuti mbotukonzya kutobela cikozyanyo ca Jesu acabasikwiiya bakwe cakuba abeenzuma babotu alimwi akuzumanana kumvwana abakwesu abacizi mumbungano? Cibalo citobela cilawiingula mubuzyo ooyu.
Ino Inga Mwaingula Buti?
• Ino ncikozyanyo cili buti Jesu ncaakatusiila cakuba mulongwe mubotu?
• Ino basikwiiya ba Jesu bakacita buti naakali kubayanda?
• Ino mbuti mbotukonzya kutondezya kuti tuli balongwe ba Kristo?
[Mibuzyo yaciiyo]
[Cifwanikiso icili apeeji 14]
Jesu wakali kuzibikkila maano zyintu nzyobakali kuyeeya ambobakali kulimvwa beenzinyina
[Cifwanikiso icili apeeji 16]
Ino mbuti mbotukonzya kutondezya kuti tulayanda kumvwana a Kristo?