“Myoyo Yanu Ipye”
“Myoyo Yanu Ipye”
“Mutabi batolo kubusungu, pele myoyo yanu ipye kukumanina Mwami milimo.”—ROM. 12:11.
1. Ino nkaambo nzi bana Israyeli ncobakali kutuula zipaizyo zyabanyama alimwi azipaizyo zimbi?
JEHOVA ulakukkomanina kulyaaba nkobacita babelesi bakwe kutondezya kuti balamuyanda alimwi balalibombya kulinguwe. Kaindi, wakali kutambula zipaizyo zyabanyama baindene-indene alimwi azipaizyo zimbi. Ibana Israyeli bakali kucita oobu kweelana a Mulawo wa Musa kutegwa balekelelwe zibi zyabo akutondezya kulumba. Mumbungano ya Banakristo, Jehova tayandi kuti tumupe zipaizyo zili boobu pe. Pele, mucaandaano 12 calugwalo ndwaakalembela Banakristo bana Roma, Paulo wakatondezya kuti andiswe tuleelede kupa zipaizyo. Atubone mbotukonzya kucita oobo.
Cipaizyo Cipona
2. Mbotuli Banakristo, ino mbuumi nzi mbotupona, alimwi ino eeci cibikkilizya nzi?
2 Amubale Ba-Roma 12:1, 2. Kumatalikilo aalugwalo lwakwe, Paulo wakatondezya kuti Ibanakristo bananike, bama Juda naa Bamasi, bakali kwaambwa kuti balasalala kubusyu bwa Leza akaambo kalusyomo lwabo ikutali akaambo kamilimo njobakali kucita. (Rom. 1:16; 3:20-24) Mucaandaano 12, Paulo wakapandulula kuti, Ibanakristo beelede kutondezya kulumba kwiinda kubelekela Leza. Kutegwa tucite boobo, tuyandika kubikkila maano. Akaambo kakutalondoka nkotwakakona, “mulawo wazibi awalufu” ulakonzya kutukatazya. (Rom. 8:2) Aboobo tweelede kusanduka, “kubukuluka mumuuya wakuyeeya” kwesu kwiinda mukucinca mbotuyeeya. (Ef. 4:23) Tatukonzyi kucinca tobeni pe, pele inga twacinca kuti twagwasyigwa amuuya wa Leza uusalala. Andiswe tweelede kubelesya ‘nguzu zyesu zyakuyeeya.’ Eeci caamba kuti tweelede kulyaandaanya anyika kutegwa “[t]utakozyanizigwi aziyanza zyaciindi ecino,” zyakutalilemeka, kulikondelezya kubyaabi alimwi akuyeeya kutaluzi.—Ef. 2:1-3.
3. Ino nkaambo nzi ncotucitila milimo ya Bunakristo?
3 Paulo alimwi utwaambila kuti tubelesye ‘nguzu zyesu zyakuyeeya’ kutegwa tuzyibe “makani ngaayanda Leza, makani mabotu aatambulika aalondokede.” Ino nkaambo nzi ncotubala Bbaibbele lyoonse, kuzinzibala kuyeeya nzyotubala, kupaila, kuunka kumiswaangano ya Bunakristo alimwi akutola lubazu mumulimo wakukambauka makani mabotu aa Bwami? Sena tulacita oobo akaambo kakuti baalu balatukulwaizya? Masimpe tulabalumba baalu akaambo kakutuyeezya kucita boobo, pele aaka takali nkakaambo katupa kucita zyintu eezyi. Tulacita milimo ya Bunakristo eeyi akaambo kakukulwaizyigwa amuuya uusalala kutegwa tutondezye kuti tulamuyanda Jehova. Kuyungizya waawo, tusyoma kuti notucita milimo eeyi tucita luyando lwa Leza. (Zek. 4:6; Ef. 5:10) Cilatukkomanisya kuzyiba kuti notupona buumi bwa Bunakristo, tulamukkomanisya Leza.
Zipego Zyamisyobo-misyobo
4, 5. Ino mbuti baalu Banakristo mbobeelede kubelesya zipego zyabo?
4 Amubale Ba-Roma 12:6-8, 11. Paulo wakaamba kuti “tulijisi [zipego] zyamisyobo misyobo mbuli luzyalo ndutwapegwa.” Zimwi zipego nzyaakaamba Paulo, mbuli kukombelezya abusololi, zijatikizya baalu Banakristo ibakulwaizyigwa kusololela ‘cabusungu.’
5 Paulo wakaamba kuti ibaalu beelede kusungwaala nobayiisya ‘anobakutauka’ mulimo wabo. Aawa Paulo naamba ‘kukutauka’ waamba mulimo uucitwa mumbungano naa “mubili omwe.” (Rom. 12:4, 5) Mulimo ooyu ulikozyenye ayooyo waambwa kulugwalo lwa Incito 6:4, kwalo ibaapostolo nkobaamba kuti: “Swebo tuyoojatisya kukukomba akumulimo wamakani.” Ino mulimo ooyu ubikkilizya nzi? Ibaalu Banakristo babelesya zipego zyabo kukulwaizya mbungano. Balatondezya kuti balabikkila maano ‘kukukutauka kwabo’ nobapa malailile aazwa mu Jwi lya Leza kumbungano, nobabala, kuvwuntauzya, kuyiisya akweembela butanga. Baalu beelede kubelesya zipego zyabo cabusungu akweembela mbelele ‘calumwemwe.’—Rom. 12:7, 8; 1 Pet. 5:1-3.
6. Ino mbuti mbotukonzya kutobela lulayo luli kulugwalo lwa Ba-Roma 12:11, ilugwalo lwamutwe wacibalo eeci?
6 Paulo alimwi wakaamba kuti: “Mutabi batolo kubusungu, pele myoyo yanu ipye kukumanina Mwami milimo.” Ikuti naa twabona kuti twatalika kulengaana mumulimo, tweelede kucinca mbotubala Bbaibbele alimwi tweelede kupaila lyoonse, kulomba kuti Jehova atupe muuya uusalala kutegwa tube basungu alimwi. (Lk. 11:9, 13; Ciy. 2:4; 3:14, 15, 19) Muuya uusalala wakabayumya-yumya Banakristo bakusaanguna akubapa kwaamba “milimo mipati ya-Leza.” (Inc. 2:4, 11) Mbubwenya buyo, andiswe ulakonzya kutupa kusungwaala mumulimo, ‘kupya mumoyo.’
Kulibombya Akulilesya
7. Ino nkaambo nzi ncotweelede kubeleka cakulibombya akulilesya?
7 Amubale Ba-Roma 12:3, 16. Kufwumbwa zipego nzyotujisi, twakapegwa akaambo ‘kaluzyalo’ lwa Jehova. Paulo alimwi wakaamba kuti: “Buzulizi bwesu buzwa kuli-Leza.” (2 Kor. 3:5) Aboobo tatweelede kulisumpula pe. Tweelede kuzyiba kuti icitupa kuti katucita kabotu mumulimo nkaambo kakuti Leza ulatuleleka, ikutali akaambo kakuti tuluuzi mulimo. (1 Kor. 3:6, 7) Kweelana amakani aaya, Paulo wakati: “Ndaambila boonse buyo bali kulindinywe, kuti muntu ataliyeeyi cakulisumpula kwiinda mbukweelede.” Tuyandika kulilemeka, kujana lukkomano akukkutila notubelekela Jehova. Nokuba boobo, ikulilesya naa kuzyiba mbazu nzyotulezya, kulakonzya kutulesya kulisumpula. Muciindi caboobo, tuyanda ‘kuyeeya cakulibatamika.’
8. Ino ncinzi cikonzya kutupa kuti ‘katutaliyeeyi tobeni kuti tuli basongo’?
8 Inga kwaba kufwubaala kuti twatalika kulidunda akaambo kamilimo njotucita. Ngu “Leza uumenya.” (1 Kor. 3:7) Paulo waamba kuti Leza nguwaabila “mweelwe walusyomo” kuli umwi aumwi mumbungano. Muciindi cakulisumpula, tweelede kuzyiba kuti abamwi balacita kweelena amweelwe walusyomo ndobajisi. Paulo wakayungizya kuti: “Amukalane amoyo womwe.” Mulugwalo lumbi, imwaapostolo utwaambila kuti: “Mutaciti cintu niciba comwe cabbivwe nanka cakulisumpula, pele umwi aumwi akati kanu alibombye mumoyo, akuyeeya kuti mweenzuma mubotu kwiinda ndime.” (Flp. 2:3) Kuyandika kulibombya akusolekesya kutegwa tuyeeye kuti aumwi mukwesu naa mucizyi mubotu naa kuti ucita kabotu kwiinda ndiswe muzyintu zimwi. Ikulibombya inga kwapa kuti ‘katutaliyeeyi tobeni kuti tuli basongo.’ Nokuba kuti imwi mikuli yamumbungano ilakonzya kupa kuti bamwi bazyibwe kapati, toonse tuyakukkomana kuba “babombe myoyo” notubeleka milimo iibonwa kuti taipi bulemu.—1 Pet. 5:5.
Lukamantano lwa Bunakristo
9. Ino nkaambo nzi Paulo ncaakakozyanisya Banakristo bananike kuzyizo zyamubili?
9 Amubale Ba-Roma 12:4, 5, 9, 10. Paulo ukozyanisya Banakristo bananike kuzyizo zyamubili akuti babelekela antoomwe a Mutwe wabo, Kristo. (Kol. 1:18) Ulabayeezya Banakristo bananike kuti mubili ulijisi zyizo zinji izibeleka milimo iindene-indene akuti “notuli banji, tuli mubili omwe muli-Kristo.” Mbubwenya oobo, Paulo wakakulwaizya Banakristo bananike ibaku Efeso kuti: “Aboobo tulakonzya kukula muziyanza zyoonse akujatana ayooyo uuli mutwe wesu, nkukuti Kristo. Kunsi kulinguwe mubili woonse mbuulungene akujatana mungo zyoonse nzyuubambilidwe, kubeleka kweelede kwacizo cimwi acimwi kulagwasya mubili kuti ukule akuliyaka muluyando.”—Ef. 4:15, 16.
10. Ino mbweendelezi nzi “[ba]mbelele zimwi” mbobeelede kuzyiba?
10 Nokuba kuti “[iba]mbelele zimwi” tabali baciinga camubili wa Kristo, balakonzya kwiiya zinji kucikozyanyo eeci. (Joh.10:16) Paulo waamba kuti Jehova “wakabika zintu zyoonse kunsi lyamaulu aa [Kristo], alimwi wakamubika kuti abe simutwe wazintu zyoonse kumbungano.” (Ef. 1:22) Mazuba aano, bambelele zimwi bali akati “[ka]zintu zyoonse” Jehova nzyaakabikka kuti zyeendelezyegwe a Mwanaakwe. Alimwi bali akati “[ka]zintu” Kristo nzyaakapa “muzike musyomesi uucenjede” kuti azyeendelezye. (Mt. 24:45-47) Aboobo, aabo balangila kuya kukkala aano anyika beelede kuzyiba kuti Kristo ngo Mutwe wabo alimwi beelede kulibombya kumuzike musyomesi uucenjede, ku Kabunga Keendelezya akubaalu mumbungano. (Heb. 13:7, 17) Eeci cipa kuti Banakristo bakamantane.
11. Ino kukamantana kwesu kuyeeme anzi, alimwi ino ndulayo nzi lumbi Paulo ndwaakapa?
11 Kukamantana kuli boobu kuyeeme akuyandana, “[i]caanzyo cabuumi bulondokede.” (Kol. 3:14) Mucaandaano 12 calugwalo lwa Ba-Roma, Paulo ulakakankaizya kaambo aaka, naamba kuti kuyandana kwesu takweelede kuba “[k]wakuupaupa ameso.” Eeci cipa kuti katulemekana. Imwaapostolo waamba kuti: “Amusungwaale kukulemekana.” Nokuba boobo, eeci tacaambi kuti tweelede kuciindizya buya kutondezya luyando. Tweelede kubona kuti mbungano ilasalala. Naakali kupa lulayo kujatikizya kuyandana, Paulo wakayungizya kuti: “Amusesemwe kububi, mukakatile kububotu.”
Amusamausye Beenzu
12. Ino ncinzi ncotukonzya kwiiya ku Banakristo bansiku bana Makedoniya mbobakali kusamausya beenzu?
12 Amubale Ba-Roma 12:13. Ikubayanda bakwesu kulakonzya kutupa kuti “[t]waabile basalali bacete” kweelana anzyobabulide alimwi anzyotukonzya kupa. Nokuba kuti tuli bacete, tulakonzya kwaaba nzyotujisi. Paulo naakalemba kujatikizya Banakristo baku Makedoniya, wakati: “Nikuba kuciindi ncibakali mukati kalusunko lwamapenzi mapati, alimwi bakali mubucete bunji, kukondwa kwabo kwakapaya akucita kuti buuya bwabo buvule. Ncobeni bakapa mbuli inguzu zyabo, ee, kwiinda inguzu zyabo, nkabela makani aya akazwa mumyoyo yabo beni. Bakatukumbila camoyo woonse kuti bazumizigwe kuba acaabilo camilimo eyi yakugwasya basalali [mu Judiya].” (2 Kor. 8:2-4) Nokuba kuti Banakristo bana Makedoniya bakali bacete, bakali baabi. Bakacibona kuti cakali kuyandika kwaabilana zyintu abakwesu baku Judiya.
13. Ino ‘kusamausya beenzu’ caamba nzi?
13 Mabala aakuti “amusamausye beenzu” akasandululwa kuzwa kumabala aa Chigiliki aamba kusaanguna kubweza ntaamu. Ibbaibbele lya The New Jerusalem lyaamba kuti: “Amujane nzila mbomukonzya kusamausya beenzu.” Tulakonzya kusamausya beenzu ikuti naa twabatamba kucakulya alimwi cilakkomanisya kuti eeci cacitwa caluyando. Ikuti naa katuli kumpela kucita oobo, tulakonzya kujana nzila zimbi mbotukonzya kusamausya beenzu. Pele kuti katutakonzyi kubatamba kucakulya, tulakonzya kubatamba kucibwantu naa tulyo tumbi ntotukonzya.
14. (a) Ino bbala lya Chigiliki lyakasandululwa kuti “kusamausya” lijisi mabala nzi obilo? (b) Notuli mumuunda, ino mbuti mbotukonzya kutondezya kuti tulababikkila maano bantu bazwa kumasi aambi?
14 Kusamausya kulabikkilizya ambotuzibona zyintu. Ibbala lya Chigiliki lyakasandululwa kuti “kusamausya” lijisi mabala obilo aamba “luyando” a “muzwakule” naa mweenzu. Ino tubabona buti beenzu naa bamuzwakule? Inzila imwi mbotukonzya kusamausya beenzu njakwiiya mwaambo umbi kutegwa katubakambaukila bantu bazwa kumasi aambi ibali mucilawo cambungano yesu. Pele akaambo kabukkale bwesu, tobamwi tulaalilwa kwiiya mwaambo umbi. Nokuba boobo, toonse tulakonzya kubagwasya bantu bazwa kumasi aambi kwiinda mukubelesya kabbuku kakuti Good News for People of All Nations ikajisi mulumbe wamu Bbaibbele mumyaambo minji. Sena kuli bubotu bumwi mbotujana kwiinda mukubelesya kabbuku aaka?
Kuba Aluzyalo
15. Ino mbuti Jesu mbwaakali cikozyanyo cibotu kumalailile aali ku Ba-Roma 12:15?
15 Amubale Ba-Roma 12:15. Lulayo lwa Paulo mulugwalo oolu inga lwaambwa mumajwi obilo akuti: Kuba aluzyalo. Tweelede kumuswiilila muntu naamba naa kubona zyintu zimukatazya naa zimukkomanisya akulibikka muciimo cakwe. Ikuti kaupya moyo, tulakonzya kulibonya kuti twatyompwa naa twakkomana. Nobakapiluka basikwiiya ba Kristo kuzwa kukukambauka kabakkomene akwaamba milimo mibotu njobakacita, Jesu “wakasekelela mu-Muuya Uusalala.” (Lk. 10:17-21) Kulubazu lumwi, ‘Jesu wakalila abantu bakali kulila’ ciindi mulongwe wakwe Lazalo naakafwa.—Joh. 11:32-35.
16. Ino mbuti mbotukonzya kutondezya kuti tuli aluzyalo, alimwi ino mbaani bayandika kapati kucita oobo?
16 Tuyanda kutobela cikozyanyo ca Jesu caluzyalo. Iciindi Munakristoma nakkomana andiswe tweelede kutondezya kuti twakkomana. Mbubwenya buyo, tweelede kubafwida luzyalo bakwesu abacizyi nobali mumapenzi. Ikubaswiilila basyomima batyompedwe nobatwaambila zibakatazya kulakonzya kubakatalusya. Zimwi ziindi tuleetezyegwa cakuti twalila buya. (1 Pet. 1:22) Ikapati baalu beelede kwaatobela malailile ngaakapa Paulo aaluzyalo.
17. Ino ncinzi ncotwaiya mucaandaano 12 kulugwalo lwa Ba-Roma, alimwi ino ncinzi ncotuyakulanga-langa mucibalo citobela?
17 Tupango ntutwalanga-langa mulugwalo lwa Ba-Roma caandaano 12 twatugwasya mbotukonzya kulilemeka Tobanakristo alimwi ambotukonzya kuyanzana abakwesu. Mucibalo citobela tulabandika tupango twasyaala mucaandaano eeci, itwaamba mbotukonzya kuyanzana abantu batali mumbungano ya Banakristo kubikkilizya abaabo bakaka mulumbe wesu alimwi abaabo batupenzya.
Kwiinduluka
• Ino mbuti mbotutondezya kuti ‘myoyo yesu ilapya’?
• Ino nkaambo nzi ncotweelede kubelekela Leza cakulibombya akulilesya?
• Ino muunzila nzi mbotukonzya kutondezya kuti tulabafwida luzyalo bakwesu?
[Mibuzyo yaciiyo]
[Zifwanikiso izili apeeji 4]
Ino nkaambo nzi ncotucitila milimo eeyi ya Bunakristo?
[Cifwanikiso icili apeeji 6]
Ino mbuti toonse mbotukonzya kubagwasya bantu bazwa kumasi aambi kwiiya makani aa Bwami?