Sena ‘Mwakasimpa Akuzyatila Antalisyo’?

SENA mwakabona kale cisamu cipati mbocicita kuti kakuli guwo? Cisamu eeci cilakonzya kuwa, pele cilaliyumya. Ino nkaambo nzi? Akaambo kakuti cilijisi miyanda miyumu alimwi iiya aansi kapati mubulongo. Tulakonzya kuba mbuli cisamu eeci. Ikuti katuli mumapenzi mapati, andiswe tulakonzya kuliyumya ikuti ‘katusimpidwe akuzyatila antalisyo.’ (Ef. 3:14-17, NW) Ino intalisyo eeyi ninzi?

Ijwi lya Leza lyaamba kuti “Jesu Kristo mwini ndibbwe lyakuciswi” cambungano ya Banakristo. (Ef. 2:20; 1 Kor. 3:11) Mbotuli Banakristo, tulakulwaizyigwa ‘kweenda mulinguwe, katusimpidwe, akuyakwa mulinguwe alimwi akuliyumya mumakani aalusyomo.’ Ikuti twacita oobu, tuya kuzumanana kuliyumya mumasunko oonse aasunka lusyomo lwesu—kubikkilizya ayaayo aaboola kwiinda ‘mukutuyunga’ “[a]makani aatawo” aabantu.—Kol. 2:4-8.

“Busasa Abulamfu, Abulamfu Bwamunyika Abulamfu Bwakujulu”

Pele ino mbuti mbotukonzya ‘kusimpa akuzyatila antalisyo’? Nzila yomwe iiyandika kapati kutegwa miyanda yesu yuunke aansi kapati njakwiiya Jwi lya Leza ilyakasololelwa amuuya. Jehova uyanda kuti swebo tumvwisye, “antoomwe abasalali boonse, mbububede busasa abulamfu, abulamfu bwamunyika abulamfu bwakujulu” ibwakasimpe. (Ef. 3:18) Aboobo, kunyina Munakristo iweelede kukkutila akaambo kakuzyiba buyo “milao mitete yakusaanguna” iili mu Jwi lya Leza. (Heb. 5:12; 6:1) Muciindi caboobo, aumwi wesu weelede kuzumanana kwiiya kutegwa amvwisye kasimpe kamu Bbaibbele.—Tus. 2:1-5.

Pele eeci tacaambi kuti tuyandika kuba aluzyibo lunji kutegwa tusimpe akuzyata mukasimpe. Kayi Saatani awalo ulizizyi zyoonse zilembedwe mu Bbaibbele. Nzinji iziyandika kucitwa. Tuyandika “kuziba luyando lwa-Kristo ilwiinda luzibo loonse.” (Ef. 3:19) Nokuba boobo, ikuti twaiya Jwi lya Leza akaambo kakuti tulamuyanda Jehova alimwi akasimpe kakwe, tulakonzya kuyungizya luzyibo akuyumya lusyomo lwesu.—Kol. 2:2.

 Amubone Ncomukonzya Kumvwa

Lino, inga mwatalika kulanga-langa mbomukonzya kutumvwa twaambo tumwi ituli mu Bbaibbele. Kucita boobu kulakonzya kumugwasya kuba basungu nomucita ciiyo canu ca Bbaibbele. Mucikozyanyo, amubale tupango twakusaanguna mulugwalo Paulo ndwaakalembela bana Efeso. (Amubone kabbokesi kakuti:  “Lugwalo lwa Paulo Ndwaakalembela Ba-Efeso.”) Mwamana kubala tupango ootu, amulibuzye kuti: ‘Sena ndilatumvwisya twaambo tulembedwe mumabala aacengeme mulugwalo oolu iluli mukabbokesi?’ Atutulange-lange, akamwi kalikke.

Kusalwa “Kuzwa Kumatalikilo Aanyika”

Paulo wakalembela basyominyina kuti: “[Leza wakatusala] kuti tube bana bakwe mwini.” Masimpe, Jehova wakabona kuti cakali kuyandika kusala bantu kuzwa munyika kuti bakabe bana bakwe balondokede akubabikka mumukwasyi wakwe wakujulu. Bana aaba ba Leza baya kulela kabali bami abapaizi antoomwe a Kristo. (Rom. 8:19-23; Ciy. 5:9, 10) Saatani naakali kukazya bulelo bwa Jehova, wakaamba kuti bantu boonse mbaakalenga Leza bali atumpenda. Aboobo, cileelela kuti Jehova wakasala bantu kuzwa munyika kutegwa abalo bakatole lubazu mukugusya bubi boonse, kubikkilizya a Saatani Diabolosi, iwakatalisya bubi. Pele, Jehova tanaakasalila limwi bantu mbaakali kuya kubelesya. Muciindi caboobo, Leza wakasala kuti kuya kuba kakamu, naa kabunga kabantu ibaya kulela a Kristo kujulu.—Ciy. 14:3, 4.

Ino “[ni]nyika” iili njaakali kwaamba Paulo naakalembela Banakristonyina kuti bakasalwa kabali kakamu “kuzwa kumatalikilo  aanyika”? Tanaakali kwaamba ciindi Leza kataninga lenga nyika naa bantu. Eeci tacikonzyi kweelana amulawo wakwe. Ikuti Leza naakazyibila limwi kuti Adamu a Eva baya kubisya kabatana lengwa, naatakabapa mulandu. Aboobo, ino ndilili Leza naakabona kuti kwakali kuyandika kwaamana mapenzi ngobakatalisya ba Adamu a Eva nobakasala kubelekela aantoomwe a Saatani mukuzangila Leza abweendelezi bwakwe? Jehova wakacita oobu nobakabisya ibazyali besu bakusaanguna, pele inyika yabantu batalondokede ibakonzya kunununwa, kaitanaba.

“Mbubonya Mbuli Buvubi Bwaluzyalo Lwakwe”

Ino nkaambo nzi Paulo ncaakaambila kuti bubambe ibulembedwe mutupango twakusaanguna mulugwalo lwa Ba-Efeso bwakacitika “mbubonya mbuli buvubi bwaluzyalo lwa [Leza]”? Wakaamba boobu kutondezya kuti Jehova tanaakasinikizyigwa kunununa bantu basizibi.

Akaambo kakuti tatulondokede, kunyina muntu uukonzya kwaamba kuti ndileelela kunununwa. Aboobo, akaambo kakuti Jehova ulatuyanda, wakabikka bubambe bwaalubazu bwakutunununa. Kweelana ambwaakaamba Paulo, akaambo kakuti tuli bantu batalondokede alimwi balubizya lyoonse, icinunuzyo cesu nduzyalo buyo lwa Leza.

Makani Aasisidwe Aamakanze aa Leza

Kumatalikilo Leza tanaakaamba mbwaakali kuya kwaamana mapenzi ngaakatalisya Saatani. Akali “makani aasisidwe.” (Ef. 3:4, 5) Kumbele, noyakatalika mbungano ya Banakristo, Jehova wakayubununa mbwaakali kuya kuzuzikizya makanze aakwe kujatikizya bantu alimwi anyika. Paulo wakapandulula kuti: “[Nocak]asika buyo ciindi ceelede,” Leza wakabikka “mitwe yazintu zyoonse,” naa bubambe bwakweendelezya zyintu ibuya kupa kuti zilenge zyoonse ziyeeya zikakamantane.

Cibeela cakusaanguna mukukamantanya ooku cakatalika lya Pentekoste 33 C.E. ciindi Jehova naakatalika kubunganya baabo ibaya kulela a Kristo kujulu. (Inc. 1:13-15; 2:1-4) Cibeela cabili ciyakuba eelyo aakubunganya baabo ibaya kukkala muparadaiso aanyika mu Bwami bwa Mesiya. (Ciy. 7:14-17; 21:1-5) Ibbala lyakuti “mitwe yazintu” talyaambi Bwami bwa Mesiya, akaambo kakuti Bwami oobu bwakatalika mu 1914. Muciindi caboobo, lyaamba bubambe naa mbwaakeendelezya zyintu Leza kutegwa azuzikizye makanze aakwe aakukamantanya zilenge zyoonse.

“Kumakani Aabusongo Amube Bazonokede”

Cakutadooneka, kuba acilengwa cibotu cakwiiya Bbaibbele kuya kumugwasya kumvwisya “mbububede busasa abulamfu, abulamfu bwamunyika abulamfu bwakujulu” ibwakasimpe. Nokuba boobo, akaambo kakuti bantu boonse bajisi bubi mazuba aano, eeci cipa kuti Saatani abatolwaazye kwiiya Bbaibbele. Mutamulekeli kuti amutolwaazye. Amubelesye “busongo” mbwaakamupa Leza kutegwa “musime mukuyeeya kwanu.” (1 Joh. 5:20; 1 Kor. 14:20, BT) Mweelede kukazyiba kaambo ikamupa kusyoma nzyomusyoma alimwi akuti lyoonse mulakonzya ‘kubapanduluda bantu ncomuzisyomena.’—1 Pet. 3:15.

Amuyeeye buyo kuti mwakaliko ku Efeso ciindi lugwalo lwa Paulo nolwakasaanguna kubalwa. Cakutadooneka, majwi aaya naakamukulwaizya kuba “aluzibo lwa-Mwana a-Leza.” (Ef. 4:13, 14) Aboobo, imajwi aa Paulo aaya aakasololelwa amuuya ayelede kumukulwaizya mbubwenya amazuba aano. Kumuyandisya Jehova akuba aluzyibo lwa Jwi lyakwe kuya kumugwasya kuzumanana ‘kusimpa akuzyata aantalisyo’ ya Kristo. Kwiinda mukucita boobu, muya kuzumanana kuliyumya mumasunko aali oonse Saatani ngamuletela, kaatana kusika mamanino aanyika eeyi mbyaabi.—Int. 1:1-3; Jer. 17:7, 8.

Kabbokesi/[Cifwanikiso icili apeeji 27]

 “Lugwalo lwa Paulo Apostolo Ndwaakalembela Ba-Efeso”

“Alumbwe Leza Wisi wa-Mwami wesu Jesu Kristo, iwakatulongezya azilongezyo zyoonse zyamuuya mumasena aakujulu mutukede muli-Kristo, mbubonya mbuli mbwaakatusala mulinguwe kuzwa kumatalikilo aanyika, kuti tusalale, tutabi akampenda nikaba komwe kumeso aakwe. Nkaambo wakatuyandisya, aboobo wakatukanzila kuti tube bana bakwe mwini kujanza lya-Jesu Kristo, nkabela ncobeni obu bukanze mbwaakalita bwacitya kuti bulemekwe loko bulemu bwaluzyalo lwakwe ndwaakatufwida mu-Muyandwi wakwe. Mulinguwe mumonya mutujene lunununo nkaambo kabulowa bwakwe, lulekelelo lwamilandu yesu, mbubonya mbuli buvubi bwaluzyalo lwakwe, ndwaakatuvuzizya maanu oonse amancenjela, akutucita kuti tuzibe makani aasisidwe aabukanze bwamoyo wakwe. Lulito lwakwe ndwaakalita kalekale mulinguwe ndoolu. Wakabamba kuti, casika buyo ciindi ceelede, mitwe yazintu zyoonse, niziba zintu zyamujulu niziba zintu zyaansi, ibikwe antoomwe muli-Kristo.”—Ef. 1:3-10.