Amuukkomanine Mulimo Ngomujisi Mumbungano

“Leza wakabika zizo zyoonse mumubili, cimwi acimwi, mbuli mbwaakayanda.”—1 KOR. 12:18.

1, 2. (a) Ino ncinzi citondezya kuti bantu boonse mumbungano balakonzya kuba amulimo ngobakonzya kukkomanina? (b) Ino mibuzyo nzi itiilangwe-langwe mucibalo eeci?

KUZWA kumazuba aabana Israyeli bansiku, imbungano nenzila njabelesya Jehova ikubalanganya akubapa malailile bantu bakwe. Mucikozyanyo, bana Israyeli nobakazunda munzi wa Ai, Joshua “wakabala majwi oonse aamulao, majwi aakulongezya amajwi aakutuka, oonse aalembedwe mubbuku lyamulao . . . kumeso aambungano yaba-Israyeli.”—Jos. 8:34, 35.

² Mumwaanda wamyaka wakusaanguna C.E., mwaapostolo Paulo wakaambila mwaalu Munakristo Timoteo kuti mbungano ya Banakristo yakali “ŋanda ya-Leza” akuti “ngomusemu, alimwi ncecisiko calusinizyo.” (1 Tim. 3:15) “Ŋanda” ya Leza mazuba aano nimbungano ya Banakristo bakasimpe iili munyika yoonse. Mucaandano 12 calugwalo lwakwe lwakusaanguna ndwaakalembela bana Korinto, Paulo ukozyanisya mbungano kumubili wamuntu. Waamba kuti nokuba kuti cizo acimwi cibeleka mulimo wiindene, zyoonse zilayandika kapati. Paulo wakalemba  kuti: “Leza wakabika zizo zyoonse mumubili, cimwi acimwi, mbuli mbwaakayanda.” Alimwi waamba kuti “azyalo zizo ezyo zyamubili nzituyeeya kuti tazilemekeki, nzizyonya nzituinda kusamika cabulemu.” (1 Kor. 12:18, 23) Aboobo, muŋanda ya Leza taaku muntu uujisi mulimo wiinda milimo njobabeleka Banakristonyina. Nkuti buyo milimo iliindene. Mpoonya, ino mbuti mbotukonzya kuba amulimo mumbunga ya Leza alimwi akuukkomanina? Ino ntwaambo nzi itukonzya kuujatikizya mulimo ngotujisi mumbungano? Ino mbuti mbotukonzya kupa kuti ‘bantu boonse babone kukomena’ naa kuyaambele kwesu?—1 Tim. 4:15.

Ino Mbuti Mbotukonzya Kuukkomanina Mulimo Ngotujisi?

3. Ino ninzila nzi imwi yakuba amulimo mumbungano akutondezya kuti tulaukkomanina?

³ Nzila imwi yakuba amulimo mumbungano akutondezya kuti tulaukkomanina nkubelekela antoomwe “[a]muzike musyomesi uucenjede” a Kabunga kakwe Keendelezya. (Amubale Matayo 24:45-47.) Tweelede kubona mbotutobela busolozi buzwa kuciinga camuzike. Mucikozyanyo, kwamyaka iili mbwiibede, twatambula malailile kujatikizya kusama akulibamba, kulikondelezya, alimwi akutabelesya kabotu Intaneti. Sena tulaatobela malailile mabotu aaya kutegwa tukwabililwe kumuuya? Ino mbuti lulayo lujatikizya kuba abubambe bwakukomba mumukwasyi lyoonse? Sena twakalutobela lulayo oolu akubikka buzuba bwakuti katukomba mumukwasyi? Ikuti katutakwete naa kukwatwa, sena tulacibelesya ciindi eeci kwiiya Bbaibbele? Jehova uyakutulongezya swebo aumwi kumugama alimwi amikwasyi yesu ikuti katutobela busolozi bwaciinga camuzike.

4. Ino ncinzi ncotweelede kubikkila maano notusala zyakucita?

⁴ Bamwi inga bayeeya kuti Munakristo aumwi weelede kulisalila mutwaambo tujatikizya kulikondelezya alimwi akusama akulibamba. Pele, Imunakristo uulyaabide uukkomanina mulimo wakwe mumbungano, ciindi nasala cakucita teelede kubikkila buyo maano kuzyintu nzyayanda walo. Weelede kubikkila maano kapati mbwazibona zyintu Jehova kweelana ambolyaamba Jwi lyakwe Ibbaibbele. Mulumbe uuli mu Bbaibbele weelede kuba ‘lampi kuzituta zyesu, alimwi amumuni kunzila yesu.’ (Int. 119:105) Alimwi tweelede kubona zyintu nzyotusala mbozyuujatikizya mulimo wesu wakukambauka ambozibajatikizya bantu, ibali mumbungano abaabo batali mumbungano.—Amubale 2 Ba-Korinto 6:3, 4.

5. Ino nkaambo nzi ncotuteelede kuyanda kulyeendelezya?

⁵ “Muuya uubeleka sunu mumyoyo yabana bakasampusampu” ulajanika koonse mbuli muya ngotuyoya. (Ef. 2:2) Imuuya ooyu ulakonzya kutupa kuyeeya kuti tatuyandiki kusololelwa ambunga ya Jehova. Masimpe tatuyandi kuba mbuli Diotrefe, iwatakali kuyanda ‘kutambula’ mwaapostolo Johane cabulemu. (3 Joh. 9, 10) Tatweelede kuyanda kulyeendelezya. Tatweelede kwaamba naa kucita cintu cimwi icitondezya kuti tatubaswiilili aabo Jehova mbabelesya kutusololela mazuba aano. (My. 16:1-3) Muciindi caboobo, tweelede kucikkomanina coolwe ncotujisi cakubelekela antoomwe aciinga camuzike. Masimpe tweelede kubaswiilila aabo batusololela mumbungano zyesu alimwi akulibombya kuli mbabo.—Amubale Ba-Hebrayo 13:7, 17.

6. Ino nkaambo nzi ncotweelede kulingula bukkale bwesu?

⁶ Aimbi nzila njotutondezya kuti tulaukkomanina mulimo ngotujisi mumbungano nkwiinda mukulingula bukkale bwesu alimwi ‘akulemeka mulimo wesu’ akupa bulemu kuli Jehova. (Rom. 11:13) Bamwi balakonzya kuba bapainiya baciindi coonse. Bamwi balabeleka milimo yaalubazu yaciindi coonse kabali bamisyinali, balangizi beendeenda alimwi abamikwasyi ya Bbeteli munyika yoonse. Bakwesu abacizi banji balagwasyilizya mukuyaka aa  Maanda aa Bwami. Bunji bwabantu ba Jehova balabeleka kapati kugwasya mikwasyi yabo kuti izumanane kumubelekela alimwi balatola lubazu mumulimo wakukambauka ansondo. (Amubale Ba-Kolose 3:23, 24.) Tulakonzya kuba alusyomo lwakuti notulyaaba mumulimo wa Leza akumubelekela camoyo woonse, tulijisi mulimo lyoonse mumbungano yakwe.

Twaambo Itujatikizya Mulimo Ngotujisi Mumbungano

7. Amupandulule bukkale bwesu mbobukonzya kuujatikizya mulimo ngotujisi mumbungano.

⁷ Cilayandika kapati ikulingula bukkale bwesu akaambo kakuti bulazijatikizya nzyotukonzya kucita mumbungano. Mucikozyanyo, mulimo ngwajisi mukwesu mumbungano uliindene amulimo ngwajisi mucizyi. Ciimo, buumi bwakwe alimwi atwaambo tumwi buyo azyalo zilakonzya kuzijatikizya zyintu muntu nzyakonzya kucita mumbungano ya Jehova. Lugwalo lwa Tusimpi 20:29 lwaamba kuti: “Bulemu bwabakubusi ninguzu zyabo, pele kweebeka kwabapati nimvwi zyabo.” Bana ibali mumbungano balakonzya kucita zinji mumulimo akaambo kanguzu zyabukubusi nzyobajisi kakuli bacembeede balaigwasya kapati mbungano akaambo kabusongo alimwi aluzyibo ndobajisi. Alimwi tweelede kuzyiba kuti cintu cili coonse ncotukonzya kucita mumbunga ya Jehova, tulacicita akaambo kaluzyalo lwakwe.—Inc. 14:26; Rom. 12:6-8.

8. Ino zyintu nzyotuyanda zicijatikizya buti cotucita mumbungano?

⁸ Cikozyanyo cabacizyi banabakwabo bobilo cilatondezya kaambo kambi ikajatikizya mulimo wesu mumbungano. Boonse bakamanizya cikolo. Bazyali babo bakabakulwaizya kuti baakumanizya cikolo bakatalike mulimo wabupainiya bwaciindi coonse. Nobaamanizya cikolo, umwi watalika bupainiya, kakuli umwi watalika kubeleka mulimo wakumubili. Ino ncinzi capa kuti baindane? Nzyintu nzyobayanda. Aumwi wacita ncaakali kuyanda kucita. Sena oobu tabusyi mbotwakacita andiswe? Tweelede kuyeeya nzyotuyanda kucita mumulimo wa Leza. Sena inga twayungizya ciindi ncotubeleka mumulimo, nokuba kuti eeci kaciyanda kuti tucince bukkale bwesu?—2 Kor. 9:7.

9, 10. Ino ncinzi ncotweelede kucita ikuti katutajisi makanze mabotu aakucita zinji mumulimo wa Jehova?

⁹ Ino mbuti ikuti katutajisi makanze akucita zinji mumulimo wa Jehova akuti twiinzya buyo mulawo kutegwa tukkwanye mweelwe wamawoola uuyandika mumulimo wambungano? Mulugwalo ndwaakalembela bana Filipi, Paulo waamba kuti: “Ngu-Leza uubeleka mumyoyo yanu, mbuli mbwayanda, akumupa inguzu zyoonse nzimubula niziba zyakukanza niziba zyakucita.” Inzya, Jehova ulakonzya kupa kuti tube amakanze aakucita zyintu alimwi akuba aluyandisyo.—Flp. 2:13; 4:13.

¹⁰ Sena tatweelede kulomba Jehova kutegwa atugwasye kuba aluyandisyo lwakucita kuyanda kwakwe? Mwami Davida wa Israyeli yansiku wakacita mbubwenya oobu. Wakapaila kuti: “Kondizibya inzila zyako, O Jehova; Kondiiyisya myeendelo yako. Kondeenzya mulusinizyo lwako, undiiyisye, nkaambo nduwe Leza walufutuko lwangu; Buzuba boonse ndakulangila.” (Int. 25:4, 5) Inga twacita  mbubwenya andiswe kwiinda mukupaila kuti Jehova atugwasye kuba aluyandisyo lwakucita zyintu zimukkomanisya. Notuzinzibala kuyeeya Jehova Leza a Mwanaakwe mbobalimvwa kujatikizya nzyotucita mumulimo, tulakulwaizyigwa kubalumba. (Mt. 26:6-10; Lk. 21:1-4) Ikulumba ooku kulatupa kuti tumulombe Jehova kuti atugwasye kuba aluyandisyo lwakuyaambele kumuuya. Musinsimi Isaya ulatupa cikozyanyo cambotweelede kucita. Naakamvwa Jehova kabuzya kuti: “Ino nguni ngunti tume? Nguni uukonzya kutwiinkila?” musinsimi wakaingula kuti: “Mpendi! Unditume mebo!”—Is. 6:8.

Ino Mbuti Mbotukonzya Kuyaambele?

11. (a) Ino nkaambo nzi bakwesu ncobayandika kusika azyeelelo zyakuba amikuli mumbunga? (b) Ino ncinzi mukwesu ncakonzya kucita kutegwa ayelele kupegwa mikuli mumbungano?

¹¹ Akaambo kabasikumwaya ibali 289,678 ibakabbapatizyigwa munyika yoonse mumwaka wamulimo wamu 2008, ibakwesu balayandika kapati kutegwa kabeendelezya. Ino mbuti mukwesu mbwaayelede kucita kubwiite oobu? Mubufwaafwi inga twaamba kuti, weelede kusika azyeelelo ziyandika kubakutausi abaalu izyaambwa mu Magwalo. (1 Tim. 3:1-10, 12, 13; Tit. 1:5-9) Ino mbuti mukwesu mbwakonzya kusika azyeelelo zyamu Magwalo? Ulakonzya kucita oobo kwiinda mukutola lubazu cabusungu mumulimo wakukambauka, kulanganya milimo njapedwe mumbungano, kubeleka canguzu kutegwa kaingula kabotu lyamiswaangano ya Bunakristo alimwi akwiinda mukubabikkila maano kapati basyominyina. Ikuti wacita oobu utondezya kuti ulaukkomanina mulimo ngwajisi mumbungano.

12. Ino mbuti bakubusi mbobakonzya kutondezya kuti mbasungu mukasimpe?

¹² Ino ncinzi bakwesu, ikapati bakubusi, ncobakonzya kucita kutegwa babelesyegwe mumbungano? Balakonzya kusolekesya kuba “abusongo bunji bwakumvwisya makani aamuuya” kwiinda mukubala Bbaibbele. (Kol. 1:9) Kubala Jwi lya Leza cabusungu akutola lubazu mumiswaangano yambungano kulakonzya kubagwasya kucita oobo. Alimwi balakonzya kusika azyeelelo kwiinda mukusolekesya kutegwa beelele kunjila “[a]mulyango mupati wakucita milimo” iindene-indene yaciindi coonse. (1 Kor. 16:9) Ikucita mulimo wa Jehova cilakkomanisya alimwi cipa kuti tulongezyegwe.—Amubale Mukambausi 12:1.

13, 14. Ino muunzila nzi bacizyi mbobakonzya kutondezya kuti balaukkomanina mulimo wabo mumbungano?

¹³ Abalo bacizyi balakonzya kutondezya kuti balakkomana kuba acoolwe cakuzuzikizya caambwa ku Intembauzyo 68:11, nkotubala kuti: “Mwami watuma inkombe; Banakazi baikanana ninkamu impati.” Inzila yomwe  bacizyi mbobatondezya kuti balaukkomanina mulimo ngobajisi mumbungano njakutola lubazu mumulimo wakugwasya bantu kuba basikwiiya. (Mt. 28:19, 20) Aboobo, kwiinda mukutola lubazu mumulimo wamumuunda akulyaaba kucita mulimo ooyu, ibacizyi batondezya kuti balaukkomanina mulimo wabo mumbungano.

¹⁴ Naakalembela Tito, Paulo wakati: “Bakaintu bapati mbubonya, babe aziwa zyabulemu, . . . babe bafundisi babululami, kuti bafundisye bakaintu bacili bana kuyanda balumi babo akuyanda bana babo, balibatamike, akusalala, akukutauka kabotu mumaanda aabo, kabasamauka, akumvwa balumi babo, kuti makani aa-Leza atasampaulwi.” (Tit. 2:3-5) Eelyo kaka bacizyi basimide kumuuya balakonzya kukulwaizya mumbungano! Kwiinda mukulemeka bakwesu ibasololela alimwi akusama kabotu akulibamba alimwi akusala zyakulikondelezya, bapa cikozyanyo cibotu kuli bamwi alimwi batondezya kuti balaukkomanina mulimo wabo mumbungano.

15. Ino mucizyi utakwetwe inga wacita buti kutegwa katalendelelwi?

¹⁵ Zimwi ziindi cilamukatazya mucizyi uutakwetwe kubona mulimo ngwajisi mumbungano. Mucizyi umwi iwakalimvwa boobu wakati: “Ikuti kotakwetwe zimwi ziindi ulalendelelwa.” Naakabuzyigwa kuti aambe cimugwasya kuti aliyumye, wakati: “Ikupaila akubala kulandigwasya kapati. Ndilabala makani aamba mbwandibona Jehova. Mpoonya ndilagwasya bamwi mumbungano. Eeci cilandigwasya kuti kandiyeeya bamwi muciindi cakulibikkila buyo maano ndemwini.” Kweelana a Intembauzyo 32:8, Jehova wakaambila Davida kuti: “Njookweenzya kukubika liso lyangu alinduwe.” Masimpe, Jehova ulamubikkila maano mubelesi aumwi kubikkilizya abacizyi batakwetwe, alimwi ulabagwasya boonse kubona mulimo ngobajisi mumbungano.

Amuzumanane Kubeleka

16, 17. (a) Ino nkaambo nzi ncocili camaano kuzumina kuba kumbunga ya Jehova? (b) Ino mbuti mbotukonzya kuzumanana kuba abusena mumbunga ya Jehova?

¹⁶ Jehova wakabasala babelesi bakwe boonse kuti babe acilongwe anguwe. Jesu wakaamba kuti: “Takukwe muntu uukonzya kuza kulindime Taata uwakandituma atamukwela.” (Joh. 6:44) Akati katuulunzuma twabantu bali anyika, Jehova wakatusala swebo kuti tube akati kabaabo bali mumbungano yakwe mazuba aano. Twakacita kabotu ikuzumina. Eeci capa kuti katukkomana. Eelyo kaka tulikkomene akaambo kakuba amulimo mumbungano!

¹⁷ Sintembauzyo wakati: “O Jehova, ndayandisya mokede muŋanda yako.” Alimwi wakati: “Cituta cangu niciimvwi mubusena bubambasene, ndatembaula Jehova akati kambungano.” (Int. 26:8, 12) Leza ulijisi busena bwamuntu aumwi mumbunga yakwe. Kwiinda mukuzumanana kusololelwa a Leza alimwi akubeleka mulimo wakwe, tulakonzya kuzumanana kuba abusena mumbunga ya Jehova.

Sena Muciyeeyede?

• Ino nkaambo nzi ncocili camaano kwaamba kuti Banakristo boonse balijisi mulimo mumbungano?

• Ino mbuti mbotutondezya kuti tulaukkomanina mulimo ngotujisi mumbungano?

• Ino ntwaambo nzi tukonzya kujatikizya mulimo wesu mumbungano?

• Ino mbuti Banakristo boonse, ibakubusi alimwi abapati, mbobakonzya kutondezya kuti balaukkomanina mulimo wabo mumbungano?

[Mibuzyo yaciiyo]

[Zifwanikiso izili apeeji 16]

Ino mbuti bakwesu mbobakonzya kweelela kuba amikuli mumbungano?

[Cifwanikiso icili apeeji 17]

Ino mbuti bacizyi mbobakonzya kutondezya kuti balaukkomanina mulimo ngobajisi mumbungano?