Ino Mipailo Yanu Itondezya Nzi Kujatikizya Ndinywe?
Ino Mipailo Yanu Itondezya Nzi Kujatikizya Ndinywe?
“Webo ooswiilila zikombyo, bantu boonse bayoosika kulinduwe.”—INT. 65:2.
1, 2. Ino nkaambo nzi babelesi ba Jehova ncobali alusyomo nobapaila kuli nguwe?
JEHOVA ulaswiilila mipailo yababelesi bakwe boonse basyomeka. Tulasyoma kuti ulatuswiilila. Noliba leelyo tuulunzuma twa Bakamboni ba Jehova nobapaila kuli Leza aciindi comwe, ulabaswiilila boonse.
2 Kali aalusyomo lwakuti Leza ulamvwa mipailo yakwe, sintembauzyo Davida wakaimba kuti: “Webo ooswiilila zikombyo, bantu boonse bayoosika kulinduwe.” (Int. 65:2) Mipailo ya Davida yakaingulwa akaambo kakuti wakali mukombi wa Jehova uusyomeka. Tweelede kulibuzya kuti: ‘Sena mipailo yangu ilatondezya kuti ndilamusyoma Jehova alimwi akuti ndilabubikkila maano bukombi busalala? Ino mipailo yangu itondezya nzi kujatikizya ndime?’
Katulibombya Notupaila Kuli Jehova
3, 4. (a) Notupaila kuli Leza, ino tweelede kuba muciimo nzi? (b) Ino ncinzi ncotweelede kucita ikuti ‘mizeezo yesu’ yatukatazya akaambo kacibi cipati ncotwakacita?
3 Kutegwa Leza aiswiilile mipailo yesu, tweelede kulibombya notupaila. (Int. 138:6) Tweelede kumulomba Jehova kuti atulingule mbuli mbwaakacita Davida naakaimba kuti: “Undilingule, O Leza, uzibe moyo wangu. Undisunke, uzibe miyeeyo yangu. Bona na muli inzila imbi mulindime; undeenzye munzila iitamani.” (Int. 139:23, 24) Tatweelede buyo kupaila, pele alimwi tweelede kulibombya Leza natulingula kwiinda mu Jwi lyakwe. Jehova ulakonzya ‘kutweenzya munzila iitamani,’ ikutugwasya kutobela nzila iitola kubuumi butamani.
4 Ino mbuti ikuti ‘mizeezo yesu’ yatukatazya akaambo kacibi cipati ncotwakacita? (Amubale Intembauzyo 32:1-5.) Ikusola kulilubya-lubya cilakonzya kututyompya mbubwenya mbuli cisamu mbociyuma icilimo akaambo kakupya kapati. Davida wakapenga kapati mumoyo alimwi kulangilwa kuti wakaciswa akaambo kacibi ncaakacita. Pele naakapaila kuli Leza, kulyaambilila cibi cakwe, wakalimvwa kwaanguluka. Amuyeeye buyo mbwaakakkomana naakamvwa kuti Jehova ‘wamulekelela milandu yakwe.’ Kupaila kuli Leza kulomba kulekelelwa kulakonzya kupa kuti muntu alimvwe kwaanguluka, alimwi lugwasyo lwabaalu Banakristo lulakonzya kupa kuti sikubisya apone kumuuya.—Tus. 28:13; Jak. 5:13-16.
Katumulomba Leza Akumulumba
5. Ino kumukombelezya Jehova caamba nzi?
5 Ikuti naa twalibilika akaambo kapenzi limwi, tweelede kutobela lulayo lwa Paulo lwakuti: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza.” (Flp. 4:6) Kukombelezya caamba kulomba cakulibombya. Tweelede kulomba Jehova kuti atugwasye alimwi akutusololela ikapati notuli muntenda.
6, 7. Ino nkaambo nzi ncotweelede kubikkilizya kulumba mumipailo yesu?
6 Ikuti katupaila buyo ciindi notuyanda cintu, ino eeci inga catondezya nzi kujatikizya cilongwe cesu a Jehova? Paulo wakaamba kuti tweelede kumwaambila Leza zyintu nzyotuyanda, alimwi tweelede kucita oobo “cakulumba.” Masimpe tujisi twaambo tubotu twakumulumba Jehova mbubwenya mbuli Davida naakaamba kuti: “Bupati anguzu abulemu aluzundo abwami, zyoonse nzizyako, O Jehova, nkaambo zintu zyoonse zyakujulu azyaansi nzizyako. Bwami mbobwako, O Jehova, alimwi nduwe nosumpwidwe mbuli simutwe waboonse. . . . O Leza wesu, iswe tulakulumba akutembaula izina lyako lilemu.”—1 Mak. 29:11-13.
7 Jesu wakamulumba Leza akaambo kacakulya alimwi acinkwa awaini izyakabelesyegwa ku Mulalilo wa Mwami. (Mt. 15:36; Lk. 22:18, 19) Kunze lyakulumba munzila njiyonya eeyi, tweelede ‘kumulumba Jehova’ akaambo “[k]amilimo yakwe iigambya njacitila bana ba-Adamu,” akaambo “kambeta zyak[we] ziluleme,” alimwi akaambo kajwi lyakwe naa mulumbe uujanika mu Bbaibbele sunu.—Int. 107:15; 119:62, 105.
Katubapailila Bamwi
8, 9. Ino nkaambo nzi ncotweelede kubapailila Banakristoma?
8 Cakutadooneka tulalipailila, pele alimwi tweelede kubapailila abamwi—abaabo Banakristo mbotutazyi mazyina aabo. Nokuba kuti mwaapostolo Paulo ulangilwa kuti tanaakabazyi Banakristo boonse baku Kolose, wakalemba kuti: “Tulalumba Leza Wisi Mwami wesu Jesu Kristo, alimwi tulamukombela lyoonse, nkaambo tulimvwide makani aalusyomo lwanu ndumusyomya Jesu Kristo aluyando lwanu ndumuyandya basalali boonse.” (Kol. 1:3, 4) Paulo alimwi wakapailila a Banakristo baku Tesalonika. (2 Tes. 1:11, 12) Mipailo iili boobu yaamba zinji kujatikizya ndiswe ambotubabona bakwesu abacizyi.
9 Mipailo yesu njotupailila Banakristo bananike alimwi abeenzinyina “[iba]mbelele zimwi” itondezya kuti tulaibikkila maano mbunga ya Leza. (Joh. 10:16) Paulo wakalomba bakombinyina kuti bamupailile kuti ‘akapegwe zyakwaamba kutegwa akazyibye zyintu zisisidwe zyamakani mabotu.’ (Ef. 6:17-20) Sena tulabapailila Banakristo bambi munzila njiyonya eeyi?
10. Notupailila bamwi, ino citugwasya buti?
10 Kubapailila bamwi kulakonzya kucinca mbotubabona. Ikuti katupailila muntu ngotutamvwani limwi, eeci ciyakutupa kucinca mbotumubona. (1 Joh. 4:20, 21) Mipailo iili boobu ilabayumya alimwi ilabakamantanya bakwesu. Kunze lyaboobo, mipailo iili boobo ilatondezya kuti tulamvwana mbubwenya mbuli mbwaakali kucita Kristo. (Joh. 13:34, 35) Luyando luli akati kamicelo yamuuya wa Leza. Sena notuli tolike tulaakuupailila muuya uusalala, ikulomba Jehova kuti atugwasye kutegwa tube aamucelo yamuuya mbuli luyando, lukkomano, luumuno, busicamba, buuya, bubotu, lusyomo, lubomba akulilesya? (Lk. 11:13; Gal. 5:22, 23) Ikuti kakuli boobo, nzyotwaamba anzyotucita ziyakutondezya kuti tusololelwa amuuya.—Amubale Ba-Galatiya 5:16, 25.
11. Ino muyeeya kuti nkaambo nzi ncecili cibotu ikulomba bamwi kuti batupailile?
11 Ikuti naa twazyiba kuti ibana besu balaakusunkwa kutegwa kababeja nobalemba musunko kucikolo, tweelede kubapailila akubagwasya kubona Magwalo ncaamba kutegwa kabasyomeka akucita zyintu zili kabotu. Paulo wakaambila Banakristo baku Korinto kuti: “Tulakumbila kuli-Leza kuti mutaciti zibi niziba ziniini.” (2 Kor. 13:7) Mipailo iili boobu ilamukkomanisya Jehova alimwi yaamba zinji kujatikizya ndiswe. (Amubale Tusimpi 15:8.) Inga twabalomba bamwi kuti batupailile mbubwenya mbwaakacita mwaapostolo Paulo. Wakalemba kuti: “Kamutukombela aswebo, nkaambo ncobeni twazumina kuti tulijisi kweezeezya kubotu, tuyanda kuti tululame, tubule akampenda.”—Heb. 13:18.
Mipailo Yesu Kuli Azimbi Nzyoyaamba Kujatikizya Ndiswe
12. Ino nzyintu nzi nzyotweelede kupailila lyoonse?
12 Sena mipailo yesu ilatondezya kuti tulikkomene alimwi tuli basungu mumulimo wa Jehova? Sena nzyotulomba zileendelana akuyanda kwa Leza, ikukambauka mulumbe wa Bwami, ikusinizigwa kwabweendelezi bwa Jehova, alimwi akusalazyigwa kwazyina lyakwe? Eezyi zyintu nzyotweelede kupailila lyoonse mbumunya mbokutondezyedwe mumupailo wacikonzyanyo wa Jesu uutalika amajwi aakuti: “Taateesu ooli kujulu, alilemekwe izyina lyako, abuze Bwami bwako, alucitwe luyando lwako, ansi ano mbubonya mbuli kujulu.”—Mt. 6:9, 10.
13, 14. Ino mipailo yesu yaamba nzi kujatikizya ndiswe?
13 Mipailo njotupaila kuli Leza itondezya zyintu nzyotuyanda. Jehova ulicizyi ncotuyeeya. Tusimpi 17:3 yaamba kuti: “Cuumpilo ncansiliva, nceceengelo cangolida, pele Jehova ulasunka myoyo.” Leza ulazibona zyoonse zili mumyoyo yesu. (1 Sam. 16:7) Ulizyi mbotulimvwa caboola kumiswaangano, kukukambauka ambotubabona bakwesu abacizyi bakumuuya. Jehova ulizyi mbotubabona ibanyina Kristo. (Mt. 25:40) Ulazyiba kuti ncotupailila tuciyanda ncobeni naa twiile kwiinduluka buyo mabala. Jesu wakati: “Mukukomba kwanu mutaindululi mbuli mbubacita bamasi [munzila iitali kabotu], nkaambo balayeeya kuti balaswiililwa kukubwanta kwabo.”—Mt. 6:7.
14 Nzyotwaamba mumupailo azyalo zilatondezya kuti tulamusyoma Leza. Davida wakaamba kuti: “Webo [Jehova] waba macijilo aangu, iŋanda yangu indamfu yakundivuna kulibasinkondoma. Nkale mucilao cako lyoonse! Ncijile kumayubilo aamababa aako.” (Int. 61:3, 4) Kwaamba munzila yamaambilambali, ciindi Leza ‘nakkala akati kesu’ tulaba aaluumuno alimwi tulakwabililwa. (Ciy. 7:15) Eelyo kaka cilanoneezya kupaila kuli Jehova katuli aalusyomo lwakuti ‘uli akati kesu’ notuli mumasunko aali oonse!—Amubale Intembauzyo 118:5-9.
15, 16. Ino mbuti mupailo mboukonzya kutugwasya kuzyiba makanze eesu ngotujisi notuyanda kuba amikuli imwi mumbungano?
15 Kumwaambila cini ncotuyanda Jehova mumupailo, cilakonzya kutugwasya kuzyiba bwini mbotuyeeya. Mucikozyanyo, sena tuyanda kuba mulangizi mumbunga ya Leza akaambo kakuyanda kugwasya bakwesu alimwi akubeleka mulimo wa Bwami? Naa sena tuyanda buyo “kuba mupati akati kabo” naa kubakoma? Oobu tabusyi mbobeelede kucita bantu ba Jehova. (Amubale 3 Johane 9, 10; Luka 22:24-27.) Ikuti katuli amizeezo iitali kabotu, ikupaila cakukkazyika moyo akumwaambila Jehova Leza zyoonse zitukatazya, Leza ulakozya kutugwasya kucinca kautana komena muzeezo ooyu.
16 Bamakaintu Banakristo balakonzya kulombozya kuti balumi babo kabali bakutausi naa mukuya kwaciindi bakabe balangizi naa baalu. Aaba bacizyi beelede kulilemeka kweelana amipailo njobapaila. Eeci cilayandika kapati akaambo kakuti, mbobalilemeka ambobaambaula banamukwasyi cilakonzya kupa kuti mulumi kalemekwa mumbungano naa pe.
Kwiiminina Bamwi Mumupailo
17. Ino nkaambo nzi ncociyandika kupaila katuli tolikke?
17 Jesu zimwi ziindi wakali kuzwa akati kabantu banji kutegwa akapaile alikke kuli Bausyi. (Mt. 14:13; Lk. 5:16; 6:12) Andiswe tuyandika kuba tolikke. Notupaila kakunyina ciyobeka, tulakonzya kusala cintu cikonzya kumukkomanisya Jehova akutugwasya kuzumanana kumubelekela. Jesu alimwi wakali kupaila abuleya, aboobo cilakonzya kubota ikuti twazyiba eeci mbocikonzya kucitika munzila mbotu.
18. Ino ntwaambo nzi ntobeelede kuyeeya bakwesu nobaiminina mbungano mumupailo?
18 Kumiswaangano yesu, baalumi basyomeka balayiiminina mbungano mumupailo. (1 Tim. 2:8) Kumamanino aamupailo uuli boobu, basyominyina beelede kwaamba kuti “ameni,” ikwaamba kuti “akube boobo.” Kutegwa bacite oobo, beelede kuzumina kuzyintu zyaambwa. Taaku cigambya naa cityompya mumupailo wacikozyanyo wa Jesu. (Lk. 11:2-4) Kunze lyaboobo, tanaakaamba mapenzi oonse abaabo ibakali kumuswiilila. Zyintu zijatikizya muntu aumwi zilakonzya kubota kuzyaamba notupaila tolikke kutali abuleya. Alimwi notwiiminina bamwi mumupailo, tatweelede kubikkilizya twaambo twamaseseke.
19. Ino mbuti mbotweelede kulilemeka notupaila abuleya?
19 Kuti umwi katwiiminina mumupailo, tweelede kutondezya kuti ‘tulamuyoowa Leza.’ (1 Pet. 2:17) Kuli zyintu zimwi zikonzya kweelela kucitwa aciindi cimwi aabusena bweelede pele izitakonzyi kweelela kucitwa kumuswaangano wa Banakristo. (Muk. 3:1) Mucikozyanyo, umwi inga wayanda kuti boonse bajatane maanza nobapaila. Eeci cilakonzya kubatyompya naa kubanyonganya bamwi kubikkilizya abeenzu batali Bakamboni. Bamwi banabukwetene balakonzya kujatana mumaanza cabulemu, pele ikuti naa bakumbatana nobapaila, aabo ibababona balakonzya kutyompwa. Balakonzya kuyeeya kuti banabukwetene aaba bali kubikkilana buyo maano muciindi cakuyoowa Jehova. Aboobo, akaambo kabulemu mbotumupa, tweelede kucita “zyoonse cakuti kube bulemu kwa-Leza” alimwi tatweelede kucita zyintu zikonzya kunyonganya naa kutyompya bamwi.—1 Kor. 10:31, 32; 2 Kor. 6:3.
Ino Nzinzi Nzyotweelede Kupailila?
20. Ino mbuti mbomukonzya kupandulula lugwalo lwa Ba-Roma 8:26, 27?
20 Zimwi ziindi inga tatuzizyi kabotu nzyotweelede kwaamba notupaila tolikke. Paulo wakalemba kuti: “Nkaambo kukomba mbutweelede tatucizi pe, pele Muuya mwini ulatukombelezezya amitongelo iitaambiki. Nkabela oyo [Leza] uugulunganya myoyo yabantu ulizi miyeeyo ya-Muuya mbwiibede.” (Rom. 8:26, 27) Jehova nguwakapa kuti mipailo minji ilembwe mu Magwalo. Ulaitambula mipailo eeyi mbuli kuti ndiswe tulomba akutupa ncotuyanda. Leza ulituzyi alimwi ulizizyi zyoonse zilembedwe mu Bbaibbele nzyaakasololela amuuya wakwe. Jehova ulaingula mipailo yesu ciindi muuya ‘noutukombelezyela.’ Pele notuyaabulizyiba kabotu Ijwi lya Leza, tulakonzya kuba azyakwaamba notupaila.
21. Ino ncinzi ncotuya kulanga-langa mucibalo citobela?
21 Mbubwenya mbotwaiya, mipailo yesu yaamba zinji kujatikizya ndiswe. Mucikozyanyo, mipailo eeyi ilakonzya kutondezya mbotumvwana a Jehova alimwi ambotulizyi Jwi lyakwe. (Jak. 4:8) Mucibalo citobela, tulalanga-langa mipailo imwi iilembedwe mu Bbaibbele. Ino kulanga-langa Magwalo aaya kuya kutugwasya buti notupaila kuli Leza?
Ino Inga Mwaingula Buti?
• Notupaila kuli Jehova, ino tweelede kuba muciimo nzi?
• Ino nkaambo nzi ncotweelede kubapailila basyomima?
• Ino mipailo yesu ilakonzya kwaamba nzi kujatikizya ndiswe alimwi anzyotuyeeya?
• Ino mbuti mbotweelede kulilemeka notupaila abuleya?
[Mibuzyo yaciiyo]
[Cifwanikiso icili apeeji 4]
Sena lyoonse mulamutembaula akumulumba Jehova?
[Cifwanikiso icili apeeji 6]
Mbotulilemeka notupaila mubuleya kweelede kutondezya kuti tulamulemeka Jehova