Kamubabikkila Maano Bakwesu Abacizyi Basyaataambi

BANTU ba Leza mazuba aano mukwasyi mupati wabakwesu abacizyi iwakatalikila kuli bamaalumi abamakaintu bansiku. Aaba babikkilizya Samuele, Davida, Samsoni, Rahabu, Musa, Abrahamu, Sara, Nowa a Abelo. Akati kababelesi ba Jehova basyomeka, kuli basyaataambi banji. Mucikozyanyo, ibantu bobilo bakasaanguna kuba Bakamboni ba Jehova mucisi ca Mongolia bakali banabukwetene basyaataambi. Alimwi imbunga yesu yakazumizigwa mucisi ca Russia ankuta ya European Court of Human Rights akaambo kakusyomeka kwabakwesu abacizyi basyaataambi bamucisi eeco.

Mazuba aano, “muzike musyomesi uucenjede” upanga mavidiyo mumwaambo wakutambaika alimwi wabamba miswaangano yaalubazu, yabbazu alimwi ayacooko mumwaambo nguwenya ooyu. (Mt. 24:45) Bubambe oobu bwabagwasya kapati basyaataambi. * Pele sena kuli nomwakalibuzyide kuti: ‘Ino basyaataambi bakali kucikonzya buti kwiiya makani aajatikizya Leza wakasimpe akuyaambele kumuuya kabutanaba bubambe oobu’? Sena kuli nomwakayeeyede mbomukonzya kubagwasya basyaataambi bali nkomuzwa?

Kacitanatalika Cibelesyo Camazuba Aano

Ikuti naa mwababuzya basyaataambi bamwi ibapati mbobakamuzyiba Leza, balakonzya kumwaambila mbobakalimvwa ciindi cakusaanguna nobakazyiba kuti Leza ulijisi zyina. Eeci cakabagwasya kucinca bukkale bwabo akupa kuti kabasyomeka kwamyaka iili mbwiibede, kaatanabambwa mapulogilamu mumwaambo wakutambaika avidiyo aakonzya kubagwasya kukazyiba kabotu kasimpe kamu Magwalo. Balakonzya kupandulula mbocakabede nikwakanyina miswaangano yeendelezyegwa mumwaambo wakutambaika naa kusandululwa. Umwi wakali kukkala ambabo akubalembela twaambo apepa kutegwa bazyibe makani aabandikwa. Umwi mukwesu syaataambi wakaiya kasimpe kamu Bbaibbele munzila njoonya eeyi kwamyaka iili ciloba kusikila nokwakaba sikusandulula miswaangano mumwaambo wakutambaika.

Bakamboni basyaataambi ibapati balayeeya mbobakali kulimvwa nobakali kubelekela antoomwe ambungano kukambaukila bantu baambaula. Kujanza lyomwe bakali kuba akapepa aalembedwe mulumbe mubufwaafwi ngobakeelede kubala bamukamwini ŋanda. Kujanza limbi bakali kuba amamagazini mapya aa Ngazi Yamulindizi a Sinsimuka! Cakali kubakatazya basyaataambi kuyiisyanya kwiinda mukubelesya mabbuku akaambo kakuti boonse bobilo tiibakali kuzimvwisya. Kweelede kuti aaba basyaataambi ibapati balayeeya mbobakali kutyompwa ciindi bantu nobatakali kuzimvwa nzyobakali kuyiisya aboobo bakali kucileka kwaamba makani aakumuuya. Alimwi balizyi muntu mbwalimvwa ikuti kamuyanda kapati Jehova pele katakonzyi kuzicita kabotu zyintu nzyaiya. Nkaambo nzi? Nkaambo kakuti tiibakali masimpe kuti naa bakali kutumvwisya twaambo tumwi.

Nokuba kuti kwakali buyumu-yumu buli boobu, bakwesu abacizyi basyaataambi bakazumanana kusyomeka. (Job. 2:3) Alimwi bali kulindila Jehova. (Int. 37:7) Lino wabalongezya kwiinda mbobakali kuyeeyela banji.

Amubone mbwaakacita mukwesu umwi, syaataambi, uukwete alimwi uujisi abana. Kakutanaba mavidiyo aamumwaambo wakutambaika, wakali kusololela ciiyo camukwasyi.  Mwanaakwe musankwa waamba kuti: “Cakali kubakatazya bataata kusololela ciiyo camukwasyi, mbwaanga bakali kubelesya buyo mabbuku nobakali kutuyiisya. Ziindi zinji tiibakali kuzimvwisya zyintu zilembedwe. Alimwi andiswe tobana twakali kubapa kuti cibakatazye. Twakali kufwambaana kubaambila ikuti naa tiibapandulula kabotu. Nokuba kuti zyintu zyakali boobo, lyoonse bakali kusololela ciiyo camukwasyi. Bakalizyi kuti ikutuyiisya makani aa Jehova kwakali kuyandika kapati nokuba kuti bakali kutyompwa zimwi ziindi baalilwa kupandulula kabotu.”

Kuli cikozyanyo acimbi caba Richard, imukwesu uuli amyaka iili kuma 70 moofwu alimwi syaataambi, uukkala ku Brooklyn, mudolopo lya New York, ku U.S.A. Ba Richard balizyibidwe kuti balajanika lyoonse kumiswaangano ya Bunakristo. Nobaunka kumiswaangano, balatanta citima balikke, kababala zitisyini kutegwa bazyibe mpobeelede kuselukila. Bumwi buzuba mupeyo, kwakali guwo alimwi kwakali caanda icakuti boonse mumbungano bakamvwana kuti kutabi miswaangano. Boonse bakaambilwa, pele mukubula coolwe ba Richard tiibakaambilwa pe. Bakwesu nobakabayeeya ba Richard, bakatalika kubalangaula, bamane bakabajana kabaimvwi anze a Ŋanda ya Bwami kabalindila kuti milyango ijalulwe. Nobakabuzyigwa ncobakaunkila nokuba kuti kwakali guwo acaanda, bakaingula kuti: “Ndilamuyanda Jehova.”

Ino Ncinzi Ncomukonzya Kucita?

Sena kuli basyaataambi bakkala nkomuzwa? Sena inga mwaiya mwaambo wakutambaika kutegwa kamubandika ambabo? Basyaataambi balakkazika moyo alimwi balijisi lubomba nobayiisya bamwi mwaambo wabo. Mulakonzya kujana syaataambi kuli koonse naa nomukambauka. Ino ncinzi ncomukonzya kucita? Amubone mbomukonzya kubandika anguwe. Mulakonzya kutambaika, ikulemba, kubelesya zifwanikiso naa kubelesya nzila zyoonse eezyi. Nokuba kuti muntu ooyo watondezya kuti tayandi kwiiya kasimpe, amwaambile Kamboni umwi syaataambi naa uumwi uucizyi mwaambo wakutambaika kuti mwakajana syaataambi. Syaataambi ulakonzya kukkomana kwiiya kasimpe ikuti uumuyiisya kabelesya mwaambo wakutambaika.

Ambweni lino mwiiya mwaambo wakutambaika alimwi muli mumbungano iibelesya mwaambo ooyu. Ino mbuti mbomukonzya kuuzyiba kabotu mwaambo ooyu? Nokuba kuti kuli basikumwaya batali basyaataambi mumbungano yanu, kamubelesya mwaambo ooyu lyoonse. Eeci ciyakupa kuti kamuyeeya mumwaambo wakutambaika. Zimwi ziindi mulakonzya kubona kuti ncuuba-uba kwaambaula muciindi cakutambaika. Nomwiiya mwaambo uumbi, mweelede kuzumanana kuubelesya kutegwa muzyibile.

Ikubelesya mwaambo wakutambaika inga catondezya kuti tulabayanda akubalemeka bakwesu abacizyi basyaataambi. Amuyeeye buyo basyaataambi mbobalimvwa abuzuba akaambo kakutamvwa nzyobaamba bamwi kumulimo naa kucikolo. Mukwesu umwi, syaataambi,  waakaamba kuti: “Lyoonse ndilaakuba abantu baambaula. Bunji bwaziindi, ndilalendelelwa akubona mbuli kuti kunyina uundibikkila maano alimwi eeci cilandityompya akundinyemya. Cilandaalila kwaamba mbondilimvwa zimwi ziindi.” Bakwesu abacizyi beelede kukkomana nobali kumiswaangano nkobatambuda cakulya cakumuuya alimwi akubandika akuyanzana a Banakristonyina.—Joh. 13:34, 35.

Atwalo tubunga twabasyaataambi ibaswaangana ambungano zyabantu baambaula tweelede kubikkilwa maano. Miswaangano ilasandululwa mumwaambo wabo. Kutegwa bacimvwe kabotu caambwa, basyaataambi bakkalila kuzyuuno zyakumpela mu Ŋanda ya Bwami. Munzila eeyi, balakonzya kumubona mwaambi alimwi ayooyo uusandulula kakunyina amapenzi. Kweelana ambobazibona zyintu bamumbungano bajisi bubambe oobu, boonse balafwambaana kuzyibila alimwi eeci tacibanyonganyi pe. Ibubambe oobu bulacitwa akumiswaangano yaalubazu, yabbazu alimwi ayacooko. Tweelede kubalumba bakwesu abacizyi ibabeleka canguzu kusandulula makani mbuli mbwakonzya kwaamba syaataambi—munzila iilimvwisya kabotu.

Ambweni muli mumbungano iigwasyilizya kabunga kabelesya mwaambo wakutambaika naa iijisi basyaataambi oomo miswaangano mwiisandululwa mumwaambo ooyo. Ino ncinzi ncomukonzya kucita kutondezya kuti mulababikkila maano bakwesu abacizyi basyaataambi? Amubatambe kuŋanda yenu. Ikuti kacikonzyeka, amwiiye majwi aamwi aamumwaambo wakutambaika. Tamweelede kuyoowa akaambo kakuti tamukonzyi kubandika kabotu ambabo. Bumwi buzuba, muyakucikonzya kubandika ambabo alimwi ikucita boobu kuya kumukkomanisya lyoonse. (1 Joh. 4:8) Tulakonzya kwiiya zinji kuli Bakambonima basyaataambi. Mbantu bayanda kubandika, mbasongo alimwi balasangalizya. Mukwesu wakazyalwa kubazyali boonse bobilo basyaataambi waamba kuti: “Lyoonse ndikkala abasyaataambi alimwi balandipa zyintu zyoonse ziyandika. Tulakonzya kwiiya zyintu zinji kubakwesu abacizyi basyaataambi.”

Jehova ulabayanda babelesi bakwe basyomeka, kubikkilizya abasyaataambi. Lusyomo lwabo akuliyumya zipa kuti mbungano ya Jehova kaikkomanisya. Aboobo atubabikkile maano bakwesu abacizyi basyaataambi!

Bupanduluzi buyungizidwe

[Cifwanikiso icili apeeji 31]

Mulumbe wa Bwami ulakonzya kutambulwa kabotu kuli syaataambi ikuti wasandululwa mumwaambo wakutambaika

[Zifwanikiso izili apeeji 32]

Bakwesu abacizyi beelede kukkomana nobali kumiswaangano nkobatambuda cakulya cakumuuya