Mibuzyo Yabasikubala

Sena cileelela kuti mucizyi kasama citambala nasandulula makani aa Bbaibbele mumwaambo wakutambaika kumiswaangano yambungano, yabbazu, yaalubazu naa yacooko?

Imukaintu Munakristo uyandika kusama citambala ikuti kacita mulimo ngwayelede kucita mulumi wakwe naa mukwesu mumbungano. Eeci cileendelana ancaakaamba mwaapostolo Paulo naakati, “mwanakazi uukomba nanka kusinsima atanoovumbidwe kumutwe ulaubausya mutwe wakwe” nkaambo “mutwe wamwanakazi ngumwaalumi.” (1 Kor. 11:3-10) Ikuti naa mucizyi wasama citambala aciindi eeco, citondezya kuti ulabulemeka bubambe bweendelezyegwa a Leza mumbungano ya Banakristo.—1 Tim. 2:11, 12. *

Ino mbuti kuti mukwesu kapa makani pele mucizyi kasandulula mumwaambo wakutambaika? Masimpe, mucizyi ooyu usandulula buyo ncaamba mwaambi. Eeci caamba kuti tali nguyo uuyiisya pe, mukwesu nguuyiisya, walo usandulula buyo. Nokuba boobo, imwaambo wakutambaika uliindene kapati amyaambo yaambaulwa buya. Kumyaambo yaambaulwa buya, ibaswiilizi balakonzya kumulanga uupa makani kumwi kabamumvwide ayooyo uusandulula mumwaambo uumbi. Alimwi, ikwiindana akusandulula mwaambo wakutambaika, kanji-kanji bacizyi ibasandulula mwaambo waambaulwa tabaimini mpobakonzya kubabona boonse. Zimwi ziindi balaa kukkala nibasandulula naa kwiimikila kabalangide kumwaambi ikutali kubaswiilizi. Aboobo, imucizyi uusandulula makani mumwaambo waambaulwa teelede kusama citambala.

Ikuyungizya kukaambo aaka, akaambo kazyintu zibelesyegwa nobasandulula makani mumwaambo wakutambaika, uusandulula  ulabonwa abaswiilizi, nkaambo ulalibonya acipeku-peku kakuli iwaamba makani talibonyi kuli boonse. Aboobo, cileelela kuti imucizyi uusandulula mumwaambo wakutambaika kasama citambala kutegwa atondezye bulemu akutondezya kuti mulimo ngwacita ngwabakwesu.

Ino malailile aaya aacinca ayakugwasya buti kusandulula mwaambo wakutambaika amuswaangano wa Cikolo Camulimo Weendelezyegwa a Leza, nokucitwa zitondezyo, nobaingula lya Ciiyo ca Bbaibbele Cambungano, a Muswaangano Wamulimo aa Ciiyo ca Ngazi Yamulindizi? Sena mucizyi uusandulula amiswaangano eeyi ulakonzya kusama citambala? Inga caboneka mbuli kuti kusama citambala taciyandiki zimwi ziindi akaambo kakuti boonse baswiilila balizyi kuti tali nguyo waamba makani. Cilakonzya kuba oobo, ikapati nasandulula muntu naingula, bacizyi nobapa makani naa nokuli citondezyo. Nokuba boobo, nasandulula makani ngobapa bakwesu kumiswaangano eeyi, imukwesu nayendelezya Ciiyo ca Ngazi Yamulindizi naa Ciiyo ca Bbaibbele Cambungano akuti naa kali nguyo uuyimbya nyimbo mumwaambo wakutambaika, ulakonzya kusama citambala. Ciindi camiswaangano, imucizyi ulakonzya kusanduluda bakwesu, bacizyi, bana abaalu. Aboobo kuti kacikonzyeka, inga cainda kubota kuti kasamide citambala kusikila kumamanino aamuswaangano.

Bupanduluzi buyungizidwe