Musimbi Uujisi Moyo Wabwaabi

MUSIMBI umwi uujisi myaka yakuzyalwa iili fwuka wakucisi ca Brazil wakabikka mali aakwe muzibeela zyobilo—K90,000 (18 dollars) a K125,000 (25 dollars). Wakabikka K90,000 mukabbokesi kakusangila ku Ŋanda ya Bwami kutegwa akabelesyegwe kubbadelela naa kuula zyintu ziyandika mumbungano. Amane wakatumina K125,000 kuofesi yamutabi ya Bakamboni ba Jehova antoomwe akagwalo kafwaafwi. Kagwalo kakwe kaamba kuti: “Ndatumina mali aaya kutegwa agwasye mumulimo wanyika yoonse. Ndiyanda kugwasya bakwesu abacizyi bali munyika yoonse kukambauka makani mabotu. Ndacita oobo akaambo kakuti ndilamuyanda Jehova.”

Bazyali bamusimbi ooyu bakamuyiisya kuti weelede kutola lubazu mumulimo wakukambauka Bwami. Alimwi bakamugwasya kuzyiba kuti ulakonzya ‘kulemeka Jehova ambono zyakwe.’ (Tus. 3:9) Mbubwenya mbuli musimbi ooyu, toonse tulakonzya kutola lubazu mukusanga akukambauka kutegwa mulimo wa Bwami uzumanane, kubusena nkotukkala alimwi amunyika yoonse.