Amuzumanane Kukkomana Nomuli Mumapenzi
Amuzumanane Kukkomana Nomuli Mumapenzi
“Boonse bajene mayubilo muli [Jehova] basekelele, baimbe cakukondwa mazuba oonse.”—INT. 5:11.
1, 2. (a) Ino nzyintu nzi zileta mapenzi mazuba aano? (b) Kunze kwamapenzi aacitikila bantu boonse, ino mapenzi nzi aacitikila Banakristo?
BAKAMBONI BA JEHOVA abalo balajanika mumapenzi mbubwenya mbuli bantu boonse munyika. Bantu ba Leza banji balajanika mumapenzi aaletwa azigwebenga, nkondo alimwi alunya. Ntenda zilicitikila, bucete, kuciswa alimwi akufwidwa, zileta mapenzi. Imwaapostolo Paulo wakalemba kuti: “Tulizi kuti kusikila sunu zilenge zyoonse zilatongela akumyongwa antoomwe.” (Rom 8:22) Alimwi tulapenga akaambo kakutalondoka. Mbubwenya mbuli Mwami wansiku Davida tulakonzya kwaamba kuti: “Zibi zyangu zyandibbizya, zyandilemena kwiinda mukuli mulemu.”—Int. 38:4.
2 Kunze kwamapenzi aacitikila bantu boonse, Banakristo bakasimpe balanyamuna acisamu cabo cakupenzyezya. (Lk. 14:27) Masimpe, mbubwenya mbocakabede kuli Jesu, basikwiiya bakwe balazondwa alimwi balapenzyegwa. (Mt. 10:22, 23; Joh. 15:20; 16:2) Aboobo, kutegwa tucikonzye kutobela Kristo tweelede kubeleka canguzu akuliyumya notulindila kulelekwa kuya kuba munyika mpya.—Mt. 7:13, 14; Lk. 13:24.
3. Ino tuzyiba buti kuti Munakristo teelede kupenga buya kutegwa akkomanisye Leza?
3 Sena nkokuti Banakristo beelede kuba mumapenzi lyoonse? Sena tuna kupenga lyoonse kusikila kumamanino? Masimpe ngakuti Jehova uyanda kuti katukkomene notulindila kuzuzikizyigwa kwazisyomezyo zyakwe. Ciindi aciindi, Bbaibbele lyaamba bakombi bakasimpe kuti mbantu bakkomene. (Amubale Isaya 65:13, 14.) Intembauzyo 5:11 yaamba kuti: “Boonse bajene mayubilo muli [Jehova] basekelele, baimbe cakukondwa mazuba oonse.” Inzya, tulakonzya kukkomana, kuba aluumuno naa kukkalwa moyo alimwi akukkutila nokuba kuti tuli mumapenzi. Atulange-lange Bbaibbele mbolikonzya kutugwasya kuti tucikonzye kukkomana akuliyumya notuli mumapenzi.
Jehova ngu “Leza [Uukkomene]”
4. Ino Leza ulimvwa buti bantu nobakaka kucita nzyayanda?
4 Mucikozyanyo, atulange mbwacita Jehova. Mbwali Leza Singuzuzyoonse, ulijisi nguzu zyakweendelezya bubumbo boonse. Kunyina ncabulide pe alimwi tayandiki kugwasyigwa. Nokuba kuti ulaanguzu zinji, kweelede kuti Jehova wakatyompwa mwanaakwe omwe wamuuya naakazanga akuba Saatani. Leza weelede kuti wakatyompwa alimwi bangelo bambi nobakazanga abalo. Alimwi kamuyeeya buyo Leza mbwaakalimvwa ba Adamu a Eva nobakamuzangila. Kuzwa ciindi eeci, bana babo banji kapati bazumanana kukaka bweendelezi bwa Jehova.—Rom. 3:23.
5. Ino ncinzi cini camutyompya kapati Jehova?
5 Buzangi mbwaakatalisya Saatani bucizumanana. Kwamyaka iisika ku 6,000, Jehova wababona bantu kabakomba mituni, kulwana, kujayana akucita zyintu zisesemya zijatikizya koonana. (Matl. 6:5, 6, 11, 12) Kunze lyaboobo, ulamvwa bantu nobamubejelezya alimwi akumusampaula. Nobaba bakombi bakwe bakasimpe balamutyompya zimwi ziindi. Ibbaibbele lilaamba mbobakamutyompya bamwi nolyaamba kuti: “Kanji-kanji bakamupapila munkanda, akumukataazya musokwe. Bakali kusunka Leza, akukalazya Uusalala wa-Israyeli.” (Int. 78:40, 41) Cilamucima kapati Jehova ciindi bantu bakwe nobabukaka bweendelezi bwakwe. (Jer. 3:1-10) Mubwini, zyintu zibi zilacitika alimwi Jehova ulatyompwa kapati nozicitika.—Amubale Isaya 63:9, 10.
6. Ino mbuti Leza mbwacita ikuti kwaba cintu citamukkomanisyi?
6 Pele nokuba kuti Jehova ulatyompwa taleki kubweza ntaamu. Zyintu zibi nozicitika, Jehova ulafwambaana kuzibambulula zyintu. Alimwi wabikka bubambe bwakuti makanze aakwe akazuzikizigwe. Kucita boobu kupa kuti Jehova akkomane nalindila bulelo bwakwe kuti bukasinizyigwe alimwi akubona mbobaya kulongezyegwa bakombi bakwe basyomeka. (Int. 104:31) Masimpe, nokuba kuti Jehova wasampaulwa, wazumanana kukkomana.—1 Tim. 1:11; Int. 16:11.
7, 8. Ikuti zyintu kaziteendi kabotu, ino mbuti mbotukonzya kwiiya Jehova?
7 Masimpe, tatukonzyi kukozyanya a Jehova caboola kumakani aakumana mapenzi. Nokuba boobo, tulakonzya kumwiiya Jehova ikuti katuli mumapenzi. Cili kabotu kutyompwa ikuti zyintu tiizyeenda mbotwali kuziyeeyela, pele tatweelede kuzumanana kucita oobo. Mbokunga twakalengwa mucinkozya ca Leza, tulayeeya alimwi tuli basongo, calo icipa kuti katuzyiba cakucita.
8 Ikaambo kapati kakonzya kutugwasya kutegwa tuliyumye kumapenzi nkakuzyiba kuti mapenzi aamwi tatukonzyi kwaamana pe. Aboobo, kuzumanana kulibilika akaambo kazyintu eezyi kulakonzya kututyompya akutulesya kuba alukkomano ndobajisi bakombi bakasimpe. Ikuti naa twabweza ntaamu iiyandika kutegwa tuliyumye kupenzi eeli, inga cainda kugwasya kuti twatalika kucita zyintu zikonzya kutugwasya. Makani aamu Bbaibbele aatobela alakasalazya kaambo aaka.
Tuyandika Kuzilanga Kabotu Zyintu
9. Ino Hana wakatondezya buti kuti wakali kuzilanga kabotu zyintu?
9 Amulange cikozyanyo ca Hana, walo iwakazikuba banyina Samuele imusinsimi. Wakalityompedwe kapati akaambo kakuti tanaakali kuzyala. Wakali kufwubaazyigwa akaambo kakutazyala. Zimwi ziindi, Hana wakali kutyompwa kapati cakuti wakali kulila akukaka kulya. (1 Sam. 1:2-7) Cimwi ciindi Hana naakaunka kutempele lya Jehova, ‘wakamucisa moyo cakuti wakali kukomba Jehova cakulilisya.’ (1 Sam. 1:10) Hana naakamana kupaila kuli Jehova, Eli mupaizi mupati wakamwaambila kuti: “Koya caluumuno, Leza wa-Israyeli akupe cikumbilo cako ncokumbila kulinguwe.” (1 Sam. 1:17) Aciindi eeci, Hana wakabona kuti wacita zyoonse nzyaakali kukonzya kucita. Pele penzi lyakaciliko. Hana wakatondezya kuti wakali kuzyilanga kabotu zyintu. Aboobo, “wakainka, wakalya, takakacili kuusa pe.”—1 Sam. 1:18.
10. Ino Paulo wakatondezya buti kuti uzilanga kabotu zyintu ciindi naakali mupenzi ndyaatakali kukonzya kumana?
10 Imwaapostolo Paulo awalo wakatondezya kuti wakali kuzilanga kabotu zyintu naakali mumapenzi. Wakali apenzi lyakali kumukatazya kapati. Wakalyaamba penzi eeli kuti, “cisongozyo cakuyasa.” (2 Kor. 12:7) Kufwumbwa naa penzi eeli lyakali lipati buti, Paulo wakacita zyoonse nzyaakali kukonzya kutegwa alimane, wakapaila kuli Jehova kuti amugwasye. Ino nziindi zyongaye Paulo nzyaakapaila kuli Jehova kumwaambila penzi eeli? Ziindi zyotatwe. Ciindi catatu, Leza wakaambila Paulo kuti “cisongozyo cakuyasa” tacikonzyi kugusyigwa munzila yamaleele. Paulo wakakazumina kaambo aaka amane wakazumanana kubelekela Jehova amoyo woonse.—Amubale 2 Ba-Korinto 12:8-10.
11. Ino mupailo inga watugwasya buti notuli mumapenzi?
11 Eezyi zikozyanyo tazyaambi kuti tweelede kuleka kupaila kuli Jehova kuti katuli amapenzi. (Int. 86:7) Muciindi caboobo, Ijwi lya Leza litwaambila kuti: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza.” Ino Jehova uyakuyiingula buti mipailo eeyi? Ibbaibbele liyungizya kuti: “Elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.” (Flp 4:6, 7) Masimpe, Jehova takonzyi kulimanizya penzi lyesu mpoona aawo, pele ulakonzya kwiingula mipailo yesu kwiinda mukutugwasya kuti katuyeeya kabotu. Twamana kupaila, tulakonzya kulibona penzi likonzya kuboola akaambo kakuciindilizya kulibilika.
Kamukukkomanina Kucita Kuyanda kwa Leza
12. Ino nkaambo nzi kutyompwa kwaciindi cilamfwu ncokukonzya kuleta mapenzi?
12 Lugwalo lwa Tusimpi 24:10 lwaamba kuti: “Na wawizuka mubuzuba bwamapenzi, inguzu zyako zyaceya.” Kasimpi akamwi kaamba kuti: “Mubuusu bwamoyo muntu ulafwidwa muuya.” (Tus. 15:13) Banakristo bamwi balatyompwa cakunga balacileka kubala Bbaibbele akuzinzibala kuyeeya zilembedwe Mujwi lya Leza. Mipailo yabo njakwiinzya buyo mulawo alimwi balalizandula kubakombinyina. Imasimpe ngakuti, kuzumanana kutyompwa kulakonzya kupa kuti muntu acite cintu citayandiki.—Tus. 18:1, 14.
13. Ino nzyintu nzi zikonzya kutukkomanisya akutukulwaizya?
13 Kulubazu lumwi, kuzilanga kabotu zyintu kuya kutugwasya kubikkila maano kuzyintu nzyotucita mubuumi izikkomanisya. Davida wakalemba kuti: “Ndakondwa kucita luyando lwako, O Leza wangu; mulao wako uli mumoyo wangu.” (Int. 40:8) Ikuti zyintu zyalubila, cintu ncotuteelede kucita, nkuleka kukomba. Masimpe ngakuti, kucita zyintu zitukkomanisya ngomusamu wakutyompwa. Jehova utwaambila kuti tulakonzya kukkomana ikuti katubala Jwi lyakwe akucita oobu lyoonse. (Int. 1:1, 2; Jak. 1:25) Ikuti katubala Magwalo Aasetekene alimwi akujanika kumiswaangano ya Banakristo, tulamvwa “majwi aabotezya” alo aakonzya kutukulwaizya akutukkomanisya.—Tus. 12:25; 16:24.
14. Ino ncinzi ncaakatusyomezya Jehova icitukkomanisya lino?
14 Leza ulatupa twaambo tunji itukonzya kutukkomanisya. Ikutusyomezya kutufwutula nkwakaamba kulatukkomanisya. (Int. 13:5) Tulizyi kuti kufwumbwa naa ncinzi citucitikila lino, kumamanino Leza uya kubapa bulumbu aabo ibamuyandaula amoyo woonse. (Amubale Mukambausi 8:12.) Musinsimi Habakuku wakakapandulula kabotu kaambo aaka naakalemba kuti: “Nekuba kuti mukuyu topampanuki, amumusaansa tamukwe micelo, micelo yamaolifa tiibonwi, amyuunda tiijisi zilyo, imbelele zyamana mubbondo, amucimpati tamukwe iŋombe, nsileki kubotelwa muli-Jehova, noocikondwa muli-Leza walufutuko lwangu.”—Hab. 3:17, 18.
“Bali Acoolwe Bantu Bajisi Jehova Kuba Leza Wabo!”
15, 16. Amwaambe zipego zizwa kuli Leza zikonzya kutukkomanisya notucilindila kuti tukalongezyegwe kumbele.
15 Notulindila zyintu zibotu nzyatubambilide Jehova kumbele aamazuba, uyanda kuti katukkomana azyintu nzyatupa lino. Ibbaibbele lyaamba kuti: “Ndizi kuti taakwe cintu cibotela bantu kwiinda eci: kukondwa akulibotezya mubuumi bwabo. Alimwi cipo ca-Leza nceeci: kuti muntu alye akunywa akukondwa mumilimo yakwe yoonse.” (Muk. 3:12, 13) Ooku “kulibotezya” kubikkilizya kucitila bantu zyintu zibotu. Jesu wakaamba kuti tulakkomana kapati notupa kwiinda notutambula. Kubacitila lubomba bantu mbotukwetene limwi, bana, bazyali abasazima, kulakonzya kukkomanisya. (Tus. 3:27) Kuba amoyo mubotu, kusamausya akubalekelela bakwesu abacizyi akwalo kulatukkomanisya kapati, awalo Jehova ulakkomana. (Gal. 6:10; Kol. 3:12-14; 1 Pet. 4:8, 9) Alimwi kulyaaba kucita mulimo wakukambauka kulakkomanisya kapati.
16 Majwi aali atala aawa aazwa mulugwalo lwa Mukambausi aamba zyintu nzyotucita lyoonse mbuli kulya akunywa. Masimpe, nociba ciindi notuli mumapenzi, tulakonzya kukkomana akaambo kazipego zili zyoonse nzyatupa Jehova. Kuyungizya waawo, kubona zyintu mbuli nolibbila zuba, mboiyalidwe nyika, nobasobana banyama azyintu zimwi zikkomanisya nzyaakalenga Leza, cilakonzya kutukkomanisya kapati. Notuziyeeya zyintu eezyi tulakonzya kumuyanda kapati Jehova akaambo kakuti Nguupa zyintu zyoonse zibotu.
17. Ino ncinzi ciyakupa kuti mapenzi oonse amane, alimwi mazuba aano ino ncinzi cituyumya?
17 Kumamanino, luyando ndotujisi kuli Leza, kutobela milawo yakwe alimwi akuba alusyomo mucinunuzyo, ciya kupa kuti mapenzi oonse aaboola akaambo kakutalondoka akamane akuti katukkomana kukabe kutamani. (1 Joh. 5:3) Kwaciindi cino, tulakulwaizigwa kuzyiba kuti Jehova ulaazyi mapenzi eesu oonse. Davida wakalemba kuti: “Ndabotelwa akukondwa muluse lwako, nkaambo ulibwene mapenzi aangu, ulizi kupenga kwamoyo wangu.” (Int. 31:7) Akaambo kakuti Jehova ulatuyanda, uyakutufwutula kumapenzi eesu.—Int. 34:19.
18. Ino nkaambo nzi bantu ba Leza ncobeelede kukkomanina?
18 Notucilindila kuzuzikizyigwa kwazisyomezyo zya Jehova, atutobele cikozyanyo ca Leza uukkomene. Tutaleki kubelekela Jehova akaambo kakutyompwa. Ikuti katuli mumapenzi, tweelede kuyeeya kabotu akubelesya zyintu nzyotwiiya mu Bbaibbele kutegwa zitusololele. Jehova ulakonzya kutugwasya kuti tuliyumye alimwi akucita zyintu zikonzya kutugwasya muciindi camapenzi. Tweelede kuzikkomanina zyintu zibotu zyakumubili alimwi azyakumuuya izizwa kulinguwe. Kwiinda mukumvwana kapati a Leza, tuya kukkomana akaambo kakuti “bali acoolwe bantu bajisi Jehova kuba Leza wabo!”—Int. 144:15.
Ino Ncinzi Ncomwaiya?
• Notuli mumapenzi, ino mbuti mbotukonzya kumwiiya Jehova?
• Ino kuzilanga kabotu zyintu inga kwatugwasya buti kuti tuliyumye mumapenzi?
• Notuli mumapenzi, ino mbuti kucita kuyanda kwa Leza mbokukonzya kutukkomanisya?
[Mibuzyo yaciiyo]
[Zifwanikiso izili apeeji 16]
Jehova tazimukkomanisyi zyintu zibi zicitika
[Kulumba]
© G.M.B. Akash/Panos Pictures
[Zifwanikiso izili apeeji 18]
Jehova watupa zyintu zikonzya kutugwasya kuzumanana kukkomana