Ibajisi Bubi Alimwi Ibakkomene Mumulimo wa Leza

JEHOVA uyanda kuti kamukkomana. (Int. 100:2) Mbomuli umwi wababelesi bakwe, ambweni andinywe mujisi bubi. Ambweni tiimwakali kubeleka boobu nomwakalyaaba kuli Leza, pele lino milimo yakumubili ayakumuuya imupa kujata bubi. Alimwi mulakonzya kulimvwa bubi akaambo kakutacita zyoonse nzyomuyanda kucita. Ino ncinzi ncomukonzya kucita kutegwa mucikonzye kucita zyoonse zyobilo alimwi akuzumanana kukkomana?—Neh. 8:10.

Mupona muziindi zikatazya alimwi mapenzi aamucitikila manji, aboobo zyintu mweelede kuzicita kabotu. Ikujatikizya makani aaya, ilulayo lwamwaapostolo Paulo ilwakasololelwa amuuya luleelela lwakuti: “Amucenjele loko mbumweenda. Muteendi mbuli bafubafuba, pe, amweende mbuli basimaanu. Amujatisye loko ciindi canu coonse, nkaambo kakuti mazuba aasunu mabi.”—Ef. 5:15, 16.

Ikweelana alulayo oolo lugwasya, ino mbuti mbomunga mwalibikkila mbaakani iikonzya kumupa kuba aciindi cakuba aciiyo canu nobeni, cakulanganya mukwasyi, cakuunka mumulimo wamumuunda, cakucita mulimo wakumubili alimwi acakucita milimo iimbi iiyandika?

Sena mulayeeya mbomwakakkomana nomwakalyaaba kuli Leza akubbapatizyigwa? Mwakakkomana akaambo kaluzyibo lwa Jehova alimwi amakanze aakwe. Ambweni cakamutolela myezi iili mbwiibede ikwiiya kutegwa mube aluzyibo alimwi mwakakkomana. Pele kusoleka kwanu tiikwakali kwabuyo. Iciiyo eeco cakapa kuti buumi bwanu bubote.

Ikutegwa muzumanane kukkomana, mweelede kuzumanana kulya cakulya cakumuuya. Ikuti cilamukatazya kujana ciindi cakubala akwiiya Bbaibbele, amuzilange-lange zyintu nzyomucita. Nokuba kujana ciindi buyo cisyoonto cakwiiya akuzinzibala kuyeeya abuzuba ciya kumupa kuswena kuli Jehova. Alimwi eeco ciya kumupa kuti kamukkomana.

Ibunji bwababelesi ba Leza balakonzya kujana ciindi cakucita zyintu ziyandika kapati kwiinda mukubelesya ciindi ncobali kucita zyintu zimbi. Amulibuzye kuti, ‘Ino ndibelesya ciindi cilamfwu buti kubala mamagazini aakunyika naa miteende, kweebelela cipekupeku, kuswiilizya nyimbo naa kucita zyintu nzyondiyanda kapati?’ Izyintu  zili boobo zilakonzya kukkomanisya ikuti twazicita munzila yeelede. (1 Tim. 4:8) Ikuti mwabona kuti ipenzi ndyomujisi njakutacibelesya kabotu ciindi, amuzilange-lange alimwi zyintu nzyomucita.

Ba Adam, ibakwete, ibalaabana botatwe alimwi mbaalu balapandulula cibagwasya, baamba kuti: “Ndilalilesya kuba azyintu naa kucita zyintu zikonzya kundinyonganya. Tandiciti zyintu izikonzya kundimanina ciindi akuba azyintu iziyandika kubikkilwa maano lyoonse. Takuli kuti ndiliimya buya pe—ndicita buyo zyintu zikonzya kundipa ciindi.”

Ikuyeeya zyintu zibotu zimucitikila akaambo kakusala kwanu kulakonzya kumupa kukkomana akumugwasya kuzilanga kabotu zyintu. Mucikozyanyo, ba Mariusz, ibaalu bajisi bana botatwe baamba kuti: “Nindakatalika kwiiya Bbaibbele, ndakatalika kuzilanga kabotu zyintu. Ciindi aciindi, ndilaakuba mumapenzi, aayo alo Jehova alikke nguwaazyi. Pele ndilalumba akaambo kakuti Jehova ulandigwasya, aboobo ndilikkomene akaambo kakuzyiba kuti mapenzi aaya, ayakumana kumbele.”

Mbubonya mbuli ba Mariusz, ikuzilanga kabotu zyintu takukonzyi kumana mapenzi oonse. Pele kulakonzya kumugwasya kuti muliyumye. Tubala kuti: “Mazuba oonse aamuntu uupengede alakataazya, pele uukondwa mumoyo uli apobwe lyoonse.” (Tus. 15:15) Alimwi kamuyeeya Leza mbwamuyanda. Ikuyeeya kuli boobu kulakonzya kumupa kuti mumuyande kapati akuzumanana kukkomana.—Mt. 22:37.

Ikubikka kuyanda kwa Jehova mubusena bwakusaanguna kulakonzya kupa kuti kamukkomana mumukwasyi. Ikutondezya bube bwa Bunakristo kulakonzya kulesya kuzwangana alimwi kupa kuti bamumukwasyi kabamvwana kapati akwaanguluka kubandika lyoonse. Aboobo mumukwasyi wanu kunakuli luumuno alimwi alukamantano.—Int. 133:1.

Ikucita zyintu zyakumuuya mumukwasyi kulakonzya kumukkomanisya kapati. Ba Mariusz ibaambwa musyule bapandulula kuti: “Ndilaakucikkomanina kapati ciindi nendili antoomwe amukwasyi. Mukaintu wangu ulandigwasya kapati. Lyoonse kuti naa wacikonzya, inga tuunka limwi kukukambauka, kukusalazya busena nkotucitila miswaangano yacooko alimwi akukupa makani aabuleya mumbungano zimbi. Eeci cilandikkomanisya kapati.”

Imagwalo alabakulwaizya Banakristo kuti kababapa ziyandika zyakumubili bamumukwasyi. (1 Tim. 5:8) Pele ikuti mulimo wakumubili kaumumanina ciindi alimwi kamukatala kapati, tamukonzyi kucita milimo ya Leza kamukkomene. Amwaapailile makani aaya kuli Jehova. Bamwi bacibona kuti ikutegwa bazumanane kubikka Bwami bwa Leza mubusena bwakutaanguna, bayandika kucinca mulimo. (Int. 55:22) Kunyina Munakristo weelede kuyungwa amali manji ngavwola kumulimo wakumubili uumumanina ciindi anguzu ikutegwa amulesye kubikkila maano kuzyintu zyakumuuya iziyandika kapati.—Tus. 22:3.

Inga camugwasya ikulemba zyintu zibotu azibi mumulimo ngomuyanda kunjila naa ooyo ngomubeleka lino. Ikuvwola mali manji alimwi akubeleka mulimo ngomukkomanina, ncibotu. Nokuba boobo, sena mulimo ngomucita lino ulamupa kuti mubagwasye banamukwasyi kumuuya? Amuzilange-lange kabotu zyintu zyoonse, akusala zinga zyamugwasya kuzumanana kumvwana a Jehova.

Ikuti mulimo ngomucita kaumupa kuti mutaciti kabotu kumuuya, mulakonzya kucinca mulimo. Banakristo banji bakacinca bukkale bwabo kutegwa bajane ciindi cakucita zyintu zyakumuuya. Imukwesu umwi kucisi ca Poland waamba kuti: “Akaambo kakuti lyoonse ndakali kutumwa kwaakubelekela kumasena aambi, ndakayeeya kuti ndicileke kubeleka mukkampani eeyi. Tiindakali kujana ciindi cakulanganya mukwasyi wangu naa kucita zyintu zyakumuuya.” Lino ubeleka mulimo uukonzya kumupa ciindi cinji cakucita zyintu zyakumuuya.

Kamukukkomanina Kugwasya Bamwi

Jesu wakati “kupa kuli coolwe kwiinda kupegwa.” (Inc. 20:35) Banakristo bali acoolwe cakucita oobo. Zimwi ziindi, kumwetamweta, kumujata mumaanza naa kumulumbaizya muntu wacita kabotu mumbungano cilakonzya kuba ncecintu  celikke cikonzya kumukkomanisya moonse mobilo.

Imwaapostolo Paulo wakakulwaizya Banakristonyina kuti: “Mubaumbulizye batyompedwe mumyoyo, mubatabe bakompeme.” (1 Tes. 5:14) Batyompedwe balakonzya kulimvwa kuti tabakonzyi kuliyumya mumapenzi. Sena inga mwabagwasya ibali boobu? Ikuti naa mwabona kuti umwi akati kabanyoko waleka kuukkomanina mulimo wa Jehova, amumukulwaizye. Ikucita boobo kuya kumukulwaizya andinywe. Imapenzi amwi taaku muntu uukonzya kwaamanizya. Nokuba boobo, mulakonzya kumufwida lubomba munyoko akumukulwaizya kusyoma muli Jehova nkaambo walo takonzyi kwaalilwa. Aabo ibacita boobo tabakatyompwi pe.—Int. 27:10; Is. 59:1.

Inzila imwi njakutamba ooyo uutyompedwe kuti mubeleke limwi. Jesu naakatuma basikwiiya bakwe ibali 70, “wakabatuma bobile bobile.” (Lk. 10:1) Cakutadooneka, eeci ncaakacita Jesu cakabapa kuti bakulwaizyanye? Sena andinywe inga mwaibelesya nzila eeyi kugwasya bamwi aano mazuba?

Kuli zyintu zinji zitupa kulibilika mubuumi. Nokuba boobo, Paulo utwaambila kuti: “Amusekelele mu-Mwami lyoonse. Ee, ndaamba lwabili eli jwi lyakuti, Amusekelele.” (Flp. 4:4) Akaambo kakuti mulamuyanda Leza, mulamumvwida alimwi mulaliyumya mumulimo ngwaakamupa kuti mucite, mulazumanana kukkomana. Kunze lyaboobo, Jehova ulamugwasya kuliyumya mumapenzi ngomujisi.—Rom. 2:6, 7.

Tuli aalusyomo lwakuti tulaafwaafwi kunjila munyika mpya njaakatusyomezya Jehova. Eelyo kaka kunakuli zyintu zinji ziya kutupa kukkomana! (Int. 37:34) Aboobo katuzumanana kukkomana akaambo kakuti tulizibwene zyintu nzyatulongezya Jehova neliba lino. Twacita boobo, tulakonzya ‘kubelekela Jehova cakukkomana.’—Int. 100:2.

Citondezyo cili apeeji 8]

(Kutegwa mubone bwini mbwaakkede mabala, amubone bbuku lini)

Ambweni inga mwayandika kucinca mbomucibelesya ciindi canu ikutegwa muzumanane kukkomana

KULIKONDELEZYA

KULANGANYA MUKWASYI

MULIMO

MISWAANGANO YA BANAKRISTO

CIIYO CANU NOBENI

MULIMO WAKUKAMBAUKA

[Zifwanikiso izili apeeji 10]

Sena mulakonzya kugwasya bamwi kuti batalike alimwi kuukkomanina mulimo wa Jehova?