Sena Inga Mwazubukila ku Makedoniya?

NAAKALI mumunzi wa Trowa imwakali kwiimina mato ku Asia Minor, mwaapostolo Paulo wakabona cilengaano. Imwaalumi waku Makedoniya wakamukombelezya kuti: “Zubukila ku-Makedoniya, utugwasye.” Mbwaakacibonena buyo cilengaano, Paulo abantu mbaakali limwi ‘bakasyoma kuti Leza nguwakabaita kuti bakakambauke makani mabotu’ kubana Makedoniya. Ino ncinzi cakacitika? Mumunzi mupati wa Filipi waku—Makedoniya, Ludiya abamukwasyi wakwe bakatalika kuzisyoma nzyaakabaambila Paulo. Abamwi mubusena oobu bwaku Roma ku Makedoniya bakacita mbubonya oobo.—Inc. 16:9-15.

Ibusungu buli boobo bulalibonya akati ka Bakamboni ba Jehova mazuba aano. Ibanji bakalisungula kulongela kumasena kubulide bakambausi ba Bwami kababelesya mali aabo. Mucikozyanyo, Lisa wakali kuuyanda kapati mulimo wakukambauka. Wakalonga kuzwa ku Canada kuya ku Kenya. Ba Trevor aba Emily abalo ibazwa ku Canada bakaunka kwaakubelekela ku Malawi. Ba Paul aba Maggie, bana England, nibakacileka kubeleka, bakacibona kuba coolwe cakucita zinji mumulimo wa Jehova, aboobo bakalongela ku Africa nkoili Kujwe. Sena mulakonzya kulyaaba? Sena inga mwacikonzya kulonga? Ikuti kakuli boobo, ino ninjiisyo nzi amalailile aamu Bbaibbele aakonzya kumugwasya?

Amulilingule

Cintu ncomweelede kulanga-langa nkubona nzyomuyeeya. Jesu wakati mulawo mupati kwiinda yoonse ngwakuti: “Yanda Leza Jehova  wako amoyo wako woonse, amoya wako woonse, amumiyeeyo yako yoonse.” Ikaambo kapati kakuya kubelekela kucisi cimbi keelede kuba luyando kuli Leza alimwi akuyanda kumanizya mulimo wakugwasya bantu kuba basikwiiya. Jesu wakazumanana kati: “Awabili ulikozyenye awalo, ngooyu, Yanda mweenzinyoko mbuli mboliyanda omwini.” Ikuyanda basimukoboma kulatondezyegwa notubagwasya. (Mt. 22:36-39; 28:19, 20) Ikubelekela kucisi cimbi kanji-kanji kuyandika kuyuma alimwi akulyaaba. Takuli mbuli kuti muya kwaakuswaya buyo kubusena bukkomanisya. Mweelede kuti kamuyandide. Ba Remco aba Suzanne ibakucisi ca Netherlands, ibabelekela ku Namibia, mubufwaafwi baamba kuti: “Icitupa kuzumanana kubelekela okuno nduyando.”

Ba Willie, ibalangizi babbazu ku Namibia, baamba kuti: “Aabo ibabelekela mucisi cimbi tabalangili kuti bakwesu bakubusena—nkobaunka baya kubalanganya pe. Bakaboola amuzeezo wakubelekela antoomwe abakwesu aabo, ikubagwasya mumulimo wakukambauka.”

Mwamana kulanga-langa nzyomuyanda kucita, amulibuzye kuti: ‘Ino nduzyibo nzi ndondijisi ilukonzya kugwasya mucisi cimbi? Sena ndili musungu mukukambauka? Ino myaambo nzi njondizyi? Sena ndililibambide kwiiya mwaambo umbi?’ Amwaabandike makani aaya mumukwasyi. Amubabuzye baalu mumbungano yanu. Alimwi amubone kuti mwaapailila makani aaya kuli Jehova. Ikulilingula kuli boobo kweelede kumugwasya kubona naa mulakonzya kubelekela mucisi cimbi.—Amubone kabbokesi kakuti  “Amulizyibe.”

 Nkomukonzya Kubelekela

Paulo mucilengaano wakaitwa ku Makedoniya. Sunu, Jehova tabelesyi maleele kutusololela pe. Pele kwiinda mumagazini eeyi alimwi amabbuku aambi, bantu ba Leza balaambilwa zilawo zinji zibulide. Aboobo amusaangune kulemba mulongo wamasena aali boobo. Ikuti kamutalibambilide kwiiya mwaambo umbi naa kuya kukkala kucisi cimbi, mulakonzya kubelekela mucisi oomo momuuzyi kale mwaambo. Mpoonya amulange-lange zyintu mbuli mapepa aamuzumizya kuya kucisi cimbi, mbomuya kweenda, mbomukonzya kulikwabilila, mbozidula zyintu, alimwi ambokubede ooko nkomuya naa kulatontola naa kulapya. Cilakonzya kumugwasya kubandika abaabo ibakaunka kale. Nomucita boobo, amwaapailile makani aaya. Amuyeeye kuti Paulo abaabo mbaakali limwi “bakakasigwa [a] Muuya Uusalala kwaamba makani mu-Asiya.” Nokuba kuti bakasoleka kuunka ku Bituniya, “muuya wa-Jesu tuukabazuminide” kucita boobo. Mbubonya buyo, cilakonzya kutola ciindi cili mbocibede kutegwa mubone nkomukonzya kubelekela.—Inc. 16:6-10.

Mweelede kuti lino mwazibona nzila nzimukonzya kutobela. Ikuti kamuyanda kuyoobelekela kucisi cimbi, amubalembele bakumaofesi aamitabi aa Bakamboni ba Jehova kuzisi eezyo nkomuyanda kuunka. Amwaambe nzyomucita mumbungano alimwi amibuzyo iili yoonse njomujisi, mbuli mbozidula zyintu, maanda aakukkala ngomukonzya kubbadelela, naa zibbadela zili afwaafwi alimwi amilimo yakumubili njomukonzya kucita. Mpoonya mulakonzya kupa lugwalo naa magwalo aanu kuli bakkomiti yamulimo mumbungano yanu. Baya kubikkilizya lugwalo lumuzumizya kuti muleelela kubeleka alimwi bamana baya kwaatuma kumaofesi aamitabi ngomwakalembela. Cakutadooneka, baakusandula muya kusala nkomukonzya kuya kubelekela.

Ba Willie, ibaambwa kale, baamba kuti: “Aabo ibacikonzya kuunka kanji-kanji bakasaanguna kuunka kucisi akulangaula busena bukonzya kubakkomanisya. Banabukwetene bamwi bakabona kuti ciya kubakatazya kuya kukkala muminzi. Aboobo bakakkala mudolopo lisyoonto imwakali kuyandika lugwasyo pele nkobakali kukonzya kukkomana akaambo kakuti zyintu tiizyakali kudula.”

Kujana Zyintu Zipya

Ikulongela kumbi, cilakonzya kumuletela buyumuyumu bumwi. Lisa waambwa kale, waamba kuti: “Ikuti naa walendelelwa ulakonzya kupenga kapati.” Ino ncinzi cimugwasya Lisa? Nkuba abakwesu abacizyi bakumbungano kubusena ooku nkwaakaya. Wakalibikkila mbaakani yakubazyiba boonse mumbungano. Ikutegwa acikonzye kucita oobu, wakali kufwambaana kusika kumiswaangano akumuka kuunka kuŋanda kutegwa abandike ambabo.  Lisa wakali kubeleka ambabo mumulimo, wakali kubatamba kuŋanda yakwe alimwi wakabapanga kuti babe beenzinyina. Aboobo waamba kuti: “Ndakasala kabotu. Jehova wandilongezya.”

Nobakakomena bana babo, ba Paul aba Maggie bakalongela kumbi kuzwa kubusena ooko nkobakakkala myaka iili 30. Ba Paul baamba kuti: “Tiicakatukatazya kusiya zyintu zyoonse. Icakatukatazya kapati nkusiya mukwasyi. Twakalila kapati notwakali mundeke. Ncuuba-uba kuyeeya kuti, ‘Atupiluke buyo tutaunki.’ Pele twakasyoma Jehova. Ikumvwana abantu bambi kulakonzya kumupa kuti muzumanane.”

Ba Greg aba Crystal bakasala kulonga kuzwa ku Canada akuya ku Namibia akaambo kakuti bakali kubelesya Chingisi, imwaambo uubelesyegwa mucisi eeco. Nokuba boobo, mukuya kwamazuba bakabona kuti cilakonzya kugwasya ikwiiya mwaambo wakucisi eeco. “Zimwi ziindi twakali kutyompwa. Pele notwakaiya mwaambo wakooko ndendilo notwakabona mbobapona. Ikumvwana abakwesu kwatugwasya kuzyibila kubusena oobu bupya.”

Ikulicesya kuli boobo akulisungula kulakonzya kubagwasya abalo bakwesu bakubusena oobo. Ba Jenny balaiyeeya mikwasyi yakalongela kucisi ca Ireland nkobakakomenena. Baamba kuti: “Mikwasyi eeyi yakali kusamausya. Masimpe, bakaboola kubeleka, ikutali kubelekelwa. Bakalilisungude alimwi bakalikkomene kapati cakuti andime cakandipa kuya kubelekela kubusena kubulide.” Ba Jenny lino babelekela ku Gambia abalumi babo kabali bamisyinali.

Zilongezyo zya Jehova ‘Zilavwubya’

Eelyo kaka Paulo wakalongezyegwa kapati ku Makedoniya! Nokwakainda myaka iisika ku 10, wakalembela bakwesu ku Filipi kuti: “Ndalumba Leza wangu lyoonse nendi mukumuyeeya.”—Flp. 1:3.

Ba Trevor aba Emily, ibakabelekela ku Malawi kabatana kutambwa ku Watchtower Bible School of Gilead, abalo mbobalimvwa oobo. Baamba kuti: “Zimwi ziindi twakali kuyeeya naa twakali kucita kabotu, pele twakalikkomene. Twakali kumvwana alimwi twakalibonena zilongezyo zya Jehova.” Ba Greg aba Crystal, ibaambwa kale baamba kuti, “Kunyina cimbi ncotwakali kukonzya kucita kwiinda ceeci.”

Mubwini, tabali boonse ibakonzya kuya kubelekela kucisi cimbi. Bamwi balakonzya kucita kabotu kulongela kubusena kubulide mucisi cabo mumonya. Ibamwi balakonzya kubelekela mumbungano iimbi iili afwaafwi ankobakkala. Icintu ciyandika kapati nkubelekela Jehova. (Kol. 3:23) Aboobo, majwi aaya aakasololelwa amuuya ayakuba aamasimpe kulindinywe: “Lulongezyo lwa-Jehova lulavubya, alimwi tayungizyi mause kulindulo.”—Tus. 10:22.

Kabbokesi/[Cifwanikiso icili apeeji 5]

 Amulizyibe

Ikutegwa mubone naa inga mwaakubelekela kucisi cimbi, amulange-lange mibuzyo iitobela akwaapailila makani aaya kuti mubone naa mulakonzya kulonga. Itwaambo tuli mumamagazini aa Ngazi Yamulindizi aamusyule tulakonzya kumugwasya kucita oobo.

• Sena ndili muntu uusimide kumuuya?—“Masitepe Opezera Chimwemwe” (October 15, 1997, peeji 6)

• Sena ndili mukambausi musungu?—“Zimene Mungachite Kuti Utumiki Wanu Waupainiya Uyende Bwino” (May 15, 1989, peeji 21)

• Sena inga ndacikonzya kuya kukkala kubusena buli kulamfwu kusiya mukwasyi abeenzuma?—“Kulimbana ndi Malingaliro a Kulakalaka Kumudzi Kwanu mu Utumiki wa Mulungu” (May 15, 1994, peeji 28)

• Sena inga ndaiya mwaambo umbi?—“Kutumikira Mumpingo wa Chinenero China” (March 15, 2006, peeji 17)

• Sena ndilijisi mali aakubelesya ndaakulonga?—“Kodi Mungakatumikire Kudziko Lina?” (October 15, 1999, peeji 23)

[Cifwanikiso icili apeeji 6]

Ikulicesya akulisungula kulakonzya kubagwasya abalo bakwesu bakubusena oobo

[Cifwanikiso icili apeeji 7]

Aabo ibaboolela kubeleka mbambabo ibacikonzya