Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwasoleka kwiingula mibuzyo eeyi iitobela:

• Ino ncinzi ncotwiiya kuzwa kumulimo wa Jesu wakuvwuna Petro kuti atanyikili mulwizi? (Mt. 14:28-31)

Ikuti twabona kuti mukwesu walezya mulusyomo, tulakonzya kutambika janza lyesu akumugwasya kuti abe aalusyomo luyumu.—9/15, peeji 8.

• Ino nkulyaaba kuli buti nkwaakacita Jehova kutegwa tufwutulwe?

Jehova wakaliyumya ciindi mwanaakwe naakali kupenzyegwa akusampaulwa. Alimwi kweelana akulyaaba nkwaakacita Abraham ikwakuyanda kwaaba mwanaakwe, Jehova wakaliyumya ciindi Mwanaakwe naakali kujaigwa mbuli cigwebenga.—9/15, peeji 28-29.

• Ino ncinzi ncobakonzya kucita bazyali kutegwa babe aabubambe bugwasya bwa Kukomba Mumukwasyi?

Amubikke buzuba alimwi aciindi ca Kukomba Mumukwasyi mpoonya amucitobele lyoonse. Kuyungizya waawo, amusalile limwi buzuba bumbi mbomukonzya kwiiya Bbaibbele ikuti naa tiimwacikonzya kucita oobo mubuzuba mbomwiiya lyoonse akaambo kazyintu zyacitika nzyomwatali kuyeeyela.—10/15, peeji 29.

• Ino lugwalo lwa Tusimpi 24:27 lutuyiisya nzi kujatikizya ‘kuyaka ŋanda’?

Musankwa uuyanda kukwata weelede kulibambila kabotu kutegwa akacikonzye kuzuzikizya mukuli ooyo. Eeci cilabikkilizya akulibambila kugwasya mukwasyi wakwe kumubili alimwi akusololela muzyintu zyakumuuya.—10/15, peeji 12.

• Ino mbuti Jehova a Jesu mbobakatupa cikozyanyo cibotu cakulemeka bamwi?

Nokuba kuti ujisi cuuno caatala, Jehova ulaalubomba kubantu alimwi ulabalemeka. Mumwaambo wakusaanguna, Jehova naakali kwaambila Abrahamu a Musa, wakabelesya bbala lya Chihebulayo ilitondezya kuti wakali kubalomba buya. (Matl. 13:14; Kul. 4:6) Leza alimwi ulaswiilila bantu nobaambaula anguwe. (Matl. 18:23-32) Awalo Jesu mbwaakacita oobo alimwi wakalilisungwide kugwasya bantu. Bunji bwaziindi wakali kubelesya mazyina aabo naakali kubaita.—11/15, peeji 25.

• Ino nkaambo nzi mucizyi uusandulula makani aa Bbaibbele mumwaambo wakutambaika kumiswaangano ya Bunakristo ncayelede kusama citambala?

Akaambo kazyintu zibelesyegwa nobasandulula makani mumwaambo wakutambaika, uusandulula ulabonwa abaswiilizi, nkaambo ulalibonya acipeku-peku kakuli iwaamba makani talibonyi kuli boonse. Aboobo cileelela kuti mucizyi uusandulula mumwaambo wakutambaika kasama citambala kutegwa atondezye bulemu akutondezya kuti mulimo ngwacita ngwabakwesu.—11/15, page 12.