Amubagwasye Bana Benu Ikuliyumya Mumapenzi

IBANA basyoonto balipengede. Muuya wa Saatani wakucita zibi ulibazungulukide alimwi bayandika kuliyumya “[ku]zisusi zyabwanike.” (2 Tim. 2:22; 1 Joh. 5:19) Alimwi akaambo kakuti ‘bayeeya Mulengi wabo,’ balapenzyegwa abaabo bakazya nzyobasyoma. (Muk. 12:1) Nobayeeya ciindi nibakali kukomena ba Vincent baamba kuti: “Lyoonse kuli wakali kundipenzya naa kundisoka kutegwa tulwane akaambo kakuba Kamboni. Iziindi zinji cakali kubija cakuti tiindakali kuyanda akuunka kucikolo.” *

Kunze lyakupenzyegwa abantu bambi, bana besu basankwa abasimbi abalo balijisi mapenzi aabo abalo aakuyanda kuba mbuli beenzinyina. Cathleen, imucizyi uuli amyaka iili 16 waamba kuti: “Cilakatazya kubonwa kuti uliindene abeenzinyoko.” Mukwesu uucili mwana wazyina lya Alan waamba kuti:  “Beenzuma mbondiiya limwi, lyoonse bakali kunditamba kumamanino aansondo, eeci cakali kundikkomanisya, ndakali kuunka. Alimwi ibana ncibayanda kapati nkutola lubazu muzisobano zyakucikolo, zyalo izikonzya kubapa kuba abeenzinyina bakonzya kubayunga. Mucizyi Tanya waamba kuti: “Ndilayanda kusobana. Lyoonse beendelezya zisobano bakali kundilomba kuti ndikasobane. Cakali kundikatazya kukaka.”

Ino mbuti mbomukonzya kubagwasya bana benu kutegwa baliyumye kubuyumu-yumu mbobajana? Jehova wakabapa mulimo ibazyali wakuti kababagwasya bana babo. (Tus. 22:6; Ef. 6:4) Ncobayanda bazyali bamuyoowa Leza ncakuti bana baiye kutobela milawo ya Jehova. (Tus. 6:20-23) Kuti bacita oobo, ibana inga balakonzya kuliyumya kumapenzi aabasikila nokuba kuti bazyali tabako munsi-munsi.

Ibazyali bajisi buyumu-yumu bwakujana zyintu ziyandika mubuumi, kukomezya bana akucita milimo yakumbungano aciindi ncimunya eeco. Bamwi balacita oobo kabali bazyali bali balikke naa kabakwete naa kukwatwa kumuntu uutali Kamboni. Nokuba boobo, Jehova uyanda kuti ibazyali kabajana ciindi cakuyiisya akugwasya bana babo. Aboobo ino ncinzi ncomukonzya kucita kutegwa mubagwasye bana benu kuti baliyumye kumasunko amapenzi aabacitikila abuzuba?

Ikumvwana a Jehova

Cakutaanguna, ibana besu mumbungano bayandika kumuzyiba ncobeni Jehova. Bayandika kugwasyigwa “kubona yooyo uutabonwa.” (Heb. 11:27) Ba Vincent ibaambwa kale balayeeya bazyali babo mbubakabagwasya kuti babe beenzinyina a Jehova. Baamba kuti: “Bakandiyiisya mbociyandika kupaila. Ndilayeeya kuti kuzwa kaindi nindakacili mwana ndakali kupaila kuli Jehova lyoonse masiku ndaunka kukoona. Jehova ndakali kumubona kuti muntu wini.” Sena mulapaila abana benu? Sena mwakamvwa kale ncibaamba kuli Jehova nobapaila? Sena baile kwiinduluka zyintu nzimunya lyoonse? Naa sena balamwaambila Jehova bwini mbobalimvwa?  Kuti kamwiiswiilila mipailo yabo muya kuzyiba naa bacita kabotu kumuuya.

Ikuba abubambe bwakubala Ijwi lya Leza nenzila imwi ibana njobakonzya kubelesya kumvwana a Jehova. Cathleen iwaambwa kale waamba kuti: “Ikulibala Bbaibbele lyoonse kandicili mwana kwakandigwasya kapati. Cakandipa kusyoma kuti nokuba kuti bantu tabandiyandi, Jehova ulandiyanda.” Sena bana benu balijisi bubambe bwakubala Bbaibbele?—Int. 1:1-3; 77:12.

Masimpe, ibana balaindana mbobaamvwa malaile aabazyali. Alimwi ikucita kabotu kwabo kumuuya ciya buyo mbuli ciimo cabo. Nokuba boobo, ikuti bana mwatabayiisya kabotu, tabakonzyi kumuzyiba Jehova. Bazyali beelede kubayiisya bana babo Jwi lya Leza kutegwa bazyibe mbwayeeya Jehova nociba ciindi nobali balikke. (Dt. 6:6-9) Bana benu beelede kusyoma kuti Jehova ulababikkila maano.

Mbomukonzya Kubandika Munzila Iigwasya

Kubandika nenzila imwi njomukonzya kubelesya kutegwa mugwasye bana benu. Masimpe, ikubandika kabotu tacaambi buyo kwaambaula abana pele kubikkilizya zinji. Cibikkilizya kubuzya mibuzyo akuswiilila nobaingula, nokuba kuti bwiinguzi mbobapa tabuli boobo mbomuyanda kumvwa. Ba Anne, ibajisi bana basankwa bobilo baamba kuti: “Ndilaakubuzya mibuzyo kusikila ndamvwa cini ncobayeeya acibapenzyede.” Sena bana benu balizyi kuti mulabaswiilila nibaambaula? Tanya waambwa kale waamba kuti: “Ibazyali bangu bakali kundiswiilila nindakali kwaambaula alimwi ndilaakuyeeya mbutwakali kubandika. Bakali bazyi beenzuma boonse mbindakali kwiiya limwi. Bakali kubuzya mbobapona alimwi azyintu zimwi buyo nzyitwakabandikide.” Kuswiilila akuyeeya kulayandika kapati mumubandi.

 Mumikwasyi minji, bajana kuti ciindi cakulya nceciindi cibotu cakubandika. Ba Vincent baamba kuti: “Kulida antoomwe cakali kutukkomanisya kapati. Aboobo, toonse twakali kulangilwa kuti katuliko ciindi cakulya. Kweebelela cipekupeku, kuswiilila wailesi naa kubala ciindi cakulya tiicakali kuzumizyigwa. Akaambo kakuti mibandi yesu yakali kukkomanisya alimwi yakali kuyumya-yumya, eeci cakali kundigwasya kuliyumya mumapenzi ngondakali kujana kucikolo.” Uyungizya kuti: “Kuzyibila kubandika abazyali bangu ciindi cakulya cakandigwasya kwaanguluka kubaambila zyintu zyakali kundikatazya.”

Amulibuzye kuti: ‘Ino nziindi zyongaye nzyotulida antoomwe?’ Ikuti kamutaciti oobo sena inga mwajana nzila yakuti kamubandika abana benu?

Mbobuyandika Bubambe bwa Kukomba Mumukwasyi

Bubambe bwa Kukomba Mumukwasyi abwalo bulabagwasya boonse kubandika kabotu alimwi cilabagwasya bana kuliyumya mumapenzi ngobajana. Alan iwaambwa kale waamba kuti: “Nitwakali Kukomba Mumukwasyi bazyali bangu bakali kubelesya ciindi eeci ikutugwasya kuti tulikwaye kwaamba nzyotuyeeya. Bakali kubandika andiswe makani aamba zyintu zyakali kutucitikila.” Banyina Alan baamba kuti: “Nitwakali kwiiya, twakali kulibambila akutondezya mbotukonzya kucita notubandika abamwi. Mibandi eeyi yakabagwasya bana kuzyiba mbobakonzya kubapanduluda bamwi nzyobasyoma akubatondezya kuti nzyamasimpe. Eeci cakali kubapa kuti kabaliyumya mumapenzi ngobakali kujana.”

Masimpe, nzinji ziyandika kutegwa bana batayungwi abeenzyinyina. Imwana teelede kubaambila buyo beenzinyina kuti tandiyandi kucita ncomundaambila. Weelede kubaambila ncacitila boobo naa ncakakila kucita zyintu zimwi. Alimwi weelede kuzyiba ncayelede kucita nafwubaazyigwa akaambo kalusyomo lwakwe. Ikuti katacikonzyi kwaamba  nzyasyoma, inga camukatazya kwiiminina bukombi bwakasimpe. Aboobo kutegwa aliiminine, nomwiiya atondezye mbwakonzya kucita nabandika abeenzinyina.

 Mukabbokesi kali apeeji 18 kuli nzila nzyobakonzya kubelesya bana nobacita zitondezyo ciindi ca Kukomba Mumukwasyi. Kutegwa zitondezyo eezyi zibagwasye, amubabuzye mibuzyo mbubwenya mbobakonzya kubabuzya beenzyinyina. Kuyungizya waawo, amulange-lange twaambo tumwi tukonzya kubagwasya tuli mu Bbaibbele. Ikuti bana benu kamubayiisya boobu aŋanda, balakonzya kuliyumya kumapenzi ngobajana kucikolo anobali kumbi buyo.

Sena Kuli Luumuno Aŋanda?

Sena bana benu balakkomana kujokela kuŋanda bakotoka kucikolo? Ikuti naa kuli luumuno kuŋanda, cilakonzya kubagwasya ibana kuti kabaliyumya mumapenzi. Mucizyi umwi lino uuli ku Bbeteli wakaamba kuti: “Cintu cimwi ciyandika kapati icakandigwasya nindakali kukomena ncakuti aŋanda kwakali luumuno. Nokuba kuti zyakatazya buti zyintu kucikolo, ndakali kuliyumya akaambo kakuzyiba kuti ndaunka kuŋanda ndiya kukkomana.” Ino kuli buti kuŋanda yenu? Sena kuli “inyemo, insulano, [a]mipampo mipambo” naa sena kuzyibidwe kuti kuli ‘luyando, lukondo aluumuno’? (Gal 5:19-23) Ikuti naa ziindi zinji kakutako luumuno, sena mulaakusoleka kujana nzila ikonzya kupa kuti bana kabaliiba aŋanda?

Nzila aimwi ikonzya kumupa kuti mubagwasye bana kuti kabaliyumya, nkubagwasya kuti babe abeenzyinyina bali kabotu. Mucikozyanyo, mulakonzya kutamba bakwesu abacizyi bamumbungano ibayumu kumuuya nomulikondelezya. Ambweni mulakonzya kujika cakulya kutegwa mulide antoomwe abalangizi beendeenda naa aabo bali mumulimo waciindi coonse. Alimwi ikuti naa kuli bamisyinali naa babeleka ku Bbeteli, ibana balakonzya kumvwana akubandika abantu aaba kwiinda mukubalembela magwalo, tugwalo twaakkompyuta naa kubatumina luwaile. Ikusobana naa kumvwana abantu bali boobu cilakonzya kubagwasya bana benu akuba ambaakani zyakumuuya. Kamuyeeya imwaapostolo Paulo mbwaakamugwasya Timoteo naakacili mwana. (2 Tim. 1:13; 3:10) Ikumvwana a Paulo kwakapa kuti Timoteo kabikkila maano kuzyintu zyakumuuya.—1 Kor. 4:17.

Amubalumbaizye Bana Benu

Jehova ulakkomana nabona bana kabacita kabotu nokuba kuti balasunkwa anyika eeyi yeendelezyegwa a Saatani. (Int. 147:11; Tus. 27:11) Cakutadooneka, andinywe mulakkomana nomubona bana nobasala camaano. (Tus. 10:1) Amubaambile bana benu mbomulimvwa kujatikizya mbabo akubalumbaizya. Jehova wakapa cikozyanyo cibotu kubazyali. Ciindi Jesu naakabbapatizyigwa, Jehova wakaamba kuti: “Nduwe mwanaangu uuyandwa, ndakondwa loko kulinduwe.” (Mk. 1:11) Eelyo kaka majwi aa Bausyi eelede kuti akamuyumya Jesu kumapenzi ngaakali kulangila! Mbubwenya buyo, inga mwabaambila bana kuti mulabayanda akubalumbaizya akaambo kazyintu nzyobacita kabotu.

Masimpe, tamukonzyi kubacingilila bana benu kubantu boonse bakonzya kubayunga, kubakatazya alimwi akubafwubaazya. Nokuba boobo, nzinji nzyomukonzya kucita kutegwa mubagwasye. Ino munzila nzi? Amubagwasye kuti kabamvwana a Jehova. Amubone mbomukonzya kubagwasya kuti kabalikwaya kubandika. Nomukomba mumukwasyi, amubandike twaambo tugwasya alimwi akuti kube luumuno aŋanda. Kwiinda mukucita boobo, ibana benu balakonzya kuliyumya mumapenzi.

Bupanduluzi buyungizidwe

Kabbokesi/[Cifwanikiso icili apeeji 18]

 KUCITA MBOBAKONZYA KWIINGULA CILAKONZYA KUMUGWASYA

Nzyeezyi zyintu zimwi zikonzya kubacitikila bana benu. Mulakonzya kulibambila akutondezya mbobakonzya kucita nomukomba mumukwasyi.

▸ Weendelezya cisobano waambila mwaneenu musimbi kuti abe munkamu yabasizibano kucikolo.

▸ Mwaneenu musankwa bamupa tombwe beenzyinyina naazwa kucikolo.

▸ Bana basankwa bamwi bayoosya mwaneenu musankwa kuti baya kumuuma ikuti bakamubone kakambauka alimwi.

▸ Mwaneenu musimbi nali mumulimo wamumuunda wakuŋanda aŋanda, wajana ngwaiya limwi.

▸ Kabali akati kambaiya limwi, mwaneenu musimbi wabuzyigwa ncataimbili lwiimbo lwacisi.

▸ Mwana musankwa umwi lyoonse ulamufwubaazya mwaneenu musankwa akaambo kakuba Kamboni.

[Cifwanikiso icili apeeji 17]

Sena bana benu balijisi bubambe bwakubala Bbaibbele?

[Cifwanikiso icili apeeji 19]

Sena nomulikondelezya mulasobana abakwesu naa bacizyi bayumu kumuuya?