Bulelo Bwa Jehova Bwasumpulwa!
Bulelo Bwa Jehova Bwasumpulwa!
“Syakeemba nguuendelezya mubwami bwabasyaansi.”—Dan.4:17.
1, 2. Ino ntwaambo nzi tumwi itwapa kuti bantu baalilwe kulilela?
BANTU bwaalilwa kulilela! Aaka kaambo takudoonekwi buya pe. Ikaambo kapati ikapa kuti bantu baalilwe kulilela nkakuti tabajisi busongo bukonzya kubapa kuti balilele kabotu. Citondezyo cakuti bantu baalilwa kulilela ncakuti baleli banji mazuba aano ‘baliyanda, balaayandisya mali, mbasimantumbwaambwa, mbasikasankusanku, tabakombeleli, mbaasikancimwa, mbaasimfundiilili, mbaasiluvwiyu, tabalyeendelezyi, mbaasitunyetunyetu, tabayandi bubotu, mbaasimusuzyanya, mbaasikainya alimwi balalisumpula.’—2 Tim. 3:2-4.
2 Kaindi, ibazyali besu bakusaanguna bakakaka kweendelezyegwa a Leza. Nobakacita boobo bakali kuyeeya kuti baanguluka. Pele, masimpe ngakuti bakatalika kweendelezyegwa a Saatani. Kwainda myaka iili zyuulu zili cisambomwe kuzwa ciindi Saatani “mwami wenyika ino” naakayunga bantu kuti kabalilela, alimwi lino bantu bajisi mapenzi manji kwiinda mbocakabede kaindi. (Joh. 12:31) Ikwaamba mbobapona bantu mazuba aano, ibbuku lya The Oxford History of the Twentieth Century lyakaamba kuti, “tacigwasyi kuyeeya kuti nyika eeyi kuli noiya kuba kabotu.” Lyaamba kuti: “Kunze lyakutaba anyika mbotu, inzila zyoonse nzyobakonzya kubelesya kuti babe anyika mbotu inga zyaile kupa kuti kube mapenzi, kudyaaminina alimwi ankondo.” Masimpe eeci ncitondezyo cakuti bantu baalilwa kulilela!
3. Ino Leza naakatweendelezya buti ikuti ba Adamu a Eva nibatakabisya?
3 Eelyo kaka cilausisya kubona kuti ibazyali besu bakusaanguna bakaka kweendelezyegwa a Leza walo uucizyi kweendelezya! Masimpe, tatuzyi naa Jehova naakayeendelezya buti nyika ikuti ba Adamu a Eva nibakazumanana kusyomeka. Nokuba boobo, masimpe ngakuti Leza naakabeendelezya kabotu kwiinda mukubayanda alimwi akutabasala. (Inc.10:34; 1 Joh.4:8) Kunze lyaboobo, mbwaanga busongo bwa Leza tabumani, tulakonzya kuba masimpe kuti, ikuti bantu nibakazumanana kweendelezyegwa a Jehova imapenzi oonse ngobaleta bantu naataliko. Bweendelezi bwa Leza nibwacikonzya ‘kubakutya baumi boonse.’ (Int. 145:16) Mubufwaafwi inga twaamba kuti naakabeendelezya kabotu. (Dt. 32:4) Cakabija kuti bantu bakakaka kweendelezyegwa a Leza.
4. Ino Saatani wazumizyigwa ikulela kusikila aali?
4 Pele, nokuba kuti Jehova wakabazumizya bantu kuti kabalyeendelezya, ncotuteelede kuluba ncakuti tanaakacileka kweendelezya zilenge zyakwe. Naba mwami waku Babuloni naakakeempwa wakazyiba kuti “Syakeemba nguuendelezya mubwami bwabasyaansi.” (Dan. 4:17) Mukuya kwaciindi, ikuyanda kwa Leza kuya kucitika. (Mt. 6:10) Masimpe, kwaciindi cisyoonto Jehova wazumizya Saatani kuti abe “leza waansi aano” ikutegwa tusalazyigwe twaambo ntwaakatalisya sikukazya ooyu. (2 Kor. 4:4, BT.; 1 Joh.5:19) Nokuba boobo, kunyina buzuba Saatani mbwaakacita cintu ikwiinda aali ceeco ncaakamuzumizya kuti acite Jehova. (2 Mak. 20:6; amweezyanisye Job.1:11, 12; 2:3-6.) Alimwi lyoonse kuli bantu ibasala kubelekela Leza nokuba kuti bakkala munyika yeendelezyegwa a Sikondonyina wa Leza.
Leza Mbwaakabeendelezya Bana Israyeli
5. Ino bana Israyeli bakamvwana nzi a Leza?
5 Kuzwa ciindi naakali kupona Abelo kusikila kuciindi cabana Israyeli, kwakali bantu bakali kumukomba Jehova alimwi akutobela milawo yakwe. (Heb. 11:4-22) Muciindi ca Musa, Jehova wakapangana cizuminano abana ba Jakobo, aba bakaba cisi cabana Israyeli. Mu 1513 B.C.E., bana Israyeli bakazumina kuti balo alimwi abana babo boonse banakweendelezyegwa a Jehova kabati: “Coonse buyo Jehova ncaamba tulacicita.”—Kul. 19:8.
6, 7. Ino mbuti Leza mbwaakali kubeendelezya bana Israyeli?
6 Kuli kaambo Jehova ncaakabasalila bana Israyeli kuti babe bantu bakwe. (Amubale Deuteronomo 7:7, 8.) Naakabasala tanaakali kulanga buyo mbobakali kupona. Izyina lya Leza abweendelezi bwakwe azyalo zyakalibikkilizyidwe alimwi zyakali kuyandika kapati. Ibana Israyeli bakeelede kupa bumboni bwakuti Jehova ngo Leza alikke mwini-mwini. (Is. 43:10; 44:6-8) Aboobo, Jehova wakaambila cisi eeci ikuti: “Nkaambo muli bantu basalalisya kuli-Jehova Leza wanu. Jehova wamusala kuzwa kumisyobo yoonse iili ansi ano kuti mube musyobo wakwe uuyandika.”—Dt. 14:2.
7 Leza naakali kubeendelezya bana Israyeli wakalizyi kuti tabalondokede. Kulubazu lumwi, milawo yakwe yakalilondokede alimwi yakali kutondezya bube bwayooyo Iwakabapa. Imilawo ya Jehova njaakapa Musa yakatondezya kuti ulasalala Leza, uyandisya bululami, ulalekelela alimwi ulakkazyika moyo. Kumbele, mumazuba aa Joshua abantu mbakali kupona limwi, bana Israyeli bakali kwiitobela milawo ya Jehova, aboobo kwakali luumuno alimwi bakalongezyegwa kumuuya. (Jos. 24:21, 22, 31) Izyakacitika kubana Israyeli zyakatondezya kuti Jehova nguweelede kulela.
Ikweendelezyegwa Amuntu Kuletela Mapenzi
8, 9. Ino ncintu nzi citagwasyi ncobakalomba bana Israyeli alimwi ino ncinzi cakabacitikila?
8 Kwaciindi cili mbocibede, bana Israyeli bakali kukaka kweendelezyegwa a Leza, aboobo bakali kupenga akaambo kakuti Leza tanaakali kubakwabilila. Mukuya kwaciindi, kwiinda mumusinsimi Samuele, bana Israyeli bakalomba kuti babe amwami waanyika. Jehova wakamuzumizya Samuele kuti abape ncibakali kulomba. Nokuba boobo, Jehova wakayungizya kwaamba kuti: “Teensi nduwe ngubasampaula, ndime ngubasampaula kutaba mwami kulimbabo.” (1 Sam. 8:7) Nokuba kuti Jehova wakabazumizya bana Israyeli kuba amwami, wakabaambila kuti kweendelezyegwa amuntu kuletela mapenzi.—Amubale 1 Samuele 8:9-18.
9 Izyakabacitikila zyakatondezya kuti nzyaakaamba Jehova zyakali zyamasimpe. Kulelwa amuntu kwakabaletela mapenzi bana Israyeli, ikapati kuti imwami ooyo katasyomeki. Ikulanga cikozyanyo cabana Israyeli, tacigambyi kubona kuti mfwulumende zyeendelezyegwa abantu batamuzyi Jehova zilaalilwa kweendelezya kabotu. Masimpe, ibali mutwaambo twacisi bamwi balomba Leza kuti abagwasye kutegwa kabaicita kabotu milimo yabo kutegwa kube luumuno, pele ino mbuti Leza mbwakonzya kubagwasya bantu bali boobu ibatayandi kweendelezyegwa anguwe?—Int. 2:10-12.
Cisi Cipya Iceendelezyegwa a Leza
10. Ino nkaambo Leza ncaakasalila bambi akubaleka bana Israyeli mbakasalide?
10 Bana Israyeli bakaleka kubelekela Jehova cakusyomeka. Kumane, bakamukaka Mesiya iwakatumwa a Leza, awalo Jehova wakabakaka amane wakasala nkamu yabantu bambi ibakaba cisi cipya. Akaambo kaceeci, mumwaka wa 33 C.E. imbungano ya Banakristo bananike yakatalika. Imbungano eeyi njiyakaba cisi cipya iceendelezyegwa a Jehova. Paulo wakaamba cisi eeci kuti “[m]bana ba-Israyeli ba-Leza.”—Gal. 6:16.
11, 12. Ino nkukozyanya kuli buti kuliko akati kaba Israyeli bansiku “[a]bana ba-Israyeli ba-Leza”?
11 Akati kacisi cabana Israyeli bansiku “[abana] ba-Israyeli ba-Leza” bapya, kuli zyintu nzibaindene anzibakozyenye. Kwiindana abana Israyeli bansiku, imbungano ya Banakristo taijisi mwami waanyika alimwi taiyandiki kwaaba banyama kutegwa basizibi balekelelwe. Kukozyanya kuliko akati kacisi cabana Israyeli ambungano ya Banakristo nkwakuti kuli bubambe bwakuba abapati naa baalu. (Kul. 19:3-8) Ibaalu aaba Banakristo tabeendelezyi butanga bwa Leza pe. Muciindi caboobo, ibaalu beembela mbungano alimwi balabasololela kabotu bakwesu mumilimo ya Bunakristo. Alimwi balabayanda bantu boonse mumbungano akubapa bulemu mbubayandika.—2 Kor. 1:24; 1 Pet. 5:2, 3.
12 Kwiinda mukuzinzibala kuyeeya mbuli mbwaakali kubeleka abana Israyeli Leza, “bana ba-Israyeli ba-Leza” abeenzinyina “[iba]mbelele zimwi” balamulumba Jehova akaambo kakuti weendelezya kabotu. (Joh. 10:16) Mucikozyanyo, izyakali kucitika zitondezya kuti ibakali kweendelezya bana Israyeli bakali kupa kuti bacite zyintu zibotu naa zibi. Aaka kaambo kazyibya baalu kuti, nekuba kuti tabali basololi mbuli bamami bansiku, beelede ikutondezya cikozyanyo cibotu cakusyomeka.—Heb. 13:7.
Mbwayendelezya Jehova Mazuba Aano
13. Ino ncinzi cipati cakacitika mu 1914?
13 Banakristo mazuba aano bakambaukila bamasi kuti bweendelezi bwabantu buli afwaafwi kumana. Mu 1914, Jehova wakatalisya Bwami bwakwe kujulu ibweendelezyegwa a Jesu Kristo, Mwami ngwaakasala. Aciindi eeci, wakamuzumizya Jesu kuti aunke “kuya buzunda akuzunda.” (Ciy. 6:2) Imwami mupya ooyu wakaambilwa kuti: “Ube mweendelezi akati kabasinkondonyoko.” (Int. 110:2) Cuusisya ncakuti ibantu bamuzisi bakaka kweendelezyegwa a Jehova. Bazumanana kucita mbuli kuti “taakwe Leza.”—Int. 14:1.
14, 15. (a) Ino mbuti mbotweendelezyegwa a Bwami bwa Leza mazuba aano, alimwi mibuzyo nzi njotunga twalibuzya? (b) Imazuba aano, ino ncinzi citondezya kuti bweendelezi bwa Leza mbobwiinda kubota?
14 Ibananike basyoonto ibali mukabunga “[ka]bana ba-Israyeli ba-Leza” baciliko anyika banabokwabo a Jesu, balazumanana kubeleka kabali “bangambela ba-Kristo.” (2 Kor. 5:20) Basalwa kuba baciinga camuzike musyomesi uucenjede kutegwa kababamba cakulya cakumuuya ca Banakristo bananike abankamu mpati aabo lino ibabikkilizya tuulunzuma twabantu balangila kupona buumi butamani anyika. (Mt. 24:45-47; Ciy. 7:9-15) Jehova ulabulongezya bubambe oobu akaambo kakuti mazuba aano bakombi bakasimpe bacita kabotu kumuuya.
15 Aumwi weelede kulibuzya kuti: ‘Sena ndiliizyi kabotu milimo njondeelede kucita mumbungano? Sena ndilabutobela bweendelezi bwa Jehova? Sena ndilikkomene kweendelezyegwa a Bwami bwa Jehova? Kweelana anguzu naa bukkale bwangu, sena ndililibambilide kwaambila bamwi makani aa Bwami bwa Leza?’ Mbotuli kabunga, tulazumina kusololelwa a Kabunga Keendelezya alimwi akucita ncotwaambilwa abaalu mumbungano. Notucita boobo, tutondezya kuti twabuzumina bweendelezi bwa Leza. (Amubale Ba-Hebrayo 13:17.) Kulibombya kubweendelezi kuleta lukamantano oolo lutako kubantu bakunyika. Alimwi cipa kuti kube luumuno abululami calo cipa kuti Jehova alemekwe, kutondezya kuti bweendelezyi bwakwe mbobwiinda kubota.
Bweendelezi bwa Jehova Bwazunda
16. Ino ncinzi aumwi ncayelede kusala mazuba aano?
16 Iciindi cilaafwafwi kusika cakumana kaambo katalisyigwa mumuunda wa Edeni. Aboobo, lino nceciindi bantu nobeelede kusala. Aumwi weelede kulisalila ikuti naa uyanda kweendelezyegwa a Jehova naa kuzumanana kweendelezyegwa bantu. Tuli acoolwe cakugwasya babombe myoyo kuti basale kabotu. Lino lino lya Amagedoni, Jehova uyakuzigusyila limwi mfwulumende zyabantu ziyungwa a Saatani. (Dan. 2:44; Ciy. 16:16) Kweendelezyegwa abantu kuyakumana, bolikke Bwami bwa Leza mbobuna kweendelezya nyika yoonse. Masimpe bweendelezi bwa Jehova buyoosumpulwa mane kukabe kutamani.—Amubale Ciyubunuzyo 21:3-5.
17. Ino nzyintu nzi zibagwasya bantu babombe myoyo kusala kabotu caboola kumakani aabweendelezi?
17 Aabo batana sala kweendelezyegwa a Jehova beelede kwaapailila makani aaya akuyeeya zyintu zibotu ziya kweetwa abweendelezi bwa Leza. Bweendelezi bwabantu bwaalilwa kumana manyongwe amilimo iicitwa azigwebenga. Bweendelezi bwa Leza buyakugusya ibabi boonse aano anyika. (Int. 37:1, 2, 9) Bweendelezi bwa bantu bwapa kuti kube nkondo, pele Leza anakulela uyakumana “nkondo mane kusikila kumamanino aanyika.” (Int. 46:9) Alimwi bweendelezi bwa Leza buyakupa kuti bantu abanyama kabakkala antoomwe muluumuno. (Is. 11:6-9) Ibucete anzala nzyezyintu zyikatazya kapati mazuba aano, pele bweendelezi bwa Leza buya kuzimana eezyi zyoonse. (Is. 65:21) Nobaba baabo beendelezi ibajisi makanze mabotu baalilwa kumana malwazi alimwi alufwu, pele bweendelezi bwa Leza buyakupa kuti bacembede abaciswa bakabe anguzu alimwi akukkomana mbubwena mbubakabede. (Job. 33:25; Is. 35:5, 6.) Masimpe nyika iyakuba paradaiso alimwi bafwide baya kubusyigwa.—Lk. 23:43; Inc. 24:15.
18. Ino mbuti mbotukonzya kutondezya kuti bweendelezi bwa Leza mbobwiinda kubota?
18 Masimpe, bweendelezi bwa Leza buya kwaamana mapenzi oonse Saatani ngaakaleta naakayunga bazyali besu bakusaanguna kuti baleke kutobela Mulengi wabo. Alimwi kamuyeeya kuti, Saatani wali kubapenzya bantu kwamyaka iili 6,000 pele Leza kwiinda muli Kristo, uyakwaamana mapenzi aaya oonse mumyaka iili 1,000 buyo. Eeci ncitondezyo cakuti Leza mupati alimwi bweendelezi bwakwe mbobwiinda kubota! Mbutuli Bakamboni ba Leza, tulazumina kuti ngo Mweendelezi wesu. Aboobo, lyoonse notupona tweelede kutondezya kuti tuli bakombi ba Jehova, ibeendelezyegwa a Bwami bwakwe, alimwi bakkomena kuba Bakamboni bakwe. Alimwi atubelesye ciindi coonse ncotujana ikwaambila bantu kuti bweendelezi bwa Jehova mbobwiinda kubota.
Ino Ncinzi Ncotwaiya Kujatikizya Bweendelezi bwa Leza Nitwali Kubala . .
[Mibuzyo yaciiyo]
[Zifwanikiso izili apeeji 29]
Jehova lyoonse weendelezya kabotu
[Cifwanikiso icili apeeji 31]
Kulibombya kubweendelezi bwa Jehova kupa kukamantana nyika yoonse