Zyoonse Nzyomucita Abuzuba Zyeelede Kumuleka Leza

SINTEMBAUZYO Davida wakapaila kuli Jehova kuti: “Mvwe luzyalo lwako cifumo . . . Undizibye inzila njinjeelede kweenda.” (Int. 143:8) Mwabuka cifwumo-fwumo, sena mulaakumulumba Jehova kubuzuba bupya akuti amusololele muzyintu nzyomuyanda kucita ibuzuba oobo, mbuli mbwaakacita Davida? Cakutadooneka mulacita oobo.

Mbotuli babelesi ba Jehova, “kufumbwa zintu nzi[t]ucita, nikuba kulya nikuba kunywa niciba cintu cimwi,” tulazicita “zyoonse cakuti kube bulemu kwa-Leza.” (1 Kor. 10:31) Tulizyi kuti mbotupona abuzuba tulakonzya kumulemeka naa kumusampaula Jehova. Alimwi tulizyi kuti Ijwi lya Leza lyaamba kuti Saatani ulababejelezya banabokwabo Kristo—ababelesi boonse ba Leza ibali anyika—“isikati amasiku.” (Ciy. 12:10) Nokuba boobo, tweelede kutondezya kuti nzyaamba Saatani nzyakubeja akukkomanisya Jehova kwiinda mukubelekela Taateesu wakujulu milimo iisetekene “isikati amasiku.”—Ciy. 7:15; Tus. 27:11.

Mubufwaafwi, atulange-lange nzila zyobilo ziyandika kapati izyambotukonzya kumulemeka Leza abuzuba. Nzila yakusaanguna njakuzibikkila maano zyintu ziyandika kapati, mpoonya yabili, ikubabikkila maano bantu.

Mbotukonzya Kupona Kweelana Akulyaaba Kwesu

Kwiinda mukulyaaba kuli Jehova, twakatondezya kuti tuyanda kumubelekela amoyo wesu woonse. Alimwi twakamusyomezya Jehova kuti tunakweenda munzila zyakwe “mazuba oonse”—mane kukabe kutamani. (Int. 61:5, 8) Ino mbuti mbotupona kweelana ancitwakasyomezya? Ino mbuti mbotutondezya kuti tulamuyanda Jehova amoyo wesu woonse abuzuba?

Ijwi lya Leza lilatutondezya milimo Jehova njayanda kuti tucite. (Dt. 10:12, 13) Milimo imwi ilajanika mukabbokesi kajisi mutwe wakuti  “Milimo Njatupa Leza” kali apeeji 22. Milimo yoonse eeyi izwa kuli Leza aboobo ilayandika kapati. Ino mbuti mbotukonzya kusala mulimo ngotweelede kutaanguna kucita ikuti naa kuli milimo minji iyeelede kucitwa aciindi comwe?

Tutaanguna kubikkila maano kumilimo iisetekene, yalo iibikkilizya kuba aciiyo ca Bbaibbele, kupaila, kuya kumiswaangano alimwi akuya mumulimo wakukambauka. (Mt. 6:33; Joh. 4:34; 1 Pet. 2:9) Pele, milimo yakumuuya taikonzyi kucitwa buzuba boonse. Ikubeleka, ikuunka kucikolo akucita milimo yaaŋanda zileelede kubikkilizyigwa amulongo wazyintu zyeelede kucitwa. Nokuba boobo, tulasoleka canguzu kucita kuti milimo yoonse njotucita itanyonganyi milimo iisetekene njotucita, mbuli kuya kumiswaangano yambungano. Mucikozyanyo, notuyanda kulyookezya, tweelede kubona kuti tatuunki ciindi naswaya mulangizi wabbazu, nekuli muswaangano waalubazu, muswaangano wabbazu naa muswaangano wacooko. Zimwi ziindi, tulakonzya kucita milimo yobilo aciindi comwe. Mucikozyanyo, mumukwasyi tulakonzya kubikka bubambe bwakusalazya Ŋanda ya Bwami naa kubelesya ciindi cakulyookezya masikati kumulimo naa kucikolo kutegwa tukambaukile mbotubeleka limwi naa mbotwiiya limwi. Masimpe, kufwumbwa ciindi notuyanda kusala cakucita mubuumi bwesu—mbuli kujana mulimo, kusala kkoosi njomuyanda kucita naa kusala balongwe—tweelede kusala kweelana acintu ciyandika kapati  mubuumi bwesu—ikukomba Jehova, Taateesu siluyando.—Muk. 12:13.

Kamubabikkila Maano Bantu

Jehova uyanda kuti katubabikkila maano bantu akubacitila zyintu zibotu. Kulubazu lumwi, Saatani ukulwaizya kuliyanda. Nyika yakwe izwide bantu “basikuliyanda” alimwi “bayandisya misalo yaansi” abaabo “[iba]byala zintu zyanyama.” (2 Tim. 3:1-5; Gal. 6:8) Ibanji tabayeeyi zyintu nzyobacita mbozibajatikizya bamwi. “Milimo yanyama” ilajanika koonse.—Gal. 5:19-21.

Eelyo kaka baliindene kapati abantu basololelwa amuuya uusalala wa Jehova, ibayanda beenzinyina, ibali abuuya akucitila bantu zyintu zibotu! (Gal. 5:22) Ijwi lya Leza litwaambila kuti tweelede kuzibikkila maano zyintu nzyobayandika bantu kwiinda zyesu. Aboobo, tucita zyintu izitondezya kuti tulabikkilana maano, nokuba kuti tatunjilili mutwaambo twabantu. (1 Kor. 10:24, 33; Flp. 2:3, 4; 1 Pet. 4:15) Tulababikkila maano kapati basyomima. Nokuba boobo, abalo bantu batasyomi tulabagwasya. (Gal. 6:10) Sena inga mwabona nzila mbomukonzya kutondezya luzyalo kubantu mbomuyaanya sunu?—Amubone kabbokesi kajisi mutwe wakuti  “Amubabikkile Maano” ikali apeeji 23.

 Kubabikkila maano bantu tacaambi kuti kuyandika kucita oobo aciindi cimwi naa kucita oobo ikuti kwacitika cintu cimwi. (Gal. 6:2; Ef. 5:2; 1 Tes. 4:9, 10) Muciindi caboobo, abuzuba tweelede kuzyiba mbobapona bantu alimwi akulibambila kubagwasya ikuti kwayandika, nokuba kuti cimwi ciindi cilakonzya kunyonganya zyintu nzyotwali kuyanda kucita. Tuyanda kupa kufwumbwa zyintu nzyotukonzya mbuli ciindi cesu, zyintu, kubaambila zyintu nzyotuzyi alimwi izikonzya kubagwasya. Jehova ulatusyomezya kuti, ikuti katugwasya bantu, awalo uyakutugwasya.—Tus. 11:25; Lk. 6:38.

Kubeleka Milimo Iisetekene “Isikati Amasiku”

Sena cilakonzyeka kumubelekela Jehova milimo iisetekene “isikati amasiku”? Inzya, kwiinda mukutola lubazu lyoonse mumilimo yoonse iijatikizya bukombi bwesu. (Inc. 20:31) Milimo eeyi ibikkilizya kubala akuzinzibala kuyeeya nzyotubala mu Jwi lya Leza abuzuba, kupaila cakutaleka, kujanika kumiswaangano yoonse alimwi akukambauka kufwumbwa twajana ciindi.—Int. 1:2; Lk. 2:37; Inc. 4:20; 1 Tes. 3:10; 5:17.

Sena tulamubelekela Jehova milimo iisetekene iili boobu? Ikuti naa mbotucita oobo, nkokuti zyintu nzyotucita abuzuba zilatondezya kuti tulamukkomanisya Jehova akutondezya kuti nzyaamba Saatani nzyakubeja. Tulamulemeka Jehova muzyintu zyoonse nzyotucita. Notutobela njiisyo zyakwe zitupa kuti katwaambaula kabotu katulilemeka akutugwasya notusala zyakucita. Notumusyoma akumubelekela anguzu zyesu zyoonse, tutondezya kuti tulamulumba akaambo kakutulanganya kabotu alimwi akutugwasya. Alimwi tulazumina kulaigwa ikuti twabisya akaambo kakuti tatulondokede.—Int. 32:5; 119:97; Tus. 3:25, 26; Kol. 3:17; Heb. 6:11, 12.

Atuzumanane kumulemeka Leza abuzuba. Kwiinda mukucita boobu, tulakatalukwa alimwi Taateesu wakujulu unakutulanganya kabotu mane kakabe kutamani.—Mt. 11:29; Ciy. 7:16, 17.

Kabbokesi/[Zifwanikiso izili apeeji 22]

 Milimo Njatupa Leza

• Kupaila lyoonse.—Rom. 12:12.

• Kubala akwiiya Bbaibbele, kutobela zyintu nzyotubala.—Int. 1:2; 1 Tim. 4:15.

• Kukomba Jehova mumbungano.—Int. 35:18; Heb. 10:24, 25.

• Kupa mukwasyi zyintu ziyandika zyakumubili azyakumuuya.—1 Tim. 5:8.

• Kukambauka makani mabotu aa Bwami akugwasya bantu kuba basikwiiya.—Mt. 24:14; 28:19, 20.

• Kuzibikkila maano zyintu zyakumubili, zyakumuuya anzyotuyeeya zyalo zibikkilizya kulikondelezya kuli kabotu.—Mk. 6:31; 2 Kor. 7:1; 1 Tim. 4:8, 16.

• Kwiibikkila maano milimo yamumbungano.—Inc. 20:28; 1 Tim. 3:1.

• Kusalazya maanda eesu a Ŋanda ya Bwami.—1 Kor. 10:32.

Kabbokesi/[Cifwanikiso icili apeeji 23]

 Amubabikkile Maano

• Mukwesu naa mucizyi uucembeede.—Lev. 19:32.

• Muntu uuciswa naa uupengede mumizeezo.—Tus. 14:21.

• Mukwesu naa mucizyi uuyandika cintu cakufwambaana ncomukonzya kumupa.—Rom. 12:13.

• Wamukwasyi.—1 Tim. 5:4, 8.

• Musyominyoko iwafwidwa mukaintu naa mulumi.—1 Tim. 5:9.

• Imwaalu uubeleka canguzu mumbungano yanu.—1 Tes. 5:12, 13; 1 Tim. 5:17.