Kamulibelesya Kabotu “Panga lya-Muuya”
Kamulibelesya Kabotu “Panga lya-Muuya”
“Amubweze . . . panga lya-muuya, nkukuti ijwi lya-Leza.”—EF. 6:17.
1, 2. Ino mbuti mbotweelede kwiingula kubwiite bwakukambauka makani aa Bwami?
NAAKABONA kuti bantu banji bayandika zyintu zyakumuuya, Jesu wakaambila basikwiiya bakwe kuti: “Kutebula kwavula, batebuzi bacea. Nkaambo kaako amukumbile mwami uuli amuunda kuti atume batebuzi kukutebula kwakwe.” Jesu tanaakayiila buyo amajwi aaya. Naakaamba majwi aaya, “wakaita basikwiiya bakwe bali ikumi ababili” akubatuma kuti bakakambauke, naa kutebula. (Mt. 9:35-38; 10:1, 5) Kumbele, Jesu “wakabika bamwi abali makumi aali musanu mwaabili, wakabatuma bobile bobile” kutegwa bacite mulimo ngomunya ooyu.—Lk. 10:1, 2.
2 Basikukambauka Bwami balayandika kapati amazuba aano. Nyika yoonse ibakajanika ku Ciibalusyo mumwaka wamulimo wa 2009 bakali 18,168,323. Ooyu wakali mweelwe wabantu bainda ku 10,000,000 kwiinda amweelwe wa Bakamboni ba Jehova. Masimpe, myuunda iyandika kutebula. (Joh. 4:34, 35) Aboobo, tweelede kupaila akulomba babelesi bambi. Pele ino mbuti mbotukonzya kubeleka kweelana ancitwalomba? Tulakonzya kucita oobo kwiinda mukubeleka canguzu mumulimo wakukambauka Bwami akugwasya bantu kuba basikwiiya.—Mt. 28:19, 20; Mk. 13:10.
3. Ino mbuti muuya wa Leza mboutugwasya kuti tubeleke kabotu mumulimo wamumuunda?
3 Cibalo cainda cali kwaamba mbotukonzya kugwasyigwa amuuya wa Leza kuti ‘twaambaule makani aa-Leza cabusicamba.’ (Inc. 4:31) Imuuya ooyu alimwi ulakonzya kutugwasya kutegwa katucita kabotu mubukambausi. Nzila yomwe mbotukonzya kuba bakambausi bacita kabotu nkubelesya cibelesyo ncaakatupa Jehova cibotu kapati calo cili ndi Jwi lyakwe Ibbaibbele. Lyakasololelwa amuuya wakwe uusalala. (2 Tim. 3:16) Aboobo, notwaabelesya kabotu Magwalo mumulimo wamumuunda citondezya kuti tusololelwa amuuya uusalala. Katutana talika kucita oobo, atubone Ijwi eeli mbolili anguzu.
‘Ijwi lya Leza Lili Anguzu’
4. Ino Bbaibbele inga lyamucinca buti muntu?
4 Eelyo kaka jwi lya Leza naa mulumbe wakwe uuli anguzu! (Heb. 4:12) Kubelesya maambilambali, imulumbe wamu Bbaibbele ulabosya kwiinda panga lili lyoonse lipangwa abantu akaambo kakuti lilayasa akwaandaanya zifwuwa amooma. Kasimpe kamu Bbaibbele kalamusika amoyo muntu akutondezya cili mumoyo wakwe. Kasimpe aaka kalaanguzu alimwi kalakonzya kucinca bukkale bwamuntu. (Amubale Ba-Kolose 3:10.) Masimpe, Jwi lya Leza lilakonzya kucinca bantu.
5. Ino muunzila nzi Bbaibbele molikonzya kutusololela, alimwi ino ncinzi cikonzya kucitika?
5 Kunze lyaboobo, mu Bbaibbele muli busongo butakonzyi kujanika kuli koonse. Lilijisi mulumbe uukonzya kugwasya bantu kuti kabapona kabotu munyika eeyi iipilingene. Ijwi lya Leza lilatumunikila lino alimwi akumbele. (Int. 119:105) Lilakonzya kutugwasya kapati notuli mumapenzi, notusala beenzuma, zyakulikondelezya, mulimo, zyakusama naa zyintu zimbi buyo. (Int. 37:25; Tus. 13:20; Joh. 15:14; 1 Tim. 2:9) Kubelesya njiisyo zili mu Jwi lya Leza cipa kuti katumvwana abantu. (Mt. 7:12; Flp. 2:3, 4) Ikuti twazumizya jwi lya Leza kuti litumunikile nkotuya, tulakonzya kubona nzyotusala mboziya kutugwasya kumbele. (1 Tim. 6:9) Magwalo alimwi alasinsima ncaya kucita Leza kumbele, akutugwasya kuti katupona kweelana ambwayanda. (Mt. 6:33; 1 Joh. 2:17, 18) Eelyo kaka muntu inga wakkomana ikuti katobela njiisyo zya Leza kuti zimusololele mubuumi!
6. Ino mbuti Bbaibbele mbolikonzya kutugwasya munkondo yakumuuya?
6 Kamuyeeya buyo alimwi Bbaibbele mbolikonzya kutugwasya munkondo yakumuuya. Paulo wakaamba kuti Ijwi lya Leza “[ndi]panga lya-muuya.” (Amubale Ba-Efeso 6:12, 17.) Ikuti mulumbe uuli mu Bbaibbele wabelesyegwa kabotu, ulakonzya kwaangulula bantu mubuzike bwa Saatani. Ndipanga lifwutula bantu muciindi cakubajaya. Aboobo, tweelede kulibelesya kabotu.
Amulibelesye Kabotu Jwi lya Leza
7. Ino nkaambo nzi ncociyandika kwiiya kulibelesya kabotu “panga lya-muuya”?
7 Sikalumamba ulakonzya kuzibelesya kabotu zilwanyo zyakwe kunkondo ikuti naa waiya mbozibelesyegwa. Ncimwi buyo akubelesya “panga lya-muuya” munkondo yesu yakumuuya. Paulo wakalemba kuti: “Kolisungwaazya kukonda Leza, mbuli simulimo uutakwe cintu cimuusya insoni, uupandulula makani aalusinizyo mbukweelede.”—2 Tim. 2:15.
8, 9. Ino ncinzi cikonzya kutugwasya kutegwa tuzyibe ncolyaamba Bbaibbele? Amupe cikozyanyo.
8 Ino ncinzi ciya kutugwasya ‘kwaapandulula kabotu makani’ mumulimo wesu wakukambauka? Katutana baambila bamwi ncolyaamba Bbaibbele, tweelede kusaanguna kucizyiba ncolyaamba. Kutegwa tucite oobo, tuyandika kucibala cibalo coonse.
9 Ikutegwa tulumvwisye lugwalo, tuyandika kutubala tupango toonse tuli atala atuli ansi aakapango nkotubala. Majwi ngaakaamba Paulo aali ku Ba-Galatiya 5:13 alatugwasya kubona mbotukonzya kucita oobo. Wakalemba kuti: “Inywe, nubakwesu, mwakaitwa kuti mube abulubusi, pele amucenjele kuti obu bulubusi butabi buliinsyo bwakucita zisusi zyanyama. Umwi aumwi abe muzike kumweenzinyina cakuyandana.” Ino mbulubusi nzi mbwaakali kwaamba Paulo aawa? Sena wakali kwaamba kulubuka kuzwa kucibi alufwu, kubukombi bwakubeja naa kucintu cimwi buyo? Imajwi aali mutupango twamusyule atondezya kuti Paulo wakali kwaamba kulubuka “kuzwa kulutuko lwa-Mulao.” (Gal. 3:13, 19-24; 4:1-5) Wakali kwaamba lwaanguluko lwa Banakristo. Aabo bakazumina kuba alwaanguluko luli boobu bakali kubelekelana akaambo kakuyandana. Aabo ibatakajisi luyando bakatalika kuvwiyana akuzwangana.—Gal. 5:15.
10. Kuti katuyanda kuti tulumvwisye lugwalo ndotubala, ino twaambo nzi ntotweelede kulanga-kalanga alimwi inga twatujana kuli?
10 Kutegwa twaamvwisye kabotu magwalo ncaamba, tweelede kubona twaambo tuzingulukide, mbuli wakalilemba bbuku elyo, nilyakalembwa alimwi naa wakali mubukkale buli buti. Alimwi cilagwasya kuzyiba ncilyakalembelwa bbuku elyo akubona mbubali kupona, mbubakali kulilemeka alimwi ambubakali kukomba kuciindi eeco. *
11. Ino nzyintu nzi nzyotuteelede kucita notupandulula magwalo?
11 “[Ku]pandulula makani aalusinizyo mbukweelede” takwaambi buyo kwaapandulula kabotu Magwalo. Tatweelede kubelesya Bbaibbele kuyoosya bantu. Nokuba kuti tulaakubelesya Magwalo kwiiminina kasimpe, mbuli Jesu mbwaakacita naakasunkwa aa Diabolosi, tatweelede kubelesya Bbaibbele kufwubaazya bamwi, kubayoosya naa kubasinikizya kusyoma nzyotusyoma. (Dt. 6:16; 8:3; 10:20; Mt. 4:4, 7, 10) Tweelede kwaatobela malailile ngaakaamba Petro aakuti: “Amulemeke Kristo mumyoyo yanu kuti ngo-Mwami. Amube balibambide lyoonse, kuti mubapandulwide boonse bamubuzya makani aalusyomo lumukalilide, pele amuvuwe amoyo mutete akuyoowa Leza.”—1 Pet. 3:15.
12, 13. Ino nzyintu nzi izili mbuli “mampangala mayumu” izikonzya kumwaigwa a Jwi lya Leza? Amupe cikozyanyo.
12 Ikuti naa twalibelesya kabotu Ibbaibbele, ino ncinzi ncolikonzya kucita? (Amubale 2 Ba-Korinto 10:4, 5.) Kasimpe kali mu Magwalo kalakonzya kumwaya “mampangala mayumu,” eeci caamba kuyubununa njiisyo zyabukombi bwakubeja, micito iitali kabotu alimwi anjiisyo zyabantu zitondezya kutalondoka kwabantu. Tulakonzya kubelesya Bbaibbele kutegwa tubagwasye bantu kuti baleke “[ku]lisumpula cakulwisya luzibo lwa-Leza.” Njiisyo zyamu Bbaibbele zilakonzya kubagwasya bantu kutegwa kabayeeya kweelana ancokaamba kasimpe.
13 Amubone cikozyanyo cabacembele bali amyaka 93 ibakkala ku India. Kuzwa nibakazyalwa bakali kusyoma njiisyo yakuzyalululwa. Nibakatalika kwiiya Bbaibbele kwiinda mukulembelana magwalo amwanaabo musankwa uukkala kucisi cimbi, bakatalika kuzisyoma nzyobakali kwiiya kujatikizya Jehova azyintu nzyasyomezya. Nokuba boobo, njiisyo yakuzyalululwa bakali kwiisyoma kapati cakuti bakakaka kuzumina imwanaabo naakabaambila mbobabede bafwide. Bakaamba kuti: “Tandikonzyi kwaamvwa kabotu aaya Magwalo ngoonditumina. Zikombelo zyoonse ziyiisya kuti kuli cintu cimwi mumuntu citafwi. Lyoonse ndali kusyoma kuti ikuti muntu wafwa, kuli cimwi cintu cizyalululwa mumibili iimbi kwaziindi ziinda ku 8,400,000. Ino eeci inga caba buti cakubeja? Sena zikombelo zimwi nzyakubeja?” Sena “panga lya-muuya” lilakonzya kumwaya zyintu nzyobasyoma kapati bantu? Nibakamana kwaabala Magwalo aambi aajatikizya kaambo aaka, bakamulembela nikwakainda nsondo zili mbozibede kuti: “Lino ndatalika kubona cini cicitika bantu nobafwa. Cilandikkomanisya kuzyiba kuti bantu baakubusyigwa, tuya kubonana abayandwa besu bakafwa. Ndipaila buyo kuti Bwami bwa Leza bufwambaane kuboola.”
Amulibelesye Ikukombelezya Bantu
14. Ino kubakombelezya baswiilizi besu caamba nzi?
14 Ikulibelesya kabotu Bbaibbele mumulimo wamumuunda takwaambi buyo kuzubulula magwalo. Paulo wakali “kubakombelezya” bantu, andiswe tweelede kucita oobo. (Amubale Incito 19:8, 9; 28:23.) “Kukombelezya” caamba “kumuzula muntu.” Ooyo wakombelezyegwa ulazisyoma eezyo nzyaambilwa. Notwamukombelezya muntu kuti azizumine nzyaiya mu Bbaibbele, tumupa kuti azisyome eezyo njiisyo. Kutegwa tucite oobu, tweelede kubagwasya kubona kuti nzyotwaamba nzyamasimpe. Tulakonzya kucita oobu munzila zitobela.
15. Ino mbuti mbomukonzya kutondezya bantu ncolyaamba Bbaibbele akubatondezya kuti andinywe mulalisyoma?
15 Amubatondezye bantu ncolyaamba Bbaibbele akubatondezya kuti andinywe mulalisyoma. Mwalubala lugwalo, amumugwasye muntu kuti abone mbwayeeya Leza kujatikizya makani aayo. Mwamana kumubuzya mubuzyo muntu ooyu akumvwa bwiinguzi bwakwe, mulakonzya kumwaambila kuti: ‘Atubone mbwakalanga kaambo aaka Leza.’ Ambweni mulakonzya kumubuzya kuti: ‘Ino Jehova inga waamba nzi kukaambo aaka?’ Kuti mwacita oobu inga catondezya kuti Ibbaibbele lizwa kuli Leza alimwi lilakonzya kumugwasya sikuswiilila kuti kalisyoma Bbaibbele. Ikucita boobo cilayandika kapati, ikapati kuti kamukambaukila muntu uusyoma muli Leza pele uutacizyi kabotu ncolyaamba Bbaibbele.—Int. 19:7-10.
16. Ino ncinzi cikonzya kumugwasya kwaapandulula kabotu magwalo?
16 Mutabali buyo magwalo; amwaapandulule. Paulo wakajisi cilengwa ‘cakupandulula akutondezya’ magwalo ncaamba kujatikizya zyintu nzyaakali kuyiisya. (Inc. 17:3) Kanji-kanji ilugwalo lulaakuba atwaambo tunji, pele muyandika kukankaizya kaambo ikaamba ceeco ncomubandika. Mulakonzya kucita oobu kwiinda mukuwiinduka muzeezo ooyo naa mubuzyo uukonzya kumugwasya uulaaŋanda kuti akabone kaambo. Mwamana kamupandulula ncolwaamba lugwalo oolo. Mpoonya, amumugwasye kubona mbwakonzya kulubelesya lugwalo oolo.
17. Ino mbuti mbomukonzya kwaapandulula Magwalo munzila iilimvwisya?
17 Amwaapandulule Magwalo munzila iilimvwisya. Kakombelezya akupandulula kabotu, Paulo ‘wakali kubandika abantu makani aamu Magwalo.’ (Inc. 17:2, 4) Mbubwenya mbuli Paulo, kamubagwasya bamuswiilila kuti bazimvwe nzyobabala. Kamubuzya mibuzyo kutegwa muzyibe zili mumoyo wamuntu. (Tus. 20:5) Mutani kubbodoli. Amwaambe twaambo munzila iilimvwisya. Mweelede kumupanduluda ncimwaambila boobo. Nzimwaamba zyeelede kuzwa mu Jwi lya Leza. Inga cainda kubota ikubala lugwalo lomwe akulupandulula alimwi akumupa citondezyo ikwiinda kubala buyo magwalo obilo naa otatwe kakunyina kupandulula. Ikubelesya bumboni ibutondezya mbokaluzi kaambo kulakonzya kupa kuti ‘muyungizye luzyibo kukwaambaula kwanu.’ (Tus. 16:23) Zimwi ziindi cilayandika kuvwuntauzya kutegwa mujane twaambo atumbi. Bacembele ibaambwa kale ibali amyaka iili 93 bakali kuyandika kuzyiba ncoidumide njiisyo yakuti muntu uli amuuya uutafwi. Ikutegwa bazumine ncoliyiisya Bbaibbele kukaambo aaka bakeelede kuyiisyigwa nkoyakazwida njiisyo eeyi amboyakatalika kubelesyegwa muzikombelo zinji zyamunyika. *
Amuzumanane Kulibelesya Kabotu
18, 19. Ino nkaambo nzi ncotweelede kuzumanana kulibelesya kabotu “panga lya-muuya”?
18 Ibbaibbele lyaamba kuti: “Ziyanza zyaansi ano zili mukwiindilila.” Bantu babi bayabwiindila kubija. (1 Kor. 7:31; 2 Tim. 3:13) Aboobo cilayandika kapati kuti tuzumanane kumwaya “mampangala mayumu” kwiinda mukubelesya “panga lya-muuya, nkukuti ijwi lya-Leza.”
19 Tulikkomene kuti tujisi Jwi lya Leza Ibbaibbele, alimwi tulakonzya kubelesya mulumbe mubotu uuli mumo ikuyubununa njiisyo zyakubeja akugwasya babombe myoyo. Mulumbe ooyu uli anguzu kapati kwiinda mampangala aali oonse. Aboobo, atusungwaale kulibelesya “panga lya-muuya” mumulimo ngwatupede Leza iwakukambauka Bwami.
Bupanduluzi buyungizidwe
^ munc. 10 Imabbuku aakonzya kutugwasya kuzyiba twaambo toonse ituli mukapango nkotubala ngakuti “Magwalo aya Oonse” Alasyomeka Alimwi Alagwasya, Insight on the Scriptures, alimwi azibalo mbuli cakuti “Ijwi lya Jehova Lili Abuumi,” mu Ngazi Yamulindizi.
^ munc. 17 Amubone kabroshuwa yakuti Ncinzi Cicitika Kulindiswe Twafwa? mapeeji 5-16.
Ino Ncinzi Ncomwaiya?
• Ino Jwi lya Leza lijisi nguzu nzi?
• Ino mbuti mbotukonzya ‘kwaapandulula makani aalusinizyo mbukweelede’?
• Ino ncinzi ncoukonzya kucita mulumbe wamu Bbaibbele caboola “[ku]mampangala mayumu”?
• Ino mbuti mbomukonzya kubakombelezya bantu mumulimo wakukambauka?
[Mibuzyo yaciiyo]
Kabbokesi/[Cifwanikiso icili apeeji 12]
Mbomukonzya Kulibelesya Ijwi lya Leza Ikukombelezya Bantu
▪ Amubagwasye kuti kabalisyoma Bbaibbele
▪ Amwaapandulule Magwalo
▪ Amwaapandulule Magwalo munzila iilimvwisya
[Cifwanikiso icili apeeji 11]
Mweelede kwiiya kulibelesya kabotu “panga lya-muuya”