Kamuzumanana Kweenda Munzila Mbotu Kapati Yabuumi!
Kamuzumanana Kweenda Munzila Mbotu Kapati Yabuumi!
“Twapona, ngu-Mwami ngutuponena, alimwi twafwa, ngu-Mwami ngutufwida.”—ROM. 14:8.
1. Ino ncinzi Jesu ncaakayiisya cikonzya kupa kuti katupona kabotu?
JEHOVA uyanda kuti katukkomana abuumi bubotu. Bantu balakonzya kukkala munzila ziindene-indene, pele kuli buyo nzila yomwe iinda kubota. Nzila mbotu njotukonzya kukkomana mubuumi bwesu njakupona kweelana ancilyaamba Jwi lya Leza akwiiya ncaakali kucita Mwanaakwe, Jesu Kristo. Jesu wakaambila basikwiiya bakwe kuti kabamukomba Leza mumuuya amubwini alimwi wakabakulwaizya kuti bagwasye bantu kuba basikwiiya. (Mt. 28:19, 20; Joh. 4:24) Kwiinda mukupona kweelana ancaakaamba Jesu, tulamukkomanisya Jehova alimwi ulatuleleka.
2. Ino mbuti bantu banji mbobakautambula mulumbe wa Bwami mumwaanda wamyaka wakusaanguna, alimwi ino ikutobela “Nzila” caamba nzi?
2 Ciindi bantu “basalidwe buumi butamani” nobasyoma akubbapatizyigwa, tulakkomana akubaambila kuti: “Mwatambulwa kubukkale bubotu kapati!” (Inc. 13:48) Mumwaanda wamyaka wakusaanguna C.E., zyuulu zyabantu bazwa muzisi ziindene-indene bakakazumina kasimpe akutondezya kubuleya kuti bakalyaaba kuli Leza kwiinda mukubbapatizyigwa. (Inc. 2:41) Basikwiiya bakusaanguna aaba bakali kwaambwa kuti batobela “Nzila.” (Inc. 9:2; 19:23) Imajwi aaya akali kweelela akaambo kakuti aabo ibakaba basikumutobela Kristo bakali kupona kweelana ambobakali kwiiya alimwi bakali kuzisyoma nzyaakali kuyiisya Jesu Kristo akutobela nzyaakali kucita.—1 Pet. 2:21.
3. Ino nkaambo nzi bantu ba Jehova ncobabbapatizyigwa, alimwi ino bali bongaye ibakabbapatizyigwa imyaka iili kkumi yainda?
3 Imulimo wakugwasya bantu kuba basikwiiya wayaambele mazuba aano aamamanino alimwi lino ulacitwa mumasi aayinda ku 230. Mumyaka iili kkumi yainda, ibantu bainda ku 2,700,000 balyaaba kuli Jehova akubbapatizyigwa. Ooyu mweelwe waakati-kati wabantu bainda ku 5,000 ibabbapatizyigwa ansondo. Ikusala kubbapatizyigwa kutondezya kuti balamuyanda Leza, balaazyi Magwalo alimwi balazisyoma nzyobaiya. Ikubbapatizyigwa kulayandika kapati mubuumi bwesu akaambo kakuti nceciindi notutalika kumvwana a Jehova. Alimwi citondezya kuti tulamusyoma kuti uyakutugwasya notumubelekela, mbubwenya mbuli mbwaakabagwasya babelesi bakwe bakaindi kutegwa beende munzila yakwe.—Is. 30:21.
Ino Nkaambo nzi Ncomweelede Kubbapatizyigwa?
4, 5. Amwaambe zilongezyo zimwi nzyomujana akaambo kakubbapatizyigwa.
4 Ambweni muli aluzyibo lwa Leza, mwakacinca bukkale bwenu alimwi lino muli basikumwaya batabbapatizyidwe. Kucita boobu kulayandika. Pele sena mwakalyaaba kuli Leza kwiinda mumupailo alimwi sena muyanda kubbapatizyigwa? Kweelana ancomwiiya mu Bbaibbele, tusyoma kuti mulizyi kuti zyintu zyoonse nzyomucita mubuumi bwenu zyeelede kutondezya kuti mulamutembaula Jehova, ikutali kulikkomanisya naa kuyandaula lubono. (Amubale Intembauzyo 148:11-13; Lk. 12:15) Aboobo, ino nzilongezyo nzi nzyotujana akaambo kakubbapatizyigwa?
5 Mbomuli Banakristo balyaabide, munakupona kabotu. Munakukkomene akaambo kakuti mucita kuyanda kwa Leza. (Rom. 12:1, 2) Muuya uusalala wa Jehova uyakumugwasya kuti mube aluumuno alimwi alusyomo. (Gal. 5:22, 23) Leza uyakwiivwiila mipailo yenu akumulongezya ikuti kamupona kweelana ancolyaamba Jwi lyakwe. Ikukambauka kunakumukkomanisya alimwi ikupona munzila njazumizya Leza kuya kuyumya lusyomo lwenu lwakupona kukabe kutamani. Kunze lyaboobo, ikulyaaba akubbapatizyigwa kuya kutondezya kuti muyanda kuba umwi wa Bakamboni ba Jehova.—Is. 43:10-12.
6. Ino notubbapatizyigwa tutondezya nzi?
6 Kwiinda mukulyaaba kuli Leza akubbapatizyigwa, tutondezya kuti tuli kulubazu lwa Jehova. Imwaapostolo Paulo wakalemba kuti: “Nkaambo taakwe muntu naba omwe akati kesu uuliponena mwini nikuba kulifwida mwini. Nkaambo twapona, ngu-Mwami ngutuponena, alimwi twafwa, ngu-Mwami ngutufwida. Aboobo, nitupona nitufwa tuli bakwe Mwami.” (Rom. 14:7, 8) Leza ulatupa bulemu akaambo kakuti uyanda kuti katulisalila cakucita. Ikuti naa twasala kuti katumubelekela mubuumi bwesu akaambo kakumuyanda, tulamukkomanisya. (Tus. 27:11) Ikubbapatizyigwa kwesu kutondezya kuti twalyaaba kuli Leza alimwi tutondezya bantu kuti Jehova ngomuleli wesu. Eeci citondezya kuti tuli kulubazu lwakwe mukaambo kajatikizya bulelo bwakwe bwakoonse-koonse. (Inc. 5:29, 32) Awalo Jehova ulaba kulubazu lwesu. (Amubale Intembauzyo 118:6.) Ikubbapatizyigwa alimwi kutupa coolwe cakuba aazilongezyo zyakumuuya lino akumbele.
Basikwiiya Babbapatizyidwe Balaba Akati Kabanyina Bamvwana
7-9. (a) Ino Jesu wakabasyomezya nzi bantu ibakasiya zyintu zyoonse akumutobela? (b) Ino nzyaakaamba Jesu kulugwalo lwa Marko 10:29, 30 zizuzikizyigwa buti?
7 Mwaapostolo Petro wakaambila Jesu kuti: “Langa! iswe tulisiide zintu zyoonse kuzootobela nduwe. Ino tuyoopegwanzi?” (Mt. 19:27) Petro wakali kuyanda kuzyiba zyakali kuya kumucitikila antoomwe abasikwiiya ba Jesu bambi. Ikutegwa balyaabe cakumaninina mumulimo wakukambauka Bwami, nzinji nzyobakaliimya mubuumi bwabo. (Mt. 4:18-22) Ino Jesu wakabasyomezya nzi?
8 Kweelana ancaakaamba Marko, Jesu wakaamba kuti basikwiiya bakwe baya kuba akati kabanyina bakumuuya. Wakaamba kuti: “Taakwe muntu iwakaleka iŋanda nibaba banabakwabo nibaba bacizi nibaba banyina naba wisi nibaba bana bakwe niiba myuunda nkaambo kandime aka-Makani Mabotu, anu ulijene kale kuciindi ecino buncilincili bwamaanda abanabakwabo abacizi abamanyina abana amyuunda, antoomwe amapenzi, elyo muciindi ciboola uyoojana buumi butamani.” (Mk. 10:29, 30) Banakristo bamumwaanda wamyaka wakusaanguna, mbuli Ludiya, Akula, Priskila a Gayo, bakali akati kabaabo ibakajalula “maanda” alimwi bakaba ‘banabakwabo abacizi abanyina,’ kweelana ambwaakabasyomezya Jesu.—Inc. 16:14, 15; 18:2-4; 3 Joh. 1, 5-8.
9 Nzyaakaamba Jesu zilazuzikizyigwa aano mazuba. “Myuunda” njobasiya basikumutobela yaamba bukkale mbobakasiya ibanji, kubikkilizya bamisyinali, bamukwasyi wa Bbeteli, ibabelekela muzisi zimbi alimwi abantu bamwi buyo kutegwa babeleke mulimo wa Bwami muzisi ziindene-indene. Bakwesu abacizyi banji bakasiya maanda aabo kutegwa bamubelekele Jehova, eeci cilatukkomanisya notumvwa mbwaabagwasya Jehova alimwi ambobaukkomanina mulimo wabo. (Inc. 20:35) Kunze lyaboobo, babelesi ba Jehova babbapatizyidwe balakonzya kukkomana akaambo kakusaanguna “kuyandaula Bwami bwa-Leza abululami bwakwe” kabali akati ka Banakristo babunyina bwamunyika yoonse.—Mt. 6:33.
Balaliiba “Muciyubilo”
10, 11. Ino “ciyubilo ca-Mupatikampatila” ninzi, alimwi ino mbuti mbotukonzya kunjila mumo?
10 Kulyaaba akubbapatizyigwa kubapa kuba aacilongezyo acimbi, icakuba “muciyubilo ca-Mupatikampatila.” (Amubale Intembauzyo 91:1.) Oobu mbusena bwacikozyanyo bwakucingililwa kumuuya. Oobu mbusena bwakuyubila akaambo kakuti tabuzibidwe kuli baabo batasyomi Leza. Kwiinda mukupona kweelana akulyaaba kwesu alimwi akumusyoma cakumaniina Jehova, tumwaambila kuti: “[Nduwe] macijilo aangu, ndilinga lyangu, ngu-Leza wangu ngonsyoma.” (Int. 91:2) Jehova Leza uba mayubilo eesu. (Int. 91:9) Kunyina busena bubotu kwiinda boobu.
11 Kunjila “muciyubilo” ca Jehova alimwi caamba kuti twalongezyegwa kuba beenzinyina. Eeci cilatalika muntu nalyaaba akubbapatizyigwa. Aboobo, tulakonzya kuba balongwe ba Jehova kwiinda mukwiiya Bbaibbele, ikupaila camoyo woonse alimwi akumumvwida. (Jak. 4:8) Kunyina muntu uumbi uumvwana kapati a Jehova kwiinda Jesu, walo uuli aalusyomo lutazungaani. (Joh. 8:29) Aboobo, tutani kudooneki kuti Jehova ulayanda alimwi ulakonzya kutugwasya kuti tuzuzikizye cikonke cesu ncotwakacita notwakalyaaba. (Muk. 5:4) Zyintu zyakumuuya nzyabapa bantu bakwe Leza zitondezya kuti ulatuyanda kapati alimwi uyanda kuti tucikonzye kumubelekela.
Ikwiikkomanina Paradaiso Yesu Yakumuuya
12, 13. (a) Ino paradaiso yakumuuya ninzi? (b) Ino mbuti mbotukonzya kubagwasya bapya?
12 Kulyaaba akubbapatizyigwa alimwi kulatupa kuti katupona muparadaiso yakumuuya. Mbusena buli kabotu motukkala abasyomima, ibamvwana a Jehova Leza alimwi abeenzinyina. (Int. 29:11; Is. 54:13) Kunyina busena buli boonse munyika bukonzya kweelana aparadaiso yesu yakumuuya. Eeci cilalibonya ikapati kumiswaangano mipati yamasi, kwalo bakwesu abacizyi ibazwa mumasi manji, myaambo alimwi amisyobo ibaswaangana antoomwe kabali muluumuno, kabakamantene alimwi kabamvwana.
13 Paradaiso yakumuuya motubede iliindene kapati abukkale buliko munyika mazuba aano. (Amubale Isaya 65:13, 14.) Kwiinda mukwaambilizya mulumbe wa Bwami, tutamba bantu bambi kuti baboole muparadaiso yakumuuya. Alimwi ncoolwe cipati ikugwasya baabo ibakatalika lino-lino kuswaangana ambungano alimwi ibayanda kuyiisyigwa mulimo wakukambauka. Kwiinda mukusololelwa abaalu, tulakonzya kugwasya bantu bamwi ibapya mbuli Akula a Priskila “[mbobaka]mupandulwida kabotu nzila ya-Leza” Apolo.—Inc. 18:24-26.
Kamuzumanana Kumwiiya Jesu
14, 15. Ino nkaambo nzi ncotweelede kuzumanana kumwiiya Jesu?
14 Tulijisi twaambo tubotu ncotweelede kwiiya kuli Jesu. Katana boola anyika, Jesu wakakkala a Bausyi kwamyaka minji kapati. (Tus. 8:22, 30) Wakalizyi kuti kutegwa muntu abe abuumi bubotu kapati weelede kubelekela Leza alimwi akukapandulula kasimpe. (Joh. 18:37) Jesu wakalizyi kuti tiicakali kabotu kuba abukkale bumbi. Wakalizyi kuti wakali kuya kusunkwa alimwi akujaigwa. (Mt. 20:18, 19; Heb. 4:15) Mbwali muntu Ngotwiiya, wakatuyiisya mbotukonzya kusyomeka.
15 Naakabbapatizyigwa buyo Jesu, Saatani wakamusunka kuti aleke kusyomeka, pele wakaalilwa. (Mt. 4:1-11) Eeci cituyiisya kuti kufwumbwa cili coonse ncanga wacita Saatani, tulakonzya kuzumanana kusyomeka. Ulababikkila kapati maano aabo ibayanda kubbapatizyigwa alimwi abaabo ibakabbapatizyigwa ino-ino. (1 Pet. 5:8) Banamukwasyi balakonzya kutukazya akaambo kakuti tiibakaambilwa kabotu kujatikizya Bakamboni ba Jehova, kabayeeya kuti batukwabilila buya. Nokuba boobo, masunko aali boobu atupa coolwe cakutondezya bube bubotu bwa Bunakristo mbuli bulemu alimwi akucenjela notwiingula mibuzyo yabo anotubakambaukila. (1 Pet. 3:15) Aboobo kucita oobu kulakonzya kubagwasya aabo batuswiilila.—1 Tim. 4:16.
Kamuzumanana Kweenda Munzila Mbotu Yabuumi!
16, 17. (a) Ino kulugwalo lwa Deuteronomo 30:19, 20, nzyintu nzi zyotatwe ziyandika kutegwa muntu abe abuumi? (b) Ino Jesu, Johane a Paulo mbuti mbobakazyaamba nzyaakalemba Musa?
16 Myaka iisika ku 1,500 Jesu katana boola anyika, Musa wakakulwaizya bana Israyeli kuti basale buumi bubotu mbobakali kukonzya aciindi eeco. Wakaamba kuti: “Ndatamba ijulu anyika buzuba obuno, kuti zyoonse zibe bakamboni bangu, kuzibwe kuti buumi alufu, lulongezyo alutuko, zyoonse ndazibika kuti mulisalile. Amusale buumi, kuti mupone, nywebo abana banu. Amuyandisye Jehova Leza wanu, amuswiilile ijwi lyakwe, amumukakatile.” (Dt. 30:19, 20) Bana Israyeli bakaleka kusyomeka kuli Leza, pele zyintu zyotatwe nzyaakaamba Musa kuti nzyeziyandika kutegwa muntu abe abuumi tiizyakacinca pe. Zyakazi kwiindulukwa a Jesu alimwi abantu bambi.
17 Cakusaanguna ncakuti ‘tweelede kumuyanda Jehova Leza.’ Tulatondezya kuti tulamuyanda Leza kwiinda mukucita zyintu kweelana azyeelelo zyakwe ziluleme. (Mt. 22:37) Cabili, ‘tweelede kuswiilila jwi lya Jehova’ kwiinda mukwiiya Jwi lya Leza Ibbaibbele alimwi akutobela milawo yakwe. (1 Joh. 5:3) Kutegwa tucite oobu tweelede kujanika kumiswaangano ya Banakristo, kwalo Ibbaibbele nkoliyiigwa. (Heb. 10:23-25) Catatu, ‘tweelede kukakatila kuli Jehova.’ Kufwumbwa naa ncinzi cikonzya kutucitikila, atuzumanane kumusyoma Leza akumutobela Mwanaakwe.—2 Kor. 4:16-18.
18. (a) Ino mbuti Ngazi Yamulindizi mboyakakapandulula kasimpe mu 1914? (b) Ino mbuti mbotweelede kulimvwa akaambo kamumuni wakasimpe mazuba aano?
18 Eelyo kaka ncoolwe cipati kupona kweelana akasimpe kamu Bbaibbele! Mu 1914, ikaambo aaka kayandika kapati kakalembwa mu Ngazi Yamulindizi ikakuti: “Sena tatuli bantu balelekedwe alimwi ibakkomene? Sena Leza wesu tasyomeki? Kuti kuli uuzyi cintu cimwi cibotu, weelede kwaambila bamwi. Ikuti umwi akati kenu wamvwa kaambo kabotu, inga watwaambila. Tulizyi kuti kunyina cintu cibotu kwiinda zyeezyo zili mu Jwi lya Leza. . . . Tatukonzyi kwaamba luumuno, lukkomano alimwi azilongezyo zyitujana akaambo kakumuzyiba kabotu Leza. Makani aamba Busongo bwa Leza, Bululami, Nguzu alimwi a Luyando lwakwe zilatukkomanisya kapati. Kunyina cimbi ncotuyanda. Kunyina cintu cibotu kwiinda Makani aaya ngotujana mu Jwi lya Leza.” (Ngazi Yamulindizi, yamu December 15, 1914, mapeeji 377-378) Tulalumba kumumuni wakumuuya alimwi akasimpe kuti zyazumanana. Masimpe, tulijisi kaambo kabotu katupa kukkomana akaambo kakuti “tweend[a] mumumuni wa-Jehova.”—Is. 2:5; Int. 43:3; Tus. 4:18.
19. Ino nkaambo nzi aabo ibeelela kubbapatizyigwa ncobeelede kubweza ntaamu eeyi cakufwambaana?
19 Ikuti kamuyanda “[kweenda] mumumuni wa-Jehova,” pele tamuna lyaaba akubbapatizyigwa kuba Munakristo, mutamuki. Amucite ziyandika kutegwa musike azyeelelo zyamu Bbaibbele ziyandika kubantu bayanda kubbapatizyigwa, yalo ili nenzila njomukonzya kutondezya kuti mulamulumba Leza a Jesu kuzyintu nzyibamucitila. Amumupe Jehova cintu ciinda kubota ali zyoonse nzyomujisi—ibuumi bwenu. Amutondezye kuti muyanda kucita kuyanda kwa Leza kwiinda mukutobela Mwanaakwe. (2 Kor. 5:14, 15) Cakutadooneka, eeyi nenzila mbotu kapati yabuumi!
Ino Inga Mwaingula Buti?
• Ino kubbapatizyigwa kwesu kwiiminina nzi?
• Ino nzilongezyo nzi nzyobajana aabo ibalyaaba akubbapatizyigwa?
• Ino nkaambo nzi ncociyandika kapati kumwiiya Jesu?
• Ino ncinzi cikonzya kutugwasya kweenda munzila mbotu yabuumi?
[Mibuzyo yaciiyo]
[Cifwanikiso icili apeeji 25]
Lubbapatizyo lwenu lutondezya kuti mwasala nzila mbotu kapati yabuumi
[Zifwanikiso izili apeeji 26]
Sena muliliibide “muciyubilo”?