‘Kamwaamba Makani aa Leza Cabusicamba’
‘Kamwaamba Makani aa Leza Cabusicamba’
“Bakazuzigwa Muuya Uusalala, nkabela bakatalika kwaamba makani aa-Leza akaanzambwene.”—INC. 4:31.
1, 2. Ino nkaambo nzi ncotweelede kubeleka canguzu notuli mumulimo wamumuunda?
KAKUCEEDE mazuba otatwe kuti afwe, Jesu wakaambila basikwiiya bakwe kuti: “Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” Katana unka kujulu, Jesu naakabusyigwa wakaambila basikumutobela kuti bakagwasye bantu bamisyobo yoonse kuba basikwiiya, ‘akubayiisya kuti bajatisye makani oonse ngaakabalailila.’ Wakabasyomezya kuti uyakuba aambabo “mazuba oonse nikuba kusikila kumamanino aaciindi.”—Mt. 24:14; 26:1, 2; 28:19, 20.
2 Mbotuli Bakamboni ba Jehova, tulabeleka mulimo iwakatalika kucitwa mumwaanda wamyaka wakusaanguna. Taaku mulimo wakufwutula bantu wiinda wakukambauka Bwami akugwasya bantu kuba basikwiiya. Aboobo tuyandika kuti katubeleka canguzu mumulimo wakukambauka. Mucibalo eeci, tulabona mbotunga twagwasyigwa amuuya uusalala kuti katwaamba cabusicamba notubeleka mumulimo ooyu. Zibalo zyobilo zitobela ziya kutondezya mboutugwasya muuya wa Jehova kuti katuyiisya kabotu akuzumanana kukambauka.
Tuyandika Kuba Basicamba
3. Ino nkaambo nzi ncotuyandika kuba basicamba notukambauka makani aa Bwami?
3 Ncoolwe cipati kupegwa mulimo a Leza wakwaambilizya Bwami. Nokuba boobo, zimwi ziindi cilakatazya. Nokuba kuti bantu bamwi balazumina kukambaukilwa makani mabotu aa Bwami bwa Leza, banji baboneka mbuli babaya bakali kupona mumazuba aa Nowa. Jesu wakati “teebakezi mane kupaya kwamaanzi kwakasika akubatola.” (Mt. 24:38, 39) Alimwi kuli baabo batusampaula akutukazya. (2 Pet. 3:3) Beendelezi, basicikoloma, mbotubeleka limwi naa banamukwasyi, balakonzya kutukazya. Kuyungizya kuli zyeezi, tulalezya akaambo kakuba aansoni akuyoowa kukakwa abantu aaba. Izyintu zinji zilakonzya kutupa kuti katutaanguluki notwaambaula alimwi akukambauka jwi lya Leza “[ca]kaanzambwene.” (Ef. 6:19, 20) Kutegwa tuzumanane kucita oobo tuyandika kuba basicamba. Ino ncinzi cikonzya kutugwasya kuti tube basicamba?
4. (a) Ino kuba sicamba caamba nzi? (b) Ino mbuti mwaapostolo Paulo mbwaakaliyumya kutegwa abakambaukile bana Tesalonika?
4 Ibbala lya Chigiliki ilyaamba kuti “kaanzambwene” lipandulula “kwaambaula cakutasisikizya.” Ibbala eeli lyaamba “kuba sicamba” naa “kutayoowa.” Kuba sicamba tacaambi kuba aankazi. (Kol. 4:6) Nokuba kuti tuli basicamba, tweelede kuba aluumuno kubantu boonse. (Rom. 12:18) Kunze lyaboobo, notukambauka makani mabotu aa Bwami bwa Leza, tweelede kwaamba cabusicamba alimwi acabupampu kutegwa tutabatyompyi bantu mbotukambaukila. Masimpe, kutegwa tube basicamba tuyandika kubeleka canguzu. Busicamba oobu tabubooli buyo akaambo kanguzu zyesu. Mwaapostolo Paulo abeenzinyina nobakapenzyegwa ku Filipi, ino mbuti mbobakaliyumya kutegwa bakambaukile bana Tesalonika? Paulo wakalemba kuti: “Twakaba akaanzambwene muli-Leza wesu.” (Amubale 1 Ba-Tesalonika 2:2.) Jehova Leza ulakonzya kutugwasya andiswe kuti katutayoowi akuti tube basicamba.
5. Ino mbuti Jehova mbwaakapa kuti ba Petro, Johane abasikwiiya bamwi babe basicamba?
5 Mwaapostolo Petro a Johane nibakakazigwa “[a]beendelezi abaalu abalembi,” bakaamba kuti: “Na kuliluleme kumbele lya-Leza kuswiilila ndinywe kwiinda Leza, amulisalile. Nkaambo tatukonzyi swebo kutaamba nzotwakabona akumvwa.” Muciindi cakupaila kuli Leza kutegwa baleke kupenzyegwa, balo abakombinyina bakalomba kuti: “Jehova, bona inkonkomwezyo zyabo, ugwasye bazike bako, baambe makani aako akaanzambwene kanji.” (Inc. 4:5, 19, 20, 29) Ino Jehova wakabavwiila buti? (Amubale Incito 4:31.) Jehova wakabagwasya kutegwa baliyumye kwiinda mumuuya uusalala. Muuya wa Leza ulakonzya kutugwasya andiswe. Ino mbuti mbotukonzya kutambula muuya wa Leza kutegwa utugwasye notukambauka?
Mbomukonzya Kuba Basicamba
6, 7. Ino munzila nzi motukonzya kutambula muuya uusalala wa Leza? Amupe zikozyanyo.
6 Inzila ini mbotukonzya kutambula muuya uusalala wa Leza nkulomba. Jesu wakaambila baswiilizi bakwe kuti: “Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?” (Lk. 11:13) Masimpe, lyoonse tweelede kulomba kuti atupe muuya uusalala. Ikuti naa mulimo wamumuunda kautuyoosya notubelekela mumugwagwa, twanikukambauka kufwumbwa bantu nkobajanika naa nkobabelekela, tulakonzya kumulomba Jehova kuti atupe muuya wakwe uusalala akumulomba kuti atugwasye kutegwa tube basicamba.—1 Tes. 5:17.
7 Oobu mbwaakacita mukaintu Munakristo wazyina lya Rosa. * Bumwi buzuba Rosa naakali kuncito, imwiiyinyina wakali kubala lipooti yakazwa kucikolo cimbi iyaamba mbobapenzyegwa bana. Imwiiyi ooyu zyakamunyonganya kapati nzyaakabala cakuti wakaamba kuti, “Ino nyika eeyi iya kuli?” Eeci cakamupa kuti Rosa amukambaukile mweenzinyina. Ino ncinzi cakamupa kuti atayoowi kumukambaukila? Rosa waamba kuti: “Ndakapaila kuli Jehova akulomba muuya wakwe kuti undigwasye.” Wakacikonzya kumukambaukila alimwi bakamvwana kuti akapilukile akuzumanana amubandi wabo. Alimwi amubone mbwacita Milane musimbi uujisi myaka yosanwe uukkala mu New York City. Milane waamba kuti: “Kanditanaunka kucikolo, mebo abamaama tulapaila kuli Jehova.” Ino ncinzi ncobalomba mumupailo? Bapailila kuti Milane kakambauka makani aa Leza cabusicamba. Banyina baamba kuti: “Eeci cilamugwasya Milane kubapanduluda beenzinyina ncatasekeledi mazuba aakuzyalwa amazuba aakulyookezya.” Zikozyanyo eezyi zitondezya kuti kutegwa muntu abe sicamba uyandika kupaila.
8. Ino ncinzi ncotukonzya kwiiya kuli Jeremiya notuyanda kuba basicamba?
8 Alimwi atubone cakamugwasya musinsimi Jeremiya kutegwa abe sicamba. Jehova naakamusala kuti abe musinsimi kuli bamasi, Jeremiya wakati: “Mebo nsikonzyi kukambauka, nkaambo ncili mwanikenike.” (Jer. 1:4-6) Nokuba boobo, mukuya kwaciindi Jeremiya wakazumanana kukambauka cabusicamba cakuti bantu bakali kumubona kuti waamba buyo makani aamapenzi. (Jer. 38:4) Kwamyaka iinda ku 65, wakali kwaamba mbwaya kubabeteka Jehova. Akaambo kakukambauka cabusicamba, mu Israyeli wakalizyibidwe kapati cakuti nokwakainda myaka iili 600 Jesu naakali kwaamba cabusicamba, bantu bamwi bakali kuyeeya kuti ngu Jeremiya wabusigwa. (Mt. 16:13, 14) Ino mbuti musinsimi Jeremiya iwakali ansoni mbwaakaba sicamba? Waamba kuti: “Mumoyo wangu muli anga mulilo uuyakisya uujalilidwe mukati kazifuwa zyangu, mane lumwi candikataazya kundikasya.” (Jer. 20:9) Inzya, ijwi lya Jehova lyakabeleka kapati kuli Jeremiya cakuti lyakamugwasya kwaambaula.
9. Ino nkaambo nzi ijwi lya Leza ncolikonzya kutugwasya mbuli mbolyakamugwasya Jeremiya?
9 Mulugwalo ndwaakalembela bana Hebrayo, imwaapostolo Paulo wakalemba kuti: “Ijwi lya-Leza lili abuumi, lili anguzu, lilabosya kwiinda iceba ilijisi mabemba obile, lilayasa mane kukwaanzaanya buumi amuuya, aalo maswaanganino aazifuwa amooma, alimwi lilabeteka kuyeeya akuyanda kwamoyo.” (Heb. 4:12) Mulumbe naa ijwi lya Leza lilakonzya kutugwasya mbubwenya mbuli mbolyakamugwasya Jeremiya. Amuyeeye kuti nokuba kuti bantu bakabelesyegwa kulemba Bbaibbele, talili bbuku lyakalembwa akaambo kabusongo bwamuntu, nkaambo lyakasololelwa amuuya wa Leza. Kulugwalo lwa 2 Petro 1:21, tubala kuti: “Teensi luyando lwamuntu lwakaleta businsimi kalekale, pe, pele bantu ba-Leza bakaamba mbobakasungulwa Muuya wa-Leza.” Notujana ciindi cakwiiya Bbaibbele, mizeezo yesu ilazula amulumbe wakasololelwa amuuya uusalala. (Amubale 1 Ba-Korinto 2:10.) Mulumbe ooyu ulakonzya kuba mbuli “mulilo uuyakisya” uuli muli ndiswe, cakuti tatukonzyi kuumuna buyo.
10, 11. (a) Kutegwa katwaambaula cabusicamba, ino mbuti mbotweelede kuliiya Bbaibbele? (b) Amwaambe nzila yomwe njomuyanda kubelesya kutegwa mucite kabotu muciiyo cenu ca Bbaibbele.
10 Kutegwa ciiyo cesu ca Bbaibbele citugwasye, ciiyo ceelede kucitwa munzila iikonzya kupa kuti mulumbe wamu Bbaibbele katuumvwisya. Mucikozyanyo, musinsimi Ezekiele wakabona cilengaano mwaakaambilwa kuti alye bbuku lyakajisi mulumbe iwakali kuyandika kutolwa kubantu ibatakali kuyanda kuswiilila. Ezekiele wakeelede kuumvwisya mulumbe. Kucita boobu kwakali kukonzya kupa kuti imulumbe ooyu ulweele mbuli buci.—Amubale Ezekiele 2:8–3:4, 7-9.
11 Tupona muciindi mbuli ncaakali kupona Ezekiele. Mazuba aano, bantu banji tabayandi kumvwa ncolyaamba Bbaibbele. Ikuti naa tuyanda kuzumanana kukambauka jwi lya Leza, cilayandika kuti twaazyibe Magwalo akwaasyoma. Tweelede kuba acilengwa cakubala Magwalo abuzuba kutali kusotooka. Tweelede kuba mbuli sintembauzyo iwakaimba kuti: “Majwi aamulomo wangu amiyeeyo yamumoyo wangu, zyoonse zitambulike kumeso aako, O Jehova, mwaala wangu anguzu zyangu.” (Int. 19:14) Eelyo kaka cilayandika kapati kuba aciindi cakuzinzibala kuyeeya nzyotubala kutegwa kasimpe kamu Bbaibbele tukamvwisye! Aboobo, tweelede kusoleka kutegwa katucita kabotu muciiyo cesu ca Bbaibbele. *
12. Ino miswaangano ya Banakristo itugwasya buti ikuti tusololelwe amuuya uusalala?
12 Nzila imbi mbotukonzya kugwasyigwa amuuya uusalala wa Jehova nkwiinda ‘mukuyeeyana, kubusyanya-busyanya mukuyandana akucita milimo mibotu akutaleka kubungana.’ (Heb. 10:24, 25) Kujanika lyoonse kumiswaangano ya Banakristo, kuswiilisisya alimwi akuzitobela nzyotwiiya, nenzila mbotu mbotusololelwa amuuya uusalala, nkaambo muuya uusalala wa Jehova ulatusololela kwiinda mumbungano.—Amubale Ciyubunuzyo 3:6.
Mbotugwasyigwa Akaambo Kakuba Basicamba
13. Ino ncinzi ncotukonzya kwiiya notubona Banakristo bamumwaanda wamyaka wakusaanguna mbobakacikonzya kukambauka?
13 Muuya uusalala nguujisi nguzu kapati mububumbo boonse, alimwi ulakonzya kupa kuti bantu bacite kuyanda kwa Jehova. Wakagwasya Banakristo bamumwaanda wamyaka wakusaanguna kuti kabakambauka. Bakakambauka makani mabotu “[ku]bantu boonse baansi ano.” (Kol. 1:23) Notuyeeya kuti banji bakali “bantu buyo abatakaiya,” cilalibonya kuti bakali kusololelwa acintu cimwi canguzu kapati.—Inc. 4:13.
14. Ino ncinzi cikonzya kutugwasya kutegwa ‘katupya mumyoyo’?
14 Notupona kweelana amboutusololela muuya uusalala wa Leza citupa kuti tuubeleke mulimo wakukambauka cabusicamba. Kupailila muuya uusalala, kuba aciiyo ca Bbaibbele, kuzinzibala kuyeeya nzyotubala akujanika lyoonse kumiswaangano ya Banakristo kulakonzya kutugwasya kuti ‘myoyo yesu ipye.’ (Rom. 12:11) Kalyaamba “mu-Juda umwi uutegwa Apolo, mu-Alesandreya” iwakasika ku Efeso, Ibbaibbele lyaamba kuti: “Nkaambo kakupya kwamoyo wakwe, wakakambauka akwiisya kabotu makani aa-Jesu.” (Inc. 18:24, 25) Kwiinda ‘mukupya myoyo,’ tulakonzya kuba basicamba mumulimo wesu wakuŋanda-aŋanda anotuli mubukambausi bwamukwiizya.—Rom. 12:11.
15. Ino mbuti mbotugwasyigwa akaambo kakwaamba cabusicamba?
15 Ikuti naa twazumanana kuba basicamba notuli mubukambausi cilakonzya kutugwasya. Notubona mbouyandika ambougwasya mulimo wesu, citupa kuzumanana kuzilanga kabotu zyintu. Akaambo kakuti tubeleka kabotu mumulimo wakukambauka citupa kuba basungu akukkomana. Ikuzyiba kuti mulimo wesu weelede kucitwa cakufwambaana kupa kuti katubeleka canguzu.
16. Ino ncinzi ncotweelede kucita ikuti naa twakacileka kubeleka canguzu mumulimo wakukambauka mbuli mbotwakali kucita?
16 Ino mbuti ikuti naa twakacileka kubeleka canguzu mumulimo wakukambauka mbuli mbotwakali kucita kaindi? Tweelede kucibona eeco citulesya kucita kabotu. Paulo wakalemba kuti: “Amulisukusye nubeni na muliimvwi mulusyomo, amulilingule nubeni.” (2 Kor. 13:5) Amulibuzye kuti: ‘Sena moyo wangu ucipya? Sena ndilaakulomba Jehova kuti andipe muuya wakwe? Sena mipailo yangu ilatondezya kuti ndilamusyoma akucita kuyanda kwakwe? Sena ilatondezya kuti ndilamulumba akaambo kamulimo ngwaakandipa? Ino ciiyo cangu ca Bbaibbele ndicicita buti? Ino nciindi cilamfwu buti ncondizinzibala kuyeeya nzyendibala akumvwa? Sena ndilatola lubazu kumiswaangano yambungano? Ikulibuzya mibuzyo iili boobu kulakonzya kumugwasya kubona mpomweelede kubelekela.
Muuya wa Leza Weelede Kumugwasya Kuba Basicamba
17, 18. (a) Ino mulimo wakukambauka usikide aali mazuba aano? (b) Ino mbuti mbotukonzya kuba ‘basicamba’ notukambauka makani mabotu aa Bwami bwa Leza?
17 Jesu naakabusyigwa wakaambila basikwiiya bakwe kuti: “Muyootambula nguzu, wasika alindinywe Muuya Uusalala, muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika.” (Inc. 1:8) Imulimo iwakatalika kubelekwa kaindi, ulacitwa mazuba aano kubantu banji. Bakamboni ba Jehova batandila ku 7 miliyoni balakambauka mulumbe muzisi ziinda ku 230 alimwi balabeleka mawoola aatandila kumabbiliyoni aali 1.5 amwaka mumuunda. Eelyo kaka cilakkomanisya kutola lubazu mumulimo ooyu uutakacitwi alimwi!
18 Mbubwenya mbuli mbocakabede mumwaanda wamyaka wakusaanguna, mulimo wakukambauka ulasololelwa amuuya wa Leza. Ikuti twazumina kusololelwa amuuya, tuya kuba ‘basicamba’ mumulimo wakukambauka. (Inc. 28:31) Aboobo, atusololelwe amuuya wa Leza notwaambilizya makani mabotu aa Bwami bwa Leza.
Bupanduluzi buyungizidwe
^ munc. 7 Imazyina acincwa.
^ munc. 11 Kutegwa mugwasyigwe kapati nomubala Bbaibbele anomucita ciiyo cenu, amubone cibalo cakuti “Amusungwaale Kukubala” alimwi acakuti “Ikwiiya Kulagwasya” mubbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza, mapeeji 21-32.
Ino Ncinzi Ncomwaiya?
• Ino nkaambo nzi ncotuyandika kuba basicamba notukambauka jwi lya Leza?
• Ino ncinzi cakabagwasya basikwiiya bamumwaanda wamyaka wakusaanguna kuti kabaamba cabusicamba?
• Ino mbuti mbotukonzya kuba basicamba?
• Ino mbuti mbotugwasyigwa akaambo kakuba basicamba?
[Mibuzyo yaciiyo]
[Cifwanikiso icili apeeji 7]
Ino mbuti bazyali mbobakonzya kugwasya bana babo kuba basicamba?
[Zifwanikiso izili apeeji 8]
Mupailo mufwaafwi ulakonzya kumugwasya kuba basicamba nomuli mumulimo wakukambauka