Mibuzyo Yabasikubala

Ino ncinzi cikonzya kupa kuti muntu abbapatizyigwe alimwi?

Kuli zyintu zimwi zikonzya kupa kuti muntu uubbapatizyidwe ayeeye kubbapatizyigwa alimwi. Mucikozyanyo, imuntu ooyu naakabbapatizyigwa ndiza kuli ncaakali kusisikizya calo cakali kukonzya kupa kuti agusyigwe mumbungano kuti naakali bbapatizyidwe kale. Sena inga walyaaba kuli Leza kuti kacili boobo? Ooyu muntu ulakonzya kulyaaba kuli Jehova ikuti naa wacileka kucita zyintu eezyo zitazumizidwe mumagwalo. Aboobo, imuntu wakabbapatizyigwa kali mupenzi lili boobu ulakonzya kubona naa inga ceelela alimwi kubbapatizigwa.

Ino kuti naa muntu ooyu taaku cibi ncaakacita katana bbapatizigwa pele wakatalika kutalilemeka kabbapatizidwe kale cakuti uyandika kugwasyigwa? Ndiza ulakonzya kwaamba kuti tanaakalizyi kuti taceelede kucitwa eeco ncaakacita naakabbapatizyigwa akubona kuti kubbapatizyigwa kwakwe tikwakali kabotu. Ibaalu nobabandika asikubisya ooyu tabeelede kumubuzya mibuzyo ijatikizya mbwaakabbapatizyigwa akumubuzya naa kulyaaba akubbapatizyigwa kwakwe kuli kabotu. Kunze lya boobo, wakamvwa bupanduluzi bwaamba ncocaamba kubbapatizyigwa. Wakaivwiila mibuzyo yakulyaaba akubbapatizigwa. Amane wakacinca zisani akubbapatizyigwa. Eeci cakatondezya kuti wakabona mbucakali kuyandika ikuzibikkila maano zyintu zyakumuuya. Kuzwa ciindi eeci, ibaalu balakonzya kumubona kuti muntu uubbapatizidwe.

Ikuti muntu waambila baalu kuti uyanda kubbapatizyigwa alimwi, balakonzya kumwaambila kuti abale Ngazi Yamulindizi yamu March 1, 1960, mapeeji 159 a 160, alimwi ayamu February 15, 1964, mapeeji 123 kusikila ku 126 ikaambo aaka mokapanduludwe kabotu. Ikubbapatizyigwa alimwi, (ikapati ikuti muntu naa tanaakajisi luzyibo lunji lwa Bbaibbele ciindi naakali kubbapatizigwa) ncakulisalila.

Ino nzyintu nzi Banakristo nzyobeelede kulanga-langa nobayeeya kukkala muŋanda yomwe abeenzinyina?

Boonse bantu bayandika kwakukkala. Nokuba boobo, mazuba aano bantu tabajisi maanda aabo. Akaambo kabuyumu-yumu bwamali, kuciswa naa zyintu zimwi, capa kuti bantu kabakkala antoomwe abamukwasyi naa basazinyina. Muzisi zimwi bamukwasyi inga boonse kabakkala mukaanda komwe.

Imbunga ya Jehova nyika yoonse taibikki milawo yambobeelede kukkala bantu bamumbungano mumaanda aabo. Banakristo bakulwaizyigwa kubona ncizyaamba njiisyo zyamu Magwalo kutegwa babone naa bapona mbwayanda Leza naa pe. Ino ninjiisyo nzi zimwi eezyo?

 Icipati ciyandika, nkulanga mbotuna kupona abantu aaba ambotuna kucita kumuuya. Ino mbantu bali buti aabo? Sena bakomba Jehova? Sena balaitobela milawo yamu Bbaibbele? Imwaapostolo Paulo wakalemba kuti: “Mutalyeeni. Mweenda abamineme, anywebo mulaminama.”—1 Kor. 15:33.

Imagwalo alaamba kuti Jehova tayandi basibwaamu abasimalale. (Heb. 13:4) Aboobo bubambe buli boonse ibupa kuti bantu batakwetene kabakkala antoomwe mbuli kuti mulumi amukaintu tabuzumizidwe a Leza. Munakristo teelede kukkala abusena bantu mpobatalilemeki.

Kunze lyaboobo, Ibbaibbele litwaambila kuti aabo ibayanda kulongezyegwa a Leza tabeelede kucita bwaamu. (1 Kor. 6:18) Aboobo, inga cainda kubota kuti Banakristo kabatakkali muŋanda muli bantu bakonzya kubapa kuti kabatalilemeki. Mucikozyano, amuyeeye cikonzya kucitika kuti Banakristo banji kaboona muŋanda yomwe. Sena bubambe oobu inga bwapa kuti bantu batalilemeki? Ino kuti bantu bobilo batakwetene bajanika kabali balikke cakutayeeyela akaambo kakuti kunyina uuliko aciindi eeco? Mbubwenya buyo, kuti bantu kabayandana pele kabatana kwatana tabayandiki kukkala muŋanda yomwe.

Mbubwenya buyo, taciyandiki kuti bantu aabo bakalekana kabazumanana kukkala muŋanda yomwe. Akaambo kakuti balizyibilene cilakonzya kupa kuti bacite bwaamu.—Tus. 22:3.

Camamanino pele iciyandika kapati ncakubona bantu bamumunzi mbobabona zyintu muntu nzyasala. Munakristo teelede kukkala muŋanda mwabona kuti bantu balakonzya kumuyeeyela zitali kabotu. Tatweelede kulilemeka munzila iikonzya kupa kuti izyina lya Jehova lisampuke. Paulo wakaamba kuti: “Mutabiki zilebyo munzila yabantu, nibaba ba-Juda nibaba bamasi niiba imbungano ya-Leza. Mbubonya obo ambebo ndabosezya bantu boonse muziyanza zyoonse. Nsiyandauli kuligwasya ndemwini buyo pe, ndayandaula kugwasya beenzuma banji, kuti bafutuke.”—1 Kor. 10:32, 33.

Kujana akukkala aali kabotu kulakonzya kubakatazya kapati bantu batobela zyeelelo zya Jehova ziluleme. Nokuba boobo, Banakristo beelede kusinizya kuti bacita “zintu zibotezya Mwami.” Beelede kuba masimpe kuti taaku cintu citaluzi cicitika mumaanda aabo. (Ef. 5:5, 10) Eeci ciyandika kuti Banakristo kabamulomba Leza kutegwa abasololele akucita nzyobakonzya kucita kuti bagwasyanye akuti kabalilemeka alimwi akulemeka zyina lya Jehova.