Muteenwi a Saatani

‘MUTEENWI. Leza wenu takamugwasyi. Atumvwane, buyo-buyo tulamujaya.’ Ooyu ngomulumbe Rabisake, sikwiiminina Mwami Sanakeribu waku Asuri ngwaakaambila bantu ibakali kukkala ku Jerusalemu. Basikalumamba bamwami bakausaala munzi wa Juda. Majwi aamwiiminizi akali buyo aakubatyompya bana Jerusalemu kutegwa batalwani.—2 Bam. 18:28-35.

Bana Asuri bakali ampuwo yakuti bakali basilunya. Bakali kubayoosya basinkondonyina kwiinda mukubatondezya kuti bakali kubapenzya kapati bazike. Kweelana ambobakaamba basyaazibwene mumakani aakaindi ba Philip Taylor, aaba bantu bakali “kubayoosya bantu akubacenga kuti bakali kubapenzya kapati bantu mbobakali kujata.” Makani aakubeja ncibelesyo canguzu kapati. Ba Taylor baamba kuti: “Apa kuti bantu banyongane mizeezo.”

Banakristo bakasimpe “inkondo nji[ba]lwa tiiensi yakulwana abantu balya maila, pe, njakulwana . . . amyuuya yabubi,” naa zilenge zyamuuya izyakamuzangila Leza. (Ef. 6:12) Imupati akati kabo ngu Saatani Diabolosi. Awalo ubelesya makani aayoosya alimwi aakubeja.

Saatani waamba kuti ulakonzya kutulesya kusyomeka toonse. Naakali kupona Jobu, Saatani wakaambila Jehova Leza kuti: “Muntu uyakupa zyoonse kuti akabe abuumi bwakwe mwini.” Munzila imbi Saatani wakali kwaamba kuti, ‘ikuti naa muntu wapenzyegwa, ulacileka kusyomeka kuli Leza. (Job. 2:4) Sena Saatani wakali luzi? Sena toonse kuli mpotukonzya kusika mukusyomeka cakuti twaalilwe kuliyumya? Saatani uyanda kuti katusyoma oobu. Aboobo, ubelesya makani aakubeja aabanyonganya kapati bantu. Atulange-lange nzila zimwi nzyabelesya akubona mbotukonzya kuliyumya.

“Bajisi Intalisyo Zyabulongo”

Saatani wakabelesya Elifazi, iwakali umwi wabantu botatwe bakamuswaide Jobu, kuti aambe kuti kunyina muntu uukonzya kuzumanana kusyomeka. Kaamba bantu “aabo ba[kkala mumaanda] abulongo,” Elifazi wakaambila Jobu kuti: “Bajisi intalisyo zyabulongo, bapwaika mbuli pempe, banga balakuntwa mubuzuba bomwe buyo, balafwidilila akutayeeyegwa limbi.”—Job. 4:19, 20.

Mu Magwalo aambi, tukozyanyisigwa aa “nongo zyabulongo.” (2 Kor. 4:7) Tulikompeme akaambo kacibi ncotwakakona alimwi akutalondoka. (Rom. 5:12) Saatani ulakonzya kutuzunda ikuti naa katutakwabilidwe. Pele mbotuli Banakristo tulizyi kuti Jehova ulakonzya kutugwasya. Nokuba kuti tulalezya, Leza ulatuyanda. (Is. 43:4) Nokuba boobo, Jehova ulabapa muuya uusalala aabo bamulomba. (Lk. 11:13) Imuuya wakwe ulakonzya kutupa “inguzu zigambya” kutegwa tucikonzye kuliyumya mumapenzi ngatuletela Saatani. (2 Kor. 4:7; Flp. 4:13) Ikuti twamukazya Diabolosi, katuli “bayumu mulusyomo,” Leza uyakutupa nguzu. (1 Pet. 5:8-10) Aboobo, tatweelede kumuyoowa Saatani Diabolosi.

 “Muntu Uunywa Bubi”

Elifazi wakabuzya kuti: “Muntu ninzi kuti akonzye kusalala? Uuzyalwa kumwanakazi uyoolulama buti?” Mpoonya wakaingula kuti: “Langa, takonzyi kusyoma baangelo bakwe; alyalo ijulu talisalali kumeso aakwe: Mbuti kai kumuntu uusofweede uucima, muntu uunywa bubi mbuli maanzi!” (Job. 15:14-16) Elifazi wakali kwaambila Jobu kuti kunyina muntu uululeme mumeso aa Leza. Awalo Diabolosi ubelesya mizeezo iityompya. Uyanda kuti katupenga mumizeezo akaambo kazyintu zibi nzyotwakacita kaindi, ikulipa milandu akuyeeya kuti Leza takonzyi kutulekelela. Alimwi uyanda kuti katuyeeya kuti Jehova ulangila zinji kuli ndiswe icakuti takonzyi kutulekelela ikuti naa twalubizya.

Masimpe ngakuti, toonse “[twak]abisya akulela kubulemu bwa-Leza.” Taaku muntu uutalondokede uukonzya kusika azyeelelo zya Jehova zilondokede. (Rom. 3:23; 7:21-23) Nokuba boobo, eeci tacaambi kuti Leza tatubikkili maano. Jehova ulizyi kuti “muzoka waciindi, uutegwa Diabolosi a-Saatani,” nguupa kuti katulimvwa kuti Leza takonzyi kutulekelela. (Ciy. 12:9, 10) Leza ulizyi kuti “tuli bulongo buyo” alimwi tayandauli milandu kuli ndiswe.—Int. 103:8, 9, 14.

Ikuti twacileka kucita zibi akulilekelela kuli Jehova akweempwa ‘uyakutulekelela.’ (Is. 55:7; Int. 51:17) Ibbaibbele lyaamba kuti nokuba kuti zibi zyesu “zyasalala pyu, ziyootuba buu mbuli lukobo.” (Is. 1:18) Aboobo, katusoleka canguzu, tutaleki kucita kuyanda kwa Leza.

Mbotuli basizibi, tatukonzyi kucita zyintu zikonzya kumukkomanisya Leza lyoonse. Adamu a Eva tiibakazumanana kulondoka alimwi baleka kuba aabulangizi bwakuba abuumi butamani, andiswe bakatutambukizya. (Rom. 6:23) Nokuba boobo, akaambo kakuti Jehova ulatuyanda, wakabikka bubambe bwakuti tulekelelwe zibi zyesu ikuti katuli alusyomo mucinunuzyo ca Mwanaakwe, Jesu Kristo. (Mt. 20:28; Joh. 3:16) Eelyo kaka eeci ncitondezyo cibotu “[ca]luzyalo lwa-Leza”! (Tit. 2:11) Tulakonzya kulekelelwa zibi zyesu. Aboobo, ino nkaambo nzi ncotweelede kulekela Saatani kuti katupa kuyeeya kuti tatukonzyi kulekelelwa?

“Guma Nyama Azifuwa Zyakwe”

Saatani wakaamba kuti Jobu uyakuleka kusyomeka ikuti naa waciswa. Naakali kukazyanya a Jehova, Diabolosi wakati: “Guma nyama azifuwa zyakwe uzookusinga kubusyu bwako!” (Job. 2:5) Cakutadooneka, sinkondonyina a Leza inga wakkomana ikuti naa twatyompwa twaciswa.

Nokuba boobo, Jehova taleki kutuyanda nokuba kuti twaleka kubeleka mbuli mbotwakali  kucita kaindi mumulimo wakwe. Ino mbuti kuti naa mweenzuma walicisa? Sena tulaleka kumuyanda akaambo kakuti lino taciciti zyintu mbuli mbwaakali kucita kaindi? Cakutadooneka, tatukonzyi kucita oobo pe. Tulakonzya kuzumanana kumuyanda akumulanganya, ikapati ikuti naa wakalicisa ciindi naakali kutugwasya. Sena awalo Leza takonzyi kucita oobo kujatikizya ndiswe? Ibbaibbele lyaamba kuti: “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.”—Heb. 6:10.

Magwalo aamba “umwi mukaintu mukamufu mucete” uulangilwa kuti wakali kucita mulimo wa Leza kwamyaka minji. Jesu naakamubona kabikka “tuli tuniini tobile” muciyobwedo mutempele, sena tanaakamubikkila maano akuti mali aakwe tanaakajisi mulimo? Muciindi caboobo, wakamulumbaizya akaambo kakucita nzyaakali kukonzya kutegwa acite mulimo wa Leza.—Lk. 21:1-4.

Ikuti twazumanana kusyomeka, tulakonzya kusyoma kuti kucembala naa kuciswa akaambo kakutalondoka, takukonzyi kunyonganya cilongwe cesu a Jehova. Leza takaleki kubayanda bantu bakwe basyomeka akaambo kakulezya kwabo.—Int. 71:9, 17, 18.

“Amubweze Ingoani Yalufutuko”

Ino mbuti mbotukonzya kulikwabilila kutegwa tuteenwi a Saatani? Imwaapostolo Paulo wakalemba kuti: “Amuyume mu-Mwami amunguzu zyakwe impati. Amusame zilwanyo zyoonse zya-Leza, kuti mukonzye kwiima mumeneeno aa-Diabolosi.” Cilwanyo comwe camuuya “[n]ingoani yalufutuko.” (Ef. 6:10, 11, 17) Kutegwa tuteenwi a Saatani tweelede kuti katwiijisi ingowani eeyi alimwi katwiisamide. Ingowani yasikalumamba ikwabilila mutwe wakwe. Ibulangizi bwalufwutuko lwesu—ilusyomo lwesu muzyintu nzyaakatusyomezya Leza iziya kuba munyika mpya—butugwasya kuti tutasunkwi a Saatani. (1 Tes. 5:8) Tweelede kuzumanana kusyomeka kwiinda mukuba aciiyo cesu ca Bbaibbele.

Jobu wakaliyumya naakasunkwa a Saatani. Akaambo kakuti Jobu wakali kusyoma kuti kuya kuba kubusyigwa, tanaakali kuyoowa kufwa. Muciindi caboobo, wakaambila Jehova kuti: “Noyoondiita njoovuwa, kuti koyandisisya buumi mbowakalengede.” (Job. 14:15) Jobu wakali alusyomo lwakuti nokuba kuti wafwa akaambo kakusyomeka, Leza uyakumubusya ciindi aakubusya babelesi bakwe basyomeka akaambo kakuti ulabayanda.

Andiswe tweelede kuba alusyomo luli boobu muli Leza wakasimpe. Jehova takonzyi kuzumizya cintu cili coonse ca Saatani kuti cituzunde. Alimwi amuyeeye majwi ngaakatusyomezya Paulo aakuti: “Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.”—1 Kor. 10:13.

[Cifwanikiso icili apeeji 20]

Jehova ulaikkomanina milimo yenu njomubeleka cakusyomeka

[Cifwanikiso icili apeeji 21]

Amube angowani yalufwutuko akwiisama lyoonse