Sena Jehova Mumubona Kuti Mbaauso?

“OMWAMI, utwiisye kukomba.” Sikwiiya umwi naakaamba majwi aaya, Jesu wakaingula kuti: “Mwakomba amwaambe kuti, Taateesu, ooli kujulu, alilemekwe zina lyako.” (Lk. 11:1, 2) Jesu wakali kukonzya kwaamba Jehova kubelesya mabala aabulemu aakuti “Singuzuzyoonse,” “Mwiyi,” ‘Mulengi,’ “Sinsiku” alyakuti “Mwami mupati uutamani walyoonse.” (Matl. 49:25; Is. 30:20; 40:28; Dan. 7:9; 1 Tim. 1:17) Muciindi caboobo, Jesu wakasala kubelesya bbala lyakuti “Taata.” Ino nkaambo nzi? Ambweni uyanda kuti katubandika a Mupatikampatila mububumbo boonse mbuli mwana mbwabandika abausyi.

Nokuba boobo, bantu bamwi cilabakatazya kumubona Leza kuti Mbaausyi. Munakristo umwi wazyina lyakuti Atsuko * waamba kuti: “Kwamyaka minji kuzwa ciindi nindakabbapatizyigwa, cakali kundikatazya kumubona Jehova kuti Mbaataata akupaila kuli nguwe.” Kaamba cakali kumupa kulimvwa boobu, waamba kuti: “Tandiyeeyede bataata bandizyala nibakanditondezya kuti balandiyanda.”

Mumazuba aano aamamanino aakatazya ibantu nobali basikancimwa, izyintu nzyokonzya kulangila kuti bauso balakonzya kukucitila tazilibonyi pe. (2 Tim. 3:1, 3) Aboobo taciyoosyi pe kulimvwa mbwaakali kulimvwa Atsuko. Pele tweelede kukkomana akaambo kakuti Taateesu Jehova ulatuyanda.

Jehova Nguutupa Zyintu Zyoonse

Ikuti Jehova katumubona kuti Mbaataata, tweelede kumuzyiba kabotu. Jesu wakaamba kuti: “Taakwe muntu uuzi Taata pele Mwana, antoomwe amuntu oyo ngwayanda Mwana kumuyubununa.” (Mt. 11:27) Inzila yiinda kubota yambomukonzya kubona kuti Jehova uuli mbuli Mbaataata, njakubona Jesu mbwamwaamba. Ino Jesu wakaamba nzi kujatikizya Bausyi?

Jesu naakali kwaamba Jehova kuti ngowakamupa buumi wakati: “Amebo mbwendi muumi nkaambo ka-Taata.” (Joh. 6:57) Mbubonya buyo andiswe tulapona akaambo ka Taata. (Int. 36:9; Inc. 17:28) Ino ncinzi cakapa kuti Jehova abape buumi bantu? Wakacita oobo akaambo kaluyando. Akaambo kakucita boobu andiswe tweelede kumuyanda Taateesu wakujulu.

Leza wakatondezya kuti ulabayanda bantu naakatuma Jesu kuti abe cinunuzyo cacipaizyo. Icinunuzyo cili boobu cakapa kuti bantu basizibi kabamvwana a Jehova kwiinda mu Mwanaakwe uuyandwa. (Rom. 5:12; 1 Joh. 4:9,10) Akaambo kakuti Taateesu uuli kujulu Ulazuzikizya nzyasyomezya alimwi tulakonzya kuba alusyomo lwakuti aabo boonse bamuyanda akumumvwida baya kuba “abulubulo [bwa]bulemu bwabana ba-Leza.”—Rom. 8:21.

Taateesu wakujulu “ulapasula izuba lyakwe” alindiswe abuzuba. (Mt. 5:45) Kupasula kwazuba ncecintu ncotutayeeyi kwaamba mumipailo. Nokuba boobo, lilayandika kapati alimwi tulakkomana kubona mbolibeleka. Aboobo, Taateesu nguutupa zyintu zyoonse nkaambo ulizizyi zyoonse katutana mulomba. Aboobo, sena eeci inga tacitupi kuyeeya mbwalanganya zilenge zyakwe Taateesu wakujulu?—Mt. 6:8, 26.

 Taateesu—“Nguutukwabilila”

Businsimi bwa Isaya bwakasyomezya bantu ba Leza bakaindi kuti: “Zilundu zilakonzya kutantamuka, atulundulundu tulakonzya kusosoloka, pele luzyalo lwangu talukooyootantamuka kuzwa kulinduwe, acizuminano cangu caluumuno tacikooyoososoloka abuniini, mbwaamba Jehova uukufwida luzyalo.” (Is. 54:10) Kukankaizya kaambo aaka, mumupailo wakwe buzuba bwamamanino bwabuumi bwakwe bwaanyika, Jesu wakatondezya kuti Jehova “nguutukwabilila.” Kapailila basikwiiya bakwe Jesu wakaamba kuti: “Aba bacili munyika, mebo ndiza kulinduwe. Taata Oosalala, babambe muzina lyako.” (Joh. 17:11, 14) Jehova ulabalanganya alimwi ulabakwabilila aabo bamutobela Jesu.

Inzila imwi Leza njabelesya kuti atukwabilile kuzyintu Saatani nzyabelesya mazuba aano nkutubambila cakulya cakumuuya aciindi ceelede kwiinda mu “muzike musyomesi uucenjede.” (Mt. 24:45) Kulya cakulya eeci cilayandika kapati nkaambo cilakonzya kutuyumya kuti “tusame zilwanyo zyoonse zya-Leza.” Mucikozyanyo, atulange-lange “intobo yalusyomo . . . njimukonzya kuzimya mimvwi yoonse iipya iifuswa kumubi.” (Ef. 6:11, 16) Lusyomo lwesu lulatukwabilila kuzyintu zikonzya kutunyonganya kumuuya alimwi eeci ncitondezyo cakuti Taateesu ulatukwabilila.

Tulakonzya kuba aluzyibo lunji lwambwatubamba kabotu Taateesu wakujulu kwiinda mukubona mwana a Leza mbwaakali kupona naakali anyika. Amubone cilembedwe kulugwalo lwa Marko 10:13-16. Aawa Jesu waambila basikwiiya bakwe kuti: “Amuleke twana, tuze kulindime.” Ibana boonse ibakamuzingulukide Jesu wakababukata akubaleleka. Bana bakakkomana kapati. Akaambo kakuti Jesu wakaamba kuti: “Oyo uwandibona, wamubona awalo Taata,” tulizyi kuti Leza wakasimpe uyanda kuti tuunke kuli nguwe.—Joh. 14:9.

Jehova Leza ulatuyanda lyoonse. Nguutupa zyintu zyoonse akutukwabilila alimwi uyanda kuti katumvwana anguwe. (Jak. 4:8) Aboobo Jehova nguuinda kubota kuli bamatata boonse mbotuzyi.

Mbotugwasyigwa

Tulagwasyigwa kapati akaambo kakuti tulamusyoma Jehova Taateesu wakujulu akuti ulatuyanda alimwi ulaamoyo waluzyalo. (Tus. 3:5, 6) Jesu wakagwasyigwa akaambo kakubasyoma Bausyi cakumaniina. Kristo wakaambila basikwiiya bakwe kuti: “Nsili endike, pele mpembede mebo ndili a-Taata uwakandituma.” (Joh. 8:16) Jesu lyoonse wakali kumusyoma Jehova kuti ulamugwasya. Mucikozyanyo, naakabbapatizigwa, Bausyi bakakkomana akumwaambila kuti: “Ngooyu mwanaangu uuyandika ngunkondelwa.” (Mt. 3:15-17) Alimwi kakuceede buyo ciindi cisyoonto kuti afwe, Jesu wakaamba kuti: “Taata, nduupeda muuya wangu mumaanza aako.” (Lk. 23:46) Jesu wakazumanana kubasyoma Bausyi akuciindi eeci.

Acibe boobo akuli ndiswe. Tatweelede kuyoowa nkaambo Jehova ulatugwasya. (Int. 118:6) Atsuko waambwa kumatalikilo acibalo eeci waamba kuti wakali kulisyoma naakali kuba amapenzi. Amane wakatalika kwiiya mbwaakali kupona Jesu ambwaakali kucita mulimo wakwe, akubona mbobakali kumvwana a Bausyi bakujulu. Ino ncinzi cakacitika? Atsuko wakaamba kuti, “Ndakazyiba mbocilimvwisya kuba a Bataata alimwi akubasyoma.” Uyungizya kuti: “Ndakaba aluumuno alimwi ndakakkomana. Aboobo taku ceelede kutulibilisya.”

Ino munzila nzi iimbi mbotugwasyigwa notumubona Jehova kuti ngu Taateesu? Ibana balabayanda bazyali babo alimwi bayanda kuti kababakkomanisya. Akaambo kaluyando, Mwana wa Leza lyoonse wakali “kucita zintu izimubotela wisi.” Mbubwenya buyo aswebo, luyando ndotujisi kuli Taateesu wakujulu  inga lwatupa kuti katupona kabotu alimwi “akumulumba.”—Mt. 11:25; Joh. 5:19.

Taateesu ‘Ulatujata Kujanza Lyakululyo’

Taateesu wakujulu alimwi ulatupa “mugwasyi,” imuuya usalala. Jesu wakaamba kuti: “Uzoomweenzya mubwini boonse.” (Joh. 14:15-17; 16:12, 13) Muuya usalala wa Leza ulakonzya kutugwasya kumuzyiba Taateesu. Inga watugwasya “kumwaisya mampangala mayumu,” mbuli kuyeeyela zyintu, kuba amizeezo itali kabotu naa kucinca kaambo, calo cikonzya kupa “makanze oonse kuti aswiilile Kristo.” (2 Kor. 10:4, 5) Aboobo katupaila kutegwa Jehova atupe “mugwasyi” ngwaakatusyomezya alimwi tulakonzya kusyoma kuti Taateesu ‘uuli kujulu uya kubapa Muuya Uusalala aabo ibakumbila.’ (Lk. 11:13) Alimwi cilayandika kupaila kuti muuya uusalala kautugwasya kuswena kuli Jehova.

Imwana musyoonto tayoowi kweenda kuti bausyi kabamujisi kujanza. Ikuti Jehova kamumubona kuti mbaauso, mulakonzya kwaasyoma majwi ayumya-yumya aakuti: “Mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.” (Is. 41:13) Mulakonzya kuba acoolwe “[c]akweenda” a Leza kukabe kutamani. (Mik. 6:8) Ikuti mwazumanana kucita kuyanda kwakwe akumubona kuti Jehova Mbaauso, unakumuyanda, muna kukkomana alimwi unakumukwabilila.

Bupanduluzi buyungizidwe