Sena Mulamuzumizya Jehova Kuti Amubuzye Mibuzyo?

IBBAIBBELE lilijisi mibuzyo minji iikonzya kumugwasya muntu kuliyeeya. Jehova Leza ubelesya mibuzyo kutegwa atuyiisye kasimpe. Mucikozyanyo, Jehova wakabelesya mibuzyo iili mbwiibede naakali kwaambila Kaini kuti ancince mizeezo yakwe mibi. (Matl. 4:6, 7) Ziindi zimwi, imubuzyo omwe ngwaakali kubuzya Jehova wakali kukonzya kupa kuti muntu acite cintu ciyandika. Naakamumvwa Jehova kabuzya kuti: “Ino nguni ngunti tume? Nguni uukonzya kutwiinkila?” imusinsimi Isaya wakaingula kuti: “Mpendi! Unditume mebo.”—Is. 6:8.

Jesu, Imwiiyi Mupati awalo wakali kwiibelesya kabotu mibuzyo. Makani mabotu ajisi mibuzyo njaakali kubuzya Jesu iinda ku 280. Nokuba kuti zimwi ziindi wakali kubelesya mibuzyo ikutegwa basikukazya baleke kumukazya, ziindi zinji wakali kucita oobo kutegwa abasike amoyo baswiilizi bakwe ikubapa kuti kabayeeya mbobamvwana a Leza. (Mt. 22:41-46; Joh. 14:9, 10) Mbubwenya buyo, mwaapostolo Paulo iwakalemba mabbuku aali 14 aa Magwalo aa Banakristo aa Chigiliki, wakali kubelesya mibuzyo. (Rom. 10:13-15) Mucikozyanyo, ilugwalo ndwaakalembela bana Roma lulijisi mibuzyo minji. Mibuzyo njaakali kubuzya Paulo ikulwaizya basikubala ikwiiya “bulondo buteeli mubusongo bwa-Leza amuluzibo lwakwe.”—Rom. 11:33.

Nokuba kuti mibuzyo imwi iyandika kwiingulwa mpoona-mpoona, imwi iyandika kukkala ansi kuyeeya. Imakani mabotu aamba kuti Jesu wakali kubelesya kapati mibuzyo kugwasya bantu kuti kabayeeya. Cimwi ciindi, Jesu wakacenjezya basikwiiya bakwe kuti: “Amucenjele kubumena bwaba-Farisi akubumena bwa-Heroda,” ikwaamba kuupa-upa ameso kwabo alimwi anjiisyo zyabo zyakubeja. (Mk. 8:15; Mt. 16:12) Basikwiiya ba Jesu tiibakakamvwa kaambo aaka aboobo bakatalika kukazyanya akwaamba kuti bakaluba kucibweza cinkwa. Amubone mbwaakaibelesya mibuzyo mumubandi wabo iwakatobela. “Wa[ka]baambila kuti, Nkaambonzi muloombolozyanya kuti mwabula mikamu, Sa tamuna kubona nikuba kumvwisya? Sa myoyo yanu icili miyumu? Mulijisi meso. Sa tamuboni? Mulijisi matwi. Sa tamumvwi? . . . Sa tamuna kumvwisya?” Imibuzyo ya Jesu yakali kubapa kuti basikwiiya bakwe kabayeeya, akubagwasya kuzyiba kaambo keni nkaakali kwaamba.—Mk. 8:16-21.

“Uvuwe Mibuzyo Yangu”

Jehova Leza wakabelesya mibuzyo kutegwa Jobu mubelesi wakwe acince mizeezo yakwe. Kwiinda mukubelesya mibuzyo minji, Jehova wakamugwasya Jobu kubona kuti wakali musyoonto kapati ku Mulengi wakwe. (Job. 38-41) Sena Jehova wakali kulangila bwiinguzi kumibuzyo njaakabuzya? Peepe. Imibuzyo mbuli ooyu wakuti: “Nendakaimika nyika wakali kuli yebo?” ilibonya kuti yakamugwasya Jobu kuzyiba mbwayeeya alimwi ambwalimvwa. Mibuzyo eeyi Jobu yakamuyumya mate. Wakaamba buyo kuti: “Inga ndakuvuwa buti? Ndabika minwe kumulomo wangu.” (Job. 38:4; 40:4) Jobu wakakabona kaambo amane wakalicesya. Nokuba boobo, Jehova tanaakali kumuyiisya buyo Jobu kuti kalibombya. Alimwi Jobu wakagwasyigwa kuti kayeeya kabotu. Muunzila nzi?

Nokuba kuti Jobu wakali “muntu uutakwe mulandu, uululeme,” zimwi ziindi majwi aakwe akali kutondezya kuti tanaakali kuzilanga kabotu zyintu cakuti Elihu wakamusinsa Jobu akaambo kakuti ‘wakalibotya kwiinda Leza.’  (Job. 1:8; 32:2; 33:8-12) Aboobo, mibuzyo Jehova njaakamubuzya, ayalo yakamugwasya Jobu kuzilanga kabotu zyintu. Kaambaula a Jobu kuzwa kuguwo, Leza wakati: “Ngwani oyu uuomfokezya kukanza kwangu amajwi aatayeeyegwi? Unduumuzye mbuli muntu, uvuwe mibuzyo yangu.” (Job. 38:1-3) Kwiinda mukubuzya mibuzyo, Jehova wakatondezya kuti musongo alimwi ngusinguzu kweelana azyintu zigambya nzyaakalenga. Kucita boobu kwakamugwasya Jobu kusyoma nzila mbwacita zyintu Jehova kwiinda mbwaakabede kaindi. Eelyo kaka eeci cakamuyoosya kapati Jobu ikubuzyigwa mibuzyo a Leza Singuzuzyoonse!

Mbotukonzya Kuzumizya Jehova Kuti Atubuzye Mibuzyo

Ino mbuti swebo? Sena andiswe inga twagwasyigwa amibuzyo iilembedwe mu Bbaibbele? Inzya tulakonzya kugwasyigwa. Ikupa kuti mibuzyo eeyi itugwasye kukkala ansi akuyeeya kulakonzya kutugwasya kumuuya. Imibuzyo mipati iili mu Jwi lya Leza njiipa kuti Bbaibbele libe anguzu kapati. Masimpe, “ijwi lya-Leza . . . lili anguzu . . . alimwi lilabeteka kuyeeya akuyanda kwamoyo.” (Heb. 4:12) Pele kutegwa tugwasyigwe, tweelede kubona kuti Jehova ubuzya ndiswe kutugama. (Rom. 15:4) Atulange-lange imwi mibuzyo eeyi.

“Sa oyo uubeteka nyika yoonse takooyoocita cakululama?” (Matl. 18:25) Abrahamu wakamubuzya Jehova imubuzyo ooyu uutalangilwi kwiingulwa ciindi Leza naakali kubeteka Sodoma a Gomora. Abrahamu wakabona kuti Jehova takonzyi kucita cintu citaluzi—ikujaya bantu baluleme antoomwe ababi. Imubuzyo wa Abrahamu utondezya kuti wakajisi lusyomo lwakuti Jehova uliluleme.

Mazuba aano, bantu bamwi balakonzya kulibuzya kujatikizya lubeta lwa Jehova luboola, ikuti naa mbaani ibaya kufwutuka lya Armagedoni naa kubusyigwa. Muciindi cakuti mizeezo iili boobu itunyonganye, tulakonzya kuyeeya mibuzyo njaakabuzya Abrahamu. Ikuzyiba kuti Jehova ngu Taatesu wakujulu uuli alubomba alimwi akuba alusyomo kuti uliluleme akuti uli aluse mbuli mbwaakacita Abrahamu, kulakonzya kutugwasya kuti tutasowi ciindi katulibilika akutyompwa akaambo kakudooneka alimwi akukazyanya.

“Nguni akati kanu uulibilika uukonzya kukomezya ciimo cakwe nikaba kakokola komwe?” (Mt. 6:27) Kaambila nkamu mpati iyakali kubikkilizya abasikwiiya bakwe, Jesu wakabelesya mubuzyo ooyu ikukankaizya mbociyandika kusyoma Jehova. Mazuba aamamanino aabweende oobu bwazyintu apa kuti katulibilika kapati, pele ikubikkila kapati  maano kumapenzi aaya takukonzyi kuyungizya buumi bwesu naa kupona kabotu.

Lyoonse notulibilika akaambo kamapenzi aatucitikila naa aabayandwa besu, ikuyeeya mubuzyo wa Jesu kulakonzya kutugwasya kukkazika moyo. Kulakonzya kutugwasya kuleka kulibilika kwalo ikutumanina ciindi alimwi anguzu. Kweelana ambwaakatusyomezya Jesu, Taatesu wakujulu, uusanina bayuni bakujulu akusamika maluba aamumuunda, ulizizyi zyoonse nzyotuyandika.—Mt. 6:26-34.

“Sa muntu ulakonzya kubweza mulilo akaango kakwe akutapidwa zyakusama zyakwe?” (Tus. 6:27) Izyaandaano zyakusaanguna zili fwuka mubbuku lya Tusimpi zibikkilizya makani aabusongo bausyi ngobaambila mwanaabo. Mubuzyo iwazubululwa atala aawa waamba zyintu zibi zicitika akaambo kakucita bumambe. (Tus. 6:29) Ikuti twabona kuti tusobana amuntu ngotutakwetene limwi naa twaba amizeezo yakoonana, imubuzyo ooyu weelede kutuyeezya mapenzi aakonzya kuboola akaambo kakucita boobu. Imubuzyo ooyu taukonzyi kutukwabilila buyo kuzibi zikonzya kucitika akaambo kakucita bumambe. Eelyo kaka kaambo aaka kaamba njiisyo mbotu yamu Bbaibbele yakuti: ‘Ulatebula kufumbwa ncobyala’!—Gal. 6:7.

“Ino nduweni webo nobeteka similimo wamuntu umbi?” (Rom. 14:4) Mulugwalo ndwaakalembela bana Roma, Paulo wakaamba mapenzi aakacitika mumbungano yamumwaanda wamyaka wakusaanguna. Banakristo bamwi, ibakazwa mubukkale bwiindene-indene bakali kuyanda kubeteka beenzinyina akaambo kazyintu nzyobakali kucita basyominyina. Mubuzyo wa Paulo wakabayeezya kuti bakeelede kumvwana akulekela Jehova kuti abeteke nguyo.

Mbubwenya buyo amazuba aano, bantu ba Jehova bazwa mubukkale bwiindene-indene. Pele Jehova watubikka antoomwe kutegwa tukamantane. Sena kuli ncomucita kutegwa kube lukamantano? Ikuti naa katufwambaana kubabeteka bakwesu akaambo kazyintu nzyobacita, inga cainda kubota ikulibuzya mubuzyo wa Paulo.

Imibuzyo Itugwasya Kumvwana a Jehova

Zikozyanyo eezyi zisyoonto zitondezya mibuzyo iili mu Jwi lya Leza mboikonzya kupa muntu kuti aliyeeye. Ikuti twalanga-langa cakapa kuti mibuzyo eeyi ibuzyigwe inga catugwasya kubona mbotukonzya kutubelesya twaambo ootu. Alimwi notubala Bbaibbele, tuya kujana mibuzyo iimbi iigwasya kapati.—Amubone kabbokesi apeeji 14.

Ikupa kuti mibuzyo iili mu Jwi lya Leza itusike amoyo kulakonzya kutugwasya kubona zyintu mbuli mbwazibona Jehova kweelana anzila zyakwe nzyabelesya ziluleme. Jehova naakamanizya kumubuzya mibuzyo, Jobu wakati: “Ndakalimvwide amatwi buyo anduwe, pele lino meso aangu abona.” (Job. 42:5) Inzya, Jehova wakaba muntu wini-wini kuli Jobu, mbuli kuti wakali kumubona buya. Sikwiiya Jakobo wakazi kukaamba kaambo aaka kuti: “Amuswenenene kuli-Leza, elyo alakwe ulamuswenenena.” (Jak. 4:8) Tweelede kubona kuti cibeela coonse camu Jwi lya Leza, kubikkilizya amibuzyo iili mumo, zitugwasye kukomena kumuuya “akumubona” kabotu Jehova.

Kabbokesi kali apeeji 14]

Ino kulibuzya mibuzyo eeyi inga kwamugwasya buti kuzibona mbwazibona zyintu Jehova?

“ Sa Jehova ulabotelwa zipaizyo azituuzyo mbuli kuswiilila majwi aa-Jehova?”—1 Sam. 15:22.

▪ “ Iwakabumba liso, sa taboni?”—Int. 94:9.

▪ “ Sa ulibwene muntu musongo mumeso aakwe mwini?”—Tus. 26:12.

▪ “ Ino unyemenanzi? Sa ncibotu kunyema obo na?”—Jon. 4:4.

▪ “ Nimpindunzi njajana muntu nikuba kuti wavuba nyika yoonse anukuti wanyanzigwa buumi bwakwe?”—Mt. 16:26.

▪ “ Nguni uukonzya kutwaandaanya kuluyando lwa-Kristo?”—Rom. 8:35.

▪ “ Sa kuli cintu ncojisi ncotapedwe?”—1 Kor. 4:7.

▪ “ Mumuni ulavwelana buti amudima?”—2 Kor. 6:14.

[Cifwanikiso icili apeeji 15]

Ino ncinzi Jobu ncaakaiya kumibuzyo njaakamubuzya Jehova?