Kamuzumanana Kumubelekela Jehova Nomulanganya Musazinyoko Uuciswa

NIBAKABUJANA bulwazi mumoongolola, Kim Kamboni bakamwaambila kuti ulaakkansa. * Balumi bakwe ba Steve bakaamba kuti: “Kim mbubakamupanduda buyo bakamubikka mumuncini alimwi bakatalika akumupa musamu. Imusamu ooyo wakamupa kuti nguzu zimane. Tanaakali kucikonzya kweenda.”

Kamuyeeya buyo mbwaakali kulimvwa Steve naakali kubona mukaintu wakwe ngwayanda kapenga abulwazi bupenzya kapati. Ndiza andinwe mulijisi musazinyoko uuciswa bulwazi butalangilwi kupona naa iwacembaala. (Muk. 12:1-7) Ikuti kakuli boobo, mulizyi kuti ikutegwa mumulanganye kabotu mulwazi muyandika kulibikkila maano andiwe. Ikuti naa mwaleka kucita kabotu kumuuya, muya kutyompwa alimwi ciyakupa kuti mutamugwasyi kabotu muyandwa wenu ooyu. Ino mbuti mbomukonzya kuzumanana kumubelekela Jehova nokuba kuti mulalwazya naa kulanganya bacembeede? Ikuti naa kwayandika, ino bakwesu abacizyi mumbungano ncinzi ncobakonzya kucita kutegwa bagwasye mulwazi?

Ino Mbuti Mbomukonzya Kwiibeleka Milimo Eeyi?

Ikutegwa mwiibeleke kabotu milimo eeyi, kubelekela Jehova, kulwazyika muyandwa wenu naa kulibikkila maano, muyandika kucinca akubona mbomucibelesya ciindi ambomuzicita zyintu. Bbuku lya Tusimpi 11:2 lyaamba kuti: “Babombumyoyo mbebajisi busongo.” Mukapango aaka ibbala lya busongo lyaamba kuzyiba mpalezya muntu. Ikutegwa mutabeleki cakuzwa munzila, mweelede kulanga-langa nzyomweelede kucita abuzuba amikuli njomujisi.

Steve ulatondezya kuti mubombemoyo alimwi musongo, kweelana ambwacita  milimo yakwe. Ikuyungizya kumulimo wakwe ngwacita wakumubili, ngusicuuno wakabunga kabaalu alimwi mulangizi wamulimo mumbungano ya Bakamboni ba Jehova ku Ireland nkubazwa. Alimwi wakali mukkomiti ya Hospital Liaison nkobazwa. Steve wakati: “Kim kunyina naakali kutongooka kuti ndamusiya alikke nindakali kucita milimo eeyi. Pele ndakalizyi kuti ndakali kukwelela antunda.” Ino Steve wakacita buti? Wakati: “Ndakalomba kuti ndileke kuba sicuuno wakabunga kabaalu. Ndakazumanana kuba mwaalu alimwi akaambo kakupa bamwi mikuli njindakali kucita, ndakali kukonzya kujana ciindi cinji cakuba a Kim akumucitila nzyayanda.”

Mukuya kwaciindi, Kim wakalimvwaa-mvwa kabotu. Ba Steve a ba Kim bakalanga bukkale bwabo, ba Steve bakabona kuti inga bacikonzya kwiicita milimo njibakali kucita mumbungano alimwi abalo ba Kim bakazumina. Ba Steve baamba kuti: “Twaiya mbotukonzya kucita zyintu kweelana amalwazi ngotujisi. Ndilamulumba Jehova kuti watugwasya alimwi akuti mukaintu tatongooki nokuba kuti ulaciswa-ciswa.”

Atubone cakabacitikila ba Jerry imulangizi weendeenda amukaintu wakwe Maria. Bakacinca  zibakali kuyanda kucita kutegwa balanganye bazyali baabo bacembeede. Ba Maria bakaamba kuti: “Mebo abalumi bangu twakali kuyanda kubeleka mulimo wabumisyinali mucisi cimbi. Ba Jerry mbabakali bana balikke alimwi bazyali baabo bakali kuyanda kulanganyizyigwa. Aboobo twakayeeya kuti tukkale mu Ireland kutegwa tubalanganye kabotu. Akaambo kakucita boobo, twakali kucikonzya kubalindilizya bataata nibakali mucibbadela kabatanafwa. Ino tulanganya bacembele bamaama, tukkala buyo munsi-munsi alimwi tulacikonzya kubacitila zyoonse zibayanda. Kumbungano nkobakali kuswaangana bamaama, bakali kugwasya kapati cakuti catupa kuzumanana amulimo wesu wakweendeenda.”

Mbobakonzya Kugwasya Bamwi

Nibakali kubandika zyintu nzibeelede kupegwa bamacembele bakafwidwa balumi bali mumbungano, Mwaapostolo Paulo wakalemba kuti: “Na muntu tabambi basazinyina, kwaambisya bamuŋanda yakwe, wati oyo ulisowede lusyomo lwakwe, ulaindilila akuliyooyo uutazumina.” Paulo wakabayeekezya Banakristonyina kuti, ikuti kabacita ‘cimukonda Leza’ beelede kubelesya mali aabo kugwasya bazyali baabo naa bamakaapanyina bacembeede. (1 Tim. 5:4, 8) Nokuba boobo, abamwi mumbungano balakonzya kugwasya.

Amubone banabukwetene aaba ba Hakan aba Inger ibakkala ku Sweden. Ba Hakan bakaamba kuti: Ibakaintu bangu nibakabajana akansa, cakatunyonganya kapati. Ba Inger tibakali kuciswa-ciswa pe, bakali bayumu. Ino abuzuba twakali kuunka kucibbadela kuti bakasilikwe alimwi baunwa musamu bakali kuciswa kapati. Ba Inger bakali kucaala aŋanda aciindi eeci alimwi ndakali kuyandika kuba aambabo kutegwa ndibalanganye. Ino mbungano yakabagwasya buti ba Hakan aba Inger?

Baalu mumbungano bakacita bubambe bwakuti aba banabukwetene kabaswiilila miswaangano aluwaile. Kuyungizya waawo, bakwesu abacizyi bakali kutuswaya akututumina luwaile. Bakali kututumina magwalo alimwi amakkaadi. Ba Hakan bakaamba kuti: “Jehova, bakwesu abacizyi bakatugwasya kapati. Kutulanganya kuliboobu kwatupa kuti tuzumanane kuyuma kumuuya. Cakulumba, ba Inger bayumya ono alimwi twatalika kuunka ku Ŋanda ya Bwami.” Ikuti bamumbungano bacita nzyobeelede kucita ikugwasya baciswa abacembeede bali akati kabo, masimpe inga baba ‘muzwalani ulaaluyando aciindi coonse, alimwi munyina wazyalilwa mapenzi.’—Tus. 17:17.

Jehova Ulalumba Kusoleka Kwanu

Ikulanganya wamukwasyi uuciswa cilalemya. Pesi mwami Davida wakalemba kuti: “Uli acoolwe uuyeeya batengwana” mbuli muntu uuyandika kugwasyigwa akaambo kakuciswa.—Int. 41:1.

Ino nkaambo nzi aabo balanganya baciswa ncobeelede kukkomana? Lugwalo lwa Tusimpi 19:17 lwaamba kuti: “Uufwida bacete luzyalo ulakolotya Jehova; ulamupa bulumbu bweelede milimo yakwe.” Leza mwini-mwini ulababikkila maano babelesi bakwe ibaciswa alimwi ulabalongezya ibabalwazya. Sintembauzyo Davida wakaimba kuti: “Jehova ulamutabilila [muntu uuli boobu] naaciswa abulo; mukuciswa kwakwe ulaponya malwazi aakwe oonse.” (Int. 41:3) Tulakonzya kusyoma kuti ikuti muntu uulwazya wajanika mumapenzi, Jehova ulakonzya kumugwasya.

Cilakkomanisya ikuzyiba kuti Jehova Leza ulabona zyintu nzyotucita notugwasya bamukwasyi wesu ibaciswa. Nokuba kuti kuyandika kusolekesya notubagwasya bantu aaba, Imagwalo alatutondezya kuti “Leza ulakondwa kuzipaizyo zili bobuya.”—Heb. 13:16.

Bupanduluzi buyungizidwe

[Zifwanikiso izili apeeji 18]

Kamuzibikkila maano zyintu zyakumuuya alimwi kamuzumina kugwasyigwa abamwi