Mibuzyo Yabasikubala

Mbwaanga Jehova ulakasya kukomba mituni, ino nkaambo nzi ncaatakamusubuda Aroni naakapanga moombe wangolida?

Ciindi Aroni naakapanga moombe wangolida kweelana ambokulembedwe ku Kulonga caandano 32, wakatyola mulawo wa Leza iwaamba mituni. (Kul. 20:3-5) Akaambo kaceeci, “Jehova wakamukalalila loko [Aroni], wakati munyonyoone, pele [Musa wakamu]kombela Aroni alakwe kuciindi eeco nciconya.” (Dt. 9:19, 20) Sena kupaila kwa Musa, imuntu uululeme kwakabeleka kukaambo ka Aroni? (Jak. 5:16) Inzya. Akaambo kamupailo uuli boobu alimwi atwaambo atumbi tobilo, kulibonya kuti Jehova wakauvwiila mupailo wa Musa alimwi tanaakamusubula Aroni.

Kaambo kamwi nkakuti Aroni wakali kusyomeka. Musa naakatumwa kuti aunke kuli Farao akugusya bana Israyeli mu Egepita, Jehova wakasala Aroni kuti baunke limwi a Musa kutegwa kamwaambilila kuli Farao. (Kul. 4:10-16) Aaba basankwa bobilo bakaunka ziindi zinji kumwami Farao waku Egepita, nokuba kuti zyakali kubacima nzyaakali kubaambila akaambo kakuti wakali muyumu moyo. Aboobo, naakacili ku Egepita Aroni wazyibidwe kuti wakali mubelesi wa Jehova uusyomeka.—Kul. 4:21.

Alimwi amubone cakamupa Aroni kuti apange moombe wangolida. Musa wakali a Cilundu ca Sinai kwamazuba aali 40. Ciindi “bantu nebakabona kuti Musa wamuka kuseluka kuzwa kucilundu,” bakamwaambila Aroni kuti abapangile mutuni. Aroni wakazumina mpoonya wakapanga mutuni wamoombe wangolida. (Kul. 32:1-6) Nokuba boobo, nzyaakacita Aroni kumbele zitondezya kuti tanaakazikkomanina nzyaakacita. Kuboneka kuti Aroni bakamukoma bantu. Mucikozyanyo, Musa naakaamanizya makani aamituni, bana Levi boonse—kubikkilizya a Aroni—bakasala kuba kulubazu lwa Jehova. Basikukomba mituni basika ku 3,000 bakajaigwa.—Kul. 32:25-29.

Mpoonya Musa wakaambila bantu kuti: “Mwacita zibi zipati.” (Kul. 32:30) Aboobo, Aroni tanaakali buyo alikke iwakacita mulandu ooyu. Walo abantu aaba bakalekelelwa a Jehova.

Nikakamana kaambo kamoombe wangolida, Jehova wakasala Aroni kuti abe mupaizi mupati. Leza wakaambila Musa kuti: “Samika Aroni zyakusama zisalalisya, alimwi umunanike akumusalazya, andibelekele milimo yabupaizi.” (Kul. 40:12, 13) Kuboneka kuti Jehova wakamulekelela Aroni akaambo kakulezya. Mumoyo, Aroni wakali mukombi wakasimpe uusyomeka, ikutali sikukomba mituni.