Mutapenzyi Muuya Uusalala wa Jehova

“Mutapenzyi Muuya Uusalala wa-Leza, nguwenya ngumwakaandwa kujanza lyakwe.”—EF. 4:30.

1. Ino ncinzi Jehova ncaacita kubantu banji, alimwi ino ncinzi ncobeelede kucita?

KULI cintu cipati Jehova ncaabacitila bantu ibanji bacipona munyika eeyi iili mumapenzi. Wacita kuti cibaubaubile kuti baswene kuli nguyo kwiinda mu Mwanaakwe simuzyalwa alikke Jesu Kristo. (Joh. 6:44) Muli akati kabaabo kuti ikuti naa mwakalyaaba kuli Leza alimwi akuti naa mulapona kweelana ambumwakasyomezya. Mbuli bantu bakabbapatizyigwa muzyina lya muuya uusalala, mweelede kulilemeka kweelana amuuya ooyo.—Mt. 28:19.

2. Ino mibuzyo nzi njotutilange-lange?

² Iswebo ‘notubala zyintu zyakumuuya’ tulasama buntu bupya. (Gal. 6:8; Ef. 4:17-24)  Pele mwaapostolo Paulo ulatucenjezya kuti tatweelede kunyemya muuya uusalala wa Leza. (Amubale Ba-Efeso 4:25-32.) Lino tulalubandika lugwalo oolu ndotwabala. Ino Paulo ncinzi ncaakali kwaamba naakaamba kuti mutapenzyi muuya wa Leza? Ino mbuti muntu uulyaabide kuli Jehova mbwakonzya kucita oobo? Alimwi ino mbuti mbotutakonzyi kupenzya muuya wa Jehova?

Ncaakali Kwaamba Paulo

3. Ino inga mwaapandulula buti imajwi aalembedwe ku Ba-Efeso 4:30?

³ Cakutaanguna, atubone majwi aa Paulo aali ku Ba-Efeso 4:30. Wakalemba kuti: “Mutapenzyi Muuya Uusalala wa-Leza, nguwenya ngumwakaandwa kujanza lyakwe mane kusikila kubuzuba bwa-lununuko.” Paulo tanaakali kuyanda kuti basyominyina banyonganye cilongwe cabo ncobakajisi a Leza. Muuya uusalala wa Jehova nguwakabapa kuti “[baandwe] kujanza lyakwe mane kusikila kubuzuba bwa-lununuko.” Muuya uusalala wa Leza wakali kubaanda alimwi ucibaanda ikubatondezya ciboola kumbele ibananike basyomeka. (2 Kor. 1:22) Icaando eeci citondezya kuti mbantu ba Leza akuti baya kujulu. Aabo bakaandwa bali 144,000.—Ciy. 7:2-4.

4. Ino nkaambo nzi ncotuteelede kuunyemya muuya uusalala wa Leza?

⁴ Ikunyemya muuya uusalala ilakonzya kuba ntaamu yakutaanguna iikonzya kupa kuti muuya uusalala wa Leza uleke kubeleka ku Munakristo. Ikutondezya kuti eeci cilakonzya kucitika, tulakonzya kubona cakacitika Davida naakabisya a Bateseba. Davida wakeempwa akulomba Jehova kuti: “Utandisowi kuzwa kubusyu bwako; Utandinyanzyi Muuya wako Uusalala.” (Int. 51:11) Balikke bananike aabo “[iba]syomeka mane do kusikila kulufu” mbabaya kupegwa “musini wabuumi” butamani kujulu. (Ciy. 2:10; 1 Kor. 15:53) Banakristo ibajisi bulangizi bwakupona anyika abalo bayandika muuya uusalala kutegwa bazumanane kusyomeka kuli Leza akupegwa buumi butamani kwiinda mukuba alusyomo mucituuzyo cacinunuzyo ca Kristo. (Joh. 3:36; Rom. 5:8; 6:23) Aboobo, toonse tatweelede kuunyemya muuya uusalala wa Leza.

Ino Mbuti Munakristo Mbwakonzya Kunyemya Muuya Uusalala?

5, 6. Ino mbuti Munakristo mbwakonzya kuunyemya muuya wa Jehova?

⁵ Mbotuli Banakristo balyaabide, tatweelede kuunyemya muuya uusalala. Eeci cilakonzyeka kuti naa ‘twalekela muuya uusalala kuti utusololele,’ akaambo kakuti, ikuti twacita boobo tatukayungwi kucita zyintu zyanyama. (Gal. 5:16, 25, 26) Pele eeci inga cacinca. Inga twaunyemya muuya wa Leza ikuti naa twatalika kuyaabuleka aasyoonto-syoonto kucita zyintu zili kabotu alimwi ndiza katutazyi, tulakonzya kucita cintu citazumizyide mu Jwi lya Leza.

⁶ Ikuti twazumanana kucita zyintu ziteendelani amuuya uusalala, tunakuunyemya muuya alimwi a Jehova Uutupa muuya ooyu. Kulanga-langa lugwalo lwa Ba-Efeso 4:25-32 kuya kututondezya mbotweelede kulilemeka, alimwi eeci cilakonzya kutugwasya kuti katutaunyemi muuya wa Leza.

Cikonzya Kutugwasya Kuti Tutanyemi Muuya Uusalala

7, 8. Ino nkaambo nzi ncotweelede kwaamba masimpe?

⁷ Tweelede kwaamba masimpe. Kweelana a lugwalo lwa Ba-Efeso 4:25, Paulo wakalemba kuti: “Amuleke bubeji, mwaambe lusinizyo umwi aumwi kumweenzinyina, ikuti toonse tuli basizizonyina mumubili omwe.” Akaambo kakuti tulikamantene “[ka]tuli basizizonyina mumubili omwe,” masimpe, tatweelede kubayunga basyomima nkaambo ooku nkubacenga. Bantu bali boonse ibazumanana kubeja tabakonzyi kumvwana a Leza.—Amubale Tusimpi 3:32.

⁸ Ikubeja kulakonzya kupa kuti kutabi lukamantano mumbungano. Aboobo, tweelede  kuba mbuli musinsimi Daniele iwakali kusyomeka. (Dan. 6:4) Alimwi tweelede kuyeeya majwi Paulo ngaakaambila Banakristo ibajisi bulangizi bwakuya kujulu kuti cizo acimwi “[ca]mubili wa-Kristo” ncizonyina mubili woonse alimwi ceelede kuzumanana kusyomeka kubasikutobela Jesu bananike ibasyomeka. (Ef. 4:11, 12) Ikuti katujisi bulangizi bwakupona buumi butamani mu Paradaiso anyika, andiswe tweelede kwaamba masimpe kutegwa kube lukamantano lwabunyina bwanyika yoonse.

9. Ino kaambo nzi ncotweelede kucitobela cilembedwe ku Ba-Efeso 4:26, 27?

⁹ Tweelede kumukazya Diabolosi alimwi tatweelede kumupa ciindi cakuti atutyompye kumuuya. (Jak. 4:7) Muuya uusalala ulakonzya kutugwasya kuti tumukazye Saatani. Mucikozyanyo, tulakonzya kucita oobu kwiinda mukutanyema kapati. Paulo wakalemba kuti: “Nimwaba abukali, mutabisyi. Mutabbizyi izuba bukali bwanu. Mutapi Saatani busena abuniini.” (Ef. 4:26, 27) Ikuti naa tonyemena kaambo kalibonya, cakufwambaana tweelede kupaila cakaumu-umu kutegwa ‘moyo ukkale,’ kuti twacita oobo, tunakulilesya ikutegwa tutaunyemyi muuya wa Leza. (Tus. 17:27) Aboobo tatweelede kunyema kwaciindi cilamfu kutegwa Saatani atusunke kucita cibi. (Int. 37:8, 9) Imwi nzila ikonzya kutugwasya njakufwambaana kubamba kaambo kamuzwanganya kweelana ambwaakaamba Jesu.—Mt. 5:23, 24; 18:15-17.

10, 11. Nkaambo nzi ncotuteelede kubba naa kubeja?

¹⁰ Tatweelede kusunkwa kubba naa kwaamba zyintu zyakubeja. Kaamba kubba, Paulo wakaamba kuti: “Mubbi atabbi limbi, pele asungwaale akubelesya maanza aakwe milimo mibotu, kuti ajane cakugwasya mweenzinyina uubulide.” (Ef. 4:28) Ikuti naa Munakristo uulyaabide wabba, ulakonzya kusampula zyina lya Leza. (Tus. 30:7-9) Nobuba bucete tabukonzyi kumuzumizya kubba. Aabo bamuyanda Leza alimwi abantunyina balizyi kuti kubba takuzumizyidwe.—Mk. 12:28-31.

¹¹ Paulo taambi buyo zyintu nzyotuteelede kucita pele ulaamba azyintu nzyotweelede kucita. Kuti katupona akweenda munzila yamuuya, tunakubeleka canguzu kutegwa tugwasye bamumukwasyi akugwasya “baabo bayandika kugwasyigwa.” (1 Tim. 5:8) Jesu abaapostolo bakwe bakali kuyobola mali aakugwasya bacete pele Judase Iskariote sikwaaba wakaabba mali. (Joh. 12:4-6) Masimpe ngakuti tanaakali kusololelwa amuuya uusalala. Iswebo notusololelwa amuuya wa Leza ‘tulasyomeka muzyintu zyoonse’ mbuli Paulo. (Heb. 13:18, NW) Aboobo eeci tacitupi kuunyemya muuya uusalala wa Jehova.

 Inzila Azimbi Zikonzya Kutupa Kuti Tutaunyemyi Muuya Uusalala

12, 13. (a) Kweelana ambokutondezyedwe ku Ba-Efeso 4:29, ino majwi nzi aatayaki ngotuteelede kwaamba? (b) Ino tweelede kwaambaula munzila iili buti?

¹² Mweelede kwaambaula kabotu. Paulo wakaamba kuti: “Mutazwi ijwi ibi niliba lyomwe kumilomo yanu, pele amwaambe kuziindi zyoonse majwi aaelede aakonzya kuyaka, kuti boonse baswiilila bagwasigwe.” (Ef. 4:29) Alimwi mwaapostolo tatwaambili buyo zyintu nzyotuteelede kucita; pele utwaambila nzyotweelede kunakucita. Kwiinda mukugwasyigwa amuuya wa Leza, ‘ciya kutupa kwaambaula zyintu zibotu ziyaka izikonzya kubagwasya aabo baswiilila.’ Kuyungizya waawo, tatweelede kwaamba ‘majwi mabi’ nociba ciindi comwe. Ibbala lya ci Giliki ilyakabelesyegwa kuti ‘majwi mabi’ ndyakuti ‘kubola’ ikwaamba kubola kwa micelo, inswi naa nyama. Mbubwena mbotutakonzyi kulya cintu cibolede, tatukonzi kukukkomanina kwaambaula nkwatayandi Jehova.

¹³ Tweelede kwaambaula kabotu, calubomba alimwi kwaambaula kwesu kweelede kuti “kulweezegwe amunyo.” (Kol. 3:8-10; 4:6) Bantu beelede kuzyiba kuti tuliindene nobamvwa nzyotwaamba. Aboobo tweelede kubagwasya bantu kuti kababelesya ‘majwi aayaka.’ Alimwi tweelede kulimvwa mbwaakalimvwa sintembauzyo wakaimba kuti: “Majwi aamulomo wangu amiyeeyo yamumoyo wangu, zyoonse zitambulike kumeso aako, O Jehova, mwaala wangu anguzu zyangu.”—Int. 19:14.

14. Kweelana a Ba-Efeso 4:30, 31, ino nzyintu nzi nzyotuteelede kucita?

¹⁴ Tatweelede kuba andutiluti, ikunyema, bukali, azyintu zibi zyoonse. Naakamana kucenjezya kuti tatweelede kunyemya muuya wa Leza, Paulo wakalemba kuti: “Azizwe kulindinywe zintu ezi zyoonse–ndutiluti zili buti, alunyemo, abukali, amaambani, akutuka, alusulo loonse.” (Ef. 4:30, 31) Mbotuli bantu batalondekede, toonse tweelede kubeleka canguzu kutegwa tutanikuyeeyi naa kucita zyintu zitali kabotu. Ikuti katuli ‘aandutiluti alimwi katunyema tunakuunyemya muuya wa Leza. Eeci cileeleni anotubikkilila zyintu zibi nzyibakatucitila bamwi, kuleka kubaambauzya akukaka kubalekelela. Ikuti naa twatakutobela kulayigwa kuli mu Bbaibbele, inga twaba acilengwa cikonzya kutupa kuulubizyila muuya, calo cikonzya kutupa kunjila mumapenzi.

15. Ikuti naa umwi watulubizyila, ino ncinzi ncotweelede kucita?

¹⁵ Tweelede kuba aluzyalo, buuya, alimwi akulekelelana. Paulo wakalemba kuti: “Amuusilane buuya, mukabe batete moyo, akuba aluzyalo lwakulekelelana milandu, mbubonya mbuli Leza mbwaakalekelela ndinywe muli-Kristo.” (Ef. 4:32) Nokuba kuti twanyema buti akaambo kamuntu watulubizyila, tweelede kumulekelela mbubwenya mbwacita Leza. (Lk. 11:4) Amuyeeye kuti mukombima watulubizyila. Kutegwa tukabambe kaambo, twajana ciindi cakubandika anguyo. Watondezya kuti wausa kukaambo aaka akulomba kulekelelwa. Twamulekelela, pele nokuba boobo kuli zinji nzyotweelede  kucita. Lugwalo lwa Levitiko 19:18 lwaamba kuti: “Utaliyi inkoto nekuba kuba simfundilizi kubana babantu bako; yanda mweenzinyoko mbubonya mboliyanda omwini. Ndime Jehova.”

Kupakamana Kulayandika

16. Amupe cikozyanyo citondezya kuti kucinca kulayandika zimwi ziindi kutegwa tutaunyemyi muuya wa Jehova.

¹⁶ Nociba ciindi notuli tolikke, tulakonzya kusunkwa kucita cintu cikonzya kutupa kumulubizyila Leza. Mucikozyanyo, mukwesu ulakonzya kuti wali kuswiilila nyimbo zitali kabotu. Mukuya kwaciindi, manjezyeezya aakwe alakonzya kumukatazya akaambo kakutatobela lulayo lulembwa mumabbuku ‘aamuzike musyomesi uucenjede.’ (Mt. 24:45) Ulakonzya kulipailila penzi eeli akuyeeya majwi ngaakalemba Paulo aalembedwe ku Ba-Efeso 4:30. Kakanzide kuti ataciti cili coonse cikonzya kunyemya muuya wa Leza, wasala kuti kuzwa sunu tanakuswiilili nyimbo zitali kabotu. Jehova uyakumulongezya mukwesu ooyu. Aboobo, katuzumanana kutegwa tutaunyemyi muuya wa Leza.

17. Ino ncinzi cikonzya kucitika ikuti katutapakamene akupaila?

¹⁷ Kupakamana akupaila inga kwatugwasya kutegwa tutaunyemyi muuya. Akaambo kakuti muuya uusalala utupa kuti katucita mbuli Jehova, twaunyemya, tulamunyemya awalo—eeco calo ncotutayandi kucita. (Ef. 4:30) Ibalembi Bajuda bamumwaanda wamyaka wakusaanguna bakabisya kwaamba kuti maleele aa Jesu akazwa kuli Saatani. (Amubale Marko 3:22-30.) Basinkondonyina a Kristo aaba ‘bakasanka muuya uusalala’ akucita cibi citakonzyi kulekelelwa. Tatweelede kucita mbobakacita.

18. Ino mbuti mbotukonzya kuzyiba kuti tiitwakacita cibi citalekelelwi?

¹⁸ Akaambo kakuti tatuyandi kucita cibi citakonzyi kulekelelwa, tweelede kuyeeya nzyaakaamba Paulo kujatikizya kutanyemya muuya. Ino kuti naa twacita cibi cipati? Ikuti naa tweempwa, twagwasyigwa abaalu alimwi Jehova watulekelela, ikweempwa kwesu kuya kutondezya kuti tiitwalubizyila muuya uusalala. Alimwi akaambo kakugwasyigwa a Leza, inga tatukonzyi kuunyemya muuya uusalala munzila iili yoonse.

19, 20. (a) Ino nzyintu nzi nzyotuteelede kucita? (b) Ino ncinzi ncotweelede kucita?

¹⁹ Kwiinda mukubelesya muuya wakwe uusalala, Leza upa kuti bantu bakwe kabamvwana, kabakkomana alimwi kabakamantana. (Int. 133:1-3) Aboobo, tutanikuunyemyi muuya uusalala kwiinda mukuvwiya naa kwaamba zyintu zitondezya kuti tatubapi bulemu aabo beendelezya. (Inc. 20:28; Jud. 8) Muciindi cakucita boobo, tweelede kukamantana akulemekana mumbungano. Masimpe, tatweelede kubaandaanya bantu ba Leza kwiinda mukupanga tubunga mumbungano. Paulo wakalemba kuti: “Ndamukumbila, nubakwesu, muzina lya-Mwami Jesu Kristo, kuti mwaambe cintu comwe, kutabi mipampo mipampo akati kanu. Amube alukamantano lwamoyo omwe alwamiyeeyo yomwe.”—1 Kor. 1:10.

²⁰ Jehova ulilibambide alimwi ulakonzya kutugwasya kuti tutaunyemyi muuya wakwe. Katuzumanana kuupailila muuya uusalala akucita zyintu zikonzya kutupa kuti tutaunyemyi. Katuzumanana ‘kubyala zyintu zyamuuya,’ akulomba kuti kautusololela lyoonse.

Ino Inga Mwaingula Buti?

• Ino caamba nzi ikunyemya muuya wa Leza?

• Ino mbuti muntu uulyaabide kuli Jehova mbwakonzya kuunyemya muuya uusalala?

• Ino mbuti mbututakonzyi kuunyemya muuya uusalala?

[Mibuzyo yaciiyo]

[Cifwanikiso icili apeeji 30]

Amutubambe twaambo cakufwambaana

[Cifwanikiso icili apeeji 31]

Ino mucelo nzi uutondezya mbomwaambaula?