Nobakwesu—Kamubeleka Canguzu Kutegwa Mweelele

“Oyo uubyala zintu zyamuuya ulatebula buumi butamani buzwa ku-Muuya.”—GAL. 6:8.

1, 2. Ino mbuti lugwalo lwa Matayo 9:37, 38 mboluli mukuzuzikizyigwa, alimwi ino eeci cipa kuti kuyandike nzi mumbungano?

IZYINTU nzyomubona zicitika mazuba aano zinakuyeeyegwa lyoonse. Mulimo ngwaakaamba Jesu Kristo ulibindide alimwi ulabelekwa cakufwambaana. Jesu wakaamba kuti: “Kutebula kwavula, batebuzi bacea. Nkaambo kaako amukumbile mwami uuli amuunda kuti atume batebuzi kukutebula kwakwe.” (Mt. 9:37, 38) Jehova Leza ulayiingula mipailo iili boobu munzila iitayeeyelwi. Mumwaka wamulimo wa 2009, mweelwe wambungano zya Bakamboni ba Jehova nyika yoonse mboizulwa zyayungizyigwa ambungano zili 2,031, kutegwa mweelwe usike kumbungano zili 105,298. Mweelwe waakati-kati wabantu uusika ku 757 balabbapatizyigwa abuzuba.

² Ooku kuyungizyigwa kwamweelwe kupa kuti kuyandike bakwesu beelela kutegwa kabayiisya akweembela mbungano. (Ef. 4:11) Kwaciindi cili mbocibede, Jehova walikubelesya basankwa beelela kutegwa kabasanina mbelele alimwi ulikanzide kuzumanana. Businsimi bulembedwe ku Mika 5:5 butwaambila kuti kumazuba aamamanino, bantu ba Jehova baya kuba “[a]beembezi bali musanu ababili abeendelezi bali musanu abatatu,” ikwaamba mweelwe mupati wabasankwa beelela kusololela.

3. Amupandulule ncocaamba ‘kubyala zyintu zyamuuya.’

³ Ikuti kamuli Kamboni wa Jehova imusankwa uubbapatizyidwe, ino ncinzi cikonzya kumugwasya kuti mweelele kuba amikuli mumbungano? Iciyandika kapati ncakuti mweelede ‘kubyala zyintu zyakumuuya.’ (Gal. 6:8) Ikucita boobu kubikkilizya kupona munzila iikonzya kupa kuti muuya uusalala wa Leza kaubeleka kabotu mubuumi bwenu. Amubone kuti ‘tamubyali zyintu zyanyama.’ Tamweelede kulekela zyintu mbuli kuba azyintu ziyandika mubuumi, kulyookezya akulikondelezya kuti zimulesye kubelekela Leza. Boonse Banakristo beelede ‘kubyala zyintu zyamuuya,’ mukuya kwaciindi basankwa balakonzya kweelela kupegwa milimo mumbungano. Akaambo kakuti bakutausi abaalu balayandika kapati aano mazuba, iciiyo eeci calembelwa ikapati Banakristo basankwa. Aboobo nobakwesu twamulomba kuti mucibikkile maano ciiyo eeci.

Kamubeleka Kutegwa Mweelele Kucita Mulimo Mubotu

4, 5. (a) Ino basankwa babbapatizyidwe baambilwa kuti beelele kuba amilimo iili buti mumbungano? (b) Ino mbuti muntu mbwakonzya kweelela kuba mwaalu naa mukutausi?

⁴ Musankwa Munakristo takonzyi kuba buyo acoolwe cakuba mwaalu. Weelede kubeleka kutegwa ayelele kucita “mulimo mubotu.” (1 Tim. 3:1) Eeci, cibikkilizya kubelekela basyominyina kwiinda mukubagwasya camoyo woonse muzyintu nzibayandika. (Amubale Isaya 32:1, 2.) Musankwa uuyanda kuba mwaalu naa mukutausi akaambo kakuyanda kubelekela bantu ucita kabotu.

 ⁵ Muntu ulakonzya kweelela kuba mukutausi naa mwaalu kwiinda mukusika azyeelelo iziyandika mu Magwalo. (1 Tim. 3:1-10, 12, 13; Tit. 1:5-9) Kuti kamulyaabide amulibuzye kuti: ‘Sena ndilaakutola lubazu mumulimo wakukambauka alimwi sena ndilabagwasya bamwi kucita oobo? Sena ndilabakulwaizya bakombima kwiinda mukubabikkila maano? Sena bantu balindizyi kuti ndili musungu mukwiiya Jwi lya Leza? Sena ndilaingula kabotu kumiswaangano? Sena ndilaibeleka kabotu milimo njobandipa baalu?’ (2 Tim. 4:5) Imibuzyo iili boobu ilayandika kapati.

6. Ino ncinzi cipati cikonzya kupa kuti muntu ayelele kupegwa milimo mumbungano?

⁶ Nzila imbi mbomukonzya kweelela kupegwa milimo mumbungano “[njakuyumisigwa] canguzu mubuntu bwanu bwamumoyo” kwiinda mumuuya wa Leza. (Ef. 3:16) Muntu tavwootelwi buya kutegwa abe mukutausi naa mwaalu mumbungano ya Bunakristo. Eeci coolwe cilaboola akaambo kakukomena kumuuya. Ino mbuti muntu mbwakonzya kukomena kumuuya? Mulakonzya kucita oobo kwiinda mukuzumanana ‘kweenda mumuuya’ akutondezya micelo yamuuya ooyo. (Gal. 5:16, 22, 23) Mbomuya butondezya kuti mucita kabotu kumuuya akuti mulakonzya kupegwa milimo mumbungano alimwi anomutobela zyintu nzimulaigwa, ‘bantu boonse balazibona nzyomucita.’—1 Tim. 4:15.

Ikulyaaba Kulayandika

7. Ino kubelekela bantu kubikkilizya nzi?

⁷ Kubelekela bantu kuyandika kubeleka canguzu alimwi akulyaaba kapati. Akaambo kakuti baalu Banakristo mbeembezi bakumuuya, imapenzi aabutanga alabajatikizya kapati. Amubone milimo yabweembezi mboyakamujatikizya mwaapostolo Paulo. Wakaambila basyominyina baku Korinto kuti: “Ndakamulembela cakupenga loko acakuciswa mumoyo amisozi minji, nkabela oku teekwakeensi kwakumufwisya buusu, pe, kwakali  kwakumuzibya luyando lupati ndunjisi kulindinywe.” (2 Kor. 2:4) Cakutadooneka, Paulo wakali kubeleka amoyo woonse.

8, 9. Amwaambe zikozyanyo zyamu Bbaibbele izitondezya kuti basankwa bamwi bakali kubelekela beenzinyina.

⁸ Ikulyaaba kwali kuyandika kapati lyoonse kubasankwa ibabelekela bantu ba Jehova. Mucikozyanyo, tatukonzyi kuyeeyela Nowa kuti kaambila banamukwasyi kuti: ‘Amundaambile mwamanizya kuyaka bwato kutegwa ndiboole.’ Musa tanaakabaambila bana Israyeli ku Egepita kuti: ‘Ndiya kumujana ku Lwizi Lusalala. Mulabona mbomutaayende.’ Joshua tanaakaamba kuti: Mundaambile bwawa bwaanda bwa Jeriko.’ Awalo Isaya tanaakatondeka muntu umbi kuti: ‘Nguulya kuya! Kamumutuma.’—Is. 6:8.

⁹ Icikozyanyo cipati camuntu iwakazumina kuti muuya wa Leza umugwasye ngu Jesu Kristo. Wakazumina kubeleka mulimo Wakubanununa bantu. (Joh. 3:16) Sena cikozyanyo ca Jesu cakulyaaba tacikonzyi kutupa kuti andiswe tulyaabe kubelekela bamwi? Mwaalu umwi iwabeleka ciindi cilamfwu wakaamba mbwalimvwa kujatikizya butanga kuti: “Majwi Jesu ngaakaambila Petro aakuti, embela mbelele zyangu, akandikkala kumoyo. Kwamyaka minji yainda, ndabona kuti ikubelesya buyo majwi mabotu masyoonto naa ikubafwida lubomba bantu kulakonzya kubakulwaizya. Mulimo wakweembela nguundikkomanisya kapati.”—Joh. 21:16.

10. Ino ncinzi cikonzya kubapa kuti Banakristo basankwa kabaiya cikozyanyo ca Jesu cakugwasya bamwi?

¹⁰ Caboola kubutanga bwa Leza, ibasankwa balyaabide mumbungano bayanda kwiiya Jesu wakaamba kuti: “Ndime enti kamulemunune.” (Mt. 11:28) Ilusyomo muli Leza akuyanda mbungano kubapa kuti basankwa Banakristo kababeleka kutegwa beelele kucita mulimo mubotu, kutali kuyeeya kuti balapenzyegwa naa mulimo mupati. Ino mbuti kuti muntu katayandi kupegwa mulimo mumbungano? Sena mukwesu inga wayanda kubeleka mumbungano?

Amube Aluyandisyisyo Lwakubeleka

11. Ino mbuti muntu mbwakonzya kuba aluyandisyisyo lwakubelekela bantu?

¹¹ Ikuti kutalisyoma kwamulesya kuti mweelele kubeleka mulimo mulakonzya kulomba muuya uusalala kuti umugwasye. (Lk.11:13) Muuya wa Jehova uyakumugwasya kuti kamutalibiliki mumakani aaya. Leza nguupa muntu kuti abe aluyandisyisyo lwakubeleka akaambo kakuti muuya wa Jehova nguukulwaizya mukwesu kuti ayelele kuba mukutausi naa mwaalu akumupa nguzu zyakumubelekela. (Flp. 2:13; 4:13) Aboobo, cileelela kumulomba Jehova kuti atugwasye kutegwa tube aluyandisyisyo lwakucita milimo yakwe.—Amubale Intembauzyo 25:4, 5.

12. Ino mbuti muntu mbwakonzya kuba musongo kutegwa akonzye kwiibeleka milimo njapedwe?

¹² Akaambo kakuyeeya kuti ikulanganya butanga kulakonzya kumumanina ciindi, Imunakristo ulakonzya kuyeeya kuti atabi buyo mwaalu naa mukutausi. Naa ulakonzya kulitenga kuti takonzyi kwiibeleka kabotu milimo akaambo kakubula busongo. Ikuti naa cili boobu, ndiza ulakonzya kuba abusongo kwiinda mukubala Jwi lya Leza amabbuku aagwasyilizya kuzyiba Bbaibbele. Ulakonzya kulibuzya kuti: ‘Sena ndilaakujana ciindi cakubala Bbaibbele akupaila kutegwa ndibe musongo?’ Sikwiiya Jakobo wakalemba kuti: “Na nkwali akati kanu uubula busongo, akumbile kuli-Leza, uubaabila boonse cabuuya acakutatongauka, nkabela ulabupegwa.” (Jak. 1:5) Sena mulaasyoma majwi aaya? Naakali kwiingula mupailo wa Solomoni, Leza wakamupa “moyo wabusongo uucenjede” iwakali kumugwasya kuzyiba cibotu acibi naakali kubeteka. (1 Bam. 3:7-14) Masimpe ngakuti, makani aa Solomoni akali libedelede. Nokuba boobo, tulakonzya kusyoma kuti Leza uyakubapa busongo basankwa aaba ibapegwa milimo eeyi yamumbungano kutegwa bazyeembele kabotu mbelele zyakwe.—Tus. 2:6.

13, 14. (a) Amupandulule mbwaakacita Paulo akaambo kakuti Jesu wakali kumuyanda. (b) Ino mbuti Kristo mbwatuyanda mbokukonzya kutujatikizya?

 ¹³ Cintu acimbi cikonzya kumupa kuyanda kubabelekela bantu nkuyeeya zyintu Jehova a Mwanaakwe nzyobakatucitila. Mucikozyanyo, atubone 2 Ba-Korinto 5:14, 15 ncoyaamba. (Amubale.) Ino mbuti “kuyanda Kristo [mb]okutusinikizya.” Ikuzyiba Jesu mbwaakali kutuyanda naakatufwida kweelana akuyanda kwa Leza, cilatukulwaizya kapati. Akaambo kakuti Kristo wakali kumuyanda Paulo, eeci cakamupa kuti kazicita kabotu zyintu. Cakamupa kuti kacita zyintu cakutaliyanda alimwi akumugwasya kuti abelekele Leza abantunyina ibali mumbungano abaabo batali mumbungano.

¹⁴ Kuzinzibala kuyeeya mbwabayanda bantu Kristo citupa kuti katumulumba. Akaambo kaceeci, tulabona kuti tatweelede ‘kubyala zyintu zyanyama’ kwiinda mukuliyanda akulikkomanisya. Muciindi cakucita boobo, tweelede kucinca bukkale bwesu kutegwa tubeleke mulimo ngwaakatupa Leza. Tulababelekela bakwesu akaambo kakubayanda. (Amubale Ba-Galatiya 5:13.) Ikuti lyoonse katuli bazike ibabelekela babelesi ba Jehova balyaabide, cinakutupa kubalemeka. Masimpe, tatukaiyi muuya wa Saatani wakupa bamwi milandu.—Ciy. 12:10.

Mbobakonzya Kugwasya Banamukwasyi

15, 16. Ino ncinzi banamukwasyi ncobeelede kucita kutegwa muntu ayelele kuba mukutausi naa mwaalu?

¹⁵ Ikuti mukwesu kakwete alimwi kajisi bana, izyintu zicitika mumukwasyi wakwe zilalangwa nibalanga-langa naa uleelela ikuba mukutausi naa mwaalu. Masimpe, mbobacita kumuuya azicitika mumukwasyi zilalangwa nasalwa. Eeci citondezya mbociyandika kapati kubanamukwasyi ikugwasya balumi abausyi bana nobayanda kutalika kubelekela mbungano kabali bakutausi naa baalu.—Amubale 1 Timoteo 3:4, 5, 12.

¹⁶ Jehova ulakkomana banamukwasyi Banakristu nobabelekela antoomwe. (Ef. 3:14, 15) Kutegwa kailanganya kabotu milimo yambungano akubalanganya “kabotu boonse bamuŋanda yakwe,” mutwe wamukwasyi weelede kweelanya. Aboobo, cilayandika kuti imwaalu naa mukutausi kabala Bbaibbele abakaintu bakwe abana kategwa boonse kabagwasyigwa ansondo Nobakomba Mumukwasyi. Lyoonse weelede kutola lubazu mumulimo wakukambauka ambabo. Akaambo kakaambo nkamunya, banamukwasyi beelede kubelekela aantoomwe amutwe wamukwasyi.

Sena Mulakonzya Kubeleka Alimwi?

17, 18. (a) Ikuti naa mukwesu kataceeleli kuba mukutausi naa mwaalu, ino ncinzi ncayelede kucita? (b) Ino mbuti mbwayelede kuzilanga zyintu imukwesu wakali mwaalu naa mukutausi?

¹⁷ Ndiza mwakali baalu naa bakutausi pele lino mwakaleka. Mulamuyanda Jehova alimwi muli masimpe kuti ucimulanganya. (1 Pet. 5:6, 7) Sena kuli nomwakagwasyigwa? Mweelede kuzumina kuti mwakalubizya alimwi kwiinda mukugwasyigwa a Leza amubelekele waawo mpomwakaambilwa. Mutanikunyemi pele amulicesye. Imwaalu wakabeleka myaka minji, pele iwakacilekede wakaamba kuti: “Ndakazumanana kujanika kumiswaangano, kuunka mubukambausi,  kubala Bbaibbele mbumunya mbundakali kucita nindakacili mwaalu. Ndakaiya kulicesya akaambo kakuti ndakali kuyeeya kuti mumwaka omwe naa yobilo ndilapilusyigwa abwaalu, pele nikwakainda myaka iili ciloba nindakapilusyigwa abwaalu. Ciindi eeco akaambo kakukulwaizyigwa kuzumanana kucita kabotu cakandigwasya kapati.”

¹⁸ Ikuti kamuli muciimo cili boobu mutatyompwi. Kamubona Jehova mbwamugwasya mumuunda alimwi amukwasyi wenu. Amubagwasye kumuuya banamukwasyi, amubaswaye baciswa alimwi amubakulwaizye aabo batyompedwe. Kwiinda zyoonse, kamucibona kuti ncoolwe kutembaula Leza akukambauka makani mabotu aa Bwami bwa Leza kamuli Bakamboni ba Jehova. *—Int. 145:1, 2; Is. 43:10-12.

Amuzilange Alimwi Zyintu

19, 20. (a) Ino ncinzi ncobeelede kucita basankwa boonse babbapatizyidwe? (b) Ino ncinzi ciya kubandikwa mucibalo citobela?

¹⁹ Baalu abakutausi balayandika kapati aano mazuba kwiinda kaindi. Aboobo, tulomba basankwa boonse babbapatizyidwe kuti babulange alimwi bukkale bwabo akulibuzya kuti: ‘Ino ncinzi cindipa kuti nditabi mukutausi naa mwaalu?’ Amulombe muuya wa Leza kuti umugwasye kuba amuzeezo mubotu mukaambo aaka kayandika kapati.

²⁰ Boonse mumbungano baya kugwasyigwa akaambo kakulyaaba kwabasyominyina. Ikuti katucitila bamwi lubomba, tulakkomana akaambo kakubabelekela akubyala zyintu zyamuuya. Mbubwenya mbuli cibalo citobela mbocitiitondezye, tatweelede kutyompya muuya uusalala wa Leza. Ino mbuti mbotukonzya kucita oobu?

Bupanduluzi buyungizidwe

Ino Inga Mwaingula Buti?

• Ino businsimi bulembedwe ku Mika 5:5 butusyomezya nzi?

• Ino kulyaaba kubikkilizya nzi?

• Ino mbuti muntu mbwakonzya kuba aluyandisyisyo lwakubelekela bamwi?

• Ino mbuti mbociyandika kuti banamukwasyi kababelekela antoomwe ikuti muntu ayelele kuba mukutausi naa mwaalu?

[Mibuzyo yaciiyo]

[Zifwanikiso izili apeeji 25]

Ino ncinzi ncomukonzya kucita kutegwa mweelele kuba bakutausi naa baalu?