Kukamantana Akaambo Kaluyando—Lipooti ya Muswaangano Wamwaka

BANTU boonse bakajanika Kuŋanda Yakucitila Miswaangano Mipati ya Bakamboni ba Jehova ku Dolopo ya Jersey mu New Jersey ku U.S.A. bakali kkomene. Mu October 3, 2009 mafwumofwumo, bantu bainda ku 5,000 bakajanika kumuswaangano wamwaka waba Watch Tower Bible and Tract Society of Pennsylvania wanamba 125. Zyuulu-zyuulu zyabantu bamumaanda aa Bbeteli otatwe aali mu United States abaku Mutabi waku Canada, bakali kuswiilila akweebelela acipeku-cipeku. Boonse bakali kuswiilila kumuswaangano ooyu wamawoola otatwe bakali 13,235.

Ba Geoffrey Jackson ibamu Kabunga Keendelezya mbibakali basicuuno. Bakautalika muswaangano kwiinda mukwiita baimbi baamutabi balo ibakaimba nyimbo kuzwa mubbuku lipya. Ibakali kweendelezya baimbi mba David Splane abalo ibamu Kabunga Keendelezya alimwi bakaamba kwiimba mbokuyandika kapati mubukombi bwakasimpe. Baimbi bakasaanguna kwiimba, kumane bantu boonse ibakali amuswaangano bakatambwa kuti baimbe nyimbo zipya zyotatwe antoomwe abaimbi. Kubelesya baimbi kwakali buyo kwaamuswaangano ooyu takuli kuti mbocinakucitika aamiswaangano yambungano, yabbazu naa yacooko.

Malipooti Kuzwa Kumitabi Imbi

Ibamuma Kkomiti Aamitabi iili yosanwe bakapa malipooti. Ba Kenneth Little bakaamba kuti Mutabi waku Canada ino-ino uyakutalika kusimba mamagazini aaku United States aaku Canada, calo ciya kupa kuti mulimo wakusimba ukayungizyigwe kumutabi ooyu. Kutegwa mulimo ooyu ucitwe, imuncini wakusimbya mupya iwakaulwa, unakubeleka mawoola asika ku 16 abuzuba.

Ba Reiner Thompson bakapa lipooti yambuweenda mulimo wakukambauka ku Dominican Republic alimwi ba Albert Olih bakaamba mulimo wesu mboweenda ku Nigeria. Ba Emile Kritzinger baku Mozambique bakaamba kuti Bakamboni ba Jehova bakazumizyigwa mu 1992 nibakamana kupenzyegwa kwamyaka minji. Muzisi eezyi zyoonse zyotatwe, imazuba aano mweelwe wabasikumwaya waya ambele. Ba Viv Mouritz ibakumutabi waku Australia bakaamba mulimo mbuuyaambele ku East Timor, kwalo ikulanganyizyigwa abakwesu baku Australia.

Imakkomiti aa Kabunga Keendelezya

Mu 1976, imilimo yaba Kamboni ba Jehova yoonse yakatalika kulanganyizyigwa amakkomiti aali cisambomwe a Kabunga Keendelezya. Mukuya kwaciindi, ibambelele zimwi bakasalwa kuti bagwasilizye. Mazuba aano, ibali 23 mbabacita mulimo ooyu. Ibali cisambomwe bakabuzyigwa-buzyigwa. Boonse aantoomwe balikubeleka mulimo waciindi coonse kwamyaka iili 341—mweelwe waakati-kati uusika kumyaka iili 57 aumwi.

Ba Don Adams, ibakaunka ku Mutabi mu 1943, bakaamba kuti Kkomiti Yabeendelezi ibambidwe abeendelezi bamumakkomiti osanwe, calo cipa kuti makkomiti oonse kaabeleka kabotu. Ikkomiti eeyi ilanganya twaambo tuyandika kulanganya cakufwambaana, kupenzyegwa, twaambo twamunkuta, ntenda alimwi atwaambo tumwi tujatikizya Bakamboni ba Jehova nyika yoonse.

Ba Dan Molchan bakaamba mulimo ngobacita bamu Kkomiti Iilanganya Babelesi yalo  iilanganya bukkale bwakumuuya abwakumubili bwabantu ibali 19,851 bamukwasyi wa Bbeteli nyika yoonse. Ba David Sinclair bakaamba Kkomiti Iilanganya Zyakumwaya mboilanganya mulimo wakuula zyintu zibelesyegwa mumitabi yoonse. Kumane ba Robert Wallen ibabeleka mu Bbeteli myaka iitandila ku 60, bakaamba Kkomiti Yamulimo mboilanganya mulimo wakukambauka alimwi amiswaangano yambungano yabantu ba Jehova. Ba William Malenfant bakaamba mulimo mupati ngobacita bamu Kkomiti Iilanganya Ziyiisyigwa kutegwa bacite bubambe bwamuswaangano wacooko. Kumamanino, ba John Wischuk bakaamba Kkomiti Iilanganya Zilembwa mboilanganya mulimo wakulibambila akulemba mabbuku eesu. *

Lugwalo Lwamwaka wa 2010 Lwaamba Luyando

Imakani otatwe aatobela akakananwa abamu Kabunga Keendelezya. Ba Gerrit Lösch bakatalika makani aabo amubuzyo wakuti: “Sena inga mwayanda kuti kabamuyanda bantu?” Bakaamba kuti muntu uuli woonse uyanda kuti kabamuyanda bantu. Tulapona akaambo kakuti Jehova naakatulenga wakatuyanda. Icipati ncotukambaukila akuyiisya nkumuyanda Jehova.

Ikuyanda bantu kuli boobu kupa kuti katubayanda abasinkondoma kutali buyo beenzuma. (Mt. 5:43-45) Ibakajanika kumuswaangano ooyu bakakulwaizigwa kuyeeya zyakamucitikila Jesu akaambo kandiswe, wakaumwa, wakafwubaazyigwa, alimwi bakamuswida mate. Nokuba kuti zyoonse eezyi zyakamucitikila, wakabapailila basikalumamba ibakamujaya. Sena eeci tacitupi kuti katumuyanda kapati? Amane mukwesu Lösch wakaambilizya lugwalo lwamwaka lwamu 2010 luli ku 1 Ba-Korinto 13:7, 8, ilwaamba kuti: ‘Luyando lulijisi camba mumapenzi oonse. Luyando talweeli.’ Tulijisi bulangizi bwakupona kukabe alimwi akumvwana abantu kukabe kutamani.

Sena Amumanina Mafwuta?

Ba Samuel Herd bakabelesya cikozyanyo nibakatalika makani aabo. Amweezyeezye kuti mweenzinyoko wamutoleezya mulweendo lulampa makkilomita aasika ku 50. Mbomwatantila buyo mumootokala, mwabona kuti imafwuta taako. Mwamwaambila mweenzinyoko kuti mafwuta amana. Wamwaambila kuti utapengi musa, nkaambo kucili galoni mutanki. Kakutanainda ciindi mafwuta amana mumootokala. Sena inga cabota kuti mwazumanana kweenda kamujisi buyo mafwuta masyoonto? Elyo kaka inga cabota kuti kamujisi mafwuta manji mutanki! Kubelesya maambila mbali, tuyandika kuba amafuta manji mutanki, aaya mafwuta nduzibo lwa Jehova.

Aboobo lyoonse tuyandika kubikka mafwuta. Kuli nzila zyone mbotukonzya kucita oobo. Cakusaanguna, nkwiiya Bbaibbele, ikulizyiba kabotu  kwiinda mukulibala abuzuba. Muciindi cakubala buyo mabala, tweelede kucimvwa ncotubala. Cabili, tweelede kucibelesya kabotu ciindi ca Kukomba Mumukwasyi. Sena ansondo tulalizuzya tanki naa tubikka buyo mafwuta masyoonto? Catatu, tweelede kujanika kumiswaangano yambungano. Cane, tweelede kuzinzibala kuyeeya nzyatuyiisya Jehova. Lugwalo lwa Intembauzyo 143:5 lwaamba kuti: “Ndayeeya mazuba aakale, ndaibaluka milimo yako yoonse.”

“Baluleme Bazoobala”

Ba John Barr bakapa makani aatatu alimwi aamamanino, mwalo mobakapandulula cikozyanyo ca Jesu camaila ansaku. (Mt. 13:24-30, 38, 43) Icikozyanyo eeci caamba “kutebula” aciindi “bana ba-Bwami” nibabunganyizigwa alimwi ansaku nizyaandaanyizigwa kutegwa zyuumpwe.

Mukwesu Barr wakacisalazya kuti ooku kubunganya takukazumanani kukabe kutamani. Bakali kwaamba lugwalo lwa Matayo 24:34 ilwaamba kuti: “Ncobeni ndamwaambila kuti izyalani elino talikooyoomana mane zintu ezi zyoonse zizoobe.” Bakakabala ziindi zyobilo kaambo kakuti: “Kuboneka kuti Jesu wakali kwaamba kuti bananike ibakali kupona ciindi zitondezyo nizyakatalika kulibonya mu 1914 baya kujanana abananike ibaya kubona mapenzi mapati aakutalika.” Tatukonzyi kuzyiba naa nciindi cilamfwu buti ncobaya kupona ‘bazyalani eeyi,’ pele ibikkilizya bantu bamisela yobilo iindene-indene ibakali kupona antoomwe aciindi cimwi. Nokuba kuti bananike baliindene myaka, aaya makamu obilo akali kupona aciindi comwe kuciindi camamanino. Eelyo kaka cilakkomanisya kuzyiba kuti ibananike ibacili basyoonto ibakapona abananike bapati aabo ibakabona citondezyo nocakatalika mu 1914 tabakamaniini kufwa kaatana talika mapenzi mapati!

“Bana ba-Bwami” balangila bulumbu bwakujulu, pele toonse tweelede kuzumanana kusyomeka lyoonse kusikila kumamanino. Eelyo kaka eeci ncoolwe cakubona “nsaku” nozibunganyizigwa!

Nibakamana kwiimba lwiimbo lwamamanino, imukwesu Theodore Jaracz iwamu Kabunga Keendelezya wakapaila mupailo wamamanino. Eelyo kaka bubambe oobu bwamuswaangano wamwaka bwakali bubotu kapati!

Bupanduluzi buyungizidwe

Kabbokesi kali apeeji 5]

CIKOLO CABAALU

Kumuswaangano wamwaka, ba Anthony Morris ibamu Kabunga Keendelezya, bakaambilizya kuti kunakuli bubambe bwakuyiisya baalu bambungano. Icikolo cabaalu ku United States cakatalika kumatalikilo kwa 2008 ku Patterson, New York. Ibakali mucikolo canamba 72 bakamanizya ino-ino alimwi baalu bakainda kale mucikolo eeci balasika ku 6,720. Zicili zinji ziyandika kucitwa. Mu United States molikke, kuli baalu bainda ku 86,000. Aboobo, ba Kabunga Keendelezya bakazumizya kuti kube cikolo ku Brooklyn, New York, kutalikila mu December 7, 2009.

Mumyezi yobilo balangizi beendeenda bone baya kuyiisigwa ku Patterson mulimo wakuyiisya. Aaba baakumanizya kuyiisyigwa baya kutolwa ku Brooklyn kuti bakatalike kuyiisya baalu, mpoonya balangizi beendeenda bambi bone baya kuyiisyigwa ku Patterson mulimo wakuyiisya baalu. Baakumanizya, baya kutalika kuyiisya baalu ku Brooklyn, kumane ibalangizi bone bakasaanguna kuyiisyigwa baya kutumwa kwaakuyiisyila ku Maanda Aakucitila Miswaangano Mipati amu Maanda aa Bwami. Kumane, baya kuyiisya bambi bone kutegwa basikuyiisya bakasike 12 ibanakuyiisya kuzikolo zili cisambomwe ansondo mu Chingisi ku United States. Basikuyiisya bamwi bone baya kuyiisyigwa kutegwa kabayiisya mu Chisipanisyi. Cikolo eeci tacikanjilili mubusena bwa Cikolo Camulimo wa Bwami cicitwa mazuba aano, pele ciya kugwasya baalu kuti bazumanane kuyaambele kumuuya. Imitabi nyika yoonse iyakutalika kuba azikolo zyamusyobo ooyu mu Maanda Aakucitila Miswaangano Mipati amu Maanda aa Bwami mumwaka wamulimo wa 2011.

[Zifwanikiso izili apeeji 4]

Imuswaangano wamwaka wakajalulwa kwiinda mukwiimba nyimbo kuzwa mubbuku lyanyimbo lipya lyakuti, “Amumwiimbile Jehova”