Kamutola Lubazu Mumulimo Mupati Wakutebula Kwakumuuya

“Amupangike myoyo yanu lyoonse kumilimo ya-Mwami.”—1 KOR. 15:58.

1. Ino Jesu wakabatamba kuti bacite nzi basikwiiya bakwe?

NAAKALI kweenda mumunzi wa Samariya kumamanino aa 30 C.E., Jesu wakalyookezya kumugoti munsi-munsi adolopo lya Sukari. Naakali kokuya wakabaambila basikwiiya bakwe kuti: “Amuvunune meso aanu, mulange mumyuunda, yayuma kale kuti itebulwe.” (Joh. 4:35) Jesu tanaakali kwaamba kutebula kwini, pele wakali kwaamba kuyobolola bantu babombemyoyo ibakali kuzooba basikumutobela. Wakali kutamba basikwiiya bakwe kuti batole lubazu mumulimo wakutebula. Ooyu mulimo wakali mupati pele bakeelede kuucita muciindi cisyoonto buyo.

2, 3. (a) Ino ncinzi citondezya kuti tukkala kuciindi cakutebula? (b) Ino ncinzi ncotutiibandike mucibalo eeci?

² Ncaakaamba Jesu kujatikizya kutebula cili aabupanduluzi bulibedelede kuli ndiswe mazuba aano. Tupona kuciindi muunda nouyandika kutebulwa. Amwaka, bantu banji balazumina kwiiya kasimpe kapa buumi, alimwi zyuulu zyabasikwiiya bapya balabbapatizyigwa. Tujisi coolwe cakutola lubazu mumulimo wakutebula mupati, weendelezyegwa a Mwami uuli amuunda, Jehova Leza. Sena muli basungu mumulimo ooyu wakutebula?—1 Kor. 15:58.

³ Myaka iili yotatwe acisela Jesu, wakabayiisya basikwiiya bakwe mulimo wakutebula. Cibalo eeci cilabandika ziiyo zyotatwe akati kaziiyo zinji Jesu nzyaakabayiisya basikwiiya bakwe. Ciiyo acimwi citondezya bube bumwi buyandika kapati notusoleka kubeleka mulimo wamazuba aano wakuyobolola basikwiiya. Atubulange-lange bube oobu bomwe aciindi comwe.

Kulibombya Kulayandika

4. Ino mbuti Jesu mbwaakatondezya kuti kulicesya kulayandika?

⁴ Amuyeeye cakacitika: Basikwiiya bakali kukazyanya kuyanda kuzyiba wakali mupati akati kabo. Kabalibonya kuti bacinyemede, Jesu wakaita mwana akumwiimika akati kabo. Kamulangide mwana, waamba kuti: “Mwataakusanduka akuba mbuli twana, tamukooyoonjila pe mu-Bwami bwakujulu.” (Amubale Matayo 18:1-4.) Muciindi cakuyeeya mbuli mbobayeeya bantu banyika, ikulanga muntu kweelana anguzu, lubono acuuno ncajisi, basikwiiya bakali kuyandika kuzyiba kuti, kutegwa babe bapati beelede kulicesya. Jehova wakali kukonzya kubalongezya akubabelesya ikuti naa balicesya.

5, 6. Ino nkaambo nzi ncomweelede kulicesya kutegwa mubeleke mulimo wakutebula? Amupe cikozyanyo.

⁵ Kusikila sunu, banji munyika bayanda kuti kabali anguzu, lubono acuuno. Akaambo kaceeci, bajisi buyo ciindi cisyoonto alimwi bamwi tabajisi ciindi cili coonse cakucita zyintu zyakumuuya. (Mt. 13:22) Mukwiimpana, bantu ba Jehova balikkomene kulicesya kutegwa Mwami uuli amuunda abalongezye.—Mt. 6:24; 2 Kor. 11:7; Flp. 3:8.

⁶ Amulange cikozyanyo caba Francisco, baalu ku South America. Nibakacili bana bakacileka kwiiya kucikolo cipati akutalika bupainiya.  Baamba kuti: “Nindakali kuyanda kukwata, nindakajana mulimo ngundakali kukonzya kuvwola mali manji. Muciindi caboobo, twakasala kuubya-ubya bukkale kutegwa tuzumanane mumulimo waciindi coonse. Mukuya kwaciindi twakaba abana, alimwi mapenzi akavwula. Pele Jehova wakatugwasya kuti azwidilile makanze eesu.” Ba Francisco bamanizya akwaamba kuti: “Kunze amilimo imwi njindali kucita, kwamyaka iili 30 ndali kubeleka kandili mwaalu. Kwiina buzuba nitwakauside akaambo kakupona buumi buuba-uba.”

7. Ino mbuti mbumusoleka kubelesya lulayo luli ku Ba-Roma 12:16?

⁷ Tamweelede kulisumpula pele mweelede kulibombya kutegwa andinywe mube azilongezyo zinji mumulimo wakutebula.—Rom. 12:16; Mt. 4:19, 20; Lk. 18:28-30.

Kubeleka Canguzu Kupa Bulumbu

8, 9. (a) Mubufwaafwi, amwaambe kaano kamatalenta. (b) Ino kaano aaka mbabani kapati mbokakonzya kukulwaizya?

⁸ Bube abumbi buyandika kutegwa katutola lubazu camoyo woonse mumulimo wakutebula nkubeleka canguzu. Jesu wakaamba kaano kamatalenta kutondezya mbociyandika kubeleka canguzu. * Kaano aaka kaamba muntu wakali kuya kucisi cakulamfwu wakapa zyintu zyakwe kubazike botatwe. Muzike wakusaanguna wakapegwa matalenta osanwe, wabili wakapegwa obilo, iwatatu wakapegwa lyomwe. Simalelo wabo naakaunka, bazike bobilo ‘bakaabelesya’ matalenta aabo cakufwambaana. Mukwiimpana abaaba, muzike watatu wakali “mutolo.” Wakalivwukila talenta lyakwe mubulongo. Simalelo naakapiluka wakabapa bulumbu bazike bobilo bakusaanguna kwiinda mukubabikka kuti kabalanganya “zintu zinji.” Wakamunyanga talenta njaakamupede muzike watatu akumutanda aŋanda.—Mt. 25:14-30.

⁹ Cakutadooneka, mulayanda kubaiya bazike bakabeleka canguzu bamukaano ka Jesu akubeleka camoyo woonse mumulimo wakugwasya bantu kuba basikwiiya. Ino mbuti kuti bukkale bwenu bumupa kuti kamutabeleki mbuli mbomuyanda? Ndiza penzi lyakubula mali limupa kuti kamubeleka mawoola manji kumulimo wakumubili kutegwa kamuulanganya kabotu mukwasyi wanu. Ambweni mwacembala alimwi mulaciswa-ciswa. Ikuti kacili boobo, kaano kamatalenta kalakonzya kumukulwaizya.

10. Ino simalelo wamukaano kamatalenta wakatondezya buti kuti ulababikkila maano bazike bakwe, alimwi nkaambo nzi eeci ncecimukulwaizya nywebo?

¹⁰ Amubone kuti simalelo wamukaano aaka wakalizyi muzike umwi aumwi ncaakali kukonzya kucita. Wakacitondezya eeci naakali kubapa matalenta,  nkaambo “umwi aumwi wakapegwa mbuli inguzu zyakwe.” (Mt. 25:15) Masimpe, muzike wakusaanguna wakajana mpindu mpati kwiinda muzike wabili. Nokuba boobo, simalelo wakabalumba bazike boonse bobilo akaambo kakubeleka canguzu akubaita kuti mbazike ‘babotu basyomesi’ akubapa bulumbu bweelene. (Mt. 25:21, 23) Mbubwenya buyo, Mwami uuli amuunda, Jehova Leza, ulizyi nzyotukonzya kucita mumulimo wakwe. Takonzyi kuluba milimo njomubeleka camoyo woonse alimwi uyakumulumba bweelede.—Mk. 14:3-9; amubale Luka 21:1-4.

11. Amupe cikozyanyo citondezya kuti kubeleka canguzu nokuba kuti muntu uli mumapenzi, ulakonzya kulongezyegwa kapati.

¹¹ Cikozyanyo ca Selmira mucizyi Munakristo uukkala ku Brazil, citondezya kuti kubeleka canguzu mumulimo wa Leza tacitondezyegwi aazyintu zibotu izimucitikila mubuumi. Myaka iili 20 yainda, mulumi wa Selmira bakamujaya babbi, wakamusiya abana botatwe. Mucizyi ooyu wakali kubeleka aŋanda yamuntu alimwi wakali kubeleka mawoola manji, wakali kutumwa mudolopo lyoonse kuya kuula zyintu. Nokuba kuti wakali abuyumu-yumu oobu, wakatalika bupainiya bwaciindi coonse. Akati kabana botatwe, bobilo abalo bakatalika mulimo wabupainiya. Waamba kuti: “Kwamyaka iili mbwiibede, bantu bainda ku 20 mbindakali kwiiya limwi Bbaibbele bakaba ‘bamukwasyi’ wangu. Kusikila sunu, tulamvwana kapati. Oolu ndubono lutakonzyi kuulwa amali.” Masimpe, Mwami uuli amuunda wakamuleleka Selmira akaambo kakubeleka canguzu.

12. Ino mbuti mbotukonzya kutondezya kuti tubeleka canguzu mumulimo wakukambauka?

¹² Ikuti naa zimucitikila mubuumi lino zimulesya kubeleka ciindi cilamfwu mumulimo wamumuunda, mulakonzya kucita zinji mumulimo wakutebula kwiinda mukucibelesya kabotu ciindi. Ikuti naa mwaatobela kabotu malailile aapegwa ku Muswaangano Wamulimo uucitwa nsondo ansondo, munakucita kabotu mubukambausi alimwi munakubelesya nzila zipya nomukambauka. (2 Tim. 2:15) Alimwi kuti kacikonzyeka zyintu zitayandiki kapati nzyomuyanda kucita buzuba oobo mulakonzya kuzicita buzuba bumbi naa kuzilekela limwi kutegwa kamutola lubazu lyoonse ambungano mumulimo wamuunda.—Kol. 4:5.

13. Ino ncinzi cikonzya kutugwasya kuzumanana kubeleka canguzu?

¹³ Amuzyibe kuti tulabeleka canguzu akaambo kakumuyanda Leza. (Int. 40:8) Muzike watatu waambwa mukaano ka Jesu wakali kumuyoowa simalelo wakwe akumubona kuti wakali muyumu moyo uutabikkili maano bantu. Akaambo kaceeci, muntu ooyu wakalivwukila talenta lyakwe muciindi cakulibelesya kutegwa simalelo wakwe ajane mpindu. Kutegwa tutaciti mbwaakacita muzike ooyu, tuyandika kuzumanana kumvwana a Mwami uuli amuunda, Jehova. Mweelede kujana ciindi cakwiiya akuzinzibala kuyeeya bube bwakwe—luyando, kukkazyika moyo aluse. Eeci, ciyakumukulwaizya kubeleka camoyo woonse mumulimo wakwe.—Lk. 6:45; Flp. 1:9-11.

“Amusalale”

14. Ino nzyeelelo nzi ziyandika nzyobeelede kuzuzikizya aabo bayanda kuba basikutebula?

¹⁴ Kaamba majwi aali mu Magwalo aa Cihebrayo, mwaapostolo Petro wakaamba makanze aa Leza kujatikizya babelesi bakwe baanyika naakati: “Mbuli mbwasalala oyo uwakamwiita, anywebo nobeni amusalale mukweenda kwanu koonse, nkaambo kakuti kulilembedwe kuti, Amusalale, nkaambo ndasalala mebo.” (1 Pet. 1:15, 16; Lev. 19:2; Dt. 18:13) Majwi aaya atondezya kuti basikutebula bayandika kusalala kumuuya akulilemeka. Tulakonzya kuba azyeelelo ziyandika kapati eezyi kwiinda mukubweza ntaamu kutegwa tusanzigwe munzila yamaambila mbali. Ino eeci inga cacitwa buti? Kwiinda mukugwasyigwa ajwi lya Leza lyakasimpe.

15. Ino kasimpe kali mujwi lya Leza katugwasya buti?

¹⁵ Ijwi lya Leza lilakozyanyisigwa amaanzi  aabelesyegwa kutegwa cintu cisalale. Mucikozyanyo, mwaapostolo Paulo wakalemba kuti mbungano ya Banakristo bananike ilasalala mumeso aa Leza, ilisalazidwe “amaanzi kunguzu zyajwi lyakwe . . . , [kuti] isalale akutaba akampenda nikaba komwe” mbuli mbwasalala nabwiinga wa Kristo. (Ef. 5:25-27) Awalo Jesu wakalizyaambide nguzu zyakusalazya zili mujwi lya Leza ndyaakali kwaambilizya. Naakali kwaambila basikwiiya bakwe, wakati: “Mulikokwedwe kale nkaambo kejwi ndendamwaambila.” (Joh. 15:3) Aboobo, kasimpe kali mujwi lya Leza kalijisi nguzu zikonzya kusalazya muntu kumuuya amukulilemeka. Bukombi bwesu bulakonzya kutambulwa a Leza ikuti twazumizya kasimpe kazwa mujwi lya Leza kuti katusalazye.

16. Ino mbuti mbotukonzya kusalala kumuuya amukulilemeka?

¹⁶ Aboobo, kutegwa katubeleka mumulimo wa Leza wakutebula, tulasaanguna kuzileka zyintu zyoonse zimusesemya Leza. Masimpe, kutegwa tuzumanane kweelela mumulimo wakutebula, tweelede kuba acikozyanyo cibotu mukusumpula zyeelelo zya Jehova mukulilemeka. (Amubale 1 Petro 1:14-16.) Mbubwenya mbotubikkila maano kukusalala amubili, tweelede kubona kuti lyoonse tulasalala akasimpe kazwa kuli Leza. Eeci cibikkilizya kubala Bbaibbele akujanika kumiswaangano ya Bunakristo. Alimwi caamba kusoleka canguzu kwaabelesya malailile aa Leza mubuumi bwesu. Ikuti twacita oobu tatukayungwi azisusi zyesu alimwi azyintu zisofwaazya zyamunyika eeyi. (Int. 119:9; Jak. 1:21-25) Inzya, cilakkazyika moyo kuzyiba kuti kwiinda mukugwasyigwa akasimpe kali mujwi lya Leza, tulakonzya ‘kusalazyigwa’ nomuba muzibi zipati.—1 Kor. 6:9-11.

17. Kutegwa tuzumanane kusalala, ino ndulayo nzi lwamu Bbaibbele ndotweelede kutobela?

¹⁷ Sena mulazumina kuti kasimpe kazwa kuli Leza kamusalazye mubuumi bwenu? Mucikozyanyo, ino mbuti mbomucita ikuti mwaambilwa ntenda iiliko kuzyakulikondelezya zibi zyamunyika? (Int. 101:3) Sena mulakaka kuba acilongwe citali kabotu abasicikolonyoko alimwi ambomubeleka limwi batali Bakamboni? (1 Kor. 15:33) Sena mulasoleka canguzu kutegwa mutaciti cintu cili coonse cikonzya kumusofwaazya mumeso aa Jehova? (Kol. 3:5) Sena tamutoli lubazu mumazwanga aatwaambo twacisi alimwi akutajatikizyigwa amuuya uutondezya kuyandisya cisi uujanika muzisobano zinji zyakuzundana?—Jak. 4:4.

18. Ino mbuti kusalala mukulilemeka akumuuya mbukukonzya kumugwasya kuti kamucita kabotu mumulimo wakutebula?

¹⁸ Ikuswiilila cakusyomeka mutwaambo tuli boobu kuyakutugwasya kapati. Naakali kukozyanyisya basikwiiya bakwe bananike kumitabi yamusaansa, Jesu wakati: “Mitabi yoonse yangu iitazyali micelo [Taata] wiitema, ayalo mitabi yoonse iizyala micelo wiikokweda kuti izyalisye micelo.” (Joh. 15:2) Ikuti mwasalala amaanzi aamu Bbaibbele, muyakuzyala micelo minji.

Zilongezyo Mazuba Aano Alimwi Akumbele

19. Ino basikwiiya ba Jesu bakalongezyegwa buti akaambo kakusoleka canguzu kubeleka mulimo wakutebula?

¹⁹ Basikwiiya basyomeka ibakaiya kuli Jesu bakazoopegwa nguzu kwiinda mumuuya uusalala mubuzuba bwa Pentekoste 33 C.E. kutegwa babe bakamboni “kusikila kumamanino aanyika.” (Inc. 1:8) Bamwi bakali mukabunga  keendelezya, bamwi bakali bamisyinali, bamwi bakali baalu beendeenda alimwi bamwi bakatola ambele mulimo wakukambauka makani mabotu “[ku]bantu boonse baansi ano.” (Kol. 1:23) Eelyo kaka bakalongezyegwa kapati alimwi bakabakkomanisya kapati bamwi!

20. (a) Ino nzilongezyo nzi nzyomujisi akaambo kakubeleka camoyo woonse mumulimo wakutebula kwakumuuya? (b) Ino ncinzi ncomukanzide kucita?

²⁰ Inzya, kwiinda mukulicesya, kubeleka canguzu alimwi akusumpula zyeelelo zili mu Jwi lya Leza, tulakonzya kuzumanana kutola lubazu mumulimo mupati wakutebula uuli mukucitwa mazuba aano. Bantu banji nibapenga akutyompwa akaambo kakuyanda kuvwuba akulikondelezya kuli munyika eeyi, swebo tulikkomene akukkutila. (Int. 126:6) Cipati aali zyoonse, “milimo [yesu] yamu-Mwami tiikonzyi kuba yabuyo pe.” (1 Kor. 15:58) Mwami uuli amuunda, Jehova Leza, uyakutupa bulumbu butamani akaambo ‘kamilimo yesu aluyando ndotutondezya akaambo kazyina lyakwe.’—Heb. 6:10-12.

Bupanduluzi buyungizidwe

Sena Muciyeeyede?

Nomusoleka canguzu kubeleka camoyo woonse mumulimo wakutebula . . .

• ino nkaambo nzi kulicesya ncokuyandika kapati?

• ino mbuti mbomukonzya kutalika alimwi akuzumanana kubeleka canguzu?

• ino nkaambo nzi ncociyandika kapati kuzumanana kusalala mukulilemeka alimwi akumuuya?

[Mibuzyo yaciiyo]

[Cifwanikiso icili apeeji 17]

Kulicesya kulakonzya kutugwasya kuba abuumi buuba-uba kutegwa tubikkile maano kuzyintu zya Bwami