Kulibambila Kupa Kuti Zyintu Zyeende Kabotu

SENA mulilibambide kukambauka ciindi cili coonse nomwayandika kucita oobo mucilawo canu? Bakwesu Banakristo mudolopo lya Turku lili kunkomwe yalwizi ku Finland bakacita oobo, alimwi eeci cabagwasya.

Kaindi, bakwesu baku Turku bakabona kuti bantu baku Asia baboola kudolopo eeli kutegwa bamanizye mulimo wakupanga bwato bupati. Mukuya kwaciindi, mukwesu umwi wakaizyiba ŋanda yabeenzu mobakali kukkala babelesi aaba. Alimwi wakazyiba kuti bantu aaba babwezegwa abbaasi cifwumo-fwumo kuzwa kuŋanda yabeenzu kuya nkobakali kubelekela. Mpoonya, wakaambila bakwesu bali mumbungano ya Chingisi mu Turku.

Baalu bamumbungano eeyi nibakabona kuti kuli beenzu banji, bakabikka bubambe cakufwambaana bwakukambaukila bantu aaba mulumbe wa Bwami. Munsondo mvwiki eeyo, basikumwaya bali kkumi bakaswaangana cifwumo-fwumo kuma 7 acitisyini camabbaasi. Akusaanguna, taakwe babelesi bakaboneka. Bakwesu bakalibuzya kuti: ‘Sena twamuka? Sena bakazwa mu Turku?’ Bamane, bakabona mubelesi omwe uusamide ovwolosi kaboola kuli mbabo. Mubelesi umbi wakatobela, mpoonya banji bakalibonya. Muciindi cisyoonto buyo, babelesi banji bakaswaangana acitisyini. Basikumwaya bakatalika kukambauka kabajisi mabbuku aamu Chingisi. Mukuba acoolwe, akaambo kakuti kwakainda woola lyomwe kuti babelesi boonse batante mumabbaasi, bakwesu bakabandika ababelesi banji. Mabbaasi naakaunka, babelesi aaba bakatolelezya tubbuku tuli 126 amamagazini aali 329.

Eeci cakacitika cakabakulwaizya bakwesu kuti bapilukile mvwiki yakatobela naakaswaide mulangizi wabbazu. Niyakali kuwa mvwula cifwumo-fwumo kuma 6 mulangizi wabbazu wakacita muswaangano wamulimo wamumuunda, alimwi basikumwaya bali 24 bakajanika. Bakabweza mabbuku aamumwaambo wa Tagalog akaambo kakuti bakajana kuti banji bakali kuzwa ku Philippines. Buzuba oobo, mabbaasi naakaunka kuzwa kunkomwe ya lwizi, babelesi bakatoleela mabbuku aali 7, atubbuku tuli 69 alimwi amamagazini aali 479. Amuyeeye buyo mbubakakkomene bakwesu abacizyi kuti bakaba alubazu mumulimo oyu.

Ibabelesi kabatana jokela kuzisi zyabo, bakwesu bakabaswaya ibanji mumahotela mubakali kukkala akubapandulwida mulumbe wa Bwami. Babelesi bamwi bakaamba kuti bakaswaigwa kale aba Kamboni mumasi aambi. Babelesi bakabalumba bakwesu akaambo kakubakambaukila nibakali mu Finland.

Sena mulalibambila kukambaukila bantu batalangilwi ibasika mucilawo cambungano yenu? Sena mulajana ciindi cakubandika abantu baindene-indene bazwa mumasena aambi? Ikuti kacili boobo, andinywe cilakonzya kumucitikila cakacitikila bakwesu baku Turku.

Maapu/[Cifwanikiso icili apeeji 32]

(Kutegwa mubone bwini mbwaakkede mabala, amubone bbuku lini)

FINLAND

HELSINKI

Turku