“Muuya Ulagulunganya . . . Makani Malamfu Aabulondo Bwa-leza”

“Muuya ulagulunganya makani oonse, naaba makani malamfu aabulondo bwa-Leza.”—1 KOR. 2:10.

1. Ino mulimo nzi ngoubeleka muuya uusalala ngwaakaamba Paulo kulugwalo lwa 1 Ba-Korinto 2:10, alimwi mibuzyo nzi iibuzyigwa?

EELYO kaka tulalumba akaambo kamuuya uusalala wa Jehova! Magwalo aamba muuya kuti mugwasyi, cipego, sikupa bumboni alimwi akuti uutukombelezyezya. (Joh. 14:16; Inc. 2:38; Rom. 8:16, 26, 27) Mwaapostolo Paulo wakaamba mulimo uumbi uuyandika kapati ngoubeleka muuya uusalala naakati: “Muuya ulagulunganya makani oonse, naaba makani malamfu aabulondo bwa-Leza.” (1 Kor. 2:10) Masimpe, Jehova ulaubelesya muuya uusalala kuyubununa kasimpe. Ikuti katutajisi lugwasyo oolu tatukonzyi kwaamvwisya makanze aa Jehova. (Amubale 1 Ba-Korinto 2:9-12.) Nokuba boobo, kuli mibuzyo iibuzyigwa yakuti: Ino mbuti muuya mbouyubununa “makani malamfwu aabulondo bwa-Leza”? Ino nkwiinda muli bani Jehova mwaakayubununa makani aaya mumwaanda wamyaka wakusaanguna C.E.? Ino mbuti alimwi nkwiinda muli bani mwaayubununa makani malamfwu aaya naa zyintu zisisidwe mazuba aano?

2. Ino munzila nzi zyobilo muuya uusalala mowakali kuya kubeleka?

² Jesu wakatondezya nzila zyobilo muuya uusalala mbowakali kuya kubeleka. Kakusyeede ciindi cisyoonto kuti afwe, wakaambila baapostolo bakwe kuti: “Mugwasyi, Muuya Uusalala, Taata ngwayootuma muzina lyangu, uyoomwiisya zintu zyoonse, uyoomuyeezya zyoonse nzendakamwaambila.” (Joh. 14:26) Eeci citondezya kuti muuya uusalala wakali kuya kubeleka mbuli mwiiyi alimwi asikwiibalusya. Kauli mwiiyi, wakali kuya kubagwasya Banakristo  kumvwisya zyintu nzyobatakali kukonzya kumvwisya kaindi. Kauli sikwiibalusya, wakali kuya kubagwasya kuyeeya zyintu nzyobakamvwide kale akuzitobela kabotu.

Mumwaanda Wamyaka Wakusaanguna

3. Ino majwi nzi aa Jesu aatondezya kuti “makani malamfu aabulondo bwa-Leza” ayakuyubununwa asyoonto-syoonto?

³ Jesu mwini wakabayiisya basikwiiya bakwe makani manji aakasimpe aakali mapya kuli mbabo. Nokuba boobo, bakajisi zinji zyakwiiya. Jesu wakaambila baapostolo bakwe kuti: “Ndicili amakani manji aakumwaambila, pele tamwaakonzya sunu. Nokubaboobo asika oyo Muuya wabwini, uzoomweenzya mubwini boonse.” (Joh. 16:12, 13) Eeci citondezya kuti Jesu wakaamba kuti kwiinda mumuuya uusalala, makani aasisidwe aakumuuya ayakuyubununwa asyoonto-syoonto.

4. Mubuzuba bwa Pentekoste mu 33 C.E., ino mbuti muuya uusalala mbowakabeleka mbuli mwiiyi alimwi asikwiibalusya?

⁴ Mubuzuba bwa Pentekoste mu 33 C.E., “muuya wabwini” wakatilwa ku Banakristo babalilwa ku 120 bakabungene ku Jerusalemu. Wakali kulibonya akulimvwisya kuti wasika. (Inc. 1:4, 5, 15; 2:1-4) Basikwiiya bakatalika kwaambaula mumyaambo minji “milimo mipati ya-Leza.” (Inc. 2:5-11) Lino nciindi cakuti cintu cimwi cipya ciyubununwe. Musinsimi Joeli wakalaambide kuti kuya kutilwa muuya uusalala. (Joel. 2:28-32) Bantu bakaliko bakabona kuzuzikizyigwa kwabusinsimi oobu munzila njobatakali kuyeeyela, mpoonya Petro wakabapandulwida cakali kucitika. (Amubale Incito 2:14-18.) Aboobo, muuya uusalala wakabeleka mbuli mwiiyi kumugwasya Petro kuzyiba kuti zyakabacitikila basikwiiya cakali kuzuzikizya businsimi oobu bwakaindi. Alimwi muuya wakabeleka mbuli sikwiibalusya, akaambo kakuti Petro wakazubulula bbuku lya Joeli alimwi antembauzyo zyobilo zya Davida. (Int. 16:8-11; 110:1; Inc. 2:25-28, 34, 35) Nzyobakabona akumvwa bantu aabo bakaliko akali ncobeni makani malamfwu a Leza.

5, 6. (a) Nibwakainda buzuba bwa Pentekoste 33 C.E., ino mibuzyo nzi kujatikizya cizuminano cipya yakali kuyandika kwiingulwa? (b) Ino mibuzyo eeyi yakabuzyigwa kwiinda muli bani alimwi ino mbuti mbubakatukosola twaambo?

⁵ Kwakacili twaambo tunji twakali kuyandika kusalazyigwa ku Banakristo bamumwaanda wamyaka wakusaanguna. Mucikozyanyo, kwakali mibuzyo kujatikizya cizuminano cipya icakacitika mubuzuba oobo bwa Pentekoste. Sena cizuminano eeci cipya cakali buyo cabama Juda abaabo bakasanduka kuba bama Juda? Sena Bamasi abalo bakali kuzuminwa akunanikwa amuuya uusalala? (Inc. 10:45) Sena Bamasi basankwa bakali kuyandika kusaanguna kupalulwa akutobela Mulawo wa Musa? (Inc. 15:1, 5) Eeyi mibuzyo yakali mipati. Muuya wa Jehova wakali kuyandika kutegwa uyubunune makani malamfwu aaya. Aboobo, ino wakali kuya kubelesya bani?

⁶ Bakwesu bakali kweendelezya mbibakali kutulanga-langa twaambo twakali kuyandika bupanduluzi. Petro, Paulo a Barnaba bakaliko kumuswaangano wakabunga keendelezya alimwi bakapandulula Jehova mbwaakali kubabikkila maano Bamasi batapaludwe. (Inc. 15:7-12) Nibakamana kutulanga-langa twaambo ootu kweelana a Magwalo aaci Hebrayo akugwasyigwa amuuya uusalala, bakabunga keendelezya bakasala cakucita. Bamane bakaambila mbungano ncibakasala kwiinda mukubalembela.—Amubale Incito 15:25-30; 16:4, 5; Ef. 3:5, 6.

7. Ino makani malamfwu aa Leza akayubununwa kwiinda munzi?

⁷ Twaambo tunji atumwi twakasalazigwa kwiinda mumagwalo akalongezyegwa amuuya aakalembwa aba Johane, Petro, Jakobo a Paulo. Pele nikwakainda ciindi naakamana kulembwa Magwalo aa Banakristo businsimi aluzibo lwakali kuyubununwa munzila yamaleele lwakamana. (1 Kor. 13:8) Sena muuya wakali kuyakuzumanana kubeleka mbuli mwiiyi alimwi asikwiibalusya? Sena wakali kuyakuzumanana kubagwasya Banakristo kuzyiba makani malamfwu aa Leza? Businsimi bwakatondezya kuti uyakucita oobo.

 Kumamanino Aaciindi

8, 9. Ino mbaani bakali kuya “kubekema” abusongo bwakumuuya kuciindi cakumamanino?

⁸ Naakali kwaamba mamanino aaciindi, mungelo wakasinsima kuti: “Basongo bayoobekema mbuli kubekema kwajulu, abaabo bapilusya bantu banji kubululami mbuli inyenyeezi mane kukabe kutamani. . . . Luzibo luyooyungizizigwa.” (Dan. 12:3, 4) Ino mbaani bakali kuyakuba basongo alimwi mbaani bakali kuya kubekema? Jesu wakatupa muzeezo mucikozyanyo camaila ansaku. Naakali kwaamba “mamanino aaciindi,” wakati: “Lino baluleme bazoobala mbuli izuba mu-Bwami bwawisaabo.” (Mt. 13:39, 43) Naakali kupandulula, Jesu wakaamba kuti “baluleme” “mbibana ba-Bwami,” Banakristo bananike.—Mt. 13:38.

⁹ Sena Banakristo bananike boonse bakali kuya “kubekema”? Munzila imwi inzya, nkaambo Banakristo boonse beelede kutola lubazu mukukambauka akuyakana umwi amweenzinyina kumiswaangano. Bananike bakali kuya kutondezya cikozyanyo. (Zek. 8:23) Kuyungizya kuli ceeci, makani malamfwu akali kuya kuyubununwa kuciindi cakumamanino. Businsimi mbubwenya oobu mbwaakalemba Daniele ‘bwakajalwa’ mane kusikila kuciindi eeco. (Dan. 12:9, BT) Ino mbuti alimwi nkwiinda muli bani muuya mbuwakali kuya kuyubununa makani malamfwu?

10. (a) Ino nkwiinda muli bani muuya muuyubunwida makani malamfwu aakasimpe kumazuba aamamanino? (b) Amwaambe kasimpe kajatikizya tempele lipati lya Jehova mbokakapandululwa.

 ¹⁰ Mazuba aano, ikuti naa kwayandika kusalazya kaambo kakumuuya, muuya uusalala ulabagwasya baiminina “muzike musyomesi uucenjede” ibali kumaofesi mapati kumvwisya makani malamfwu ngotwatakali kumvwisya kaindi. (Mt. 24:45; 1 Kor. 2:13) Ba Kabunga Keendelezya boonse balabulanga-langa bupanduluzi bupya. (Inc. 15:6) Nzyobaiya balazimwaya kutegwa boonse bagwasyigwe. (Mt. 10:27) Kwainda ciindi, inga kwayandika bupanduluzi bumbi, abwalo oobo bulapandululwa kabotu.—Amubone kabbokesi kakuti  “Muuya Mbuwakapandulula Ncolyaamba Tempele Lyakumuuya.””

Mbotugwasyigwa Amuuya Mazuba Aano

11. Ino mbuti Banakristo boonse mazuba aano mbobagwasyigwa amuuya uusalala kumvwisya makani malamfwu aa Leza?

¹¹ Banakristo boonse basyomeka balagwasyigwa amboubeleka muuya uusalala mukuyubununa makani malamfwu aa Leza. Mbubwenya mbuli Banakristo bamumwaanda wamyaka wakusaanguna, mazuba aano muuya uusalala ulatugwasya kutumvwisya twaambo ntotwiiya alimwi kwainda ciindi tulatuyeeya akutubelesya. (Lk. 12:11, 12) Tatuyandiki kuya kucikolo cipati kutegwa tukamvwisye kasimpe kakumuuya kalembedwe mumabbuku eesu. (Inc. 4:13) Ino mbuti mbotukonzya kucita kutegwa twaamvwisye makani malamfwu aa Leza? Atubone nzila zimwi zyaambwa.

12. Ino ndilili notweelede kulomba muuya uusalala mumupailo?

¹² Tweelede kulomba muuya uusalala mumupailo. Notutanatalika kulanga-langa twaambo twamu Magwalo, tweelede kusaanguna kulomba muuya uusalala kuti utusololele. Inga twacita oobu nokuba kuti tuli tolikke neliba leelyo netujisi buyo ciindi cisyoonto cakucita oobo. Mipailo iili boobu ilakonzya kumukkomanisya Taateesu wakujulu. Kweelana ambwaakaamba Jesu, Jehova uyakutupa muuya uusalala ikuti twamulomba.—Lk. 11:13.

13, 14. Ino kulibambila miswaangano kutugwasya buti kwaamvwisya makani malamfwu aa Leza?

¹³ Tweelede kulibambila miswaangano. Tulapegwa ‘cakulya aciindi ceelede’ kwiinda muciinga camuzike. Baciinga ‘camuzike’ balauzuzikizya mulimo ngobapedwe kwiinda mukutupa mabbuku aamba zya Bbaibbele akubikka bubambe bwamiswaangano. Kuli twaambo tubotu tubapa kuti baambile “babunyina” boonse kuti balange-lange makani amwi. (1 Pet. 2:17; Kol. 4:16; Jud. 3) Tubelekela antoomwe amuuya uusalala ciindi notusoleka kutobela malailile ngotupegwa.—Ciy. 2:29.

¹⁴ Ciindi notulibambila miswaangano ya Bunakristo, inga catugwasya kuti katwaabala Magwalo abikkidwe alimwi akusoleka kubona mbwaakasalazya kaambo aako kayiigwa. Mukuya kwaciindi, eeci cilengwa inga catugwasya kutumvwisya twaambo twamu Bbaibbele. (Inc. 17:11, 12) Kwaabala Magwalo inga kwatugwasya kwaayobola mumizeezo mpoonya muuya uusalala ulakonzya kutuyeezya kumbele. Kuyungizya waawo, kuti twalubona lugwalo  mu Bbaibbele, ciyakutugwasya kuyeeya mpolubede kutegwa citakakatazyi kulujana twaakuyanda kulubala alimwi.

15. Ino nkaambo nzi ncotweelede kwaabala mabbuku mbotwaatambwida buyo, alimwi mbuti mbomucita oobo?

¹⁵ Tweelede kwaabala mabbuku mbotwaatambwida buyo. Mabbuku amwi ngotutambula tatwaabelesyi amiswaangano yesu, pele akalembelwa kutugwasya. Naaba mamagazini ngotwaabila kubuleya akalembelwa ndiswe. Munyika eeyi bantu mobajisi bubi, kanji-kanji kuli ziindi notuyandika kulindila muntu naa cintu cimwi. Ikuti naa twabwezelezya bbuku ndyotutanabala naa nditwakabala buyo asyoonto, tulakonzya kubelesya ciindi eeci kulibala. Bamwi balaswiilila kuzyakalekkoodwa kuzwa mumabbuku eesu ciindi nibali mulweendo. Akaambo kuti aaya mabbuku naakali kulembwa bakavwuntauzya kabotu kutegwa bantu boonse kabaakkomanina kwaabala, alatugwasya kubikkila maano kuzyintu zyakumuuya.—Hab. 2:2.

16. Ino tugwasyigwa buti kwiinda mukulanga-langa mibuzyo iiboola notubala?

¹⁶ Tweelede kuzinzibala kuyeeya. Nomubala Bbaibbele amumabbuku aamba zya Bbaibbele, mweelede kujana ciindi cakuyeeya nzyomwabala. Ciindi nomubala, mulakonzya kuba amibuzyo. Amwiilembe mibuzyo eeyi kutegwa mukailange-lange kabotu. Kanji-kanji ikuti naa tuvwuntauzya twaambo tutukkomanisya ndendilyo notwiiya zyintu zinji. Zyintu nzyotwiiya lulaba lubono lwesu lukonzya kutugwasya kufwumbwa kwayandika.—Mt. 13:52.

17. Ino mbubambe nzi mbomutobela nomucita ciiyo camukwasyi naa ciiyo canu?

¹⁷ Tweelede kubikka ciindi cakukomba mumukwasyi. Ba Kabunga Keendelezya balatukulwaizya toonse kuba aciindi ansondo cakucita ciiyo cesu naa camukwasyi. Kucinca kwabubambe bwamiswaangano kwakacitwa kutupa ciindi cakucita ciiyo eeci. Ino ntwaambo nzi ntomulanga-langa ciindi nomukomba mumukwasyi? Bamwi babala Bbaibbele, kuvwuntauzya tupango ntobatamvwisyi akulemba mu Bbaibbele lyabo majwi aabupanduluzi mubufwaafwi. Mumikwasyi minji balajana ciindi cakubona mbobakonzya kutubelesya twaambo ntobaiya. Mumikwasyi imwi, mutwe wamukwasyi ulasala makani ngabwene kuti banamukwasyi bayandika kwaalanga-langa naaba yaayo aajatikizya twaambo naa mibuzyo njobakalomba banamukwasyi kuti ilangwe-langwe. Cakutadooneka, kwainda ciindi muna kuyeeya twaambo tumbi. *

18. Ino nkaambo nzi ncotuteelede kuleka kwiiya makani malamfwu aakasimpe aazwa mu Jwi lya Leza?

¹⁸ Jesu wakaamba kuti muuya wakali kuya kuba mugwasyi. Aboobo, tatweelede kuleka kwiiya makani malamfwu aakasimpe aazwa mu Jwi lya Leza. Kasimpe kali boobu kali akati “[ka]luzibo lwa-Leza,” alimwi twatambwa kuti tukavwuntauzye. (Amubale Tusimpi 2:1-5.) Kasimpe aaka kaamba zinji kujatikizya makani “Leza ngaabambilide abo bamuyanda.” Notusoleka kwiiya zyintu zinji kujatikizya Jwi lya Jehova, muuya uusalala uyakutugwasya, nkaambo “Muuya ulagulunganya makani oonse, naaba makani malamfu aabulondo bwa-Leza.”—1 Kor. 2:9, 10.

Bupanduluzi buyungizidwe

Ino Inga Mwaingula Buti?

• Ino muunzila nzi zyobilo muuya uusalala moutugwasya kumvwisya “makani malamfu aabulondo bwa-Leza”?

• Ino nkwiinda muli bani muuya uusalala muwakayubununa makani malamfwu aakasimpe mumwaanda wamyaka wakusaanguna?

• Ino mbuti muuya uusalala mboubeleka kusalazya twaambo mazuba aano?

• Ino ncinzi ncomukonzya kucita kutegwa mugwasyigwe amuuya uusalala?

[Mibuzyo yaciiyo]

Kabbokesi kali apeeji 22]

 Muuya Mbuwakapandulula Ncolyaamba Tempele Lyakumuuya

Akati “[ka]makani malamfu aabulondo bwa-Leza” aakayubununwa mumwaanda wamyaka wakusaanguna ngakuti tente alimwi amatempele kumbele akali kwiiminina bwini bwazyintu zyakumuuya. Paulo wakaamba kuti oobu bwini “[n]cikombelo cakayakwa a-Jehova, teecakayakwa kumaanza aabantu pe.” (Heb. 8:2) Eeci cikombelo lyakali tempele lipati lyakumuuya, nzila iikonzya kutupa kusika kuli Leza yakabambwa kwiinda mucituuzyo amubupaizi bwa Jesu Kristo.

“Cikombelo” cakatalika mu 29 C.E. ciindi Jesu naakabbapatizyigwa alimwi Jehova wakamutambula kuti abe cituuzyo cilondokede. (Heb. 10:5-10) Naakafwa akubusyigwa, Jesu wakanjila mu Busena Busalalisya bwatempele lyakumuuya akupa muulo wacituuzyo cakwe “kubusyu bwa-Leza.”—Heb. 9:11, 12, 24.

Mulugwalo lumbi, mwaapostolo Paulo wakalemba kuti Banakristo bananike baya “bukomena kuba cikombelo cisalala icili mu-Mwami.” (Ef. 2:20-22) Sena eeli tempele lyakali kukozyanya a “cikombelo” ncaakalemba mulugwalo luli kuba Hebrayo? Kwamyaka minji, babelesi ba Jehova mbubakali kuyeeya oobo. Cakali kulibonya kuti Banakristo bananike bakali kuyiisyigwa anyika kuti balibambile kuba “mabwe” mutempele lya Jehova lyakujulu.—1 Pet. 2:5.

Pele, kautandila kusika mwaka wa 1971, beendelezi bali muciinga camuzike bakatalika kuzyiba kuti tempele ndyaakaamba Paulo ku Efeso talikonzyi kuba tempele lipati lyakumuuya lya Jehova. Ikuti naa “cikombelo” cakali kwiiminina Banakristo bananike ibakabusyigwa, nkokuti cakeelede kutalika nobakatalika kubusyigwa “kuciindi cakubako kwa Mwami.” (1 Tes. 4:15-17, NW) Pele kwaamba tente, Paulo wakalemba kuti: “Eco ncikozyano kuciindi casunu.”—Heb. 9:9.

Kwiinda mukukozyanisya magwalo aaya aambi, cilasalala kuti tempele lyakumuuya talili mukuyakwa alimwi akuti Banakristo bananike tabali “mabwe” aabambululwa anyika kutegwa akabikkilizyigwe mulinjiyo. Muciindi caboobo, Banakristo bananike babelekela mubbuwa amu Busena Busalala bwatempele lyakumuuya, abuzuba balapa “cipaizyo cakulumba” kuli Leza.—Heb. 13:15.

[Cifwanikiso icili apeeji 23]

Ino mbuti mbotukonzya kwaamvwisya “makani malamfu aabulondo bwa-Leza”?