Ncobuyooyubununa Buzuba bwa Jehova

“Buzuba bwa-Jehova bulasika mbubonya mbwasika mubbi, . . . ayalo nyika iyootentwa azicitwa kulinjiyo.”—2 PET. 3:10.

1, 2. (a) Ino bweende bwazyintu oobu bubyaabi buyakumana buti? (b) Ino mibuzyo nzi njotutiilange-lange?

BWEENDE bwazyintu oobu bubyaabi buyeeme aamajwi aakubeja aakuti muntu ulakonzya kulyeendelezya alikke kakunyina kusololelwa a Jehova. (Int. 2:2, 3) Sena cintu ciyeeme aakubeja inga cazumanana kubako kukabe kutamani? Peepe. Nokuba boobo, tatweelede kulindila kuti nyika ya Saatani ikalinyonyoone. Muciindi caboobo, iyakunyonyoonwa a Leza aciindi ncabikkide alimwi munzila njayanda. Nzyaya kucita Leza kunyika eeyi mbyaabi ziyakutondezya bululami bwakwe aluyando munzila iilondokede.—Int. 92:7; Tus. 2:21, 22.

² Mwaapostolo Petro wakalemba kuti: “Buzuba bwa-Jehova bulasika mbubonya mbwasika mubbi. Kulimbubo ijulu liyooindilila acamuzunzumina mupati, tunyenyeezi tuyooyaka akubomboloka, ayalo nyika iyootentwa azicitwa kulinjiyo.” (2 Pet. 3:10) Ino “ijulu” a “nyika” zyaambwa awa ninzi? Ino “tunyenyeezi” ituyakubomboloka ninzi? Alimwi ino ncinzi Petro ncaakali kwaamba naakaamba kuti “nyika iyootentwa azicitwa kulinjiyo”? Ikuzyiba bwiinguzi kumibuzyo eeyi kuyakutugwasya kulibambila kuzyintu ziyoosya eezyi ziyakucitika lino-lino.

Ijulu a Nyika Iziya Kumana

3. Ino “ijulu” lyaambwa kulugwalo lwa 2 Petro 3:10 ninzi, alimwi mbuti mboliya kunyonyoonwa?

³ Ibbala lyakuti “julu” nolibelesyegwa mumaambila mbali mu Bbaibbele kanji-kanji lyaamba bweendelezi, bwalo buli atala lyabantu balelwa. (Is. 14:13, 14; Ciy. 21:1, 2) Ijulu litikanyonyoonwe liiminina bulelo bwabantu bweendelezya bantu batamukombi Leza. Ikunyonyoonwa “acamuzunzumina mupati,” cilakonzya kwaamba kunyonyooka cakufwambaana kwajulu eeli.

4. Ino “nyika” ninzi, alimwi iyakunyonyoonwa buti?

⁴ “Nyika” iiminina bantu bali munyika bazandukide kuli Leza. Bantu bali boobu bakaliko anyika ciindi naakali kupona Nowa pele Leza wakaamba kuti banyonyoonwe a Zambangulwe. “Eno ijulu anyika nzitubona sunu zyayobwedwa lubeta, kujwi elyo ndilyonya, ziti kanyonyoonwe amulilo mubuzuba obo mbubayoobetekwa bantu basikasampusampu.” (2 Pet. 3:7) Zambangulwe yakabanyonyoona aciindi comwe bantu boonse batakali kucita kuyanda kwa Leza pele kunyonyoonwa kuboola kunakuli muzibeela muciindi eeci ca ‘mapenzi mapati.’ (Ciy. 7:14) Cibeela cakusaanguna camapenzi aaya, Leza uyakupa kuti beendelezi batwaambo twacisi bali munyika eeyi banyonyoone “Babuloni Mupati,” kutondezya kuti tabayandi basizikombelo aaba batalilemeki. (Ciy. 17:5, 16; 18:8) Mpoonya, munkondo ya Armagedoni yalo iili ncibeela camamanino camapenzi mapati, Jehova nguuya kubajaya aabo boonse bantu baya kucaala bamunyika ya Saatani.—Ciy. 16:14, 16; 19:19-21.

‘Tunyenyeezi Tuyoobomboloka’

5. Ino tunyenyeezi twamaambila mbali tubikkilizya nzi?

⁵ Ino ‘tunyenyeezi ituyoobomboloka’  tunzi? “Tunyenyeezi” ntwaakaamba Petro twaamba bukkale bwabantu butamukkomanisyi Leza, mbobazicita zyintu alimwi ancobazicitila. “Tunyenyeezi” tubikkilizya “muuya waansi” walo uuli mu “bana babukali.” (1 Kor. 2:12; amubale Ba-Efeso 2:1-3.) Muuya naa “muuwo” ooyu ulaunga munyika ya Saatani. Upa kuti bantu kabayeeya mbobayeeya, makanze ngobajisi, mbobaambaula ambobacita zyintu, citondezya mbwayeeya Saatani “mweendelezi uujisi bwami bwakumuuwo” uuliyanda alimwi sinkazi.

6. Ino muuya wanyika ulitondezya buti?

⁶ Aboobo, aabo ibayungwa amuuya wanyika kabazyi naa kabatazyi, balacita zyintu kweelana ambwaziyanda Saatani. Akaambo kaceeco, bacita zyintu nzibayanda muciindi cakucita kuyanda kwa Leza. Balaliyanda naa mbalyato, balabazangila baleli alimwi eeci cipa kuti babe a “zisusi zyanyama niziba zisusi zyameso.”—Amubale 1 Johane 2:15-17. *

7. Ino nkaambo nzi ncotweelede “[ku]bamba moyo” wesu?

⁷ Eelyo kaka cilayandika kapati “[ku]bamba moyo” wesu kwiinda mukusala kabotu beenzuma, nzyotubala, zyakulikondelezya anzyotweebelela akubala a Intaneti! (Tus. 4:23) Imwaapostolo Paulo wakalemba kuti: “Amucenjele kuti kutabi naba muntu omwe uumuyunga kukusongwaala-songwaala akukwaamba makani aatawo aazwa kutunsiyansiya twabantu, aazwa kuzilenge zitaanzi zyaansi, aatazwi kuli-Kristo pe.” (Kol. 2:8) Tweelede kukabikkila maano kaambo aaka nkaambo buzuba bwa Jehova buli aafwaafwi, tunyenyeezi notuya kuyaka akubomboloka mubweende bwa Saatani kutondezya kuti zyoonse ziya kumaninina kupya. Eeci cituyeekezya cilembedwe ku Malaki 4:1: “Kuyoosika buzuba bupya mbuli ceengelo, elyo boonse balisumpula aboonse bacita zibi bayooba buungu. Buzuba obo buboola buyoobatenta.”

‘Nyika Iyootentwa Azicitwa Mulinjiyo’

8. Ino muunzila nzi nyika ‘moiyootentwa’ azicitwa mulinjiyo?

⁸ Ino Petro wakali kwaamba nzi naakalemba kuti ‘nyika iyootentwa azicitwa mulinjiyo’? Petro wakali kwaamba kuti ciindi camapenzi mapati, Jehova uyakuziyubununa zyintu zyoonse zicitwa munyika ya Saatani kutondezya kuti tazili kulubazu lwakwe alwa Bwami bwakwe alimwi akuti ziyandika kunyonyoonwa. Kalusinsima kujatikizya ciindi eeci, lugwalo lwa Isaya 26:21 lwaamba kuti: “Nkaambo amubone! Jehova ulazwa kubusena bwakwe kuti abweedezye bantu bakede munyika mulandu wabubi bwabo. Ayalo nyika iyooyubununa bulowa bwayo, tiikooyoovumba limbi bajayidwe bayo.”

9. (a) Ino nzyintu zili buti nzyotuteelede kucita alimwi nkaambo nzi? (b) Ino micelo nzi njotweelede kuba aanjiyo alimwi nkaambo nzi?

⁹ Mubuzuba bwa Jehova, aabo basololelwa aamuuya wanyika mubi baya kulitondezya bwini mbobabede alimwi banakujayana. Alimwi ciboneka kuti zyakulikondelezya zitondezya nkondo izyeebelelwa mazuba aano zipa kuti mizeezo yabantu banji ibije kutegwa caakusika ciindi eeco boonse bakatambike “maanza aabo cakuumana, umwi aumwi mweenzinyina.” (Zek. 14:13) Eelyo kaka tatweelede kucita zyintu zikonzya kutunyonganya mbuli nzitweebelela muzipeku-peku amuma vidiyo, anzyotubala mumabbuku azimwi buyo zikonzya kumusesemya Leza mbuli kuliyanda alimwi akuyanda nkondo! (2 Sam. 22:28; Int. 11:5) Muciindi caboobo, tweelede kuba amicelo yamuuya uusalala wa Leza, nkaambo micelo iili boobo taikonzyi kupya mubuzuba bwa Jehova.—Gal. 5:22, 23.

“Ijulu Ipya Anyika Impya”

10, 11. Ino “ijulu ipya” “anyika ipya” ninzi?

¹⁰ Amubale 2 Petro 3:13. “Ijulu ipya”  Mbwami bwa Leza bwakujulu ibwakatalika kulela mu 1914 “ciindi cabamasi” nicakamana. (Lk 21:24) Mumfwulumende ya Leza eeyi muli Kristo Jesu ambayoolela limwi ibali 144,000, ibanji bakatambula kale bulumbu bwakujulu. Mubbuku lya Ciyubunuzyo, aaba bakasalwa batondezyedwe kuba mbuli “munzi mulemu, Jerusalemu mupya, uuza buseluka kuzwa kujulu kwa-Leza, ulibambidwe mbuli nabwiinga mbwalisakatizizya mulumi wakwe.” (Ciy. 21:1, 2, 22-24) Mbubwenya mbuli mfwulumende mu Israyeli yansiku mbuyakali mu Jerusalemu waanyika, Jerusalemu Mupya a Mulumi wakwe mbababamba mfwulumende mubweende bwazyintu bupya. Eeyi dolopo yakujulu ‘iyakuseluka kuzwa kujulu,’ kutegwa ikabelekele anyika.

¹¹ “Nyika mpya” yaamba ciinga cabantu munyika mpya aabo bakasala kweendelezyegwa a Bwami bwa Leza. Paradaiso yakumuuya oomu mobakkomana bantu ba Leza mazuba aano, iyakuba ‘munyika eyo iiciza.’ (Heb. 2:5) Ino mbuti mbotukonzya kujanika mubweende bwazyintu bupya?

Kulibambila Kubuzuba Bupati bwa Jehova

12. Ino nkaambo nzi buzuba bwa Jehova ncobuya kusika cakutayeeyelwa munyika?

¹² Ba Paulo a Petro bakaamba kuti buzuba bwa Jehova buya kusika “mbwasika uubba” cakutayeeyelwa. (Amubale 1 Ba-Tesalonika 5:1, 2.) Nibaba Banakristo bakasimpe ibalangila buzuba oobu, baya kugambwa akaambo kakufwambaana kusika. (Mt. 24:44) Munyika kuyakuba zyintu zinji zigambya. Paulo wakalemba kuti: “Nobanoozoocili mukwaamba kuti, Kwatontola, kwaliiba, elyo muciindi eco nciconya lunyonyooko luzoofwambaana kubasikila mbuli insungo mbozisikila uumisi, nkabela tabakooyooloboka pe.”—1 Tes. 5:3.

13. Ino mbuti mbotutakonzyi kweenwa banakwaamba kuti “Kwatontola, kwaliiba”?

¹³ Ikwaamba kuti “Kwatontola, kwaliiba!” kuyakuba kubeja kwamadaimona; pele babelesi ba Jehova tabakacengwi. Paulo wakalemba kuti: “Tamuli mumudima, kuti buzuba obo bukamusikile mbuli uubba, pe nyoonse muli bana bamumuni abana basikati.” (1 Tes. 5:4, 5) Aboobo atukkale mumumuni ikulamfwu anyika ya Saatani iili mumudima. Petro wakalemba kuti: “Nomuyandwa, mbomweezi kale aya, amukalicenjezye kuti mutalengwawidwi kulweeno lwabataka akujatuluzigwa kukujatila kwanu.”—2 Pet. 3:17.

14, 15. (a) Ino mbuti Jehova mbwatulemeka? (b) Ino majwi nzi aakasololelwa amuuya ngotweelede kubikkila maano?

¹⁴ Amubone kuti Jehova tatwaambili buyo kuti ‘tucenjele’ pele ulatwaambila mbotukonzya kucita oobo. Muciindi caboobo, ulatulemeka kwiinda mukutuzyibya zyintu zimwi ziya kucitika kumbele.

¹⁵ Nokuba boobo, icuusisya ncakuti bantu bamwi tababikkili maano notuyeekezyegwa kuti tupakamane. Balakonzya kwaamba kuti ‘kwamyaka minji twali kuyeekezyegwa oobu.’ Pele, bantu aaba beelede kuyeeya kuti nibaamba boobo bakazya Jehova a  Mwanaakwe, ikutali buyo baciinga camuzike musyomesi. Jehova wakaamba kuti ‘amulindile.’ (Hab. 2:3) Mbubwenya buyo, Jesu wakaamba kuti: “Amulangile, nkaambo tamuzi buzuba mbwazoosika mwami wanu.” (Mt. 24:42) Kuyungizya waawo, Petro wakalemba kuti: “Nywebo muleelede kuba bantu bali buti kukweenda munzila iisalala amukulemeka Leza. Akuyandisya buzuba bwakusika kwa-Leza.” (2 Pet. 3:11, 12) Muzike musyomesi alimwi aba Kabunga Keendelezya kunyina nobaya kuleka kutucenjezya makani aaya!

16. Ncinzi ncotuteelede kuyeeya, alimwi nkaambo nzi?

¹⁶ Masimpe, “muzike mubi” ngonguwe uyeeya kuti Mwami waccelwa. (Mt. 24:48) Muzike mubi uli akati kabantu baambwa ku 2 Petro 3:3, 4. Petro wakalemba kuti: “Kuyoosika basabuzi” balo “beenda muzisusi zibi” akufwubaazya baabo ibaswiilila akuyeeyesya buzuba bwa Jehova. Inzya, muciindi cakubikkila maano kuzyintu zya Bwami, basikasampusampu babikkila buyo maano kuzyintu zyakumubili. Swebo tatweelede kuba amuuya ooyu mubi wakutaswiilila. Muciindi caboobo tweelede ‘kuyeeya kuti kukkazyika moyo kwa Mwami nkokuleta lufwutuko’ kwiinda mukuzumanana kubeleka canguzu mumulimo wa Bwami wakukambauka akugwasya bantu kuba basikwiiya alimwi akutalibilika kapati akaambo kakuyeeya ciindi noziya kucitika zyintu nzyaamba Jehova Leza.—2 Pet. 3:15; amubale Incito 1:6, 7.

Amusyome Leza Walufwutuko

17. Ino Banakristo basyomeka bakacita buti Jesu naakabacenjezya kuccija mu Jerusalemu, alimwi ino nkaambo nzi?

¹⁷ Bana Roma nobakalwana cisi ca Judaya mu 66 C.E., Banakristo basyomeka bakaatobela malailile ngaakabapa Jesu aakuti beelede kuccija mumunzi wa Jerusalemu aciindi eeco. (Lk. 21:20-23) Ino nkaambo nzi ncobakacitila boobo kakunyina kusowa ciindi? Cakutadooneka, bakali kutobela kucenjezya kwa Jesu. Masimpe, bakalizyi kuti ntaamu njibakali kuyanda kubweza yakali kukonzya kubapa kujana buyumuyumu kweelana ambwaakabacenjezya Kristo. Nokuba boobo, bakalizyi kuti Jehova kunyina naakali kuya kubalekelezya aabo basyomeka kulinguwe.—Int. 55:22.

18. Ino majwi ngaakaamba Jesu aalembedwe kulugwalo lwa Luka 21:25-28 amupa kulimvwa buti kujatikizya mapenzi mapati aaboola?

¹⁸ Andiswe tweelede kumusyoma Jehova amoyo woonse nkaambo walo alikke nguuya kutufwutula nyika eeyi yaakusikilwa mapenzi mapati aatanabwenwe kuzwa kaindi naa mubuumi bwabantu. Kaatalikide kale mapenzi  mapati pele Jehova katananyonyoona bantu boonse basyeede munyika, bantu “bayoomana nguzu nkaambo kakuyoowa, akulangila zintu iziciza ansi.” Pele nokuba kuti basinkondonyina Leza baya kuyoowa kapati, babelesi ba Jehova basyomeka tabakayoowi pe. Muciindi caboobo, baya kukkomana nkaambo baya kuzyiba kuti lufwutuko luli afwaafwi.—Amubale Luka 21:25-28.

19. Ino ncinzi ncotuya kulanga-langa mucibalo citobela?

¹⁹ Masimpe, aabo balyaandaanya kunyika balangila zyintu zibotu kapati. Pele mbubwenya mbocaamba cibalo citobela, ikuti katuyanda kujana buumi, tatweelede buyo kuleka kucita zibi. Tweelede kuba abube naa bukkale bumukkomanisya Leza alimwi akucita milimo iitambulika kulinguwe.—2 Pet. 3:11.

Bupanduluzi buyungizidwe

Sena Inga Mwapandulula?

• Ino zyintu eezyi ziiminina nzi . . .

‘ijulu anyika’ zyamazuba aano?

“tunyenyeezi”?

‘julu mpya anyika mpya’?

• Ino nkaambo nzi ncotweelede kumusyoma kapati Leza?

[Mibuzyo yaciiyo]

[Cifwanikiso icili apeeji 5]

Ino mbuti mbotukonzya ‘kubamba moyo’ akulyaandaanya kunyika?

[Cifwanikiso icili apeeji 6]

Ino mbuti mbotukonzya kutondezya kuti tulizyi “kuti kukazika moyo kwa-Mwami nkokuleta lufutuko”?