“Utayoowi, Ndime Sikugwasya Wako”

JESU wakacenjezya basikumutobela kuti: “Diabolosi ulawaala bamwi banu muntolongo, kuti mukasunkwe.” Nokuba boobo, katanabacenjezya, Jesu wakati: “Mutayoowi zintu ezyo nzimuti penzegwe.” Mbokunga Saatani wazumanana kubelesya nzila yakuti bantu kabaangwa kutegwa bacileke kukambauka makani aa Bwami, inga calangilwa kuti mfwulumende zimwi ziyakubapenzya Banakristo. (Ciy. 2:10; 12:17) Aboobo, ino ncinzi cikonzya kutugwasya kuti tulibambile kunzila nzyabelesya Saatani kutegwa ‘tutayoowi’ kweelana ambwaakaamba Jesu?

Masimpe, andiswe cimwi ciindi twakali kuyoowa. Nokuba boobo, Jwi lya Leza litwaambila kuti Jehova ulakonzya kutugwasya kutegwa tutanikuyoowi. Munzila nzi? Nzila yomwe Jehova njabelesya kutegwa tulibambile kukazyigwa a Saatani nkwiinda mukuzyiba nzila nzyabelesya abantu mbabelesya. (2 Kor. 2:11) Ikutegwa tupandulule kaambo aaka, atubone cakacitika kaindi. Alimwi tulabona zikozyanyo zyabasyomima bamazuba aano ‘ibakaima mumeeneeno aa Diabolosi.’—Ef. 6:11-13.

Mwami Uuyoowa Leza Walwana a Mwami Mubi

Mumwaanda wamyaka walusele B.C.E., Mwami mubi Sanakeribu waku Asuri wakazunda zisi zinji. Kalisyoma akaambo kakuzunda, wakalibambide kuzunda bantu ba Jehova amunzi wabo mupati, Jerusalemu, nkwaakali kulela Mwami Hezekiya uuyoowa Leza. (2 Bam. 18:1-3, 13) Cakutadooneka, Sanakeribu wakayungwa a Saatani kuti acite ncayanda Saatani kutegwa bukombi bwakasimpe bumane anyika.—Matl. 3:15.

Sanakeribu wakatuma bantu bakwe ku Jerusalemu kuya kwaambila bantu kuti bawaabe munzi. Akati kabaabo bakatumwa kwakali Rabisake wakali mwaambilizi mupati wa Mwami. * (2 Bam. 18:17) Rabisake ncaakali kuyanda ncakuti bama Juda batyompwe akwaaba munzi wabo kakunyina kulwana. Ino ninzila nzi Rabisake njaakabelesya kutegwa abakonge bama Juda?

Kusyomeka Nokuba Kuti Muli Molikke

Rabisake wakaambila baiminizi ba Hezekiya kuti: “Mbuboobu mbwaamba mwami mupati, mwami wa-Asuri. Ncinzi olu lusyomo lwako ndosyomya? . . . Ncobeni ulasyoma Egepita. Pele oyu musako wako nditete liti fukide buyo liyooyasa ijanza lyakwe kufumbwa uulifunkizya.” (2 Bam. 18:19, 21) Nzyaakaamba Rabisake zyakali zyakubeja akaambo kakuti  Hezekiya tanaakazuminana a Egepita. Nokuba boobo, ncaakali kuyanda cini-cini Rabisake ncakuti bama Juda bazyibe kuti kunyina uuyakubagwasya. Bali balikke buyo.

Mazuba aano, basikukazya bukombi bwakasimpe abalo balabelesya nzila njimunya eeyi kubakonga Banakristo bakasimpe kuti balakonzya kubaandaanya kubakombinyina kutegwa kabayoowa. Mucizyi umwi Munakristo, iwakaangidwe akaambo kalusyomo lwakwe akwaandaanizyigwa kubasyominyina kwamyaka minji, wakaamba cakamugwasya kuti katayoowi. Wakaamba kuti: “Mupailo wakandigwasya kuba acilongwe a Jehova . . . Ndakayeeya majwi aali kulugwalo lwa Isaya 66:2 aakuti Leza ulabalanganya aabo ‘bapenga akulibombya mumoyo.’ Eeci cakali kundiyumya akundikulwaizya lyoonse.” Mbubwenya buyo, mukwesu umwi iwakakkala myaka minji muntolongo wakaamba kuti: “Ndakazyiba kuti kaanda kaniini kamuntolongo kalakonzya kulibonya mbuli kuti nkapati ikuti kamumvwana a Leza.” Inzya, kumvwana a Jehova cakapa kuti Banakristo bobilo aaba baliyumye nokuba kuti bali balikke. (Int. 9:9, 10) Basikubapenzya bakali kukonzya kubaandaanya kumikwasyi, kubeenzinyina akubasyominyina, pele Bakamboni bakaangidwe bakalizyi kuti basikubakazya aaba tabakonzyi kubaandaanya kuli Jehova.—Rom. 8:35-39.

Aboobo, cilayandika kapati kuyumya cilongwe cesu a Jehova. (Jak. 4:8) Lyoonse tweelede kulibuzya kuti: ‘Sena Jehova ndimuzyi kabotu? Sena majwi aakwe alandeendelezya muzyintu zyoonse nzyondicita mubuumi bwangu zisyoonto azipati?’ (Lk. 16:10) Ikuti twazumanana kumvwana a Leza, taaku kaambo keelede kutupa kuyoowa. Musinsimi Jeremiya naakali kwiiminina bama Juda bakali kupenzyegwa, wakaamba kuti: “Ndakakwiilila izina lyako, O Jehova, kuzwa mudindi idamfu . . . Wakaswena kulindime mubuzuba obo nindakakukwiilila, wakati, Utayoowi.”—Malo. 3:55-57.

Saatani Waalilwa Kubacinca Babelesi ba Leza

Rabisake wakabelesya bucenjezu kutegwa abacince mizeezo bantu. Wakaamba kuti: “Sa teensi nguwe Hezekiya ngwaakagwisizya tukombelo twakuzilundu azipaililo? . . . Jehova nguwakandaambila kuti, Koya ukalwisye cisi eci akucinyonyoona.” (2 Bam. 18:22, 25) Kwiinda mumajwi aaya, Rabisake wakali kwaamba kuti Jehova takonzyi kukwabilila bantu bakwe akaambo kakuti tanaakali kubakkomanina. Pele aaya tanaakali masimpe pe. Jehova wakamukkomanina Hezekiya abama Juda bakatalika alimwi kumukomba.—2 Bam. 18:3-7.

Mazuba aano, basikupenzya balakonzya kwaambilana twaambo twamasimpe atwakubeja kutegwa bantu kabadooneka. Mucikozyanyo, bakwesu abacizyi baangidwe balakonzya kwaambilwa kuti imukwesu weendelezya mumbunga mucisi cabo wacileka kusyoma akuti abalo beelede kucileka. Nokuba boobo, twaambo tuli boobo tatubapi kudooneka Banakristo bapakamene.

Amubone cakacitikila mucizyi umwi Munakristo mu Nkondo Yanyika Yabili. Naakali muntolongo, wakatondezyegwa lugwalo lwakali kutondezya kuti mukwesu umwi wakacileka kusyoma. Wakali kubuzya wakaamba kuti: ‘Sena ulamusyoma ooyu Kamboni?’ Mucizyi ooyu wakaingula kuti, “Ooyu muntu talondokede pe.” Wakayungizya kuti mukwesu ooyu  naakali kutobela njiisyo zya Bbaibbele, wakali kubelesyegwa a Leza. “Pele mbokunga zilembedwe aawo zitondezya kuti waleka kutobela Bbaibbele, tacili mukwesu.” Mucizyi ooyu uusyomeka wakali kutobela malailile aamu Bbaibbele aakuti: “Mutasyomi bami, na muntu waansi uutagwasyi.”—Int. 146:3.

Kuba aluzyibo lwa Jwi lya Leza akutobela ncolyaamba kuyakutugwasya kuti tutayungwi amizeezo iikonzya kutupa kutaliyumya. (Ef. 4:13, 14; Heb. 6:19) Aboobo, kutegwa tulibambile kuti katuyeeya kabotu notuli mumapenzi, tuyandika kuti lyoonse katubala Bbaibbele akuba aciiyo cesu tobeni. (Heb. 4:12) Inzya, lino nceciindi cakuba aluzyibo lunji akuyumya lusyomo lwesu. Mukwesu umwi iwakaliyumya kwamyaka minji kali muntolongo wakati: “Ndiyanda kukulwaizya bantu boonse kuti kabazibikkila maano zyintu zyoonse zyakumuuya nzyotupegwa, akaambo kakuti tatukonzyi kuzyiba mboziya kutugwasya kumbele.” Masimpe ngakuti, ikuti katuzimvwa nzyotwiiya mu Jwi lya Leza alimwi amu mabbuku ngotupegwa abaciinga camuzike mazuba aano, ikuti twaba amapenzi, muuya uusalala ulakonzya ‘kutuyeezya’ nzitwakaiya.—Joh. 14:26.

Kukwabililwa Nobamuyoosya

Rabisake wakabayoosya bama Juda. Wakaamba kuti: “Kopana asimalelo wangu mwami wa-Asuri. Njookupa mabbiza aali zyuulu zyobile, na uwe ulakonzya kujana basikwaatanta. Ulakonzya buti kusampaula silutwe naba umwi naba muniini akati kabalanda basimalelo wangu?” (2 Bam. 18:23, 24) Kweelana akuyeeya kwabantu, Hezekiya abantu bakwe tiibakali kukonzya ikulwana abasikalumamba bana Asuri.

Basikupenzya bamazuba aano balakonzya kuboneka mbuli kuti balaanguzu kapati, ikapati ikuti kabeendelezyegwa a Mfwulumende. Eeci ncicakacitika kuli basikupenzya ba Nazi lya Nkondo Yanyika Yabili. Bakali kubapenzya babelesi ba Leza banji. Umwi wabakwesu iwakakkala muntolongo kwamyaka minji, wakaamba mbwaakapenzyegwa. Bumwi buzuba, mupulisa wakamubuzya kuti: “Sena wamubona musyoonto wako mbobamudubula? Ino waiya nzi kuli cacitika?” Mukwesu wakaingula kuti: “Ndili kamboni wa Jehova alimwi ndiya kuzumanana kuba kamboni.” Amane mupulisa wakamwaambila kuti: “Nkokuti ndiwe utiitobele kudubulwa.” Nokuba boobo, mukwesu tanaakacinca, amane wakali kumupenzya wakamuleka. Ino ncinzi cakamugwasya kuti azumanane kusyomeka napenzyegwa? Wakaingula kuti: “Ndakasyoma muzyina lya Jehova.”—Tus. 18:10.

Kwiinda mukusyoma muli Jehova, tulanyamuna ntobo mpati yakulikwabilila kuzyintu zyoonse nzyabelesya Saatani zikonzya kutucisa kumuuya. (Ef. 6:16) Aboobo, ncibotu kumulomba Jehova mumupailo kutegwa atugwasye kuliyumya kumuuya. (Lk. 17:5) Alimwi tuyandika kuzibelesya kabotu zyintu nzyotupegwa amuzike musyomesi kutegwa tube alusyomo luyumu. Nibatuyoosya bantu, tulayuma notuyeeya Jehova mbwaakamuyumya musinsimi Ezekieli iwakali kuyandika kwaambila bantu basicinguni. Jehova wakamwaambila kuti: “Ndayumya busyu bwako mbuli masyu aabo, ankumu yako iyooyumisigwa mbuli inkumu zyabo. Ndacita kuti inkumu yako iyume nta mbuli ibbweluuma, iyume kwiinda mandomba.” (Ezk. 3:8, 9) Ikuti kakuyandika, Jehova ulakonzya kutugwasya kuti tuyume mbuli bbweluuma mbuli mbwaakeelede kuba Ezekieli.

Kuliyumya Mumasunko

Basikukazya babona kuti nzila zyoonse nzibasoleka zyaala, nzila ilikke iikonzya kumupa muntu kuleka kusyomeka nkumupa cimwi cintu ncobayeeya kuti inga waciyanda. Awalo Rabisake wakabelesya nzila eeyi. Wakaambila bantu bakali mu Jerusalemu kuti: “Mbuboobu mbwaamba mwami wa-Asuri. Amutangane  ambebo luumuno akuzwa mumunzi kuza okuno kulindime . . . mane nkaze kuzoomutola kunyika iikozyene anyika yanu, nyika yamaila ayawaini, nyika yazinkwa ayamyuunda yamisaansa, nyika yamafuta aamaolifa ayabuci, elyo muyoopona, tamukooyoofwa pe.” (2 Bam. 18:31, 32) Kubasyomezya kulya cinkwa cicili kabotu awaini mupya kweelede kuti kwakabakkomanisya bantu aabo ibakali mumunzi iwakazingulukidwe abasikalumamba.

Nzila eeyi yakabelesyegwa bumwi buzuba kutegwa bamutyompye misyinali iwakaangidwe. Bakamwaambila kuti balamulonzya kuzwa kuntolongo mwabede kuya “kumbi kubotu” kwamyezi iili cisambomwe kutegwa acikonzye kuyeeya kabotu. Nokuba boobo, mukwesu wakali kanzide kuzumanana kutobela njiisyo zya Bunakristo. Ino ncinzi cakamugwasya? Kumbele wakaamba kuti: “Ndakali kubona bulangizi bwa Bwami kuba bwamasimpe. . . . Kuyumizyigwa aluzyibo lwabwami bwa Leza, kubusyoma akutabudooneka kwakandigwasya kuti nditayungwi.”

Ino Bwami bwa Leza mbwamasimpe buti kuli ndiswe? Syaanene Abrahamu, mwaapostolo Paulo alimwi a Jesu mwini bakaliyumya mumasunko akaambo kakuti Bwami bakali kububona kuti mbwamasimpe. (Flp. 3:13, 14; Heb. 11:8-10; 12:2) Ikuti twazumanana kubikka Bwami kumbele mubuumi bwesu akuzumanana kuyeeya zilongezyo zitakamani, andiswe tulakonzya kuliyumya kumasunko aakonzya kutupa kukkomana kwaciindi cisyoonto.—2 Kor. 4:16-18.

Jehova Takatulekelezyi

Nokuba kuti Rabisake wakasoleka canguzu kubayoosya bama Juda, Hezekiya abantu bakwe bakazumanana kusyomeka kuli Jehova. (2 Bam. 19:15, 19; Is. 37:5-7) Jehova awalo wakawiingula mupailo wabo kwiinda mukutuma mungelo wakajaya basikalumamba bana Asuri bali 185,000 mubuzuba bomwe masiku. Buzuba bwakatobela, Sanakeribu wakafwambaana kujokela kwabo ku Nineve abasikalumamba bakwe basyoonto bakacaala.—2 Bam. 19:35, 36.

Masimpe, Jehova tanaakabalekelezya aabo bakazumanana kumusyoma. Izibacitikila bakwesu abacizyi mazuba aano ibazumanana kuliyumya nobapenzyegwa azyalo zitondezya kuti Jehova tabalekelezyi bantu bakwe. Kuli kaambo kabotu Taateesu wakujulu ncatusyomezyela kuti: “Mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.”—Is. 41:13.

Bupanduluzi buyungizidwe

Majwi aakwelelezya sikubala aali apeeji 13]

Jehova ulabaambila babelesi bakwe ziindi ziinda ku 30 mu Bbaibbele kuti: “Utayoowi”

[Cifwanikiso icili apeeji 12]

Ino nzila nzyaakali kubelesya Rabisake kweena bantu zikozyanya buti azyeezyo nzyobabelesya basinkondonyina abantu ba Leza bamazuba aano?

[Zifwanikiso izili apeeji 15]

Kumvwana a Jehova kulatugwasya kuti tuliyumye notuli mumasukusyo