Mibuzyo Yabasikubala

Ino nkaambo nzi Jesu ncaakaambila mukaintu wakalizyibidwe kuba sizibi kuti zibi zyakwe zyalekelelwa?—Lk. 7:37, 48.

Jesu naakali kulya muŋanda yamu Falisi umwi wazyina lya Simoni, mukaintu umwi wakafwugama kumaulu aa Jesu. Wakatesya maulu aa Jesu amisozi yakwe akwaapukuta amasusu aakwe. Kumane wakaamyonta maulu akwaananika mafwuta aanunkila. Makani Mabotu aamba kuti mukaintu ooyu wakali ‘simucita zibi wamumunzi oomo.’ Masimpe, muntu uuli woonse uutalondokede ngusizibi, pele Magwalo kanji-kanji aamba muntu kuti ngusizibi ikuti naa zibi zyakwe nzipati alimwi akuti naa muntu ooyu ujisi mpuwo yakucita zibi. Ciboneka kuti mukaintu ooyu wakali simamambe. Muntu uuli boobu Jesu ngwaakaambila kuti: “Wajatilwa zibi zyako.” (Lk. 7:36-38, 48) Ino Jesu wakali kupandulula nzi naakaamba majwi aaya? Mbwaanga cituuzyo cacinunuzyo tiicakaningacitwa aciindi eeci, ino nicakakonzyeka buti kulekelelwa?

Mukaintu naakamana kusanzya maulu aa Jesu akumunanika mafwuta pele katana lekelelwa, Jesu wakabelesya cikozyanyo naakali kwaambila Simoni mukamwini ŋanda kutondezya kaambo kayandika kapati. Kakozyanisya cibi kucikwelete cipati cikatazya kubbadalila, Jesu wakaambila Simoni kuti: “Bantu bobile abakali amulandu kumuntu umwi. Umulandu waumwi ngwamasheleni aali myaanda yosanwe, uwaumwi ngwamakumi osanwe. Eno mbobakabula cintu cakulunga, wakabajatila boonse bobile. Ino kulibaabo nguuli uuti muyandisisye?” Simoni wakaingula kuti: “Ndiyeeya kuti nguyooyo ngwaakajatilisya.” Mpoonya Jesu wakamwaambila kuti: “Wayeeya kabotu.” (Lk. 7:41-43) Toonse tuyandika kumumvwida Leza, aboobo ikuti naa tatumumvwidi alimwi katubisya, nkokuti tulaalilwa kubbadala cikwelete ncotujisi kuli nguwe. Munzila iili boobu cikwelete cesu cilakomena. Nokuba boobo, Jehova uli mbuli muntu uukweletesya alimwi uuyandisya kubalekelela aabo bantu bakakweleta. Nkakaambo kaako Jesu wakakulwaizya basikumutobela kuti kabapaila kuli Leza akulomba kuti: “Utulekelele milandu yesu, mbubonya mbuli mbutubalekelede aswe bali amilandu kulindiswe.”(Mt. 6:12) Lugwalo lwa Luka 11:4 lulatondezya kuti kuba acikwelete ncinyonyoono.

Ino muunzila nzi Leza mbwaakabalekelela bantu kaindi? Bulemu bwakwe bulondokede buyanda kuti muntu abisya weelede kufwa. Aboobo, Adamu wakacibbadela cibi cakwe abuumi. Nokuba boobo, Mulawo Leza ngwaakabapa bana Israyeli wakali kwaamba kuti, sikubisya wakali kukonzya kulekelelwa kwiinda mukutuula cipaizyo cabanyama kuli Jehova. Mwaapostolo Paulo wakaamba kuti: “Mumakani aa-Mulao bulowa mbobusalazya zintu zyoonse buyo, alimwi takukwe kulekelelwa kwazibi mane do kukutila bulowa.” (Heb. 9:22) Bajuda bakalizyi kuti kunyina nzila imbi Leza njakonzya kulekelela muntu. Aboobo, tacigambyi kuti bantu bakali kuswiilila naakali kwaambila mukaintu ooyu bakamukazya Jesu. Aabo ibakali kulya a Jesu bakatalika kubuzyanya kuti: “Nguni oyu uujatila zibi?” (Lk. 7:49) Aboobo, ino mukaintu ooyu sizibi inga walekelelwa buti?

Businsimi bwakusaanguna ibwakaambwa banabukwetene bakusaanguna nobakazanga buyo bwakali kwaamba makanze aa Jehova aakubusya “lunyungu” ilwakali kuya kulumwa kukasindi a “lunyungu” lwa Saatani. (Matl. 3:15) Kulumwa ooku kwakacitika ciindi Jesu naakajaigwa abasinkondonyina Leza. (Gal. 3:13, 16) Bulowa bwa Kristo bwakatilwa bwiiminina muulo wacinunuzyo walo uufwutula bantu kuzwa kucibi alufwu. Mbwaanga kunyina cintu cikonzya kumulesya Jehova kuzuzikizya makanze aakwe, majwi aalembedwe ku Matalikilo 3:15 naakaambwa buyo, Leza wakabona mbuli kuti cinunuzyo cacitika kale. Lino wakali kukonzya kubalekelela aabo boonse bakali kuzisyoma zyintu zyaakali kusyomezya.

 Kabutanatalika Bunakristo, Jehova wakaamba bantu bamwi kuti mbalulami. Akati kabaaba kwakali Enoki, Nowa, Abrahamu Rahabu a Jobu. Akaambo kalusyomo lwabo, bakali kulindila kuzuzikizyigwa kwa zisyomezyo zya Leza. Sikwiiya Jakobo wakalemba kuti: “Abrahamu wakasyoma Leza, nkabela lusyomo lwakwe lwakeelezegwa mbuli bululami.” Kujatikizya Rahabu, Jakobo wakaamba kuti: “Mbubonya obo alakwe Rahabi sibwaamu sa teewakalulamikwa kumilimo?”—Jak. 2:21-25.

Mwami Davida waku Israyeli yansiku wakacita zibi zipati, pele wakajisi lusyomo luyumu muli Leza wamasimpe akutondezya kweempwa kwini-kwini lyoonse abisya. Kuyungizya waawo, Magwalo aamba kuti: “Walo [Jesu] ngwaakabika Leza kuti abe mulungo, cakulusyomo lwamubulowa bwakwe. Ncitondezyo cabululami bwakwe, nkaambo kakuleka kwazibi ezyo izyakacitwa kalekale kuciindi cacambacilemu ca-Leza. Alimwi ncicitondezyo cabululami bwakwe kuciindi casunu, citondezya kuti Leza uliluleme, alimwi ulalulamika oyo muntu uumusyoma Jesu.” (Rom. 3:25, 26) Kwiinda mucituuzyo cacinunuzyo ca Jesu icakali kuya kupegwa kumbele, Jehova wakali kukonzya kumulekelela Davida kakunyina kusotoka mulawo Wakwe wabululami.

Cakutadooneka, kaambo kajatikizya mukaintu iwakamunanika mafwuta aanunkila Jesu kalakozyanya akaambo ka Davida. Tanaakali kulilemeka, pele wakeempwa. Wakazyiba kuti uyandika kunununwa alimwi wakatondezya kwiinda mumicito yakwe kuti ulamulumba muntu ngwabelesya Jehova kupa cinunuzyo eeci. Nokuba kuti cakacili kumbele, cituuzyo eeco cakali camasimpe cakuti cakali kukonzya kugwasya bantu mbuli nguwe. Nkakaambo kaako Jesu wakamwaambila kuti: “Wajatilwa zibi zyako.”

Kweelana ambokatondezya kaambo aaka, Jesu wakali kubayanda basizibi. Wakali kubacitila zyintu zibotu. Kunze lyaboobo, Jehova ulayanda kubalekelela basizibi beempwa. Eelo kaka cilatukkomanisya akutukulwaizya swebo notutalondokede!

[Cifwanikiso icili apeeji 7]

Bakaambwa kuti mbalulami