Atumuyandaule Jehova Kuti Atulongezye

“[Leza] nguupa cilumbo kulibaabo bamuyandaula.”—HEB. 11:6.

1, 2. (a) Ino mbuti bantu banji mbobalomba kuti Leza abalongezye? (b) Ino nkaambo nzi ncotweelede kuba aluyandisisyo lwakuti Jehova atulongezye?

“LEZA amuleleke.” Mumasena amwi tacili ceenzu kumvwa muntu uutakuzyi kakwaambila majwi aayo kuti naa weesyemuka. Basololi bazikombelo balakonzya kuleleka bantu, banyama azyintu zimwi zitaponi. Ibantu balakonzya kuyungwa abazikombelo zimwi kuti bamvwa kuti baya kulongezyegwa. Bali mutwaambo twacisi lyoonse balaamba kuti Leza acileleke cisi cesu. Sena muyeeya kuti kulomba kwabo kwakuti balongezyegwe kulayandika? Sena balazisyoma nzyobaamba? Ino mbaani balongezyegwa a Leza alimwi nkaambo nzi?

² Jehova waamba kuti kumazuba aakumamanino uyakuba abantu batajisi tumpenda alimwi ibaluumuno ibaya kuzwa muzisi zyoonse ibana kukambauka makani mabotu aa Bwami munyika yoonse nokuba kuti balasulwa akupezyegwa. (Is. 2:2-4; Mt. 24:14; Ciy. 7:9, 14) Iswebo notwazumina kuba akati kabantu aaba tulayanda kulelekwa a Leza, nkaambo tulizyi  kuti, ikuti watacita oobo tatukonzyi kuzwidilila. (Int. 127:1) Ino mbuti mbotukonzya kulongezyegwa a Leza?

Aabo Bamumvwida Balalongezyegwa

3. Ino ncinzi cakali kulangilwa kuti bana Israyeli nibakazumanana kumumvwida Leza?

³ Amubale Tusimpi 10:6, 7. Bana Israyeli kabatana njila Munyika Yakasyomezyegwa, Jehova wakabaambila kuti baya kukkala kabotu alimwi uya kubakwabilila kuti kabamuswiilila. (Dt. 28:1, 2) Izilongezyo zya Jehova zilakozya ‘kubasikila’ bantu ba Leza. Kulibaabo bamuswiilila, zilongezyo tazidoonekwi.

4. Ino kumvwida kwini-kwini kubikkilizya nzi?

⁴ Ino bana Israyeli bakali kukubona buti kumvwida? Imulawo wa Leza wakaamba kuti Leza uyakutyompwa kuti bantu bakwe bakaalilwe kumubelekela “cakukondwa acamoyo mubotu.” (Amubale Deuteronomo 28:45-47.) Tuyandika kwaatobela kabotu malailile aa Jehova ikutali kwiizya buyo mulawo mbuli mbobacita banyama naa madaimona. (Mk. 1:27; Jak. 3:3) Kumumvwida ncobeni Leza ncitondezyo cakuti tulamuyanda. Tulakonzya kucita oobo akaambo kalusyomo ndotujisi mumilawo yakwe Jehova njaakaamba kuti taili miyumu akuti “nguupa cilumbo kulibaabo bamuyandaula.”—Heb. 11:6; 1 Joh. 5:3.

5. Ino kusyoma zyintu zyaakasyomezya Jehova inga kwamugwasya buti muntu kuti katobela mulawo uuli ku Deuteronomo 15:7, 8?

⁵ Amubone kusyomeka mbukwakatondezyegwa nibakali kutobela mulawo uuli ku Deuteronomo 15:7, 8. (Amubale.) Kutobela mulawo ooyu kuli mbukwakabagwasya bacete, pele sena kucita boobu nikwakabapa kumvwana kabotu bantu ba Leza? Sena babelesi bakwe nibakatondezya lusyomo lwakuti Jehova ulakonzya kubapa nzyobayandika akumwiiya mbwaaba? Peepe. Leza wakali kukonzya kubona muntu waaba mbwalimvwa mumoyo akumusyomezya kumulongezya akaambo kamicito yakwe. (Dt. 15:10) Lusyomo luli boobu lulakonzya kumupa kuti mucite cimwi cintu alimwi eeci cilakonzya kumupa kuti mulongezyegwe kapati.—Tus. 28:20.

6. Ino bbuku lya Ba-Hebrayo 11:6 litusyomezya nzi?

⁶ Kuyungizya kukuba alusyomo muli Jehova uulongezya babelesi bakwe, ibbuku lya Ba-Hebrayo 11:6 litondezya zyintu zimwi ziyandika zikonzya kutupa kuti tulongezyegwe a Leza. Kamuyeeya kuti Jehova ulabalongezya “aabo bamuyandaula.” Ibbala eeli ndibakabelesya mumwaambo wakusaanguna lyaamba kusoleka canguzu. Eeci cilakonzya kutugwasya kulongezyegwa. Eeci cizwa buyo kuli Leza alikke wakasimpe “uutabeji.” (Tit. 1:2) Kwamyaka minji wali kutondezya kuti zyoonse nzyasyomezya nzyamasimpe. Zyoonse nzyaamba zilacitika. (Is. 55:11) Aboobo tulakonzya kusyoma kuti, ikuti katusyomeka ncobeni uyakutulongezya.

7. Ino mbuti mbotukonzya kulongezyegwa kwiinda mu “mbuto” ya Abrahamu?

⁷ Jesu Kristo wakatondezya kuti nguwakali “mbuto” yakusaanguna kuli Abrahamu. Bananike Banakristo mbabali mucibeela cabili ca “mbuto” eeyo yakasinsimwa. Bakapegwa mulimo “[wakwaambilizya] milimo iitembaulika yayooyo uwaka[ba]ita kuzwa mumudima aku[ba]njizya mumumuni wakwe uugambya.” (Gal. 3:7-9, 14, 16, 26-29; 1 Pet. 2:9) Tatukonzyi kulangila kuba acilongwe cibotu a Jehova kuti katutabalemeki aabo Jesu mbaakapa mulimo wakulanganya zyintu zyakwe. Kuti batatugwasya baciinga ca “muzike musyomesi uucenjede,” tatukonzyi kuzimvwisya nzyotubala mu Jwi lya Leza alimwi tatukonzyi kuzyiba mbozibelesyegwa. (Mt. 24:45-47) Kuti katuzicita nzyotwiiya mu Magwalo, tulakonzya kulongezyegwa a Leza.

Kwaabikkila Maano Makanze aa Leza

8, 9. Ino syaanene Jakobo wakacita buti kweelana amupailo wakwe?

⁸ Kusoleka canguzu kutegwa tulongezyegwe a Leza kulakonzya kutuyeezya syaanene Jakobo. Tanaakalizyi mbocakali kukonzya kuzuzikizyigwa  cisyomezyo Leza ncaakaambila Abrahamu, pele wakalizyi kuti Jehova wakali kukonzya kuluyungizya lunyungu lwasyaanene walo wakali abana bakali kuya kuba cisi cipati. Aboobo, mu 1781 B.C.E., Jakobo wakaunka ku Harani kwaakukwata. Tanaakali kuyanda buyo mukaintu uuboneka kabotu pe, pele wakali kuyanda muntu uyoowa alimwi uusyoma muli Jehova uukonzya kuba muzyali mubotu kubana bakwe.

⁹ Tulizyi kuti Jakobo wakajana musazinyina Rakele. Wakamuyanda Rakele alimwi wakazumina kubabelekela bausyi Rakele ba Labani kwamyaka iili ciloba kutegwa abweze mukaintu wakwe. Eeci tiicakali buyo caano cinoneezya cabantu bamvwana cakuti katuyeeyela mpawo. Jakobo wakalizyi ncaakabasyomezya Singuzuzyoonse Leza basyaanyinakulu ba Abrahamu alimwi ambobakakainduluka kaambo aaka kuli Izaka. (Matl. 18:18; 22:17, 18; 26:3-5, 24, 25) Amane awalo Izaka wakaambila mwanaakwe Jakobo kuti: “Leza Singuzuzyoonse akupe coolwe, akuzyazye loko, akuvuzye, kuti ube mikowa minji. Akupe lulongezyo lwa-Abrahamu, webo alunyungu lwako, ukavube nyika yabusimutuntuli bwako, Leza njaakapa Abrahamu.” (Matl. 28:3, 4) Aboobo, kusoleka kwa Jakobo ikujana mukaintu wakali kuyandika kwakapa kuti abe amukwasyi ngwaakaambide Jehova.

10. Ino ncinzi cakamupa kuti Jehova amulongezye Jakobo?

¹⁰ Jakobo tanaakali kulomba buvwubi kutegwa kabakkala kabotu amukwasyi wakwe. Wakali kulomba ncaakabasyomezya Jehova. Wakabikkila buyo maano kukuzuzikizyigwa kwamakanze aa Jehova. Jakobo wakali kanzide kucita cili coonse ncaakali kukonzya kutegwa amuleleke Leza nokuba kuti kwakali mapenzi. Wakazumanana kusyomeka noliba leelyo naakacembaala aboobo Jehova wakamulongezya.—Amubale Matalikilo 32:24-29.

11. Ino ncinzi ncotweelede kucita kweelana amakanze aa Leza aakaambwa?

¹¹ Mbuli Jakobo, andiswe tatutuzyi twaambo toonse tuya kupa kuti makanze aa Jehova azuzikizyigwe. Pele nokuba boobo, ikubala Jwi lya Leza, kutupa muzeezo wazyintu nzyotulangila kujatikizya “buzuba bwa Jehova.” (2 Pet. 3:10, 17) Mucikozyanyo, tatuzyi naa buya kusika  buzuba nzi, pele tulizyi kuti buli aafwaafwi. Tulasyoma kuti Ijwi lya Leza nolyaamba kuti tweelede kukambauka muciindi cisyoonto cacaala, tuya kulifwutula akufwutula baabo batuswiilila.—1 Tim. 4:16.

12. Ino ncinzi ncotusyoma?

¹² Tulizyi kuti mamanino alakonzya kusika kufwumba ciindi; Jehova takalindili kuti bantu boonse munyika bakakambaukilwe. (Mt. 10:23) Nokuba boobo, tulapegwa malailile aagwasya aambotweelede kukambauka kabotu. Tulatola lubazu mumulimo ooyu kusikila mpotukonzya, katubelesya zyintu zili zyoonse nzyotujisi. Sena lyoonse tunakukambaukila mumasena mobautambula kabotu mulumbe wabwami? Sena inga twazyiba kuti bantu bayakuutambula mulumbe ngotubakambaukila? (Amubale Mukambausi 11:5, 6.) Mulimo wesu ngwakukambauka akusyoma kuti Jehova uyakutulongezya. (1 Kor. 3:6, 7) Tulasyoma kuti ulatubona notusoleka kubeleka canguzu alimwi kwiinda mumuuya uusalala ulatupa malailile ngotuyandika.—Int. 32:8

Kulomba Muuya Uusalala

13, 14. Ino muuya uusalala wa Leza ubeleka buti akati kababelesi bakwe?

¹³ Ino kuti naa twalimvwa kuti tatukonzyi kuuzuzikizya mulimo umwi naa kukambauka? Tweelede kumulomba Jehova kuti atupe muuya uusalala kutegwa tuyungizye luzyibo ndotujisi mumilimo njotumubelekela. (Amubale Luka 11:13.) Muuya wa Leza ulakonzya kugwasya muntu kuti abeleke mulimo umwi kakunyina makani ambwaakali kupona kaindi. Mucikozyanyo, nibakazwa buyo mu Egipita, beembezi abazike bakagwasyigwa amuuya wa Leza kuti bazunde munkondo nokuba kuti tiibakacibwene kulwana. (Kul. 17:8-13) Kuzwa waawo, muuya nguwenya ooyu wakabasololela ba Bezaleli a Aholiabu mbobakeelede kuyaka tempele mbotu.—Kul. 31:2-6; 35:30-35.

¹⁴ Ooyu muuya uulaanguzu wakabagwasya babelesi ba Leza bamazuba aano kulanganya ziyandika zyambunga nobakatalika kusimba mabbuku aabo. Iwakali kulanganya fakitoli aciindi eeco, imulangizi Mukwesu R. J. Martin, mulugwalo, wakapandulula mulimo mbuwakeenda kusikila mu 1927. “Aciindi ceelede, Mwami wakajalula nzila; twakatambula muncini mupati wakusimbya nokuba kuti tiitwakauzyi mboubeleka amboubelesyegwa. Pele Mwami ulizyi mbwakonzya kubagwasya aabo balyaabide kumubelekela. . . . Munsondo zisyoonto buyo, twakali kukonzya kusimba zyintu zinji kwiinda anzyobakali kuyeeyela bakaubamba muncini.” Jehova wazumanana kulongezya milimo iili boobu kusikila sunu.

15. Ino lugwalo lwa Ba-Roma 8:11 inga lwabakulwaizya buti aabo basunkwa?

 ¹⁵ Muuya wa Jehova ulabeleka munzila zinji. Muuya ooyu nkuuli kubabelesi ba Leza boonse alimwi nguubagwasya kuliyumya mumasunko mapati. Ino kuti naa twasunkwa cakuzwa munzila? Inga twayumizyigwa amajwi aa Paulo aali ku Ba-Roma 7:21, 25 a 8:11. Inzya “[i]kuti ulimukalilide mukati Muuya wasikubusya Jesu kuzwa kubafu” inga watulwanina kutegwa tuzunde muzyintu zitukatazya mubuumi. Eeci cibeela cakalembelwa bananike Banakristo, pele njiisyo ilabajatikizya boonse babelesi ba Leza. Toonse tulaba abuumi kwiinda mukuba alusyomo muli Kristo, kwiinda mukulijata kucita zyintu zitali kabotu alimwi akupona kweelana ambotulaililwa amuuya.

16. Ino ncinzi ncotweelede kucita kutegwa tupegwe muuya uusalala wa Leza?

¹⁶ Sena Leza inga watupa inguzu zyakwe zyabelesya nokuba kuti kunyina ncotucita? Peepe. Nokuba kuti tulazipailila, tweelede kuti katulibala Ijwi lwa Leza ndyaakasololela amuuya. (Tus. 2:1-6) Kuyungizya waawo, muuya wa Leza ulajanika moonse mumbungano ya Banakristo. Ikujanika lyoonse kumiswaangano kutupa kuti “[tu]swiilile Muuya mb[u]waambila imbungano.” (Ciy. 3:6) Nokuba boobo, tweelede kuzibelesya kabotu zyotwiiya. Bbuku lya Tusimpi 1:23 litulaya kuti: “Amucenjele kutapatila kwangu. Njoomutilila muuya wangu.” Masimpe, Leza ulapa muuya wakwe uusalala “kuli [baabo] bamumvwa.”—Inc. 5:32.

17. Ino kusoleka kwesu akulongezyegwa a Leza kulakonzya kukozyanyisyigwa anzi?

¹⁷ Nokuba kuti kubeleka canguzu kulayandika kutegwa Leza atulongezye, tweelede kuzyiba kuti kucita boobo takukonzyi kupa kuti tube azyintu zibotu zyoonse Jehova nzyapa kubantu bakwe. Ikusoleka kwesu akulongezyegwa kulakonzya kukozyanyisyigwa abusani mbobajana bana kucakulya ncobalya icili kabotu. Leza wakaibamba kabotu mibili yesu cakuti tulacikkomanina cakulya alimwi tulajana busani muli ncico. Alimwi ulatupa acakulya. Tatuzyi mbotujana busani mucakulya alimwi tobanji tatukonzyi kupandulula mbotujana nguzu mucakulya ncotulya. Tuzyi buyo kuti cilabeleka alimwi tulaugwasya notulya. Kuti naa twasala kulya cakulya ciyaka mubili, eeci inga cagwasya. Mbumunya buyo, Jehova wakabikka zyintu ziyandika kucitwa kutegwa tukabe aabuumi butamani alimwi ulatugwasya kutegwa tukacikonzye. Nzinji nzyatugwasya aboobo uyandika kutembaulwa. Nokuba boobo, tweelede kubelekela antoomwe, kucita zyintu kweelana akuyanda kwa Leza kutegwa tulongezyegwe.—Hag. 2:18, 19.

18. Ino ncinzi ncimukanza kucita alimwi nkaambo nzi?

¹⁸ Aboobo, mweelede kubeleka canguzu kumilimo yoonse njomupegwa. Lyoonse mweelede kulanga kuli Jehova kutegwa mucikonzye. (Mk. 11:23, 24) Nomucita boobo, mweelede kuzyiba kuti ooyo “uuyandaula ulajana.” (Mt. 7:8) Ibananike bamuuya baya kulongezyegwa a “musini wabuumi” kujulu. (Jak. 1:12) Ba “mbelele zimwi” zya Kristo balabeleka canguzu kutegwa balongezyegwe, kwiinda mumbuto ya Abrahamu bayakukkomana kumumvwa kaamba kuti: “Amuboole, inywe nomuyandwa kuli-Taata, amukone bwami mbumubambilidwe kuzwa kumalengelo aanyika.” (Joh. 10:16; Mt. 25:34) Masimpe, “abo mbalongezya [Leza] bayoovuba nyika, . . . bayookala alinjiyo lyoonse.”—Int. 37:22, 29.

Sena inga mwapandulula?

• Ino kumvwida kwini-kwini kubikkilizya nzi?

• Ino ncinzi ciyandika kutegwa tulongezyegwe a Leza?

• Ino mbuti mbotukonzya kutambula muuya wa Leza alimwi mbuti mboukonzya kutugwasya?

[Mibuzyo yaciiyo]

[Zifwanikiso izili apeeji 9]

Jakobo wakalwana amungelo kutegwa alongezyegwe a Jehova.

Sena andinywe mulasoleka canguzu?

[Cifwanikiso icili apeeji 10]

Muuya wa Leza wakabagwasya kuzwidilila ba Bezaleli aba Aholiabu