Mulimo Waalubazu Ku Bulgaria Wakeenda Kabotu

“Kutebula kwavula, batebuzi bacea. Nkaambo kaako amukumbile mwami uuli amuunda kuti atume batebuzi kukutebula kwakwe.”—MT. 9:37, 38.

MAJWI aaya aa Jesu akaba aamasimpe ku Bulgaria, icisi cibotu kumusanza aa Europe. Kuyandika babelesi banji bakonzya kukambauka makani mabotu kubantu bainda ku 7,000,000. Kuli basikumwaya basika ku 1,700 mu Bulgaria, pele tabakonzyi kukambauka mucilawo coonse. Aboobo, ba Kabunga Keendelezya, bakazumizya kuti Bakamboni baambaula mwaambo waku Bulgaria kuzwa kuzisi zyaku Europe baunke kwaakubeleka mulimo wakukambauka waalubazu ku Bulgaria mu 2009. Mulimo waalubazu ooyu wakeelede kucitwa munsondo zili ciloba lyacilimo ciindi nowakali kutalika Muswaangano Wacooko ku Sofia wakuti “Amulangile!” iwakacitika mu August 14-16, 2009.

Bantu Banji Bakalyaaba

Bakwesu bakuofesi yamutabi ku Sofia tiibakalizyi kuti naa mbongaye basikumwaya bayakulyaaba kuzwa ku France, Germany, Greece, Italy, Poland aku Spain. Bakeelede kulibbadalila kuunka ku Bulgaria kwaakukambauka. Eelo kaka cakali kukkomanisya kubona kuti bantu ibakalyaaba bakasika ku 292! Akaambo kakuti kwakali basikumwaya banji ibakalyaaba, cakakonzyeka kubatuma kumadolopo otatwe aamu Bulgaria: ku Kazanlak, Sandanski aku Silistra. Balangizi babbazu bakalomba bapainiya abasikumwaya bamu Bulgaria kuti abalo batole lubazu mumulimo waalubazu ooyu. Mukuya kwaciindi, basikumwaya bali 382 bakabelekela muzilawo zyatakali kubelekelwa kapati amakani mabotu.

Bakwesu bamumbungano zili afwaafwi bakalombwa kuti babambe masena aakoona aabeenzu aaba. Bakabayandauda maanda amahotela aataduli. Aaba bakwesu bakucilawo eeci bakabeleka kapati ikugwasya beenzu kuti bakkalikane akubajanina nzibakali kuyandika. Mumadolopo oonse otatwe aaya bakajana masena aataduli mobakali kuswaanganina. Bakacita bubambe bwakuti miswaangano yambungano kayeendelezyegwa abeenzu. Cakali kukkomanisya kubona basikumwaya bali 50 kabaswaangana kutembaula Jehova mumasena mwatakali Bakamboni.

Eelo kaka cakali kukkomanisya ikubona bakwesu bakazwa kuzisi zimbi kababeleka canguzu! Icilimo ku Bulgaria kulaakupya kapati kusikila ku 40°C. Nokuba boobo, kwiina cakali kukonzya kubalesya kubeleka canguzu ibakwesu abacizyi aaba. Dolopo lya Silistra ilili munsi-munsi aa Mulonga wa Danube imuli bantu bainda ku 50,000, munsondo zyotatwe zyakutaanguna bakakambauka kabotu cakuti bakalimanizya dolopo lyoonse. Aboobo bakwesu bakabeleka canguzu cakuti bakaakusika kuminzi yakali ku Tutrakan kulampa makilomita aali 55 kumbo aa Silistra. Bakali kutalika mulimo wabo muma 09:30 cifwumo-fwumo. Bamana kulyookezya masikati bakali kuzumanana amulimo wabo kusikila muma 7:00 yamangolezya naa kwiinda aawo. Mbubwenya buyo, akwalo ku Kazanlak a Sandanski akaambo kakubeleka canguzu bakazumanana kubeleka kwaakusika muminzi amadolopo aali munsi-munsi.

 Ino Ncinzi Cakacitika?

Bakamboni bakakambauka kapati munsondo zili ciloba. Mbubwenya mbubakaamba muciindi cabaapostolo, ibantu bamumadolopo bakaamba kuti, ‘mwazuzya dolopo yesu anjiisyo yanu.’ (Inc. 5:28) Bakamboni bakatola lubazu bakamwaya mamagazini aasika ku 50,000 alimwi bakatalisya ziiyo zya Bbaibbele zili 482. Cikkomanisya ncakuti mu September 1, 2009, imbungano yakatalisyigwa ku Silistra alimwi ku Kazanlak aku Sandanski kuli tubunga. Cilakkomanisya ikubona bantu ibakamvwa makani mabotu ciindi cakutaanguna kabayaambele kumuuya.

Nsondo yakutaanguna yakukambauka, mucizyi mupainiya wakali kwaambaula mwaambo waku Bulgaria wakazwa ku Spain wakakambaukila Karina mukaintu iwakali kusambala mapepa mumbali aamugwagwa. Karina wakazikkomanina nzyaakamvwa amane wakaboola kumuswaangano. Wakazumina kwiiya Bbaibbele. Balumi bakwe tabasyomi muli Leza, aboobo wakalomba kuti kabayiila mupaaki musobanina bana. Bakali kwiiya antoomwe abana bakwe basimbi bobilo. Daniela, imupati akati kabana wakakakkomanina kapati kasimpe kamu Bbaibbele. Wakalibala bbuku lya Bbaibbele Ncoliyiisya munsondo yomwe buyo mpoonya wakaleka kubelesya mituni mukukomba kweelana ambwaakaiya mu Bbaibbele. Amane wakatalika kwaambila beenzinyina kasimpe. Nikwakainda buyo nsondo zyotatwe kuzwa naakatalika kuunka kumiswaangano, wakaambila mucizyi iwakali kumuyiisya Bbaibbele kuti: “Ndilimvwa mbuli kuti ndili Kamboni andime. Ino ncinzi ncondeelede kucita kutegwa nditalike kukambauka?” Daniela wazumanana kuyaambele kumuuya antoomwe abanyina amusyoonto wakwe.

Ku Kazanlak, Orlin mukwesu waku Bulgaria iwakazwa ku Italy naakali kupiluka kuŋanda kuzwa mumulimo wamumuunda, wakakambaukila basankwa bobilo ibakakkede mupaaki. Wakabapa mabbuku aa Bbaibbele Ncoliyiisya akubaambila kuti uyakuboola alimwi cifwumo. Nakapilukila Orlin, wakatalika ciiyo ca Bbaibbele a Svetomir calo cazumanana kusikila sunu. Mumazuba aali fwuka Orlin wakaiya a Svetomir ziindi zili lusele. Svetomir wakaamba kuti: “Mazuba obilo kotaninga boola, ndakapaila kuli Leza kutegwa andigwasye kumuzyiba. Alimwi ndakamwaambila kuti aakundigwasya, ndiya kulyaaba kuli nguwe.” Orlin naakajokela ku Italy, ibakwesu baku Bulgaria bakazumanana kwiiya a Svetomir walo uucita kabotu kumuuya.

Balalongezyegwa Aabo Balyaaba

Ino balimvwa buti aabo balyaaba kubelesya mazuba aabo aakulyookezya alimwi  akulibbadelela kuya kucisi cimbi kwaakukambauka makani mabotu? Mwaalu uubelekela ku Spain wakalemba kuti: “Mulimo wakukambauka ooyu waalubazu wakapa kuti bakwesu baku Bulgaria bali mu Spain bakamantane. Eeci cakabagwasya kapati bakwesu bakatola lubazu.” Banabukwetene baku Italy bakalemba kuti: “Eelo kaka ooyu wakali mwezi mubotu kulindiswe!” Mpoonya bakayungizya kuti: “Mulimo waalubazu ooyu wakacinca buumi bwesu.” Banabukwetene aaba bakatalika kuyeeya kuti balongele ku Bulgaria kwaakubelekela kubusena kubulide basikumwaya. Carina mucizyi uutakwetwe mupainiya waciindi coonse uuzwa ku Spain awalo wakatola lubazu mumulimo ooyu ku Silistra. Naakapiluka ku Spain wakacileka kubeleka mulimo wakumubili akujokela ku Bulgaria kwaakugwasyilizya mumbungano mpya iili mudolopo ya Silistra. Wakayobola mali manji ngaakali kukonzya kubelesya kwamwaka omwe ku Bulgaria. Carina waamba kuti: “Ndilikkomene kapati kuti Jehova wandizumizya kumubelekela ku Bulgaria, alimwi ndilombozya kuti ndikkale kuno kwaciindi cilamfwu. Ndilijisi kale ziiyo zya Bbaibbele zyosanwe alimwi botatwe balaakuboola kumiswaangano.”

Mucizyi waku Italy awalo wakali kuyanda kutola lubazu mumulimo ooyu, pele akaambo kakuti wakatalika mulimo mupya, tanaakajisi mazuba aakubelesya. Wakalomba kuti alyookezye kwamwezi omwe kakunyina kubbadelwa pele wakalilibambilide kuti naa batamuzumizyi uyakucileka kubeleka. Wakagambwa ibapati bamulimo nibakamwaambila kuti: “Cili buyo kabotu, pele ciyandika buyo ncakuti ukanditumine kkaadi yaku Bulgaria.” Mucizyi ooyu wakalimvwa kuti Jehova wakawiingula mupailo wakwe.

Stanislava, imucizyi uukkala mudolopo lya Varna mu Bulgaria walo iwakali kubeleka mulimo uuvwolwa mali manji, wakabweza mazuba aakwe aakulyookezya kutegwa atole lubazu mumulimo wakukambauka ku Silistra. Naakabona mbobakakkomene bapainiya banji ibakaboola kuzwa kuzisi zimbi, wakalila. Wakatalika kuyeeya ncaakali kucita mubuumi bwakwe, ikubeleka mulimo wakumubili waciindi coonse. Naakajokela kumunzi nizyakamana nsondo zyobilo, wakacileka mulimo akutalika bupainiya bwaciindi coonse. Lino ulikkomene kapati, ikuyeeya Mulengi wakwe kacili mwana.—Muk. 12:1.

Eelo kaka ncilongezyo cipati ikubelekela cabusungu mumulimo wa Jehova! Kunyina cintu cibotu kwiinda kubelesya ciindi anguzu zyanu mumulimo wakuyiisya akukambauka makani mabotu. Sena kuli ncomukonzya kucita kutegwa mube aciindi cinji cakubeleka mulimo ooyu uupa buumi? Ndiza kuli masena mucisi canu kwalo ikuyandika basikumwaya. Sena inga mwalongela kubusena buli boobu? Ambweni mulakonzya kwiiya mwaambo uumbi kutegwa mugwasye bantu baambaula mwaambo ooyo mucisi canu? Kufwumbwa nzyomukonzya kucita kutegwa mube aciindi cinji cakukambauka, amuzyibe kuti Jehova uyakumulongezya kapati.—Tus. 10:22.

Kabbokesi/[Cifwanikiso icili apeeji 32]

Buzuba Mbobatakalubi

Bantu banji ibakaboola ku Bulgaria kuzwa kuzisi zyaku Europe kuti batole lubazu mumulimo waalubazu bakajanika ku Muswaangano Wacooko wakuti “Amulangile!” iwakacitikila ku Sofia. Bakwesu abacizyi baku Sofia bakakulwaizyigwa kapati kubonana abeenzu aaba bazwa kuzisi zimbi. Eelo kaka cakali kukkomanisya kapati kubantu bakajanika kumuswaangano ooyu ibali 2,039 ciindi Mukwesu Geoffrey Jackson wamu Kabunga Keendelezya naakatondezya Bbaibbele lya New World Translation of the Holy Scriptures lyamumwaambo waku Bulgaria! Boonse ibakajanika kumuswaangano muli Bwasanu bakakamba kwaciindi cilamfwu kutondezya kuti bakalumba kapati. Banji bakalila akaambo kakukkomana. Eeli Bbaibbele ilyakasandululwa mumwaambo muuba-uba kumvwa liyakubagwasya kapati bantu babombe myoyo baku Bulgaria kuti bamuzyibe Jehova.

Maapu iili apeeji 30, 31]

(Kutegwa mubone bwini mbwaakkede mabala, amubone bbuku lini)

BULGARIA

SOFIA

Sandanski

Silistra

Kazanlak

[Zifwanikiso izili apeeji 31]

Bakamboni bakakambauka kapati munsondo zili ciloba