Musololi Wesu Uubeleka Canguzu Aano Mazuba
Musololi Wesu Uubeleka Canguzu Aano Mazuba
“Wakainka kuya buzunda akuzunda.”—CIY. 6:2.
1, 2. (a) Ino milimo njacita Kristo kali mwami kuzwa mu 1914 itondezyegwa buti mu Bbaibbele? (b) Ino kuzwa ciindi naakabikkwa abwami Kristo, ncinzi ncacita?
KRISTO wakabikkwa kuti abe Mwami mu Bwami bwabu Mesiya bwa Jehova mu 1914. Ino tumubona buti? Mbwali mwami uukkede acuuno, sena ulalanga-langa munyika ciindi aciindi kubona mbungano mbozyibeleka? Ikuti naa mbotumubona oobo tweelede kucinca. Ibbuku lya Intembauzyo alya Ciyubunuzyo limwaamba kuti mwami uuli anguzu uukkede abbiza “kuya buzunda akuzunda” kusikila “kumamanino.”—Ciy. 6:2; Int. 2:6-9; 45:1-4.
2 Ikuzunda kwakutaanguna nkwaakacita naakabikkwa buyo kuba mwami, cakali ciindi naakazunda “Simwaaba . . . abaangelo bakwe.” Mikayelo angelo kali mupati wabangelo, Kristo wakawaala Saatani amadaimona aakwe ansi kuzwa kubusena busalala kujulu. (Ciy. 12:7-9) Amana, kabelesya cuuno cakwe kali “mutumwa wacizuminano” wa Jehova, Jesu wakaboola a Bausyi kuzi kulanga-langa tempele lyakumuuya. (Malk. 3:1) Wakabeteka bukombi bwakubeja bwacibeela ca “Babuloni Mupati” wakajanika amulandu wakutila bulowa alimwi awakacita bwaamu bwakumuuya abasitwaambo twacisi bamunyika.—Ciy. 18:2, 3, 24.
Kusalazya Bazike Bakwe Bali Munyika
3, 4. (a) Ino mulimo nzi Kristo ngwaakacita mbuli “mutumwa” wa Jehova? (b) Ino kulanga-langa tempele kwakayubununa nzi, alimwi ino mbaani mbaakasala Jesu kali Mupati wambungano?
3 Ikulanga-langa nkwaakacita Jehova a “mutumwa” wakwe akwalo kwakatondezya kabunga ka Banakristo bakasimpe mulubuwa lwatempele yamuuya iili anyika, ibatakali muzikombelo zya Banakristo bakubeja. Nokuba boobo, abalo Banakristo bananike naa “bana ba-Levi” bakali kuyandika kusalazigwa. Cakacitika mbumunya musinsimi Malaki mbwaakaamba kuti: “[Jehova] uyookala mbuli mufuzi uusalazya insiliva. Uyoosalazya bana ba-Levi, akubabotya mbuli mbwiibotesegwa ingolida ansiliva, kuti baletele Jehova cituuzyo camubululami.” (Malk. 3:3) Jehova wakabelesya “mutumwa wacizuminano,” Kristo Jesu kuti abasalazye aaba bana Israyeli bakumuuya.
4 Nokuba boobo, Kristo wakajana kuti ibamwi Banakristo bananike basyomeka bakali kubeleka canguzu kutegwa babape cakulya cakumuuya bamuŋanda yabo basyomeka. Kuzwa mu 1879 kusika lino cakupengelela bali kumwaya kasimpe kamu Bbaibbele kaamba zya Bwami bwa Leza mumagazini eeyi. Jesu wakasinsima kuti ‘aakusika’ kulanga-langa bamuŋanda yakwe “[ku]mamanino aaciindi,” uyakujana muzike ulabapa “zilyo zyabo kuciindi ceelede.” Muzike ooyu uya kumwaamba kuti ulikkomene alimwi “uzoomukazika kuti abe mupati wazintu zyoonse nzyajisi” munyika. (Mt. 24:3, 45-47) Mbwali Mupati wambungano ya Banakristo, Kristo ubelesya “muzike musyomesi uucenjede” kutegwa alanganye mulimo wakwe wabwami anyika. Ulabapa malailile bananike “bamuŋanda” yakwe abeenzyinyina ba “mbelele zimwi” kwiinda mu Kabunga Keendelezya.—Joh. 10:16.
Kutebula Munyika
5. Ino imwaapostolo Johane ncinzi ncaakabona mucilengaano ciyakucitika mu Bwami bwabu Mesiya?
5 Imwaapostolo Johane wakabona cilengaano cakali kutondezya cakali kuyakucita kuzwa naakabikkwa Jesu acuuno ca Bwami bwabu Mesiya mu 1914 kusikila “kubuzuba bwa-Mwami.” Johane wakalemba kuti: “Ndakalanga, ndabona ikumbi lituba, nkabela atala akumbi kwakalikede umwi uukozyenye a-Mwana a-Muntu. Kumutwe wakwe wakalijisi musini wangolida, amujanza lyakwe cigonsyo cibosya.” (Ciy. 1:10; 14:14) Johane wakamumvwa mungelo wa Jehova naakali kwaambila Sikutebula ooyu kuti abelesye sika lyakwe nkaambo “maila oonse aanyika abizwa.”—Ciy. 14:15, 16.
6. Ino ncinzi Jesu ncaakaamba kuti ciyakulibonya mukuya kwaciindi?
6 Ooku ‘kutebula munyika’ kutuyeekezya cikozyano ca Jesu camaila ansaku. Jesu wakalikozyanisya kumuntu wakasyanga maila kutegwa akatebule maila alikke aali kabotu, eeci cakali kwiiminina “bana ba-Bwami” Banakristo bakasimpe bananike ibaya kulela anguwe mu Bwami bwakwe. Pele masiku “Diabolosi” sinkondonyina a Jesu wakasyanga nsaku, eeci cakali kwiiminina “bana ba-Mubi.” Iwakasyanga wakaambila babelesi bakwe kuti baaleke maila ansaku zikomenene antoomwe kusikila ciindi cakutebula, nkokuti “mamanino aaciindi.” Aciindi eeco, uyakutuma bangelo kuti baandaanye maila ansaku.—Mt. 13:24-30, 36-41.
7. Ino Kristo uubeleka buti mulimo ‘wakutebula munyika’?
7 Ikuzuzikizigwa kwa cilengano ncaakabona Johane, Jesu wali kuweendelezya mulimo wakutebula wanyika yoonse. ‘Kutebula munyika’ kwakatalika nibakatalika kubunganya baceede akati kaba 144,000 “bana ba-Bwami” nkokuti “maila” aamucikozyanyo ca Jesu. Ikwiindana kuliko akati ka Banakristo bakasimpe abakubeja kwakalibonya niyakamana Nkondo ya Nyika Yakutaanguna, eeci cakapa kuti kube cibeela cabili ‘cakutebula munyika’—ikuyobolola bambelele zimwi. Aaba tabali “bana ba-Bwami” pele “[mba]nkamu impati” ibaliyandila kweendelezyegwa a Bwami oobu. Bakatebulwa kuzwa akati kabantu “bazisi zyoonse abamisyobo yoonse abamyaambo yoonse.” Balalibombya ku Bwami bwabu Mesiya, bwalo bubikkilizya Jesu aba 144,000 “basalali” ibana kubeleka anguwe mumfwulumende yakujulu.—Ciy. 7:9, 10; Dan. 7:13, 14, 18.
Bweendelezi bwa Mbungano
8, 9. (a) Ino ncinzi citondezya kuti Kristo talangi buyo zyintu zicitika mumbungano yoonse pele ulalanga azyintu zicita muntu amuntu? (b) Kweelana ambokutondezyedwe apeeji 26, ino “makani malamfu aabulondo bwa-Saatani” aali ngotweelede kutantamuka?
8 Kweelana ambotwaiya mucibalo cainda, twabona Kristo mbwaakali kwiibona milimo yakali kucitwa mumbungano zyamumwaanda wamyaka wakusaanguna C.E. Mazuba aano Kristo mbwali Mwami wesu “[waka]pegwa bwami boonse . . . bwakujulu nibuba bwaansi,” nguusololela akulanganya baabo beendelezya mbungano nyika yoonse. (Mt. 28:18; Kol. 1:18) Jehova “wakamubika kuti abe simutwe wazintu zyoonse kumbungano” yabananike. (Ef. 1:22) Aboobo, taaku ncatazyi icicitika mumbungano ziinda ku 100,000 zya Bakamboni ba Jehova.
9 Kumbungano yaku Tuataira yansiku Jesu wakatuma mulumbe wakuti: “Ngaaya makani ngaamba Mwana a-Leza, oyo uujisi meso aali mbuli ibbalabala lyamulilo, . . . Ndizi milimo yako mbwiibede.” (Ciy. 2:18, 19) Wakabakalalila bakali mumbungano eeyi akaambo kakutalilemeka kwabo akuyandisya kulikondelezya kutali kabotu aboobo wakabaambila kuti: “Umwi aumwi wanu njoomwaabila mbubonya mbwiibede milimo yakwe.” (Ciy. 2:23) Eeci citondezya kuti Kristo talangi buyo micito yambungano pele ulalanga amicito yamuntu aumwi uuli mumbungano. Jesu wakabalumbaizya Banakristo baku Tuataira akaambo kakuti ‘tiibakajisi lwiiyo lwa kuziba makani malamfu aabulondo bwa-Saatani.’ (Ciy. 2:24) Ncimwi buyo amazuba aano, ulabakkomanina bana abapati ibatayandauli “makani malamfu aabulondo bwa-Saatani” kwiinda mukubelesya Intaneti, zisobano zyaamavidiyo zyankondo naa kwiinda mukuyungwa abantu. Cilamukkomanisya kubona Banakristo kabasoleka canguzu kucita zyintu zibotu kutegwa kabatobela nzyayanda mubuumi bwabo boonse.
10. Ino mbuti Kristo mbwabasololela baalu mumbungano, alimwi ino ncinzi ncobeelede kuziba?
10 Kristo ulaisololela kabotu mbungano yakwe anyika kwiinda mubaalu basalidwe. (Ef. 4:8, 11, 12) Balangizi boonse bamumwaanda wakusaanguna bakali bananike. Mubbuku lya Ciyubunuzyo bakalibonya mbuli nyenyeezi zyakali mujanza lya Kristo lya kululyo. (Ciy. 1:16, 20) Mazuba aano, ibaalu banji mbambelele zimwi. Kabatanasalwa, kulaba mupailo alimwi imuuya uusalala ulabasololela kutegwa abalo kabasololelwa a Kristo. (Inc. 20:28) Aboobo, balabona kuti Kristo ubelesya kabunga kasyoonto ka Banakristo bananike iba Kabunga Keendelezya kuti kabasololela basikwiiya bakwe bali munyika.—Amubale Incito 15:6, 28-30.
“Koboola, O Mwami Jesu”
11. Ino nkaambo nzi ncotuyandisisya kuti Musololi wesu afwambaane kuboola?
11 Icilengaano ncaakaabona mwaapostolo Johane citondezya kuti ziindi zinji Jesu wakaamba kuti ulaboola ino-ino. (Ciy. 2:16; 3:11; 22:7, 20) Cakutandooneeka, wakali kwaamba kubetekwa kwa Babuloni Mupati abweende bwazintu bubyaabi bwa Saatani. (2 Tes. 1:7, 8) Kalangila kuzuzikizyigwa kwazyintu zibotu zyakasinsimwa, mwaapostolo mudaala wakaamba kuti: “Ameni! Koboola, O Mwami Jesu.” Iswebo notupona kuciindi cino camamanino cabweende bwazintu bubyaabi tulangila kubona Musololi a Mwami aakuboola mu Bwami bwakwe kuti akalomye zyina lya Bausyi abweendelezi Bwakwe bululeme.
12. Mulimo nzi Kristo ngwayelede kumanizya muwo wakunyonyoona kautanalekezyegwa?
12 Jesu katanainyonyoona mbunga ya Saatani iilibonya, ibankamu ya 144,000 bayakucaalizya ibali mukabunga kabana Israyeli bakumuuya baya kugwalwa. Ibbaibbele lilacisalazya nolyaamba kuti imuwo wakunyonyoona bweende bwa Saatani taukanyonyooni kusikila kugwalwa kwaba 144,000 kukamane.—Ciy. 7:1-4.
13. Ino Kristo uyakukutondezya buti kubako kwakwe kumamanino aa “mapenzi mapati”?
13 “Kubako” kwa Kristo kuzwa mu 1914 tiikwazyibwa abantu banji bakkala munyika. (2 Pet. 3:3, 4) Nokuba boobo, ino-ino uyakulitondezya kuti nkwali aakucita mbeta zya Jehova kwiinda mukunyonyoona zyintu ziindene-indene zili mubweende bwa Saatani bwamazuba aano. Ikunyonyoonwa kwa “muntu mubi,” ibasololi babukombi bwakubeja ncitondezyo “[c]akuboola kwakwe.” (Amubale 2 Tesalonika 2:3, 8.) Ciyakutondezya caantangalala kuti Kristo ulabeleka kali mubetesi wakasalwa a Jehova. (Amubale 2 Timoteo 4:1.) Ikunyonyoonwa kwa Bunakristo bwanyika bwalo buli ncibeela ca Babuloni Mupati buya kusaanguna kunyonyoonwa, kwaakumana bukombi bwakubeja boonse bwamunyika buya kunyonyoonwa cakumaniina. Jehova uyakupa kuti basololi batwaambo twacisi babe amuzeezo wakumunyonyoona sikuvuula ooyu mupati. (Ciy. 17:15-18) Aayo ngaayakuba matalikilo a “mapenzi mapati.”—Mt. 24:21.
14. (a) Ino cibeela cakusaanguna camapenzi mapati ciyakufwiinsilwa nzi? (b) Ino “citondezyo ca-Mwana a-Muntu” ciyakwaamba nzi kubantu ba Jehova?
14 Jesu wakaamba kuti mazuba aamapenzi mapati ayakufwiinsigwa “nkaambo kabasale” Banakristo baciceede anyika. (Mt. 24:22) Jehova takazumizyi Banakristo bananike abambelele zimwi kuti bakanyonyoonwe aakunyonyoona bukombi bwakubeja. Jesu wakayungizya kuti “musule lyamapenzi aamazuba ayo,” kuyakuba zitondezyo kuzuba, kumwezi alimwi akunyenyeezi, “kuyooboneka citondezyo ca-Mwana a-Muntu kujulu.” Eeci ciyakupa kuti bamasi munyika ‘batalike kulila.’ Eeci tacikacitiki kubananike ibajisi bulangizi bwa kujulu naa kubeenzyinyina bajisi bulangizi bwakupona anyika. ‘Bayoolanga mujulu akulungumika mitwe yabo nkaambo kunununa kwabo kuli afwaafwi.’—Mt. 24:29, 30; Lk. 21:25-28.
15. Ino mulimo nzi Kristo ngwayakucita aakuboola?
15 Katanamanizya kulwana, Mwana amuntu uyakuboola munzila iimbi. Wakaamba kuti: “Lino Mwana a-Muntu naazooboola mubulemu bwakwe antoomwe abaangelo bakwe, uzookala acuuno cabulemu bwakwe, nkabela misyobo yoonse izoobunganisigwa kubusyu bwakwe. Mpawo uzoobaandaanya mbuli mweembeli mbwaandaanya imbelele ampongo. Lino imbelele uzoozibika kululyo lwakwe, impongo uzoozibika kucimwensi cakwe.” (Mt. 25:31-33) Eeci caamba Kristo aakuboola kubeteka bantu ba “misyobo yoonse” akubaandaanya muzyibeela zyobilo: “imbelele” mbabaabo bakali kulubazu lwabanyina bakumuuya (Banakristo bananike bacili anyika) alimwi “mpongo,” mbabaabo “batamuzi Leza akutaswiilila Makani Mabotu aa-Mwami wesu Jesu.” (2 Tes. 1:7, 8) Imbelele izyaambwa aawa “[mba]balulami” bayooba “[a]buumi butamani” anyika pele impongo mbabaabo “bayoonjila mumapenzi aatamani” naa kujaigwa.—Mt. 25:34, 40, 41, 45, 46.
Jesu Wazunda
16. Ino Kristo Musololi wesu uyakuzunda buti?
16 Baaku gwalwa bami abapaizi boonse alimwi imbelele zyoonse zyaakuzyibwa akubikkwa kujanza lyalulyo kutegwa bafwutulwe, Kristo ‘uyakuzunda.’ (Ciy. 5:9, 10; 6:2) Kasololela nkamu ya bangelo balaanguzu abaabo banyina bakabusyigwa, uyakutunyonyoona itubunga twatwaambo twacisi, basikalumamba abweende bwamakwebo bweendelezyegwa a Saatani anyika. (Ciy. 2:26, 27; 19:11-21) Kristo uyakuzunda aakunyonyoona bweende bubyaabi bwa Saatani. Aakumana kucita boobo, uyakumufwusa Saatani amadaimona aakwe mumulindi uutagoli kwamyaka iili cuulu.—Ciy. 20:1-3.
17. Ino Kristo uyakubasololela kuli bambele zimwi mubulelo bwa myaka iili cuulu alimwi ino tweelede kukanza kucita nzi?
17 Kaamba “nkamu mpati” yambelele zimwi zyabaabo bayakufwutuka mapenzi mapati, mwaapostolo Johane wakasinsima kuti “Mwanambelele uuli akati kacuuno ca-Leza uyoobeembela akubasololela kutusensa twamaanzi aabuumi.” (Ciy. 7:9, 17) Masimpe mu Myaka yoonse Iili Cuulu ya Bulelo ba Kristo, uyakuzumanana kubeendelezya bambelele zimwi ibatobela ncaamba alimwi uyakubasololela kuti bakabe abuumi butamani. (Amubale Johane 10:16, 26-28.) Aboobo atuzumanane kusyomeka ku Muleli wesu—kusikila tukanjile munyika mpya njaakatusyomezya Jehova.
Kwiinduluka
• Ino ncinzi ncayakucita Kristo akubikkwa acuuno?
• Ino mbaani Kristo mbabelesya kweendelezya mbungano munyika?
• Muunzila nzi Kristo Imuleli wesu mbwayakuboola?
• Ino muunzila nzi Kristo mbwayakuzumanana kutulela amunyika mpya?
[Mibuzyo yaciiyo]
[Cifwanikiso icili apeeji 29]
Kunyonyoonwa kwabweende bwa Saatani bwamazuba aano kuyakupa kuti bazyibe kuti Kristo nkwali