Amubagwasye Bana Kuti Baizyibe Kabotu Mbunga ya Jehova

BANA balayanda kwiiya. Amuyeeye mibuzyo ibana bana Israyeli bakali mu Egepita njobakajisi imasiku nikwakali Pobwe lyakusaanguna lya Kwiindilila: ‘Nkaambo nzi ncaajailwa mwanaambelele?’ ‘Nkaambo nzi Bataata ncobabikka bulowa amulyango?’ ‘Ino tuunka kuli?’ Malailile Jehova ngaakaambila bamausyi bana Israyeli atondezya kuti wakaikkomanina mibuzyo eeyo. Kujatikizya mbobakali kuyoosekelela Mapobwe aa Kwiindilila kumbele, Jehova wakabaambila kuti: “Bana banu nebayoomubuzya kuti, Ino milimo eyi ilaambanzi? muleelede kuvuwa kuti, Ncecipaizyo capasika ca-Jehova, nkaambo wakaindilila maanda aabana ba-Israyeli bamu-Egepita ciindi eciya naakajaya ba-Egepita; wakavuna maanda esu.” (Kul. 12:24-27) Kumbele, Jehova wakayeezya bazyali bana Israyeli kujatikizya mbokwakali kuyandika kwiingula mibuzyo yabana babo iijatikizya “milazyo ambeta” nzyaakalailila Jehova.—Dt. 6:20-25.

 Cilasalala kuti Jehova wakali kuyanda kuti bana kabajana bwiinguzi bumvwika kumibuzyo njibakajisi kujatikizya bukombi bwakasimpe—bwiinguzi ibwakali kukonzya kubakulwaizya kuyanda Jehova Leza alimwi Mufwutuli wabo. Amazuba aano, Jehova ncalangila kubana besu. Inzila imwi bazyali mbobakonzya kuyiisya bana babo kutegwa bamuyande Leza abantu bakwe kuzwa ansi amoyo nkwiinda mukubagwasya kuti baizyibe kabotu mbunga ya Jehova alimwi akuzyiba mbobakonzya kugwasyigwa anjiyo. Aboobo, atulange-lange nzila zimwi ibana mbobakonzya kugwasyigwa kuti baiye twaambo tujatikizya mbunga ya Leza.

Mbungano Yanu

Bana beelede kwiizyiba mbungano mukwasyi wanu nkouswaangana. Ikutegwa baizyibe, nywebo nobazyali mweelede kubatolelezya bana banu kumiswaangano yoonse ya Bunakristo. Munzila eeyo, mutobela cikozyanyo Jehova ncaakapa bana Israyeli, ibakalaililwa kuti: “Amubunganye bantu boonse, baalumi abanakazi abana . . . , kuti baswiilile, baiye, balemeke Jehova Leza wanu akucenjela kubamba majwi oonse aa-Mulao oyu; abalo bana babo batana kuziba makani baswiilile, baiye kulemeka Jehova Leza wanu.”—Dt. 31:12, 13.

Kuzwa kubuvwanda, bana balakonzya kutalika kwiiya Jwi lya Jehova. Kujatikizya Timoteo, mwaapostolo Paulo wakati: “Kuzwa kuciindi niwakacili mwana ulyeezi magwalo aasalala.” (2 Tim. 3:15) Kumiswaangano yaku Ŋanda ya Bwami, nobaba bana bacili basyoonto kapati balazimvwa zyintu zimwi zibandikwa alimwi balazizyiba nyimbo zya Bwami. Ooko balaiya kubelesya Bbaibbele  amabbuku aapandulula Bbaibbele alimwi balaabikkila maano. Kunze lyaboobo, kumiswaangano yesu bayakubona kuti kuli bube butondezya kuti tuli basikutobela ba Kristo bakasimpe akaambo iluyando lwini-lwini. Jesu wakati: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya. Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Joh. 13:34, 35) Kumvwana akuliiba kwini-kwini izilibonya mu Ŋanda ya Bwami bayoozikkomanina bana alimwi ziyoobagwasya kuzumanana kujanika kumiswaangano ya Bunakristo mubuumi bwabo boonse.

Ikuti naa mwaba acilengwa cakufwambaana kusika ku Ŋanda ya Bwami akukkala-kkala kwaciindi cili mbocibede yamana miswaangano, ibana banu bayooba acoolwe cakuba abeenzinyina. Muciindi cakubalekela kuti kabayanzana buyo abananyina, inga cainda kugwasya kubazyibya kubakwesu abacizyi bamisela yoonse. Ikuti bazyibana abapati, ibana banu bayakuba aluzyibo alimwi bayakuba basongo. Mbubonya sikale Zekariya ‘iwakali kuyiisya bantu kuti kabayoowa Leza’ mbwaakamugwasya kucita kabotu Uziya mwami wa Juda iwakacili mwana, mazuba aano aabo ibabelekela Jehova cakusyomeka kwamyaka minji balabakulwaizya kucita kabotu bana. (2 Mak. 26:1, 4, 5) Nomuli mu Ŋanda ya Bwami, mulakonzya alimwi kubapandulwida bana banu mulimo wa laibbulali, bboodi lyamakani alimwi azyintu zimwi zijanika mumo.

Mbunga Yamunyika Yoonse

Bana beelede kuzyiba kuti mbungano yanu ncibeela cambunga yamunyika yoonse ijisi mbungano ziinda ku 100,000. Amupandulule zibeela zyambunga eeyi, mboibeleka, amulimo ngobajisi bana mukugwasyilizya mulimo uucitwa. Amubatondezye kaambo ncomuyandila kuyoojanika kumiswaangano yabbazu, yacooko, alimwi akuswaya kwamulangizi wabbazu.—Amubone kabbokesi kakuti  “Twaambo Twakubandika lya Kukomba Kwamukwasyi,” apeeji 28.

Kuti naa cakonzyeka, amutambe balangizi beendeenda, bamisyinali, bamukwasyi wa Bbeteli alimwi ababelesi baciindi coonse bambi kuzyoolya cakulya kuŋanda yanu. Mutayeeyi kuti banyina ciindi cakwiizya abana basyoonto. Aaba babelesi baciindi coonse balamutobela kumutola Jesu, ooyo lyoonse iwakali kubatambula bana akubandika ambabo. (Mk. 10:13-16) Nobamvwa babelesi ba Jehova kabaluula zyakabacitikila alimwi akubona mbobakkomana mumulimo uusetekene, ibana banu abalo balakonzya kuba ambaakani yakunjila mulimo waciindi coonse.

Ino ncinzi cimbi ncomukonzya kucita mumukwasyi wanu kutegwa mubagwasye bana banu ikwiizyiba kabotu mbunga ya Jehova? Nzeezyi nzila zimwi: Mumukwasyi wanu amulilange-lange bbuku lyakuti Jehovah’s Witnesses—Proclaimers of God’s Kingdom. Amukankaizye kulyaaba, kulicesya akusyomeka nkobakacita babelesi ba Jehova. Amutondezye mbwaakababelesya Jehova kuti bakambauke makani mabotu munyika yoonse. Amubelesye mavidiyo abambwa ambunga ya Jehova ikubayiisya zyintu ziyandika kapati kujatikizya zyintu zyakacitika kaindi amazuba aano. Ikuti kamucikonzya, mulakonzya kuswaya kuofesi yamutabi naa ku Bbeteli mucisi canu naa muzisi zimbi. Ikuswaya kuli boobo kuyoopa kuti bana banu bazyibe mboibambidwe mbunga ya Jehova yaanyika iisololelwa aciinga camuzike musyomesi kuti kaipa cakulya cakumuuya alimwi abusolozi kubakwesu nyika yoonse mboizulwa, mbubonya mboyakali kucita mumwaanda wamyaka wakusaanguna C.E.—Mt. 24:45-47; Inc. 15:22-31.

Kuyiisya Makani Aayendelana Aciimo Camwana Aumwi

Nomuyiisya bana banu, kamuyeeya lyoonse Jesu mbwaakali kuyiisya baapostolo bakwe. Aciindi cimwi wakabaambila kuti: “Ndicili amakani manji aakumwaambila, pele  tamwaakonzya sunu.” (Joh. 16:12) Jesu kunyina naakaambila basikwiiya bakwe makani manji aciindi comwe. Pele, wakali kubayiisya buce-buce twaambo twakasimpe tuyandika kapati kutegwa batumvwisye kabotu. Mbubonya buyo, mutayiisyi bana banu makani manji aciindi comwe. Kwiinda mukubayiisya lyoonse alimwi buce-buce kujatikizya mbunga ya Jehova, muyoozumanana kubagwasya kuba aluyandisisyo akukkomana kapati kwiiya zyambungano ya Bunakristo. Mboziyaabucinca zyintu nzyobayandika bana banu, mulakonzya kwiinduluka akuyungizya kuzyintu nzyobazyi kale.

Imbungano ya Bunakristo mbusena ibuyandika kapati nkotujana lugwasyo lutupa kuyuma kumuuya alimwi bana ibatola lubazu cabusungu muzyintu zicitwa mumbungano eeyi tabakonzyi kuyungwa anyika ya Saatani. (Rom. 12:2) Tusyoma kuti muyookkomana kapati ikugwasya bana banu ikwiizyiba kabotu mbunga ya Jehova. Kwiinda mukulongezyegwa anguwe, bayakuzumanana kuba mumbunga akusyomeka kuli Leza ngotubelekela.

Box/Picture on page 28]

 Twaambo Twakubandika lya Kukomba Kwamukwasyi

Ntootu twaambo tumwi tujatikizya mbunga ya Jehova ntomukonzya kubandika lya Kukomba Kwamukwasyi.

▪ Amulange-lange mboyakatalika mbungano yanu. Ino ndilili alimwi mbuti mboyakatalika? Ngaali Maanda aa Bwami ngoyakabelesya mbungano? Kujatikizya mubandi ooyu, mulakonzya kutamba umwi wali mumbungano kwaciindi cilamfwu kuŋanda yanu kutegwa aingule mibuzyo yabana banu.

▪ Amupandulule mulimo wamiswaangano yambungano amiswaangano mipati alimwi ambobakonzya kugwasyigwa kumiswaangano eeyi.

▪ Amulange-lange mulimo wazikolo zyakatalisyigwa ambunga ya Jehova. Amubandike zyakuluula zitondezya micelo mibotu njobazyala aabo ibamanizya lwiiyo muzikolo eezyi.

▪ Amubagwasye bana kuzyiba mbociyandika kuba basikumwaya basitikide bamakani mabotu. Amubatondezye mbobakonzya kuba acibeela mulipooti yanyika yoonse iimwaigwa mu Yearbook of Jehovah’s Witnesses.

▪ Amulange-lange milimo yaciindi coonse iili mumbunga ya Jehova njobanga bacita bana. Inga mwajana makani aaya oonse mu Cibalo 10 cabbuku lyakuti Bakamantene Mukucita Kuyanda kwa Jehova.

▪ Amubagwasye bana kumvwisya kaambo ncobutobelwa bubambe bubikkidwe mumbungano. Amupandulule kaambo ncobateelede kulicitila zyintu kakunyina kutobela mbunga ya Jehova nomuba mutuntu tuniini. Amubatondezye mbobakonzya kupa kuti zyintu kazyeenda kabotu mumbungano kwiinda mukutobela busolozi bwabaalu.

Cifwanikiso

Ibana banu bayoogwasyigwa ikuti naa kabamvwana ababelesi bakatalika kaindi kubelekela Jehova

[Zifwanikiso izili apeeji 26]

Mbubonya mbuli mu Israyeli yakaindi, bazyali mazuba aano balasoleka ikupa bwiinguzi bugwasya nobabuzyigwa mibuzyo iijatikizya mbunga ya Jehova