Kuzumanana Kubeleka Mumbunga ya Jehova

Akaluulwa aba Vernon Zubko

NDAKAKOMENENA ampulazi afwaafwi a Stenen, imunzi uuli mucooko ca Saskatchewan, ku Canada. Bazyali bangu ba Fred aba Adella, bakali kubeleka canguzu kutegwa bajane nzyotwakali kuyandika kumuuya akumubili mebo, mupati wangu musimbi Aurellia, alimwi abasyoonto bangu ba Alvin, Allegra, a Daryl. Kusikila sunu, tulabalumba kapati bazyali besu akaambo kakutuyiisya kasimpe.

Bataata, ibakali Banakristo bananike bakali bakambausi basicamba. Bakali kubeleka canguzu kujana ziyandika mubuumi, pele alimwi bakali kulitondezya kubantu boonse kuti bakali Bakamboni. Lyoonse bakali kwaamba makani aajatikizya kasimpe. Ndilabayeeya lyoonse akaambo kacikozyanyo cabo cabusungu abusicamba. Ziindi zinji bakali kundaambila kuti, “Kozumanana kubeleka mumbunga ya Jehova eelyo ulaatantamuka mapenzi manji.”

Kanji-kanji twakali kucita bukambausi bwamumugwagwa mumunzi wa Stenen amuminzi iizingulukide. Eeci tiicakali kunduubaubila lyoonse. Mumadolopo oonse mwakali bantu bakali kutufwubaazya tobana. Ciindi cimwi nindakali amyaka iili lusele yakuzyalwa, ndakaliimvwi mpiinyonena nzila kandijisi Ngazi Yamulindizi alimwi a Sinsimuka! eelyo kakamu kabakubusi nikakandizinguluka. Bakandikwempa nzyeete mpya njindakasamide akwiibikka amusemu wakali munsi-munsi. Mucoolwe, mukwesu umwi mupati iwakali kundilangilila wakabona cakali kucitika. Wakaboola akubuzya kuti, “Vern, sena kuli calubila?” Basankwa aaba bakamwaika mukulaba kwaliso. Nokuba kuti icakacitika eeci cakandicima, cakandiyiisya kuti notucita bukambausi bwamumugwagwa, tweelede kweendeenda muciindi cakwiile kwiimvwi nji mbuli musemu. Eeci cakacitika nindakali kukomena cakandiyiisya alimwi kuti ndibe sicamba kutegwa kanduunka kuŋanda aŋanda.

Alvin andime twakabbapatizyigwa mu May 1951. Ndakali amyaka yakuzyalwa iili 13. Ndiciyeeyede kuti Mukwesu Jack Nathan, iwakabandika makani aalubbapatizyo, wakatukulwaizya kutainzya mwezi nouba omwe kakunyina kukambauka makani aa Jehova. * Mumukwasyi wesu, mulimo wabupainiya lyoonse wakali kubonwa kuba mulimo uutaliboteli mubuumi iweelede kubelekwa. Aboobo mu 1958, nondakamanizya cikolo, ndakalongela kudolopo lya Winnipeg, ku Manitoba, kuyoocita bupainiya. Nokuba kuti Bataata bakalikkomene kuti ndakali kubeleka ambabo mumulimo wamukwasyi kandifwala mapulanga, balo a Bamaama bakali kutukulwaizya kapati kucita mulimo waciindi coonse aboobo bakandizumizya kulonga.

Munzi Mupya Amweenzuma Mupya

Mu 1959, ofesi yamutabi yakatamba boonse wakali kukonzya ikulongela ku Quebec, ooko nkobakabulide bakambausi. Ndakaunka kuyoocita bupainiya ku Montreal. Eelo kaka ooku  kwakali kucinca kupati! Kwakali kucinca kupati ikwatakaninga buzuba kwandicitikila nkaambo ndakali kwiiya kwaambaula ci French alimwi akusola kuzyibila kukkala mubukkale bumbi. Mulangizi wesu wabbazu wakandaambila kuti, “Toyelede kwaamba kuti, ‘Twakali kucita boobu kulindiswe.’” Oolu lulayo lwakali lubotu.—1 Kor. 9:22, 23.

Tiindakajisi mupainiya wakubeleka limwi nindakaunka ku Quebec. Nokuba boobo, imucizyi uucili mwana-mwana Shirley Turcotte, ooyo ngotwakayaana limwi ku Winnipeg, nguwakaba mweenzuma walyoonse kuzwa notwakakwatana mu February 1961. Awalo wakazwa kumukwasyi uuyanda Jehova. Aciindi eeco tiindakalizyi kuti wakali kuyoondiyumya akundikulwaizya kapati mumyaka yoonse eeyi.

Kukambauka ku Gaspé

Nokwakainda myaka yobilo kuzwa nitwakakwatana bwesu, twakasalwa kuba bapainiya baalubazu ku Rimouski, Quebec. Nowakamana mupeyo wamwaka wakatobela, ibaofesi yamutabi bakatulomba kuti tukakambaukile Gaspé Peninsula, kunkomwe iili kujwe kwacisi ca Canada. Imulimo wesu wakali wakusyanga mbuto zyakasimpe zinji kusikila mpotugolela. (Muk. 11:6) Mumootokala wesu twakabikka mamagazini aayinda ku 1,000 amabbuku aatandila ku 400, izyakulya alimwi azyakusama, mpoonya twakatalika bukambausi bwesu ibwakali kuyootola mwezi omwe. Twakakambauka kabotu mutunzi tusyoonto toonse mu Gaspé. Iŋanda yasikapepele ooko yakaambilizya kuti Bakamboni bakali kuyooswaya bantu alimwi yakacenjezya kuti bataatambuli pe mabbuku eesu. Pele banji tiibakakumvwisya kucenjezya ooko, balo bakayeeya kuti ŋanda yasikapepele yakali kwaambilizya mabbuku eesu, aboobo bakaatambula mabbuku ngobakapegwa.

Myaka eeyo, kukambauka cakali cintu cipya mumasena amwi aamu Quebec, aboobo tiicakali ceenzu kwiimikwa abapulisa. Eeci cakacitika mudolopo limwi oomo motwakali kumwaya mabbuku mumaanda oonse. Mupulisa umwi wakatwaambila kuti tuunke limwi kuofesi yamapulisa, eelyo twakamutobela. Ookuya ndakamvwa kuti similawo wamudolopo wakabikkide mulawo wakuti batulesye kukambauka. Mbwaanga mupati wamapulisa tanaakaliko buzuba oobo boonse, ndakapa similawo lugwalo lulembedwe kabotu kuzwa kuofesi lyamutabi ku Toronto ilwakali kupandulula nguzu nzyotupedwe zituzumizya kukambauka. Naakamana kulubala lugwalo oolu, cakufwambaana wakati: “Bona, tandiyandi mapenzi aali woonse. Mufwundisi wamudolopo eeli nguwandaambila kuti ndimulesye.” Mbwaanga twakali kuyanda kuti bantu mucilawo bazyibe kuti mulimo wesu wakali wamumulawo, twakapiluka ndilyonya kubusena nkotwakaimikwa abapulisa mpoonya twakazumanana amulimo wesu.

Buzuba bwakatobela mafwumo-fwumo notwakapiluka kuyoobonana amupati wamapulisa, wakanyema naakamvwa kuti bakatulesya kukambauka. Eelo kaka nomwakaliko naakali kwaambaula asimilawo aluwaile, nomwakalimvwida mbwaakanyemede! Mupati wamapulisa wakatwaambila kuti ikuti naa kuli penzi lili lyoonse ndyotujisi, tweelede kumutumina luwaile walo kumugama eelyo inga walilanganya penzi eelyo. Nokuba kuti twakali beenzu alimwi twakali kuliluma-luma buya kwaambaula ci French, ibantu mbotwakajana bakali kabotu alimwi bakali kusamausya. Pele twakali kulibuzya kuti, ‘Sena kuli nobayookazyiba ncobeni kasimpe?’ Mubuzyo wesu wakaingulwa nokwakainda myaka iili mbwiibede notwakapiluka kuyooyaka Maanda aa Bwami mucooko ca Gaspé. Twakajana kuti banji akati kabaabo mbotwakakambaukila, lino mbakwesu. Masimpe Jehova nguukomezya.—1 Kor. 3:6, 7.

Twapegwa Cikono

Mwaneesu musimbi Lisa wakazyalwa mu 1970. Cikono eeci cakazwa kuli Jehova cakapa kuti tukkomane kapati mubuumi. Shirley alimwi a Lisa bakabeleka andime mumilimo minji yakuyaka Maanda aa Bwami. Lisa naakamanizya cikolo wakaamba kuti: “Taata, Baama, mbwaanga ndime ndakapa kuti mucileke mulimo waciindi coonse kwakaindi kasyoonto, ndilasola kucita ncimwakali kukkomanina kwiinda mukuba mupainiya.” Lisa ucili mupainiya kwamyaka iinda ku 20, lino ubeleka antoomwe amulumi wakwe,  Sylvain. Babeleka milimo minji yamayake mumasi aambi. Makanze ngoujisi mukwasyi wesu ngakuzumanana kuliimya zyintu zimwi mubuumi akulisungula kubeleka mulimo wa Jehova kufwumbwa ciindi. Kunyina buzuba mbondakaluba majwi ngaakaamba Lisa naakatalika bupainiya. Mubwini, wakandikulwaizya kuti nduutalike alimwi mulimo waciindi coonse mu 2001, cakuti kuzwa mwaka ooyu ndali kucita bupainiya. Bupainiya bwazumanana kundiyiisya kusyoma Jehova muzyintu zyoonse nzyondicita alimwi akupona buumi bwakuliimya zyintu zimwi pele bukkomanisya.

Milimo Yakuyaka Iyandika Kuba Aluyando Akusyomeka

Jehova wandiyiisya kuti ikuti naa twalisungula akwiitambula kufwumbwa mikuli njatupa, tulajana zilongezyo zinji. Ikuba mu Kkomiti Yakuyaka Yacooko alimwi akubeleka mumilimo yakuyaka antoomwe abakwesu abacizyi mucooko coonse ca Quebec amasena aambi ncoolwe cipati.

Nokuba kuti babelesi basikulisungula bamwi inga kabatali basyaazibwene mukupa makani kumiswaangano, balicibwene kapati caboola kumilimo yakuyaka Maanda aa Bwami. Bakwesu aaba bayandwa balaubeleka mulimo camoyo woonse, alimwi luzyibo lwabo lulalibonya. Eeci cipa kuti kube ŋanda yeebeka iibelesyegwa kukomba Jehova.

Bunji bwaziindi ndibuzyigwa kuti, “Ino mubelesi uulyaabide kukuyaka Maanda aa Bwami weelede kuba abube buli buti?” Kuzwa kuzyintu zyandicitikila ndabona kuti ikusaanguna muntu weelede kuyanda Jehova a Mwanaakwe alimwi abakwesu. (1 Kor. 16:14) Cabili, weelede kusyomeka. Ikuti naa zyintu tiizyacitika kweelana ambotuyanda—alimwi eeci cilacitika—muntu uusyomeka ulazumanana kutobela bubambe bwambunga ya Leza. Kusyomeka kuyoomukulwaizya kulisungula kutola lubazu mumilimo iikonzya kucitwa kumbele.

Kumulumba Jehova

Nokuba kuti bataata bakafwa mu 1985, lulayo lwabo lwakuti ndeelede kuzumanana kubeleka mumbunga ya Jehova ndiciluyeeya. Mbubonya mbuli bamwi ibakatambula mikuli yabo mucibeela cambunga ya Jehova cakujulu, cakutadooneka bazumanana kubeleka. (Ciy. 14:13) Bamaama lino bajisi myaka yakuzyalwa iili 97. Akaambo kakulebuka, tabacikonzyi kwaambaula kabotu mbuli kaindi; nokuba boobo balilizyi Bbaibbele lyabo. Mumagwalo aabo ngobalemba balabikkilizya tupango kuzwa mu Bbaibbele alimwi balatukulwaizya kuzumanana kubelekela Jehova cakusyomeka. Eelo kaka tulalumba kapati toonse tobana kuba abazyali batuyanda!

Kunze lyaboobo, ndilamulumba kapati Jehova akaambo kamukaintu wangu alimwi imweenzuma uusyomeka, Shirley. Lyoonse ulaluyeeya lulayo ndobakamupa banyina lwakuti, “Vern uyakuba amilimo minji mumbunga, aboobo yebo weelede kumupa ciindi cakuba abantu bamwi.” Nitwakakwatana myaka iili 49 yainda, twakakanzide kuti toonse tobilo tuyoobelekela Jehova mane tukacembaale akuti ikuti toonse tukafwutuke mamanino abweende oobu, tuyoojokela kubwana antoomwe akuzumanana kumubelekela mane kukabe kutamani. Inzya, ‘twakalijisi zyakucita zinji mumulimo wa Mwami.’ (1 Kor. 15:58) Kulubazu lumwi, Jehova ncobeni watubamba kabotu alimwi lyoonse wali kutubikkila maano kutegwa tutabuli cintu nociba comwe cibotu.

Bupanduluzi buyungizidwe

[Cifwanikiso icili apeeji 31]

“Mumukwasyi wesu tukanzide kuti tuzumanane kuliimya zyintu zimwi mubuumi akulisungula kubeleka mulimo wa Jehova kufwumbwa ciindi”