‘Atumupe Cipego Jehova’

KUTI muntu umwi wamucitila cintu cibotu, ino inga mutondezya buti kulumba? Amubone basilutwe bankondo mu Israyeli mbobakatondezya kulumba nobakamana kulwana abana Midiyani. Bana Israyeli bakalwana nkondo eeyi kababisizye kale kujatikizya Baala-Peori. Leza wakabagwasya kuti bazunde nkondo bantu bakwe, zyintu zyakacaala lyankondo bakazyabanya basikalumamba bali 12,000 alimwi abana Israyeli boonse. Kweelana amalailile a Jehova, basikalumamba bakapa bapaizi cibeela ca zyintu nzyobakapegwa alimwi bana Israyeli bambi abalo bakapa ba Levi cibeela ca zyintu nzyobakapegwa.—My. 31:1-5, 25-30.

Nokuba boobo, basilutwe bankondo bakali kuyanda kucita zinji. Bakaambila Musa kuti: “Swebo tobalanda bako twabala mweelwe wabasilumamba ibakali kumaanza eesu, nkabela taakwe naba omwe uutawo.” Bakayeeya kupa ngolida abulungu busiyene-siyene kuli Jehova.  Antoomwe ngolida yakali kulema makkilogilamu aali 190.—My. 31:49-54.

Mazuba aano, akaambo ka zyintu Jehova nzyabacitila, bantu banji cilabapa kulumba. Kuyungizya waawo, tabali buyo babelesi ba Leza balyaabide batondezya kulumba kuli boobo. Mucikozyanyo, namutekenya wabbasi lyakali kutola alimwi akujola kabunga kabasimuswaangano wamasi wakacitilwa mudolopo lya Bologna ku cisi ca Italy mu 2009. Akaambo kakuti wakali mubombe alimwi wakali kubeenzya kabotu, mbaakali kweenzya bakayeeya kumulembela kagwalo kakumulumba, kumupa mali alimwi akabbuku ka Ncinzi Cini Bbaibbele Ncoliyiisya? Nobakamupa zyintu eezyi wakabaambila kuti: “Ndilikkomene kutambula kakkadi alimwi akabbuku, pele mali ndilaajosya nkaambo ndiyanda kwaasanga kutegwa muzumanane amulimo ngomucita. Nokuba kuti tandili uumwi wa Bakamboni ba Jehova, pele ndiyanda kusanga nkaambo ndabona kuti luyando ndolumupa kucita zyintu.”

Kuti kamuyanda kulumba zyintu Jehova nzyaamucitila, nzila imwi yakutondezya kulumba kwanu njakusanga kumulimo wanyika yoonse wa Bakamboni ba Jehova. (Mt. 24:14) Inzila bamwi nzyobabelesya mukusanga zyatondezyegwa mukabbokkesi kabikkilizyidwe.

Kabbokesi kali apeeji 20, 21]

NZILA BAMWI NZYOBABELESYA MUKUSANGA

KUSANGA KUMULIMO WANYIKA YOONSE

Bantu banji balabikka mali ambali kutegwa bakaabikke mutubbokesi tulembedwe kuti: “Mulimo Wanyika Yoonse.”

Amwezi mbungano zilatumina mali aaya kuofesi yamutabi ya Bakamboni ba Jehova iili mucisi eeco. Alimwi bantu balakonzya kusanga mali kwiinda mukwaatuma ku Watch Tower Society, Attention Treasury, P. O. Box 33459, Lusaka 10101, naa kuofesi lya mutabi ya Bakamboni ba Jehova iili icisi cenu. (Izyakusanga zilembedwe ansi aawa zilakonzya kutumwa kuofesi yamutabi mucisi cenu.) Macceki aatuminwa kukkeyala eeyi ayelede kulembwa kuti: “Watch Tower Society.” Ngale naa zyintu zimbi ziindene-indene azyalo zilakonzya kusangwa. Lugwalo lufwaafwi lusindikizya zyintu eezyi lulakonzya kulembwa kupandulula kuti eeci ncipego.

IKULIBAMBILA NZYOMUKONZYA KUSANGA

Kunze lyakusanga buyo mali, kuli nzila zimbi nzyomukonzya kubelesya ikupa zyintu mukugwasilizya mulimo wa Bwami uucitwa nyika yoonse. Nzila eezyi zibikkilizya:

Bukwabilizi (Insurance): Watch Tower Bible and Tract Society of Pennsylvania ilakonzya kulembwa kuti njiiya kubweza mali aabukwabilizi bwa buumi (life insurance policy) naa aalya aapegwa kumuntu wasika aciimo cakuleka mulimo (retirement/pension plan).

Nkomo Yamali Aakubbanga: Nkomo yamali aakubbanga, mapepa aatondezya mali ngaakabikka naa nkomo yamali ngapegwa muntu wasika aciimo cakuleka mulimo alakonzya kupegwa ku Watch Tower Bible and Tract Society of Pennsylvania muntu afwa kweelana aziyandika kubbanga lyakubusena nkwakkede.

Mali Ngomujisi Mukkampani (Stocks and Bonds): Mali ngomujisi mukkampani alakonzya kusangwa ku Watch Tower Bible and Tract Society of Pennsylvania kacili cipego buyo naa Watch Tower Bible and Tract Society of Pennsylvania ilakonzya kulembwa kuti njiiyakubweza mali muntu aakufwa.

Nyika Amayake (Real Estate): Nyika amayake izikonzya kusambalwa zilakonzya kusangwa, ikuti naa wasanga busena mpakkede inga wazumanana kukkala aawo ciindi nacipona.

Mali Aapegwa Amwaka (Gift Annuity): Oobu bubambe bulacitwa kwiinda mukupa mali kumbunga iibelesyegwa a Bakamboni ba Jehova. Eelyo muntu ooyu wasanga mali aaya naa muntu uumbi buyo ngwaasala, unakupegwa mali amwaka kusikkila akafwe.

Bwaapauzi Bwazyintu (Wills and Trusts): Zyintu naa mali alakonzya kupegwa ku Watch Tower Bible and Tract Society of Pennsylvania kwiinda mukubelesya pepa lyamalailile aabwaapauzi bwazyintu ilizumizyidwe amulawo naa kuti Watch Tower Bible and Tract Society of Pennsylvania ilakonzya kulembwa kuti njiyeelede kupegwa mali aajanika mubwaapauzi bwazyintu. Izyintu naa mali aapegwa kugwasya mbunga yabukombi alakonzya kugwasya munzila iimwi mumakani aamutelo.

Kweelana ancaapandulula mabala aakuti “kulibambila nzyomukonzya kusanga,” nzila eezyi zyakusanga ziyanda kuti uusanga alibambile kabotu.

Lyoonse kamutanatuma zyakusanga zilembedwe atala aawa mulakonzya kubandika abakuofesi yamutabi iili mucisi cenu.