Jehova Ulakumvwa Kulila kwa Bapengede

MBULI Mwami musongo Solomoni mu Israyeli wansinku iwakaamba kuti, “bantu boonse buyo balasikilwa ziindi zyalufu azyamapenzi.” (Muk. 9:11) Ibuyumu-yumu naa zitucitikila mubuumi zilakonzya kutunyonganya kapati. Mucikozyanyo, lufwu lwa umwi wamumukwasyi lulakonzya kututyompya. Mumvwiki amyezi iitobela kuusa inga kuyaambele. Muntu ulakonzya kunyongana mumizeezo cakuti takonzyi kupaila kuli Jehova.

Ikuti naa cacitika cili boobu, muntu uyandika kukulwaizyigwa, kubikkilwa maano akuyandwa. Cakusyomezya, sintembauzyo wakaimba kuti: “Jehova ulatabilila boonse bawa, ulabusya boonse bawizuka.” (Int. 145:14) Ibbaibbele litwaambila kuti: “Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.” (2 Mak. 16:9) Leza uli ayooyo ‘mubombe moyo uupengede. Nguubusya muuya wamuntu uubombede akukatalusya moyo wayooyo uupengede.’ (Is. 57:15) Ino Jehova ubagwasya buti akubaumbulizya aabo bapengede mumoyo?

‘Imajwi Aambwa Aciindi Ceelede’

Inzila yomwe Jehova njabelesya kutugwasya aciindi ceelede nkwiinda mukubelesya bakwesu Banakristo. Banakristo beelede ‘kubaumbulizya aabo batyompedwe mumyoyo.’ (1 Tes. 5:14) Kumubikkila maano akumutondezya kuti balamuyanda basyominyina kulakonzya kumugwasya kuliyumya muciindi eeco ncaali mubuumba. Majwi aakuumbulizya naaba masyoonto alakonzya kukulwaizya. Majwi aali boobu alakonzya kwaambwa amuntu wakacitikilwa kale penzi mbuli ndomujisi. Naa ambweni mweenzyinyoko wabona kuti mujisi penzi. Kwiinda mukubelesya nzila eezyi, Jehova ulakonzya kubagwasya aabo bapengede.

Amuyeeyele buyo mukwesu Alex mwaalu Munakristo wakakwata ino-ino alimwi wakafwidwa mukaintu wakali kuciswa bulwazi butasilikiki. Mulangizi weendeenda umwi wakeetezyegwa akuunka kuya kukulwaizya Alex. Awalo wakafwidwa mukaintu wakusanguna pele wakakwata alimwi. Mulangizi weendeenda wakapandulula lufwu lwa mukaintu wakwe mbolwakamunyonganya mumizeezo. Wakali kulimvwa kabotu naakali kuunka mubukambausi  alimwi akumiswaangano ya mbungano. Pele aunka kuŋanda yakwe wakali kulimvwa kulendelelwa. Alex wakaamba kuti: “Cakali kukazyika moyo kuzyiba kuti penzi ndekajisi abamwi lyakabacitikila.” Masimpe, ‘ijwi lyaambwa aciindi ceelede’ lilakonzya kuumbulizya muciindi camapenzi.—Tus. 15:23.

Mwaalu Munakristo aumwi wakazyi bantu banji bakafwidwa wakamukulwaizya Alex. Calubomba, wakaamba kuti Jehova ulizyi mbotulimvwa ancotuyandika. Mukwesu wakaamba kuti: “Ikuti naa mumyezi amyaka iiboola kwayandika kukwata alimwi, Jehova ulazumizya kukwata alimwi.” Masimpe ngakuti tabali boonse bafwidwa bakonzya kuyanda kukwata alimwi. Kayeeya nzyakaamba mukwesu ooyu, Alex wakaamba kuti: “Kuzyiba kuti oobu mbubambe bwa Jehova cilagwasya kuti utalimvwi kuti nkutasyomeka kuli ngookakwetene limwi naa kububambe bwa Jehova bwalukwatano kuti naa wakwata alimwi.”—1 Ko. 7:8, 9, 39.

Sintembauzyo Davida, walo wakasikilwa masunko amapenzi manji wakaamba kuti: “Meso aa-Jehova alalangisya baluleme, amatwi aakwe alaswiilila kukwiila kwabo.” (Int. 34:15) Masimpe, Jehova ulakonzya kukumvwa kulila kwabapengede aciindi ceelede kwiinda mu Banakristoma basimide nobabona penzi ndyotujisi. Bubambe oobu mbubotu alimwi bulagwasya.

Kugwasyigwa Kwiinda Mumiswaangano ya Bunakristo

Kutyompwa kulakonzya kupa muntu mizeezo iitali kabotu yakuti alizandule. Nokuba boobo, bbuku lya Tusimpi 18:1 litucenjezya kuti: “Uulipambukanya ulayandaula zisusi zyakwe mwini, ulasowa kubeteka koonse kubotu.” Alex wakaamba kuti: “Ikuti naa wafwidwa, zyintu izitali kabotu zilaboola kumizeezo.” Ulayeeya nakali kulibuzya kuti: “‘Sena kuli cimwi cintu ncondakali kukonzya kucita? Sena kuli zimwi nzintu nzyakali kulomba nzyondakacita?’  Tiindakali kuyanda kucaala ndelikke kanditakwete. Cilakatazya kuuluba muzeezo ooyu nkaambo lyoonse kuli cindiyeekezya kuti ndili endike.”

Kwiinda lyoonse, muntu uupengede uyandika bakwesu bakonzya kumuumbulizya. Bakwesu aaba balajanika kumiswaangano yambungano. Ikuti zyintu kazili boobu, tweelede kulanga kuli Leza akubona twaambo tukonzya kutuyaka.

Miswaangano ya Bunakristo ilakonzya kutugwasya kuzyilanga kabotu zyintu. Notuyaabuswiilila akuzinzibala kuyeeya zilembedwe mu Bbaibbele, tulabikkila maano kuzyintu ziyandika kapati—kusalazyigwa kwabweendelezi bwa Jehova azyina lwakwe akutabikkila buyo maano kumapenzi eesu. Nokuba boobo, kuciindi eeci notutambula malailile aazwa kuli Leza tulakulwaizigwa kuzyiba kuti Jehova ulizyi mbotulimvwa nokuba kuti bamwi tabaazyi mapenzi ngotujisi alimwi ambotulimvwa. Ulizyi kuti akaambo “[ka]buusu bwamoyo muntu ulafwidwa muuya.” (Tus. 15:13) Leza wakasimpe uyanda kutugwasya alimwi eeci citupa kuti tuzumanane kuliyumya.—Int. 27:14.

Mwami Davida nakali kupenzyegwa abasinkondonyina wakamulilila Leza kati: “Muuya wangu wawizuka; moyo wangu wayoowa mukaango kangu.” (Int. 143:4) Mapenzi alakosya akunyonganya mizeezo yamuntu. Aya mapenzi alakonzya kuba malwazi aciindi cisyoonto naa atola ciindi cilamfwu. Tulasyoma kuti Jehova uyakutugwasya kuti tuzumanane kuliyumya. (Int. 41:1-3) Nokuba kuti aano mazuba Leza taponyi bantu camaleele, ulabapa busongo anguzu zyakuliyumya kumapenzi ngobajisi. Kamuyeeya kuti naakatyompwa akaambo kamapenzi Davida wakalanga kuli Jehova. Wakaimba kuti: “Ndayeeya mazuba aakale, ndaibaluka milimo yako yoonse, ndatweluka nzyaakacita maanza aako.”—Int. 143:5.

Akaambo kakuti Majwi aaya alembedwe akasololelwa a Leza citondezya kuti Jehova ulizyi mbotulimvwa. Majwi aaya atusyomezya kuti ulaswiilila notumupaila. Ikuti twazumina kugwasyigwa a Jehova, ‘uyakututabilila.’—Int. 55:22.

“Amupaile Cakutaleka”

Lugwalo lwa Jakobo 4:8 lwaamba kuti: “Amuswene kuli Leza, eelyo awalo uyooswena kulindinywe.” Nzila yomwe yakuswenenena kuli Leza njakupaila. Mwaapostolo Paulo utwaambila kuti “amupaile cakutaleka.” (1 Te. 5:17) Nokuba kuti inga cilatukatazya kwaamba bwini mbotulimvwa, “pele muuya wini ulatukombelezyezya kujatikizya kutongela nkotukakilwa kwaamba cakupozya.” (Lom. 8:26, 27) Masimpe Jehova ulizyi mbotulimvwa.

Ba Monika balo bajisi cilongwe cibotu a Jehova baamba kuti: “Kwiinda mumupailo, kubala Bbaibbele alimwi aciiyo ca Bbaibbele, ndajana kuti Jehova Mweenzuma ncobeni. Ndilabona mbwaandigwasya mubuumi bwangu lyoonse. Cilakkazyika moyo kuzyiba kuti nokuba kuti tandinamupanduluda walo ulazyiba. Ndilizyi kuti lubomba azilongezyo zyakwe tazimani.”

Munzila iili yoonse, tweelede kuzumina kuumbulizyigwa a Banakristoma, ikutobela lulayo ndotwaambilwa kumiswaangano ya Banakristo ilutuyumya akumwaambila Jehova zili mumoyo mumupailo. Zyoonse eezi ninzila zitondezya kuti Jehova ulatuyanda. Alex waamba zyintu zyakamucitikila naamba kuti, “Kuti naa katucita zyintu zyoonse Jehova Leza nzyatwaambila kutegwa kuzumanane kuyuma kumuuya tuyakuba ‘anguzu zigambya iziinda zyabantu nzyotujisi’ kutegwa tuliyumye kumasunko woonse akonzya kutusikila.”—2 Ko. 4:7.

[Kabbokesi/Cifwanikiso icili apeeji 18]

Kuumbulizya Baabo Bapengede

Ibbuku lya Intembauzyo lizwide kulilauka kwabantu kubikkilizya azisyomezyo zyakuti Jehova ulakumvwa kulila kwabapengede. Amulange-lange tupango ootu tutobela:

“Lino mukupenga kwangu ndakali koongolola Jehova, ndakali kukwiilila Leza wangu. Elyo wakaswiilila ijwi lyangu muntempele yakwe, akoonzomoka kwangu kwakanjila mumatwi aakwe.”—Int. 18:6.

“Jehova uli afwaafwi kubawizukide mumoyo, ulafutula batete myuuya.”—Int. 34:18.

“[Jehova] ulaponya batyokedemyoyo, ulaanga zilonda zyabo.”—Int. 147:3.

[Cifwanikiso icili apeeji 17]

Elo kaka lilakulwaizya “ijwi ibbotu” lilagwasya kuti koli mumapenzi