Amulongezyegwe Amwami Uusololelwa Amuuya wa Leza

“Uyookalwa Muuya wa-Jehova.”—IS. 11:2.

1. Ino nkulibilika kuli buti bantu nkobajisi kujatikizya mapenzi aali munyika?

NAAKAKKALA ansi kuyeeya mapenzi aalangilwa kumbele, Stephen Hawking imulembi alimwi syaazibwene mumakani azilengwaleza mu 2006 wakabuzya kuti: “Munyika muli mapenzi aajatikizya twaambo twacisi, bukkale bwabantu azilengwaleza, sena bantu balalangilwa kupona kwamyaka aimwi iili 100?” Kweelana acibalo camagazini iitegwa New Statesman cakati: “Kunyina notwamana bucete naa kuleta luumuno munyika. Pele kuboneka kuti twiile kuyungizya mapenzi. Twasola nzila zyoonse. Akati kanzila eezyi kuli mfwulumende zilanganya lubono lwacisi azyeezyo zitajisi nguzu mulubono lwacisi; kusola kulesya nkondo kwiinda mukubamba nkamu ya League of Nations akupanga zilwanyo ziyoosya. Twalwana ‘nkondo zinji kuyanda’ katuyeeya kuti tulakonzya kumana nkondo.”

2. Ino Jehova uyakutondezya buti kuti bweendelezi bwakwe mbobululeme nyika yoonse?

² Majwi aali boobu taabagambyi babelesi ba Jehova. Bbaibbele litwaambila kuti muntu tanaakalengwa kuti kalisololela. (Jer. 10:23) Jehova alikke ngo Mwami wesu weelede. Aboobo, nguukonzya kutupa milawo, kutwaambila ncotweelede kucita alimwi akutusololela kutegwa tucite ciyandika mubuumi. Alimwi uyakubelesya nguzu zyakwe lino-lino kumanizya mfulumende zya bantu. Aciindi eeco, uyakubanyonyoona boonse aabo ibakaka bweendelezi bwakwe bubotu akuzumanana kubisya akucita zyintu zitalondokede akutobela Saatani Diabolosi “leza wabweende bwazyintu oobu.”—2 Ko. 4:4.

3. Ino Isaya wakasinsima nzi kujatikizya Mesiya?

³ Munyika mpya ya Paradaiso, Jehova uyakweendelezya bantu caluyando kwiinda mu Bwami bwabu Mesiya. (Dan. 7:13, 14) Kujatikizya Mwami wabwami oobu, Isaya wakasinsima kuti: “Mulasyuuka mutabi mucifumpu ca-Jese, nkabela kasamu kazwa mumiyanda yakwe kalazyala micelo. Uyookalwa Muuya wa-Jehova, Muuya wabusongo awakuswiililisya, Muuya walulayo awanguzu, Muuya waluzibo awakulemeka Jehova.” (Is. 11:1, 2) Ino munzila nzi Leza mwabelesya muuya wakwe uusala ‘mumutabi wacifumpu ca-Jese’—Jesu Kristo—kuti nguuyakulela bantu? Ino bulelo bwakwe buyakuleta zilongezyo nzi? Alimwi ino tweelede kucita nzi kuti tulongezyegwe?

Leza Umupa Kuti Jesu Acikonzye Kulela

4-6. Ino ncinzi ciyakupa kuti Jesu akabe Mwami musongo, walubomba, Mupaizi Mupati alimwi Mubetesi?

⁴ Jehova uyanda kuti bantu mbalela balondoke kwiinda mukusololelwa a Mwami musongo, walubomba, Mupaizi Mupati alimwi Mubetesi. Nkakaambo kaako Leza wakamusala Jesu Kristo, ngwaakalongezya amuuya uusalala kuti acikonzye kuucita mulimo ooyu uyandika kapati. Atubone twaambo tumwi tuyakumupa kuti Jesu akaucite kabotu mulimo ngwaakamupa Leza.

⁵ Jesu ulijisi luzyibo lwini lwa Leza. Ooyu mwana simuzyalwa alikke ulibazi kabotu Bausi alimwi bakkala anguyo kwaciindi cilamfwu ndiza kwazyuulu zyamyaka. Ciindi eeco nobakali aantoomwe, Jesu wakamuzyiba  Jehova cakumaninina cakuti ulakonzya kwaambwa kuti “ngonguwe cinkozya ca Leza uutalibonyi.” (Kol. 1:15) Jesu wakaamba kuti: “Ooyo wandibona wamubona awalo Taata.”—Joh. 14:9.

⁶ Kunze lya Jehova, Jesu ngujisi luzyibo lwazilenge zyoonse kubikkilizya abantu. Mulugwalo lwa Bakolose 1:16, 17 tubala kuti: “Nkaambo mulinguwe muzyakalengwa zintu zyoonse, zyamujulu azyaansi, zintu zibonwa azitabonwi . . . Kunze lyaboobo, ngomutaanzi kubako kuzyintu zimbi zyoonse alimwi kwiinda mulinguwe izyintu zimbi zyoonse zyakabako.” Kamuciyeeyela buyo eeco! Jesu, “mufuzi” wa Leza wakatola lubazu mukulenga zyintu zyoonse. Aboobo, ulibuzi kabotu bubumbo boonse bwakujulu kubikilizya abongo mbobubeleka. Masimpe, Kristo mbusongo muciimo camuntu.—Tus. 8:12, 22, 30, 31.

7, 8. Ino muuya wa Leza wakamugwasya buti Jesu kuti abeleke mulimo wakwe?

⁷ Jesu wakananikwa amuuya uusalala wa Leza. Jesu wakaamba kuti: “Muuya wa Jehova uli alindime nkaambo wakandinanika kuti ndaambile bacete makani mabotu; wakandituma kuti ndaambilizye kwaangununwa kubaange akupona kuboofwu, ikwaangununa badyaaminidwe, kukambauka mwaka mubotu wa Jehova.” (Lk. 4:18, 19) Jesu nakabbapatizyigwa, muuya uusalala wakamuyeekezya zyintu zyoonse zyaakazi katanasika aanyika kubikkilizya azyintu Leza nzyakali kuyanda kuti azuzikizye mumulimo wakwe wabu Mesiya.—Amubale Isaya 42:1; Luka 3:21, 22; Johane 12:50.

⁸ Akaambo kakuti wakasololelwa amuuya uusalala alimwi akuti wakali londokede Jesu tanakali buyo muntu mupati wakaponede anyika pele alimwi wakali Mwiiyi mupati. Masimpe ngakuti, bakali kumuswiilila ‘bakagambwa kapati ambwaakali kuyiisya.’ (Mt. 7:28) Jesu wakalizyi cakali kubapa kuti bantu kabapenga—cibi, kutalondoka akubula luzyibo lwa Leza. Wakalizyi zyakali mumyoyo yabantu alimwi wakalizyi mbwakali kukonzya kubagwasya.—Mt. 9:4; Joh. 1:47.

9. Ino lusyomo lwenu lwakuti Jesu Muleli luyungizyigwa buti mwayeeya zyintu izyakamucitikila?

⁹ Jesu wakali kupona mbuli muntu. Izyakali kumucitikila naakali kupona alimwi akukkala abantu batalondokede cakamugwasya kapati kuti Jesu ayelele kuba Mwami. Mwaapostolo Paulo wakalemba kuti: “[Jesu] wakaleelede kuba mbuli ‘banabokwabo’ mumbazu zyoonse, ikutegwa abe mupaizi mupati uuli aluse alimwi uusyomeka kuzyintu zya Leza, kutegwa atuule cipaizyo cakumanya zibi zyabantu akubayanzanya a Leza. Mbwaanga walo wakapenga naakali kusunkwa, ncobeni ulakonzya kubagwasya aabo ibasunkwa.” (Heb. 2:17, 18) Akaambo kakuti Jesu ‘wakasunkwa,’ ulakonzya kubafwida lubomba aabo bapenzyegwa. Lubomba ndwaakajisi Jesu lwakalibonya nakali kubeleka mulimo wakwe wamunyika. Ibaciswa, ibalemene, batyompedwe, abana bakalaangulukide kumusikila. (Mk. 5:22-24, 38-42; 10:14-16) Ibabombe myoyo abaabo ibakali  kuyanda kumuzyiba Leza abalo bakali kumusikila. Kulubazu lumwi, aabo balisumpula, balaankazi abaabo ‘batamuyandi Leza’ bakali kumusula alimwi bakali kumukazya.—Joh. 5:40-42; 11:47-53.

10. Ino Jesu wakatondezya buti kuti ulatuyanda?

¹⁰ Jesu wakatufwida. Icimwi cakapa kuti Jesu ayelele kuba Muleli ncakuti wakazumina kutufwida. (Amubale Intembauzyo 40:6-10.) Kristo wakati: “Kunyina uujisi luyando lwiinda loolu, cakuti muntu umwi atuulile beenzinyina buumi bwakwe.” (Joh. 15:13) Inzya, kwiindana abaleli batalondokede ibapona kabotu akaambo kakulida masuku aamitwe yabaabo mbobalela, Jesu walo wakabafwida bantu boonse.—Mt. 20:28.

Wakapegwa Nguzu Zyakubelesya Cinunuzyo

11. Ino ncinzi ncotukonzya kubeda alusyomo muli Jesu mbwali Mufwutuli wesu?

¹¹ Eelo kaka cileelela kuti Jesu ngu Mupaizi Mupati uuyelede kubelesya cinunuzyo cacipaizyo cakwe kulindiswe! Masimpe ngakuti, naakali kubeleka mulimo wakwe anyika, Jesu Munununi wesu wakatondezya ncayakucita ambotuya kukkomana kuti naa twazumanana kusyomeka ciindi nayakulela mu Myaka Iili Cuulu. Wakaponya baciswa abalemene, wakabusya bafwide, wakasanina makamu-makamu alimwi wakaimika guwo alwizi. (Mt. 8:26; 14:14-21; Lk. 7:14, 15) Nokuba boobo, tanaakali kucita zyintu eezyi akaambo kakuti wakalaanguzu, pele akaambo kakuti wakali aalubomba aluyando. Wakaambila sicinsenda kuti “Ndilayanda” naakamulomba kuti amuponye. (Mk. 1:40, 41) Jesu uyakucita mbubwenya oobu munyika yoonse anakulela mu Myaka Iili Cuulu.

12. Ino Isaya 11:9 iyakuzuzikizigwa buti?

¹² Kristo abaabo mbaya kulela limwi abalo bayakuzumanana kuyiisya bantu kuti bamuzyibe Leza, mulimo ooyo walo wakatalikwa a Jesu myaka iili 2,000 yainda. Aboobo, majwi aali ku Isaya 11:9 ayakuzuzikizigwa aakuti: “Nyika iyoozula luzibo lwa-Jehova mbubonya mbuli maanzi mbwaazuzya lwizi.” Malailile aazwa kuli Leza ayakubikkilizya mbotuna kwiibamba nyika ambotuna kulanganya zilenge zitabaliki mbubwenya Adamu mbwakaambidwe kucita. Yaakwiinda myaka iili cuulu, kuyanda kwa Leza kulembedwe ku Matalikilo 1:28 kuya kuzuzikizyigwa alimwi cinunuzyo ciya kubeleka mboceelede.

Wakapegwa Nguzu Zyakubeteka

13. Ino Jesu wakatondezya buti kuti ulabuyanda bululami?

¹³ Kristo “ngonguwe wakasalwa a Leza kuti  abe mubetesi wabaumi abafwide.” (Mil. 10:42) Eelo kaka cilakulwaizya kuzyiba kuti Jesu takonzyi kuyungwa, mululami alimwi lusyomo lwakwe luyooba lutambo, luyooba mbuli lutambo ndwalyaanzya mucikungu! (Is. 11:5) Wakatondezya kuti tanakali kubayanda balyato, basikuupa-upa ameso abantu bacita zibi alimwi tanaakali kubayanda aabo bakali kupenzya bantu bapengede. (Mt. 23:1-8, 25-28; Mk. 3:5) Nokuba boobo, Jesu wakatondezya kuti tanaakali kukonzya kweenwa, “nkaambo walo mwini wakalizyi cakali mumuntu.”—Joh. 2:25.

14. Ino munzila nzi Jesu mwatondezya kuti ulabuyanda bululami alubeta lucitwa kabotu lino, alimwi mibuzyo nzi njotukonzya kulibuzya?

¹⁴ Jesu wazumanana kutondezya mbwabuyanda bululami alubeta lucitwa kabotu kwiinda mukweendelezya mulimo mupati wakukambauka awakuyiisya uucitwa nyika yoonse. Kunyina muntu naa mfwulumende yamuntu naa muuya mubi uukonzya kulesya mulimo wa Leza kuti ucitwe munzila iili kabotu. Aboobo tulakonzya kusyoma kuti yakwiinda Harmagedoni, bululami bwa Leza bunakuli bwacitwa. (Amubale Isaya 11:4; Matayo 16:27.) Amulibuzye kuti: ‘Sena andime ndibabona mbwakali kubabona Jesu bantu mumulimo wakwe? Sena ndilamubelekela Jehova kusikila mpondikonzya nokuba kuti ndilaciswa naa kuli zimwi zindikatazya?’

15. Ino ncinzi cikonzya kutugwasya kumubelekela Leza camoyo woonse?

¹⁵ Tuyakugwasyigwa kumubelekela Leza camoyo yoonse kuti twazyiba kuti mulimo wakukambauka mulimo wakwe. Nguwakautalisya, ubelesya Mwanaakwe kuti mulimo ooyu ucitwe alimwi kwiinda mumuuya uusalala ulabapa nguzu aabo baucita. Sena mulaukkomanina mulimo wakubeleka aa Leza antoomwe a Mwanaakwe uusololelwa amuuya? Kunyina uumbi kunze lya Jehova uukonzya kupa kuti bali 7 milyoni, balo babonwa kuti ‘tabayiide kapati alimwi mbantu buyo,’ kuti batole lubazu mukumwaya mulumbe wa Bwami kubantu bali muzisi zili 236.—Mil. 4:13.

Kwiinda Muli Kristo Mulalongezyegwa

16. Ino bbuku lya Matalikilo 22:18 lyaamba nzi kujatikizya zilongezyo zya Leza?

¹⁶ Jehova wakaambila Abrahamu kuti: “Mulunyungu lwako zisi zyoonse zyaansi moziyoojana coolwe, nkaambo kakuti waswiilila ijwi lyangu.” (Matl. 22:18) Eeci citondezya kuti aabo bacibona kuti ncoolwe kubelekela Leza a Mwanaakwe balakonzya kulangila zilongezyo zizwa ku Lunyungu lwabu Mesiya. Akaambo kaceeci mazuba aano bajisi bubi kubelekela Leza.

17, 18. Ino ncisyomezyo nzi ncaakatusyomezya Jehova ncotubala kuli Deuteronomo 28:2, alimwi ino caamba nzi kuli ndiswe?

¹⁷ Leza wakaambila bana ba Abrahamu, bana Israyeli kuti: “Zyoolwe ezi zyoonse zilamusikila [mbuli mbukulembedwe mumulawo wa cizuminano], zilaba zyanu, na mwaswiilila ijwi lya-Jehova Leza wanu.” (Dt. 28:2) Eeci cilakonzya kubacitikila babelesi ba Leza mazuba aano. Kuti kamuyanda kuti Jehova amulongezye, ‘kamuzumanana kuswiilila’ jwi lyakwe. Kwamana zilongezyo zyakwe “zilaba zyanu.” Ino ‘kuswiilila’ kubikilizya nzi?

¹⁸ Kuswiilila caamba kubikkila maano kuli nzyolyaamba Jwi lya Leza acakulya cakumuuya ncatupa. (Mt. 24:45) Alimwi caamba kuvwida Leza a Mwanaakwe. Jesu wakati: “Boonse bandaambila kuti, Mwami, mwami,  teensi mbabo bayoonjila mu-Bwami bwakujulu, ngooyo uucita luyando lwa-Taata uuli kujulu.” (Mt. 7:21) Alimwi kumuswiilila Leza caamba kutobela malailile ngaakabikka mubungano ya Banakristo yeendelezyegwa abaalu bakasalwa ‘izipego kubantu.’—Ef. 4:8.

19. Ino mbuti mbotukonzya kuba aakati kabaabo balongezyegwa?

¹⁹ Akati ‘kazipego kubantu’ mba Kabunga Keendelezya, balo baiminina mbungano zya Banakristo. (Mil. 15:2, 6) Masimpe ngakuti, mbotubabona banyina Kristo bakumuuya ciyakutondezya mbotuya kubetekwa ciindi mapenzi mapati aakusika. (Mt. 25:34-40) Aboobo, nzila yomwe mbotukonzya kulongezyegwa nkwiinda mukugwasya baabo bananike ba Leza.

20. (a) Ino “zipego kubantu” mulimo nzi mupati ngobajisi? (b) Ino mbuti mbotukonzya kutondezya kuti tulabalumba bakwesu aaba?

²⁰ “Zipego kubantu” alimwi zibikkilizya Kkomiti ya Mutabi, balangizi beendeenda abaalu bamumbungano—aaba boonse bakasalwa amuuya uusalala. (Mil. 20:28) Mulimo wabakwesu aaba ngwakugwasya bantu ba Leza “kusikila . . . tukakamantane mulusyomo amuluzyibo lwini-lwini lwa Mwana wa Leza, tukabe bantu bapati, tukasike aciimo cizulide ica Kilisito.” (Ef. 4:13) Mbwenya mbuli ndiswe, abalo tabalondokede. Nokuba boobo, tulalongezyegwa kuti naa twazitobela nzyobatwaambila.—Heb. 13:7, 17.

21. Ino nkaambo nzi ncotuyandika ino kumumvwida Mwanaa Leza?

²¹ Ino-ino, Kristo uyakubunyonyona bweende bubyaabi bwa Saatani. Eeco caakucitika, ciyakuya buyo mbwaya kutubeteka Jesu nkaambo nguwakapegwa nguzu a Leza kuti asololele “nkamu mpati” “kutusensa twamaanzi aabuumi.” (Ciy. 7:9, 16, 17) Aboobo, tuyandika kutobela cakuliyandila kumalailile ngatupa Mwami wakasololelwa amuuya wa Jehova.

Ino Ncinzi Ncomwaiya ku . . .

• Isaya 11:1-5?

• Maako 1:40, 41?

• Milimo 10:42?

• Matalikilo 22:18?

[Mibuzyo yaciiyo]

[Cifwanikiso icili apeeji 17]

Luzyalo lwa Jesu lwakalibonya nakabusya mwana a Jairo musimbi

[Zifwanikiso izili apeeji 18]

Jesu Kristo nguulanganya mulimo mupati wabukambausi uucitwa kuzwa kaindi