Mibuzyo Yabasikubala

Kulugwalo lwa Matalikilo 6:3 tubala kuti: “Muuya wangu tuukooyookazyanya lyoonse amuntu pe, nkaambo ninyama buyo. Mazuba aakwe ayooba myaka iili mwaanda amakumi obile.” Sena Jehova wakabikka myaka yabantu kuti ibe 120, alimwi sena Nowa wakakambauka kujatikizya zambangulwe kwamyaka iili 120?

Bwiinguzi kumibuzyo yoonse yobilo mbwakuti peepe.

Zambangulwe kaitanatalika, bantu banji bakapona myaka minji. Nowa wakali amyaka iili 600 niyakatalika Zambangulwe, amane wakafwa kali amyaka iili 950. (Matl. 7:6; 9:29) Bamwi ibakazyalwa niyakainda Zambangulwe abalo bakapona myaka iinda ku 120—Arifakisadi wakafwa kajisi myaka iili 438 alimwi Sela wakafwa kajisi myaka iili 433. (Matl. 11:10-15) Pele kuciindi ca Musa, myaka yakupona kwabantu yakaceya kusika ku 70 a 80. (Int. 90:10) Aboobo, ibbuku lya Matalikilo 6:3 Leza tanaakaamba kuti bantu banakupona buyo myaka iili 120.

Mpoonya, sena kapango aaka kaamba kuti Leza wakali kwaambila Nowa kuti acenjezye bantu kujatikizya Zambangulwe yakali kuboola mumyaka iili 120 kumbele? Peepe. Ziindi zili mbozibede, Leza wakabandika a Nowa. Mukapango 13 tubala kuti: “Leza wakaambila Nowa kuti, Ndakanza kumanisya bantu boonse, nkaambo nyika ilizwide luuni.” Myaka yakatobela, Nowa wakamanizya mulimo mupati wakupanga bwato alimwi aciindi eeci lugwalo lwaamba kuti: “Jehova wakaambila Nowa kuti, Njila mubwaato, webo abeŋanda bako boonse.”  (Matl. 6:13; 7:1) Alimwi kuli ziindi zimbi Jehova naakambila Nowa twaambo tumwi.—Matl. 8:15; 9:1, 8, 17.

Nokuba boobo, cilembedwe ku Matalikilo 6:3 ciliindene; tacaambi kuti Nowa a Leza bakali kubandika. Eeci cilakonzya kulimvwisya mbuli kuti caamba kuyanda kwa Leza. (Amweezyanisye Matalikilo 8:21.) Cilayandika kuzyiba kuti, cakacitika kaindi katanalengwa Adamu, tujana twaambo mbuli twakuti: “Leza wakaamba kuti.” (Matl. 1:6, 9, 14, 20, 24) Jehova tanakali kwaambaula a muntu anyika aano akaambo kakuti tanaakaninga lenga muntu uuli woonse.

Aboobo, ncamaano kuzyiba kuti Matalikilo 6:3 yaamba kuti Leza uyakwaamana mapenzi aali anyika. Jehova wakaambila Nowa kuti acite oobo mu myaka iili 120, nokuba kuti walo tanakalizyi. Ino nkaambo nzi ncaakabikkila ciindi? Ino ncinzi ncalindila?

Mwaapostolo Petro waamba kaambo kakuti: “Leza naakali kulindila cakukkazyika moyo kumazuba aa Nowa, ibwato nobwakali kupangwa, oomo bantu basyoonto buyo, nkokuti bantu bali lusele mobakafwutulwa kumaanzi.” (1 Pe. 3:20) Leza nakaamba kujatikizya myaka iili 120, kuli zyintu zimwi zyatakaninga citwa. Nikwakainda myaka iili 20, Nowa abakaintu bakwe bakatalika kuba abana. (Matl. 5:32; 7:6) Bana babo botatwe bakakomena akukwata, kuyungizya mukwasyi wabo kuti babe “lusele.” Kumane bakeelede kuyaka bwato, eeci tiicatakali cuuba-uba akaambo kakukomena kwa bwato alimwi akuti mukwasyi wa Nowa wakali musyoonto. Masimpe, kukkazika moyo kwa Leza kwa myaka iili 120 cakapa kuti eezyo zyintu zizuzikizigwe aakuti ‘bantu bali lusele bafwutulwe kumaanzi.’

Bbaibbele talitwaambili mwaka Jehova ngwakaambila Nowa kuti Zambangulwe liya kucitika. Kuzwa ciindi bana bakwe nibakazyalwa akukomena akukwata, kuboneka kuti myaka iili 40 naa 50 yakainda kaitanacitika Zambangulwe. Kumane Jehova wakaambila Nowa kuti: “Ndakanza kumanisya bantu boonse.” Wakayungizya kuti Nowa wakeelede kuyaka bwato bupati akuti walo amukwasyi wakwe banjile. (Matl. 6:13-18) Mumyaka yakaceede, Nowa wakatondezya citondezyo cibotu cakuba mululami nakali kupona. Wakabeleka kali “imukambausi wabululami” wakajisi mulumbe wakucenjezya—Leza wakali kanzide kunyoonyoona baabo batakali kumutobela. Nowa tanakazyiba kakucili ciindi kuti kunyoonyoona ooku kuyakuba lili, pele wakalizyi kuti kuyakucitika ncobeni. Alimwi mulizyi kuti cakacitika ncobeni.—2 Pe. 2:5.