Twiimbile Jehova
Twiimbile Jehova
“Njootembaula Jehova mubuumi bwangu boonse.”—INT. 146:2.
1. Ino ncinzi cakamukulwaizya Davida naakacili mwana kulemba nyimbo zimwi zyamu intembauzyo?
NAAKACILI mwana Davida wakali kweembela mbelele zya bausyi mumyuunda munsi a Betelehemu. Naakali kweembela mbelele, Davida wakali kubona milimo ya Jehova muzilenge zyakwe: zyakujulu, “banyama bamusokwe” alimwi “abayuni bakujulu.” Nzyaakabona zyakamujatikizya kapati cakuti cakamupa kwiimba lwiimbo lwakutembaula yooyo Wakazilenga zyintu zibotu. Ziimbo zinji nzyaakalemba zilajanika mubbuku lya Intembauzyo. *—Amubale Intembauzyo 8:3, 4, 7-9.
2. (a) Ino nyimbo inga zyamujatikizya buti muntu? Amupe cikozyanyo. (b) Ino ncinzi ncotukonzya kwiiya kucilongwe ncobakajisi Davida a Jehova notubala Intembauzyo 34:7, 8 a Intembauzyo 139:2-8?
2 Kuboneka kuti nceciindi ncimunya eeci Davida nakacizyiba kwiimba kabotu. Wakacizyiba kapati kwiimba cakuti wakatambwa kuti akakumulizile kantimbwa Mwami Saulo. (Tus. 22:29) Inyimbo zya Davida zyakamukazika moyo mwami wakapengede mbubwenya mbuli nyimbo ziimbwa mazuba aano mbozibakkomanisya bantu. Lyoonse Davida naakali kwiimba ‘Saulo wakali kutontozegwa mumoyo wakwe alimwi wakali kulimvwa kabotu.’ (1 Sam. 16:23) Nyimbo zyamwiimbi amulembi ooyu wakali kuyoowa Leza zyicibelesyegwa asunu. Kamuciyeeyela buyo eeco! Sunu kwainda myaka iinda ku 3,000 kuzwa ciindi Davida naakazyalwa, mamilyoni abantu basiyene-siyene munyika yoonse balazyibala intembauzyo zya Davida kutegwa bagwasigwe akuba aabulangizi.—2 Mak. 7:6; amubale Intembauzyo 34:7, 8; 139:2-8; Am. 6:5.
Mboziyandika Nyimbo Mubukombi Bwakasimpe
3, 4. Ino mbubambe nzi bwakabikkwa kutegwa nyimbo zisetekene ziimbwe mumazuba aa Davida?
3 Davida wakalicizyi kwiimba cakuti wakabelesya nyimbo eezyi kutembaula Jehova. Davida naakaba mwami wa Israyeli wakabikka bubambe bwakuti kakuli baimbi baimba kabotu mutempele. Akati kaba Levi bali 4,000 bakapedwe mulimo ‘wakutembaula,’ ibali 288 ‘bakaisyigwa kwiimbila Jehova.’—1 Mak. 23:3, 5; 25:7, BT.
4 Davida nguwakalemba nyimbo zinji nzyobakali kwiimba bana Levi. Bana Israyeli boonse ibakajisi coolwe cakujanika nyimbo zya Davida nozyakali kwiimbwa bakakulwaizyigwa kapati. Nilyakaletwa bbokesi lyacizuminano ku Jerusalemu, “Davida wakalailila basilutwe baba-Levi kuti babike bamwi bakwabo kuti babe basikwiimba abasikulizya zibulo zyakwiimya, nyeele atuntimbwa azigweele, akusekelela loko.”—1 Mak. 15:16.
5, 6. (a) Ino nkaambo nzi nyimbo ncizyakali kubikkilwa maano Davida naakali kulela? (b) Ino mbuti mbotuzyiba kuti nyimbo zyakali kuyandika kapati mubukombi bwabana Israyeli bansiku?
5 Ino nkaambo nzi ncotuzibikkila maano nyimbo zyakaimbwa ciindi Davida naakali kupona? Sena nkaambo kakuti mwami wakali mwiimbi? Peepe, kwakali kaambo kambi kakalibonya naakatalisya milimo yamu tempele alimwi Mwami Hezekiya uululeme nikwakainda myaanda ya myaka minji. Kubbuku lya 2 Makani 29:25 tubala kuti: “Ba-Levi bakaima muŋanda ya-Jehova, bakali amyeembo atuntimbwa anyeele mbubonya mbubakalailila Davida a-Gadi sicilengano wamwami a-Natani musinsimi, nkaambo oyu mulao wakazwa kuli-Jehova kumilomo yabasinsimi bakwe.”
6 Masimpe, kwiinda mubasinsimi Jehova wakaambila bantu bamukomba kuti kabamutembaula munyimbo. Baimbi bakazwa kumusyobo wabapaizi tiibakali kucita milimo iimwi njibakali kucita bamwi kutegwa babikkile maano kukulemba akulibambila kwiimba.—1 Mak. 9:33.
7, 8. Caboola kukwiimba nyimbo zya Bwami, ino ncinzi ciyandika kapati kunze lya kucizyiba kwiimba?
7 Mulakonzya kwaamba kuti, “Caboola kukwiimba, tandikonzyi kubalilwa kubantu bakacizyi kwiimba kutempele.” Pele tabali boonse bana Levi bakali kwiimba ibakali baimbi babotu. Kweelana abbuku lya 1 Makani 25:8 kwakali ‘abakali kwiiya.’ Ncotweelede kuzyiba ncakuti, kwakali abamwi ibakacizyi kwiimba akati kamisyobo ya Banaisrayeli, pele Jehova wakapa buyo mulimo ooyo kubana Levi. Ncotukonzya kuba masimpe ncakuti, nokuba kuti kwakali bakacizyi kwiimba naa bakali kwiiya, boonse bana Levi basyomeka bakali kuubikkila maano mulimo ngubakapedwe.
8 Davida wakali kuziyanda nyimbo alimwi wakali mwiimbi mubotu. Sena nkwiimba kolikke nkwayanda Leza? Ku Bakolose 3:23, kulembedwe kuti: “Kufwumbwa ncomucita, amucicite camoyo woonse mbuli kuti mubelekela Jehova, ikutali bantu pe.” Kaambo kalasalala: Ciyandika kapati nkwiimba camoyo woonse notutembaula Jehova.
Mbozibeleka Nyimbo Mazuba Aano
9. Amwaambe ncimwakali kukonzya kubona akumvwa nimwakajanika nilyakali kwaabwa tempele ciindi Solomoni naakali kulela.
9 Ciinda naakali kulela Solomoni, inyimbo zyakali kubelesyegwa kapati mubukombi bwakasimpe. Itempele nilyakali kwaabwa kwakali zibelesyo zinji zyakali kubelesyegwa mukwiimba, akati kazyeezyo kwakali myeembo iili 120. (Amubale 2 Makani 5:12.) Ibbaibbele litwaambila kuti, “basimyeembo abasikwiimba kabeelede kuteleezya majwi aabo mbuli ijwi lyomwe kukutembaula akulumba Jehova, . . . nkaambo mubotu, luse lwakwe talweeli.” Nibakamana kwiimba, “iŋanda, nkukuti iŋanda ya-Jehova, yakazula ikumbi” kutondezya kuti Jehova wautambula mupailo. Eelo kaka cakali kunonezya kuswiilila myeembo kaisangana kabotu amyanda-myanda yabaimbi!—2 Makani 5:13.
10, 11. Ino ncinzi citondezya kuti Banakristo bakusaanguna bakali kwiimba mubukombi bwabo?
10 Abalo Banakristo bakutaanguna bakali kuzibelesya nyimbo nibakali kukomba. Bakombi bamumwaanda wamyaka wakusaanguna tiibakali kukombela mutempele pe, pele bakali kuswaanganina mumaanda aabantu. Akaambo kakupenzyegwa alimwi azyintu zimwi zyakali kucitika, tibakali kukonzya kwiimba mbobeelede. Nokuba boobo, Banakristo aaba bakali kumutembaula Leza munyimbo.
11 Mwaapostolo Paulo wakaambila Banakristonyina baku Kolose kuti: “Amuzumanane akukulwaizyanya antembauzyo, nyimbo zyakulumba Leza, nyimbo zyakumuuya ziimbwa cakukondwa.” (Kol. 3:16) Ba Paulo a Sila nibakaangwa bakatalika “kupaila akutembaula Leza munyimbo” nokuba kuti tiibakajisi bbuku lyanyimbo. (Mil. 16:25) Ikuti naa mwaangwa, ino zili zyongaye nyimbo zya Bwami nzyomukonzya kwiimba kakunyina bbuku lyanyimbo?
12. Ino mbuti mbotukonzya kutondezya kuti tulazyibikkila maano zyiimbo zya Bwami?
12 Mbwaanga nyimbo zilayandika kapati mubukombi bwesu, tulakonzya kulibuzya kuti: Sena ndilazyibikkila maano? Sena ndilafwaambana kusika kumiswaangano kumbungano akumiswaangano mipati kutegwa twiimbile antoomwe abakwesu abacizyi mulwiimbo lwakutaanguna alimwi sena ndilaimba kuzwa ansi amoyo? Sena ndikulwaizya bana bangu kubona mbuli kuti lwiimbo lwiimbwa akati ka Cikolo Camulimo Weendelezyegwa a Leza amuswaangano wa Mulimo naa akati kamakani abuleya a Ngazi Yamulindizi kuti nceciindi cakulyookezya, kuzwa aawo mpobakkede naa kuunka anze kukulyoolola maulu?’ Kwiimba ncibeela cabukombi bwesu. Inzya, nokuba kuti naa tulicizyi kwiimba naa twiiya buya, toonse tweelede mukutembaula Jehova notwiimba.—Amweezyanisye 2 Bakolinto 8:12.
Mbociya Buya Ciindi Anzyotuyanda Zilacinca
13, 14. Ino cinzi ncociyandika kwiimba camoyo woonse ciindi camiswaangano yambungano? Amupandulule.
13 Kwainda myaka iinda ku 100 kuzwa ciindi ngazi ya Zion’s Watch Tower niyakapandulula kaambo ncoziyandikila kapati nyimbo zya Bwami. Yakaamba kuti: “Ikwiimba makani aakasimpe nenzila mbotu iikonzya kugwasya kuti twaambo tubanjile mumyoyo bantu ba Leza.” Nyimbo zyesu zizwa mumagwalo, aboobo kwaaiya mabala aali munyimbo nenzila mbotu yakuziba magwalo kuzwa ansi amoyo. Kanji-kanji beenzu baboola ciindi cakusaanguna kumiswaangano balakulwaizigwa anyimbo ziimbwa mumbungano.
14 Buzuba bumwi mu 1869, C. T. Russell naakali kuunka kuŋanda naakakotoka, wakamvwa bakali kwiimba kuzwa muŋanda iimwi. Eeci ciindi wakazyi kuti takakajani kasimpe ka Leza. Aboobo wakayeeya buyo kuti atalike kucita makwebo kutegwa ajane mali akuti kagwasya bantu nokuba kuti takonzyi kubagwasya kuzyiba kasimpe ka Leza. Mukwesu Russell wakanjila muŋanda eeyi nokuba kuti tiiyakali kuboneka kabotu alimwi wakajana miswaangano yatalika kale. Wakakkala kuswiilila. Amane wakalemba ncaakamvwa buzuba oobo masiku kuti “zyakali kulimvwisya alimwi malailile aazwa kuli Leza akandipa kuyuma kumuuya alimwi.” Kamuyeeya kuti cakapa kuti Mukwesu Russell aunke kumuswaangano ciindi cakutaanguna zyakali nyimbo.
15. Ino ntwaambo nzi twakacincwa mubbuku lya nyimbo?
15 Mbociyaabuya ciindi, kuli kucinca kuliko mbotwaamvwa magwalo. Bbuku lya Tusimpi 4:18 lyaamba kuti: “Inzila yabaluleme ili mbuli mumuni uumweka, Uuya bungwengwemuka mane bwaca buzuba.” Mumuni mbuyabumunikisya, eeci cipa kuti kube kucinca munyimbo zya kasimpe nzyotwiimba. Kwamyaka iili 25, Bakamboni ba Jehova mumasi manji babelesya bbuku liitwa kuti Amwiimbile Jehova Ntembauzyo. * Kuzwa nilyakamwaigwa bbuku eeli imumuni wali kuya bumweka muzyintu zinji alimwi majwi amwi aakabelesyegwa mubbuku eeli taacibeleki. Mucikozyanyo, tatulibelesyi bbala lyakuti “bweende bupya” pele tubelesya lyakuti “nyika mpya.” Alimwi twaamba kuti izyina lya Jehova “liyoolemekwa,” ikutali “kusinizyigwa.” Aaka kaambo alimwi atwaambo tumwi ntotwapa kuti kucitwe mulimo wakubamba bbuku lipya lyanyimbo. Mucikozyanyo, twakaleka kubelesya mabala aakuti “bweende bupya” pele tubelesya mabala aakuti “nyika mpya.” Alimwi ino twaamba kuti izyina lya Jehova “lilemekwe” kuleka “kusumpulwa.”
16. Ino bbuku lyesu lya nyimbo zipya liyakutugwasya buti kutobela malailile aa Paulo ajanika ku Baefeso 5:19?
16 Akaambo katwaambo ootu, Bakabunga Keendelezya bakazumizya kuti kusimbwe bbuku lipya lya nyimbo lya kuti Amumwiimbile Jehova. Inyimbo mubbuku lyesu lipya zyacesegwa kusika ku 135. Akaambo kakuti inyimbo zyakwiiya zyaceya, tulakonzya kwaaziba mabala amunyimbo zipya. Eeci cileendelana alulayo lwa Paulo lulembedwe kuli Baefeso 5:19.—Amubale.
Amutondezye Kuti Mulalumba
17. Ino ncinzi cikonzya kutugwasya kutafwa nsoni caboola kukwiimba?
17 Sena kuyoowa kusampuka inga kwatulesya kwiimba kumiswaangano ya Bunakristo? Amucibone munzila eeyi: Casika kukwaambaula, sena tacili camasimpe kuti “toonse tulalubizya ziindi zinji”? (Jak. 3:2) Pele eeci taceelede kutulesya kutembaula Jehova kuŋanda aŋanda. Aboobo, sena kutaimba kabotu kulakonzya kutulesya kutembaula Leza munyimbo? Jehova “wakalenga mulomo wamuntu” ulakkomana namvwa majwi eesu notumutembaula.—Kul. 4:11.
18. Amwaambe mbotukonzya kwiiya mabala aali munyimbo.
18 Ma CD aakuti Amumwiimbile Jehova—Zyamajwi alajanika mumyaambo minji. Malimba amajwi aali munyimbo zipya aalendelana kabotu. Kuteelela kunyimbo cilakkomanisya kapati. Kamuziswiilila lyoonse nkaambo mwacita oobu muyakwaaziba mabala aali munyimbo eezi zipya. Mabala aali munyimbo akalembwa munzila mbotu yakuti mwaimba mumuzila wakusaanguna, mulakonzya kuziba citobela. Aboobo, nomulizya ma CD, mulakonzya kuccililizya. Mwaakwaazyiba mabala alimwi ambozilila nyimbo, masimpe muyakwiimba cakutayoowa ku Ŋanda ya Bwami.
19. Ino ncinzi cicitika nobalibambila kwiimba nyimbo zya Bwami?
19 Tulakonzya kuti katutazibikkili maano nozilila nyimbo kumiswaangano yesu yaalubazu, yabbazu, alimwi ayacooko. Kuli milimo minji nokulibambilwa. Zyasala nyimbo, zilalembwa kabotu-kabotu kutegwa baimbi baku Watchtower bali 64 bazyimbe antoomwe amalimba. Baimbi aaba balazyinduluka-induluka ziimbo kwaciindi cilamfu kutegwa bakalekoode mu Patterson ku New York. Bakwesu abacizyi bali kkumi tabakkali mu United States. Boonse bacibona kuti ncoolwe cakwiimba nyimbo zibelesyegwa mumulimo weendelezyegwa a Leza. Tulabalumba bakwesu abacizi aaba babeleka canguzu. Basicuuno kumiswaangano mipati batwaambila kukkala tweelede kukkala kutegwa tuswiilile nyimbo nzyibakatubambilwa.
20. Ino ncinzi ncomukanzide kuzumanana kucita?
20 Jehova ulaswiilila notumutembaula munyimbo. Zilayandika kapati kulinguwe. Atumukkomanisye kwiinda mukumwiimbila camoyo woonse notumukomba kumiswaangano. Masimpe ngakuti, nokuba kuti tulicizyi naa tatucizyi, “atumwiimbile Jehova.”—Int. 104:33.
Bupanduluzi buyungizidwe
^ munc. 1 Cigambya ncakuti, myaanda yamyaka iili kkumi kafwide Davida, ibangelo bakaambilizya kuzyalwa kwa Mesiya kubeembezi bambelele bakali kweembela mbelele zyabo mumyuunda munsi a Betelehemu.—Lk. 2:4, 8, 13, 14.
^ munc. 15 Inyimbo zyoonse izili 225 zilajanika mumyaambo iinda ku 100.
Ino Muyeeya Buti?
• Ino nzikozyanyo nzi zyakaindi zitondezya kuti kwiimba kwakali kuyandika kapati mubukombi bwesu?
• Ino nkweendelana nzi kuliko akati kakutobela mulawo wa Jesu uulembedwe kuli Matayo 22:37 akwiimba nyimbo zya Bwami camoyo woonse?
• Ino ninzila nzi zimwi nzyotukonzya kutondezya kuti tulaziyanda ziimbo zya Bwami?
[Mibuzyo yaciiyo]
[Cifwanikiso icili apeeji 23]
Sena mulaakubaambila bana banu kuti batani kuzwi anze ciindi nyimbo noyiimbwa?
[Cifwanikiso icili apeeji 24]
Sena mulaakuzyiiya nyimbo zipya kuŋanda?